Wala Shihilɛ He Sane

Minine Shɛ ‘Nii Ni Mitsui Taoɔ Lɛ’ Nɔ

TAAKƐ DOMINIQUE MORGOU GBA

Yɛ naagbee lɛ, mibashɛ Afrika yɛ December afi 1998! Nɔ ko ni mísusu he aahu kɛjɛ migbekɛbiiashi lɛ eba mli agbɛnɛ. Afrika shikpɔji ni kamɔ shi kplanaa kɛ koo mli kooloi ni haa mɔ náa miishɛɛ lɛ ahe sane ni bayiɔ mijwɛŋmɔ mli lɛ haa mimli filiɔ mi be fɛɛ be. Amrɔ nɛɛ miyɛ jɛmɛ diɛŋtsɛ! Yɛ nakai beaŋ nɔŋŋ lɛ, nɔ kroko hu ni kã mitsui nɔ lɛ eba mli anɔkwale. Miisɔmɔ akɛ be-fɛɛ sanekpakpa shiɛlɔ yɛ maŋsɛɛ. Ekolɛ mɛi babaoo yɛ ni baasusu akɛ enɛ ehiŋ feemɔ. Mihiŋmɛi enaaa nii jogbaŋŋ, ni gbee ni tsɔɔ shwilafo gbɛ ní atsɔse lɛ kɛha Europa maŋtiasei amli gbɛjegbɛi lɛ anɔ nyiɛmɔ lɛ ji nɔ ni yeɔ ebuaa mi kɛha Afrika akrowai amli gbɛjegbɛi ni shia fa yɛ nɔ lɛ anɔ nyiɛmɔ. Ha magba bo bɔ ni fee ni minyɛ misɔmɔ yɛ Afrika kɛ bɔ ni Yehowa ha mi ‘nii ni mitsui taoɔ lɛ.’—Lala 37:4.

A FƆ́ mi yɛ June 9, afi 1966 yɛ France wuoyigbɛ. Miji gbekɛ kwraa yɛ bii kpawo—hii enyɔ kɛ yei enumɔ—lɛ ateŋ, ni fɔlɔi ni yɔɔ suɔmɔ ji mɛi ni kwɛ wɔ fɛɛ. Shi kɛlɛ, mikɛ awerɛho shihilɛ ko kpe beni miji oblayoo lɛ. Taakɛ minaa, minyɛ kɛ minyɛmimɛi yei lɛ ateŋ mɔ kome ji lɛ, miye weku mli hela ko ni baaha mihiŋmɛi ashwila kwraa yɛ sɛɛ mli.

Ákɛ oblayoo fioo lɛ, sui ni mɛi jieɔ lɛ kpo amɛtsɔɔ mi ji hewolo nɔ su mlijiemɔ, hetsɛ̃ kɛ osatofeemɔ, ni enɛ haa miteɔ shi miwoɔ maŋbii. Be ní mli wa nɛɛ mli wɔfã kɛtee Hérault kpokpaa lɛ nɔ. Naakpɛɛ nɔ ko ba yɛ jɛmɛ.

Hɔgbaa leebi ko lɛ, Yehowa Odasefoi lɛ ateŋ mɛi enyɔ ba wɔshinaa lɛ naa. Minyɛ le amɛ ni eha amɛba mli. Yei lɛ ateŋ mɔ kome bi Awo kɛji  akɛ ekaiɔ shi ni ewo be ko akɛ ebaaha akɛ lɛ abafee Biblia mli nikasemɔ wɔsɛɛ ko lɛ lo. Awo kai ni ebi akɛ, “Mɛɛ be wɔbaaje shishi?” Amɛkpɛlɛ koni amɛkpe daa Hɔgbaa leebi, ni kɛtsɔ enɛ nɔ lɛ, minyɛ bɔi “sanekpakpa lɛ anɔkwale lɛ” kasemɔ.—Galatabii 2:14.

