Mɛni Hewɔ Yehowa Odasefoi Fɔ̀ɔ Oŋɔɔ Baa Nɛkɛ?

ALE Yehowa Odasefoi jogbaŋŋ yɛ je lɛŋ fɛɛ yɛ bɔ ni amɛkɛ amɛhe woɔ amɛ shia-kɛ-shia shiɛmɔ nitsumɔ lɛ mli ni amɛfɔ̃ɔɔ lɛ hewɔ. Efeɔ mɛi komɛi anaakpɛɛ yɛ bɔ ni Odasefoi fɔ̀ɔ amɛŋɔɔ baa nakai lɛ, titri lɛ kɛji akɛ yɛ be ni eho lɛ mli lɛ amɛjie hiɛsɔɔ fioo ko pɛ kpo yɛ Odasefoi lɛ ashɛɛ sane lɛ he. Woji enyɔ ni aŋmala kɛjɛ Russia lɛ yeɔ ebuaa kɛtsɔɔ yiŋtoo hewɔ ni ebaa lɛ nakai lɛ mli.

Masha, ni eji gbekɛ yoo ko ni eye afii 19 ni jɛ Khabarovsk lɛ kpɛlɛ nɔ akɛ: “Yɛ anɔkwale mli lɛ, be ko ni eho lɛ, mibɔɔ mɔdɛŋ waa ni mitsĩɔ Yehowa Odasefoi anaa koni amɛkaba miŋɔɔ.” Shi kɛlɛ, beni ekane woji tɛtrɛbii ni Odasefoi lɛ fee lɛ ateŋ ekomɛi egbe naa sɛɛ lɛ, etsake esu. Masha ŋma akɛ: “Nɔ ni mikane yɛ woji tɛtrɛbii lɛ amli lɛ fɛɛ yɛ miishɛɛ ni etsɔɔ mɔ nii babaoo, shi nɔ ni he hiaa fe fɛɛ lɛ, ehaa mɔ kwɛɔ je lɛ yɛ gbɛ ni yɔɔ srɔto ko nɔ. Mibɔi yiŋtoo ni yɔɔ wala sɛɛ lɛ shishinumɔ fiofio.”

Svetlana, ni jɛ Ussuriysk maŋtiase ni kɛ Vladivostok kooyigbɛ jɛkɛmɔ aaafee kilomitai 80 lɛ ŋma akɛ: “Nyɛsɛɛ nɛɛ nɔŋŋ mibɔi Buu-Mɔɔ kɛ Awake! lɛ kanemɔ. Nɛkɛ woji tɛtrɛbii nɛɛ ahe miihia waa yɛ wɔgbii nɛɛ amli. Minyaa amɛmli saji lɛ fɛɛ ahe. Amɛmli ŋɔɔ, amɛtsɔɔ mɔ nii, ni amɛhaa mɔ nilee yaa hiɛ waa. Miida nyɛ shi! Miida nyɛ shi waa akɛ nyɛyɛ je nɛɛ mli ni nyɛmiifee ejurɔ ni tamɔ nɛkɛ kɛ nitsumɔ ni he hiaa nɛɛ.”

Yehowa Odasefoi ni yɔɔ je lɛŋ fɛɛ lɛ kɛ hiɛdɔɔ susuɔ bɔfo Paulo sanebimɔ ni kanyaa sane hesusumɔ nɛɛ he akɛ: ‘Ni asaŋ te aaafee tɛŋŋ ni gbɔmɛi aaanu kɛ́ shiɛlɔ ko bɛ lɛ?’ (Romabii 10:14) Mɛni hewɔ oheee minitii fioo ko ni okɛbo Odasefoi lɛ atoi kɛ amɛbasara bo be kroko? Bo hu obaanyɛ oná shɛɛ sane ni shɛjeɔ mɔ mii ni yɔɔ Nyɔŋmɔ Wiemɔ, ni ji Biblia lɛ mli lɛ mli ŋɔɔmɔ.