Ani Esa akɛ Wɔshwa Nyɔŋmɔ yɛ Wɔnaagbai Ahe?

BENI Marion biyoo nukpa lɛ ná ansɔ mli hela ko ni mli wa waa lɛ, Marion fee nɔ ni kulɛ wɔteŋ mɛi babaoo baafee lɛ. * Esɔle ebi yelikɛbuamɔ kɛjɛ Nyɔŋmɔ ŋɔɔ. Marion kɛɛ akɛ: “Minuko he akɛ mifee shwɛm nɛkɛ dã. Sɛɛ mli lɛ ebiyoo lɛ hela lɛ mli bawa, ni Marion yiŋ bɔi lɛ kɔshikɔshifeemɔ yɛ Nyɔŋmɔ he. Ebi akɛ: “Mɛni hewɔ enɛ baa minɔ? Enuuu nɔ hewɔ ni Nyɔŋmɔ ni yɔɔ suɔmɔ ni susuɔ mɔ he lɛ baakwa lɛ lɛ shishi.

Marion niiashikpamɔ lɛ jeee nɔ ni efɔɔɔ kaa. Mɛi babaoo ni yɔɔ je lɛŋ lɛ enu he akɛ Nyɔŋmɔ ekwa amɛ yɛ hiamɔ bei amli. Beni agbe Lisa nabi lɛ sɛɛ lɛ, ekɛɛ akɛ: “Mikã he mikɛ sanebimɔi ni kɔɔ nɔ hewɔ ni Nyɔŋmɔ ŋmɛɔ piŋmɔ gbɛ lɛ miishi mpele lolo. Hemɔkɛyeli ni miyɔɔ yɛ Nyɔŋmɔ mli lɛ etako kwraa, shi emli waaa taakɛ eji tsutsu ko lɛ.” Nakai nɔŋŋ beni yoo ko kɛ oshara ko ni nilee bɛ mli ni kɔɔ ebinuu abifao he lɛ kpe sɛɛ lɛ, ekɛɛ akɛ: “Nyɔŋmɔ eshɛjeee mimii yɛ nɔ ni ba lɛ he. Minako nɔ ko ni tsɔɔ akɛ esusuɔ mihe loo emusuŋ tsɔɔ lɛ yɛ mihe.” Ekɛfata he akɛ: “Mikɛ Nyɔŋmɔ he ekeŋ lɛ kɔkɔɔkɔ.”

Mɛi krokomɛi amli fuɔ Nyɔŋmɔ kɛji akɛ amɛkwɛ jeŋ ni ebɔle amɛ lɛ. Amɛnaa maji ni miiye ohia kɛ hɔmɔ, ta mli abobalɔi ni bɛ hiɛnɔkamɔ, gbekɛbii ni anyɛɛɛ akane ni AIDS eha amɛtsɔmɔ awusãi, kɛ gbɔmɛi akpekpei abɔ ni helai krokomɛi emɔmɔ amɛ. Yɛ shihilɛi nɛɛ kɛ osharai ni tamɔ nakai amli lɛ, mɛi babaoo shwaa Nyɔŋmɔ akɛ efeee shihilɛ lɛ he nɔ ko.

Shi kɛlɛ, anɔkwale lɛ ji akɛ, esaaa ákɛ akɛ naagbai ni baa adesai anɔ lɛ ahe shwamɔ fɔ̃ɔ Nyɔŋmɔ nɔ. Yɛ anɔkwale mli lɛ, yiŋtoi kpakpai yɛ ni wɔɔdamɔ nɔ wɔhé wɔye akɛ etsɛŋ ni Nyɔŋmɔ baajie awuiyeli ni akɛba adesai aweku lɛ nɔ lɛ kɛya. Wɔmiifɔ bo nine koni ogbele kɛya sane ni nyiɛ sɛɛ lɛ koni ona akɛ Nyɔŋmɔ susuɔ wɔhe lɛɛlɛŋ.

[Shishigbɛ niŋmaa]