Miná Nilee

Awo mia ehiɛ waa koni enu nɔ ni ekase lɛ shishi ní ekai. Akɛni eshwila hewɔ lɛ, ehe bahia ni ekase nɔ fɛɛ nɔ ewo eyitsoŋ. Odasefoi lɛ to amɛtsui shi amɛha lɛ waa diɛŋtsɛ. Be fɛɛ be ni Odasefoi lɛ aaaba lɛ, miyateeɔ yɛ mitsu lɛ mli aahu kɛyashi beni amɛyaa. Shi kɛlɛ, gbi ko shwane lɛ, Eugénie ni eji Odasefoi lɛ ateŋ mɔ kome lɛ, kɛ mi kpe ni ekɛ mi gba sane. Ekɛɛ mi akɛ, Nyɔŋmɔ Maŋtsɛyeli lɛ kɛ osatofeemɔ, nyɛ̃ɛ kɛ hetsɛ̃ ni yaa nɔ yɛ je lɛŋ lɛ baaba naagbee. Ekɛɛ akɛ: “Nyɔŋmɔ pɛ yɔɔ enɛ naa tsabaa.” Ani miisumɔ ni male babaoo? Enɔjetsɛremɔ lɛ, akɛ mi je Biblia mli nikasemɔ shishi.

Nɔ fɛɛ nɔ ni mikaseɔ lɛ ji nɔ hee kɛha mi. Kpaako minuɔ shishi akɛ Nyɔŋmɔ miiŋmɛ efɔŋ gbɛ kɛyashi be ko yɛ shikpɔŋ nɔ yɛ yiŋtoi kpakpai ahewɔ. (1 Mose 3:15; Yohane 3:16; Romabii 9:17) Mitee nɔ mikase akɛ Yehowa shĩii wɔ efolo ní wɔbɛ hiɛnɔkamɔ. Ekɛ naanɔ wala yɛ paradeiso shikpɔŋ nɔ he shiwoo ni yɔɔ miishɛɛ lɛ eha wɔ. (Lala 37:29; 96:11, 12; Yesaia 35:1, 2; 45:18) Mihiŋmɛi ni Nyɔŋmɔ kɛduro mi lɛ baana nii ekoŋŋ yɛ nakai Paradeiso lɛ mli, ejaakɛ bɔ ni minaa nii mihaa lɛ miiba shi fiofio.—Yesaia 35:5.

Mikɛ Mihe Wo Be-Fɛɛ Sɔɔmɔ lɛ Mli

Mikɛ nu mli baptisimɔ fee mihenɔjɔɔmɔ kɛha Yehowa lɛ he okadi yɛ December 12, afi 1985, ni mibafata minyɛmi yoo Marie-Claire ni kɛ ehe ewo nitsumɔ nɛɛ mli momo lɛ he. Etsɛɛɛ ni minyɛmi nuu Jean-Pierre kɛ minyɛ awo hu fee nakai nɔŋŋ.

Daa gbɛgbalɔi, loo be-fɛɛ sanekpakpa jajelɔi babaoo yɛ asafo ni mikɛbɔ lɛ mli. Miishɛɛ kɛ ekãa ni amɛyɔɔ kɛha sɔɔmɔ nitsumɔ lɛ wo mi hewalɛ. Marie-Claire ni miiye hiŋmɛi hela ni akɛ dade ni akɛnyiɛɔ ewo enane kome lɛ po kɛ ehe wo be-fɛɛ sɔɔmɔ lɛ mli. Ewoɔ mi hewalɛ yɛ mumɔŋ, ni etee nɔ efee nakai kɛbashi bianɛ. Gbɛgbalɔi ni yɔɔ asafo lɛ mli kɛ miweku lɛ mli ní mikɛbɔ be fɛɛ be lɛ ye ebua mi ni miná he miishɛɛ waa akɛ mi hu mikɛ mihe aaawo be-fɛɛ sɔɔmɔ lɛ mli. No hewɔ lɛ, yɛ November afi 1990 lɛ, mibɔi sɔɔmɔ yɛ Béziers akɛ gbɛgbalɔ.—Lala 94:17-19.

Nijiaŋwujee ni Mikpee Naa

Beni mikɛ mihe wo shiɛmɔ nitsumɔ lɛ mli lɛ, bɔ ni gbɛgbalɔi krokomɛi lɛ haa amɛhiɛ hiɔ minɔ jogbaŋŋ lɛ ye ebua mi. Yɛ no gbɛfaŋ po lɛ, minijiaŋ jeɔ wui yɛ be kɛ beaŋ yɛ nɔ ni minyɛɛɛ mafee lɛ hewɔ, ni miishwe akɛ kulɛ manyɛ mafee babaoo. Shi kɛlɛ, Yehowa ye ebua mi yɛ nakai bei ni minijiaŋ je wui lɛ fɛɛ amli. Mitao saji amli yɛ Watch Tower Publications Index lɛ mli, ni mitao gbɛgbalɔi ni hiŋmɛi enaaa nii jogbaŋŋ tamɔ mi lɛ awala shihilɛ he saji. Saji babaoo ni tamɔ nɛkɛ ni minine shɛ nɔ lɛ ha minaa kpɛ mihe! Nɛkɛ saji ni woɔ mɔ hewalɛ, ní anyɛɔ akɛtsuɔ nii lɛ ha mihiɛ sɔ nɔ ni minyɛɔ mifeɔ lɛ, ni mikpɛlɛ nɔ akɛ minyɛŋ babaoo mafee.

Bɔni afee ni maná mihiamɔ nii lɛ, mikɛ Odasefoi krokomɛi yabɛɛɔ shwapoi amli kɛha nyɔmɔwoo. Gbi ko lɛ, nɔ ni mina ji akɛ, mɛi ni fata mihe kɛtsuɔ nii lɛ kuɔ sɛɛ amɛyabɛɛɔ hei ni mibɛɛ jɛmɛ migbe naa etsɛko lɛ. Eka shi faŋŋ akɛ miishi jwɛi babaoo yɛ misɛɛgbɛ. Mitee koni miyasara Valérie ni eji gbɛgbalɔ ni kwɛɔ wɔbɛɛmɔ kuu lɛ nɔ lɛ, ni mibi koni ekɛ nɔ ko nɔ ko akatee mi, ní ekɛɛ mi kɛji minifeemɔ miigbá mɛi krokomɛi lɛ anaa. Ejɛ suɔmɔ mli eha mi hegbɛ koni mi diɛŋtsɛ matsɔɔ be mli ni misusuɔ akɛ minyɛŋ nitsumɔ lɛ matsu dɔŋŋ. Yɛ March afi 1994 lɛ, miŋmɛɛ bɛɛmɔ nitsumɔ ni mitsuɔ lɛ he.

Mibanu he ekoŋŋ akɛ mihe bɛ sɛɛnamɔ kwraa. Mikɛ ekãa sɔle miha Yehowa, ni mile akɛ ebo mifaikpamɔi lɛ atoi. Shikome ekoŋŋ lɛ, Biblia lɛ kɛ Kristofoi awoji lɛ akasemɔ ye ebua mi babaoo diɛŋtsɛ. Eyɛ mli akɛ bɔ ni mihiŋmɛi naa nii ehaa lɛ tee nɔ eba shi fiofio moŋ, shi shwelɛ ni miyɔɔ akɛ masɔmɔ Yehowa lɛ mli bawa be fɛɛ be. Mɛni mafee?

 Klɛŋklɛŋ lɛ Aŋma Migbɛi Koni Mamɛ, No Sɛɛ lɛ Mikpɛ Miyiŋ Trukaa

Miŋma wolo kɛtee Rehabilitation Center for the Blind and Visually Impaired (Helatsamɔhe ni Kwɛɔ Shwilafoi kɛ Mɛi ni Enaaa Nii Jogbaŋŋ) ni yɔɔ Nîmes lɛ kɛha tsɔsemɔ, ni yɛ naagbee lɛ ayatsĩ minaa nyɔji etɛ. Miná be nɛɛ he sɛɛ waa. Mibanu bɔ ni kpá ni mije lɛ yɔɔ ha lɛ shishi ni mikase bɔ ni mafee ni mikɛhi shi. Mɛi ni eje kpái srɔtoi ni mikɛ amɛ yahi shi lɛ ye ebua mi ni miyɔse bɔ ni Kristofoi ahiɛnɔkamɔ ni miyɔɔ lɛ he yɔɔ sɛɛnamɔ babaoo ha. Kɛ hooo kwraa lɛ, mikɛ oti ko ema mihiɛ ni manyɛ mafee nɔ ko ní he baaba sɛɛnamɔ. Kɛfata he lɛ, mikase shwilafoi anikanemɔ yɛ French wiemɔ mli.

Beni miku misɛɛ kɛtee shĩa lɛ, miweku lɛ na akɛ tsɔsemɔ ni miná lɛ eye ebua mi jogbaŋŋ. Shi nɔ kome ni misumɔɔɔ kwraa ji shwilafoi atso ni mahiɛ lɛ. Mináaa lɛ mlɛo kwraa akɛ mahiɛ nakai “tso” lɛ. Ebaafee nɔ ni hi akɛ maná nɔ kroko ni mikɛaanyiɛ—ekolɛ gbee ni tsɔɔ shwilafo gbɛ.

Miŋma wolo nɔ nii kɛbi koni aha mi gbee, shi akɛɛ mi akɛ mɛi babaoo miimɛ koni aha amɛ eko. Agbɛnɛ hu, ehe baahia ni nitsumɔhe lɛ atao nibii amli. Akɛ gbee ni tsɔɔ shwilafo gbɛ haaa mɔ fɛɛ mɔ kɛkɛ. Gbi ko lɛ, yoo ko ni yeɔ ebuaa kɛkwɛɔ kuu ko ni afee kɛha shwilafoi lɛ nɔ lɛ kɛɛ mi akɛ tɛnis tswaa kuu ko ni yɔɔ jɛmɛ lɛ baasumɔ ni amɛkɛ gbee ni tsɔɔ shwilafo gbɛ aha shwilafo ko loo mɔ ko ni hiŋmɛi enaaa nii jogbaŋŋ ni yɔɔ wɔkutso lɛ mli. Ekɛɛ akɛ esusu mihe. Ani makpɛlɛ nɔ? Miyɔse akɛ Yehowa nine yɛ sane lɛ mli ni mikpɛlɛ ejurɔfeemɔ nɛɛ nɔ. Fɛɛ sɛɛ lɛ, ehe bahia ni mamɛ koni akɛ gbee lɛ abaha mi.

Afrika He ni Misusuɔ Lolo

Be mli ni mimɛɔ lɛ, migbala mijwɛŋmɔ kɛtee nɔ kroko nɔ. Taakɛ mitsĩ tã kɛtsɔ hiɛ lɛ, kɛjɛ migbekɛbiiashi tɔ̃ɔ lɛ, miyɛ Afrika he miishɛɛ waa diɛŋtsɛ. Yɛ bɔ ni mihiŋmɛi naa nii ehaa ni baa shi lɛ fɛɛ sɛɛ lɛ, nakai miishɛɛ lɛ mli babɔi waa fe  tsutsu ko, titri lɛ, akɛni miná mile akɛ Afrikabii pii yɛ Biblia lɛ he miishɛɛ ni amɛmiisumɔ ni amɛsɔmɔ Yehowa lɛ hewɔ. Be ko ni eho lɛ, mitsĩ tã kɛkɛ mitsɔɔ Valérie akɛ masumɔ ni mayasara Afrika. Ani ebaasumɔ ni efata mihe kɛya? Ekpɛlɛ nɔ, ni wɔŋma kɛyaha Yehowa Odasefoi anitsumɔhe niji babaoo ni awieɔ French yɛ jɛmɛ lɛ.

Wɔnine shɛ hetoo nɔ kɛjɛ Togo. Mimli bafili mi, ni mibi Valérie koni ekane etsɔɔ mi. Wolo lɛ woɔ mɔ hewalɛ, no hewɔ lɛ, Valérie kɛɛ akɛ: “Ojogbaŋŋ, mɛni hewɔ ni wɔyaŋ?” Beni mikɛ nyɛmimɛi ni yɔɔ nitsumɔhe nine lɛ egba sane kɛtsɔ woloŋmaa nɔ sɛɛ lɛ, aha mikɛ Sandra ni eji gbɛgbalɔ ko ni yɔɔ Lomé, ni ji Togo maŋtiase lɛ mli lɛ bɔi sanegbaa. Wɔto gbɛjianɔ akɛ wɔbaafã gbɛ lɛ yɛ December 1, afi 1998.

Shihilɛ lɛ yɛ srɔto kwraa, shi kwɛ bɔ ni eyɔɔ miishɛɛ ha! Beni wɔyashɛ Lomé lɛ, wɔjɛ kɔɔyɔŋ lɛlɛ lɛ mli wɔyi shi, ni wɔnu Afrika kɔɔyɔŋ dɔlɛ lɛ he tamɔ kuntu yɛ wɔhe. Sandra bakpee wɔ. No mli lɛ, wɔkɛ wɔhe ekpeko pɛŋ, shi amrɔ nɔŋŋ lɛ wɔfee tamɔ nanemɛi ni le amɛhe momo. Beni eshwɛ fioo ni wɔbaaya jɛmɛ lɛ, ahala Sandra kɛ eshiɛmɔyaa hefatalɔ Christine akɛ gbɛgbalɔi krɛdɛɛi yɛ Tabligbo ni ji maŋ bibioo ko ni yɔɔ maŋ lɛ teŋgbɛ lɛ. Wɔná hegbɛ agbɛnɛ akɛ wɔɔfata amɛhe kɛyatsu nitsumɔ hee ni akɛha amɛ lɛ. Wɔhi shi aaafee nyɔji enyɔ, ni beni wɔshi wɔtee lɛ, mile akɛ maku misɛɛ maba.

Miná Miishɛɛ akɛ Miku Misɛɛ Miba Ekoŋŋ

Beni miyɔɔ France lɛ, mibɔi gbɛjianɔtoo amrɔ nɔŋŋ kɛha gbɛfaa kɛmiiya Togo nɔ ni ji shii enyɔ nɔ. Yɛ miweku lɛ dɛŋ yelikɛbuamɔ naa lɛ, minyɛ mito gbɛjianɔ koni mahi jɛmɛ nyɔji ekpaa. No hewɔ lɛ, yɛ September afi 1999 lɛ, miyatá kɔɔyɔŋ lɛlɛ ko ni yaa Togo lɛ mli. Shi kɛlɛ mɔ ko fataaa mihe yɛ nɛkɛ be nɛɛ mli. Bo lɛ susumɔ bɔ ni miweku lɛ mli bii nu he amɛha lɛ he okwɛ, beni amɛna akɛ yɛ kpá ni mije lɛ fɛɛ sɛɛ lɛ, mikɛ mɔ ko mɔ ko fataaa mihe kɛyaaa lɛ! Shi ehe ehiaaa kwraa ni amɛye amɛtsui yɛ enɛ he. Mima nɔ mi miha mifɔlɔi akɛ minanemɛi lɛ ni amɛbatsɔmɔ tamɔ mi diɛŋtsɛ miweku lɛ baamɛ mi yɛ Lomé.

Kwɛ bɔ ni mimii shɛ mihe akɛ misaa miku misɛɛ kɛba akutso ko ni mɛi ni jieɔ miishɛɛ kpo yɛ Biblia lɛ he lɛ ayi fa babaoo yɛ mli lɛ mli! Efɔɔ kaa akɛ aaana mɛi ni miikane Biblia lɛ yɛ gbɛjegbɛi lɛ ahe. Kɛ oshɛ Tabligbo maŋ lɛ mli lɛ, obaana ni mɛi miitsɛ́ bo koni okɛ amɛ abagba Biblia mli sane kɛkɛ. Ni kwɛ bɔ ni eji hegbɛ ni miná akɛ mikɛ nyɛmimɛi yei gbɛgbalɔi krɛdɛɛi enyɔ aaahi tsu bibioo ko mli! Mibale kusum nifeemɔ kroko ni tsɔɔ bɔ ni esa akɛ makwɛ nii yɛ gbɛ kroko kwraa nɔ. Nɔ ni fe fɛɛ lɛ, miyɔse akɛ wɔnyɛmimɛi hii kɛ yei Kristofoi ni yɔɔ Afrika lɛ kɛ Maŋtsɛyeli lɛ he nibii yeɔ klɛŋklɛŋ gbɛhe yɛ amɛshihilɛi amli. Ákɛ nɔkwɛmɔnɔ lɛ, nyiɛmɔ ni amɛnyiɛɔ kilomitai babaoo kɛyaa Maŋtsɛyeli Asa lɛ nɔ lɛ etsĩii amɛkpeeiyaa naa. Mikase nibii babaoo hu kɛjɛ hedɔɔ kɛ gbɔfeemɔ su ni amɛyɔɔ lɛ mli.

Gbi ko beni mijɛ shiɛmɔ mibaa lɛ, miteemɔŋ sane ko ni mikɛɛ Sandra ji akɛ misumɔɔɔ ni mikuɔ misɛɛ kɛyaa France. No mli lɛ mihiŋmɛi miiya nɔ eeshwila fiofio. Misusu gbɛjegbɛi ni yɔɔ Béziers ni nɔ efee hoo kɛ gbɔmɛi babaoo lɛ he, ni  misusu atrakpoi ni yɔɔ tsũi wuji amli, kɛ nibii krokomɛi ni fa babaoo ni haa shihilɛ waa kɛhaa mɔ ko ni enaaa nii jogbaŋŋ lɛ hu ahe. Nɔ ni tamɔɔɔ nakai lɛ, Tabligbo gbɛjegbɛi lɛ anɔ yɛ diŋŋ—gbɔmɛi faaa babaoo yɛ nɔ, ni lɔlei faaa tsɔ̃ yɛ nɔ, eyɛ mli moŋ akɛ awoko nɔ kootaa. Te mahi shi yɛ France maha tɛŋŋ, amrɔ nɛɛ ni mile Tabligbo shihilɛ nɛɛ?

Gbii enyɔ sɛɛ lɛ, mimami tswa mi tɛlifoŋ koni eha male akɛ skul ni atsɔseɔ gbeei ni tsɔɔ shwilafoi agbɛ yɛ lɛ miimɛ̃ mi. Etsɛŋ tsɔ̃ ni Labrador gbee ko ni akɛ lɛ yaa gbɔbimɔ ni gbɛi ji Océane lɛ baatsɔ “hiŋmɛi” kɛha mi. Shikome ekoŋŋ lɛ, atsu mihiamɔ nii lɛ ahe nii aha mi ni miyeyeeyefeemɔi lɛ tee kwraa. Beni mikɛ miishɛɛ esɔmɔ nyɔji ekpaa sɛɛ yɛ Tabligbo lɛ, miba France ekoŋŋ koni mibana Océane.

Beni miná tsɔsemɔ nyɔji abɔ sɛɛ lɛ, akɛ Océane ha mi. Yɛ shishijee mli lɛ, ebɛ mlɛo. Ehe bahia ni wɔnu wɔhe shishi. Shi fiofio lɛ, mibayɔse bɔ ni Océane he hiaa mi waa ha. Yɛ anɔkwale mli lɛ, Océane ebafee gbee ni fataa mihe daa. Te mɛi ni yɔɔ Béziers lɛ fee amɛnii amɛha tɛŋŋ beni amɛna akɛ mikɛ gbee miiba amɛshinaa shi lɛ? Akɛ bulɛ babaoo ha mi, ni afee mi ejurɔ babaoo hu. Océane batsɔ “kooloo ni asumɔɔ esane” yɛ akutso lɛ mli. Akɛni mɛi babaoo ahe ejɔɔɔ amɛ yɛ kpajelɔ ko hiɛ hewɔ lɛ, gbee ni mihiɛ lɛ haa minyɛɔ miwieɔ mikpá lɛ he yɛ gbɛ ni waaa kwra nɔ. Mɛi náa tsui, ni amɛboɔ mi toi. Yɛ anɔkwale mli lɛ, Océane batsɔ mɔ ni haa minyɛɔ mijeɔ sanegbaa shishi yɛ gbɛ ni waaa kwraa nɔ.

Mikɛ Océane Yɛ Afrika

Mihiɛ kpako Afrika nɔ, ni mije shishi mibɔi gbɛjianɔtoo kɛha migbɛfãa ni ji etɛ lɛ. Yɛ be ni tamɔ nɛkɛ mli lɛ, Océane bafata mihe. Mɛi ni fata mihe hu ji oblanyo ko kɛ eŋa, ni ji Anthony kɛ Aurore, kɛ minaanyo Caroline—amɛ fɛɛ amɛji gbɛgbalɔi tamɔ mi nɔŋŋ. Yɛ September 10, afi 2000 lɛ, wɔbashɛ Lomé.

Yɛ shishijee mli lɛ mɛi babaoo sheɔ Océane gbeyei. Mɛi ni yɔɔ Lomé lɛ ateŋ mɛi fioo ko pɛ ena gbee agbo tamɔ nɛkɛ pɛŋ, ejaakɛ gbeei ni yɔɔ Togo lɛ ateŋ babaoo daraaa. Kɛ mɛi komɛi na akɛ awo lɛ kpãa lɛ, amɛsusuɔ akɛ eji kooloo ni hiɛ yɔɔ la ní esaaa akɛ aŋmɛɛɔ ehe. Océane sumɔɔ ni etsĩ tutuamɔ naa, ni efee klalo akɛ eeebu mihe kɛjɛ nɔ fɛɛ nɔ ni tamɔ nɔ ni baaye mi awui lɛ he. Shi kɛlɛ, etsɛɛɛ ni Océane bale akutso hee lɛ mli shihilɛ. Kɛ kpãa lɛ yɛ ekuɛ lɛ, etsɔɔ mi gbɛ—ebaa ehe shi, ehiɛ yɛ ehe nɔ, ni ehiɔ mimasɛi. Kɛ ajie lɛ yɛ kpãa lɛ mli lɛ, eshwɛɔ, ni bei komɛi lɛ esumɔɔ koni egba mɛi anaa. Mikɛ lɛ shwɛɔ waa.

Afɔ̃ wɔ fɛɛ nine koni wɔkɛ Sandra kɛ Christine ayahi shi yɛ Tabligbo. Bɔni afee ni maye mabua nyɛmimɛi hii kɛ yei ni yɔɔ jɛmɛ lɛ koni amɛle bɔ ni akɛ Océane hiɔ shi ahaa hewɔ lɛ, wɔha amɛbasara wɔ, ni wɔtsɔɔ amɛ bɔ ni gbee ni tsɔɔ shwilafo gbɛ lɛ tsuɔ nii ehaa, nɔ hewɔ ni eko he hiaa mi, kɛ bɔ ni esa akɛ amɛfee amɛnii amɛha kɛ́ eyɛ amɛmasɛi. Onukpai lɛ kpɛlɛ nɔ akɛ Océane afata mihe kɛba Maŋtsɛyeli Asa lɛ nɔ. Akɛni gbɛjianɔtoo ni tamɔ nɛkɛ efɔɔɔ kaa kwraa yɛ Togo hewɔ lɛ, atswa adafi koni akɛgbála sane lɛ mli atsɔɔ asafo lɛ. Yɛ nɔ ni kɔɔ sɔɔmɔ nitsumɔ lɛ he lɛ, Océane kɛ mi yaa bei amli pɛ ni miifee sɛɛkuu-kɛsaramɔi kɛ beni mifeɔ Biblia mli nikasemɔi—shihilɛi amli ni egbaŋ mɛi anaa kwraa akɛ eeehi jɛmɛ lɛ.

Shikpɔŋkuku nɛɛ mli shiɛmɔ ŋɔɔ be fɛɛ be. Daa nɛɛ, minyaa mɛi ahesusumɔ ni mɛi ni baa amɛhe shi lɛ jieɔ lɛ kpo kɛtsɔ amɛnifeemɔi kpakpai anɔ, tamɔ bɔ ni amɛnáa he miishɛɛ akɛ amɛaaha mi sɛi lɛ he waa. Beni mifãa gbɛ kɛbaa Togo nɔ ni ji shii ejwɛ nɔ yɛ October afi 2001 lɛ, minyɛ fata mihe kɛba. Beni ehi shi otsii etɛ sɛɛ lɛ, esaa etee France, ni ená nɔmimaa akɛ miyɛ jogbaŋŋ, ni ená miishɛɛ hu.

Miida Yehowa shi waa akɛ eha minyɛ miyasɔmɔ yɛ Togo. Miyɛ nɔmimaa akɛ Yehowa baaya nɔ aha mi ‘nii ni mitsui taoɔ lɛ’ yɛ be mli ni miyaa nɔ mikɛ nɔ fɛɛ nɔ ni miyɔɔ lɛ tsuɔ nii yɛ esɔɔmɔ mli lɛ. *

[Shishigbɛ niŋmaa]

[Mfonirii ni yɔɔ baafa 10]

Afrika shikpɔji ni kamɔ shi kplanaa kɛ koo mli kooloi ni haa mɔ náa miishɛɛ lɛ ahe sane ni bayiɔ mijwɛŋmɔ mli lɛ haa mimli filiɔ mi be fɛɛ be

[Mfoniri ni yɔɔ baafa 10]

Océane fataa mihe kɛyafeɔ sɛɛkuu-kɛsaramɔi

[Mfoniri ni yɔɔ baafa 11]

Onukpai lɛ kpɛlɛ nɔ akɛ mikɛ Océane aba kpeei ashishi