Bɔ ni Ooofee Otsu Omumɔŋ Hiamɔ Nii Ahe Nii

BƆNI U.S.News & World Report lɛ kɛɛ nɛ: “Yɛ afii 10 ni eho lɛ mli lɛ, woji ni fa fe 300 ni kɔɔ nɔ ni mumɔŋ shidaamɔ tsuɔ yɛ mɔ heloonaa nitsumɔ mli lɛ he—kɛjɛ Jesus CEO nɔ kɛyashi The Tao of Leadership lɛ nɔ lɛ—eyi woji ahɔɔmɔhei amli obɔ.” Nɔ ni nifeemɔ gbɛ nɛɛ jieɔ lɛ kpo pɛ ji anɔkwale ni eji akɛ, shwelɛ kɛha mumɔŋ gbɛtsɔɔmɔ yɛ shihilɛ he lɛ miiya hiɛ yɛ shikpɔji ni eshwere yɛ heloonaa nibii amli lɛ mli. Beni jarayeli he wolo tɛtrɛɛ Training & Development lɛ wieɔ enɛ he lɛ, ekɛɛ akɛ: “Wɔmiitao shishinumɔ ni mli kwɔ, yiŋtoo ni yɔɔ wala sɛɛ, kɛ mɔ tsui ni nyɔɔ emli babaoo, dani be ni tsɔji ahe nilee baakudɔ wɔ shihilɛ fãi srɔtoi fɛɛ lɛ ashɛ.”

 Belɛ, nɛgbɛ obaanyɛ oná mumɔŋ gbɛtsɔɔmɔ ni haa mɔ tsui nyɔɔ emli yɛ? Yɛ be ni eho lɛ mli lɛ, gbɔmɛi kwɛ jamɔi ni ato amɛhe gbɛjianɔ lɛ agbɛ akɛ amɛye amɛbua amɛ koni amɛná “shishinumɔ ni mli kwɔ” kɛ “yiŋtoo” ni yɔɔ wala sɛɛ. Ŋmɛnɛ, mɛi babaoo ekpoo jamɔ ni ato he gbɛjianɔ. Training & Development lɛ wie niiamlipɛimɔ ko ni afee yɛ nitsumɔ nɔkwɛlɔi kɛ nitsumɔ mli onukpai 90 ahe lɛ he, ni ejie lɛ kpo akɛ, “mɛi kɛ mligbalamɔ agbo baa jamɔ kɛ mumɔŋ shidaamɔ teŋ.” Mɛi ni abibii amɛ saji lɛ bu jamɔ akɛ “nɔ ko ni tsĩɔ mɔ naa, ni kɛ mligbalamɔ baa,” ni amɛbu mumɔŋ shidaamɔ akɛ “jeŋ muu fɛɛ nɔ ko, ni kɔɔ mɔ fɛɛ mɔ he.”

Obalahii kɛ oblayei ni yɔɔ maji ni bɛ Nyɔŋmɔjamɔ su lɛ amli, tamɔ Australia, New Zealand, United Kingdom, kɛ Europa lɛ, naa srɔtofeemɔ ni tamɔ nakai nɔŋŋ yɛ jamɔ kɛ mumɔŋ shidaamɔ teŋ. Nilelɔ Ruth Webber ŋma yɛ Youth Studies Australia lɛ mli ni ejaje akɛ: “Obalahii kɛ obalayei babaoo heɔ Nyɔŋmɔ, loo hewalɛ ko ni fe adesai anɔ lɛ amɛyeɔ, shi amɛbuuu sɔlemɔ lɛ akɛ nɔ ko ni he hiaa loo nɔ ko ni baanyɛ aye abua amɛ ni amɛjie amɛ mumɔŋ shidaamɔ lɛ kpo.”

Anɔkwa Jamɔ Haa Mumɔŋ Shidaamɔ Shwereɔ

Shishinumɔ yɛ nɛkɛ yiŋkɔshikɔshifeemɔ ni ayɔɔ yɛ jamɔ he lɛ he. Jamɔ gbɛjianɔtoi babaoo kɛ amɛhe ewo maŋkwramɔŋ saji kɛ jeŋba mli osatofeemɔ mli vii, ni amɛshwie lá ni eye bem shi yɛ jamɔŋ tai ni anyɛŋ akane lɛ amli. Shi kɛlɛ, be mli ni mɛi komɛi ekpoo jamɔ gbɛjianɔtooi ni kɛ osatofeemɔ kɛ malemɔ ewo amɛhe muji lɛ, amɛtɔ̃ hu kɛtsɔ Biblia lɛ ni amɛkpoo, akɛni amɛsusuɔ akɛ ekpɛlɛɔ nifeemɔi ni tamɔ nakai lɛ anɔ lɛ hewɔ.

Yɛ anɔkwale mli lɛ, Biblia lɛ teɔ shi ewoɔ osatofeemɔ kɛ mlatɔmɔ. Yesu kɛɛ jamɔ mli hiɛnyiɛlɔi ni hi shi yɛ egbii lɛ amli lɛ akɛ: “Kpoo ha nyɛ, woloŋmalɔi kɛ Farisifoi, osatofoi! akɛni nyɛtamɔ gbohii asãŋi ni asha he ni amɛhewɔ efee fɛo moŋ, shi amɛmligbɛ lɛ eyimɔ obɔbɔ kɛ gbohii awui kɛ muji srɔtoi fɛɛ. Nakai nɔŋŋ anaa nyɛ hu yɛ gbɔmɛi ahiɛ tamɔ jalɔi, shi osato kɛ mlatɔmɔ eyi nyɛmli obɔ.”—Mateo 23:27, 28.

Kɛfata he lɛ, Biblia lɛ woɔ Kristofoi hewalɛ koni amɛfee mɛi ni kɛ amɛhe wooo maŋkwramɔŋ saji amli. Yɛ nɔ najiaŋ ni eeewo heyelilɔi hewalɛ koni amɛgbegbee amɛhe lɛ, ekɛ gbɛtsɔɔmɔ haa akɛ esa akɛ amɛsumɔ akɛ amɛbaagboi amɛha amɛhe. (Yohane: 15:12, 13; 18:36; 1 Yohane 3:10-12) Yɛ nɔ najiaŋ ni anɔkwa jamɔ, ni damɔ Biblia nɔ lɛ, aaafee “nɔ ko ni tsĩɔ mɔ naa ni kɛ mligbalamɔ baa” lɛ, eji nɔ ko ni “kɔɔ mɔ fɛɛ mɔ he.” Bɔfo Petro kɛɛ akɛ: “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.”—Bɔfoi lɛ Asaji 10:34, 35.

Biblia Lɛ—Gbɛtsɔɔmɔ ni Anyɛɔ akɛ He Fɔɔ Nɔ Kɛha Mumɔŋ Hewalɛnamɔ

Biblia lɛ kɛɔ wɔ akɛ abɔ adesai yɛ Nyɔŋmɔ subaŋ nɔ. (1 Mose 1:26, 27) Be mli ni enɛ etsɔɔɔ akɛ adesai asu tamɔ Nyɔŋmɔ nɔ, yɛ gbɔmɔtsoŋ gbɛfaŋ lɛ, etsɔɔ diɛŋtsɛ akɛ adesai yɛ nyɛmɔ ni amɛkɛaajie Nyɔŋmɔ sui ni eyɔɔ lɛ akpo, ni nyɛmɔ yɛ mumɔŋ nibii, loo mumɔŋ shidaamɔ he lɛ fata he.

Kɛ́ nakai ji sane lɛ, be lɛ nilee yɛ mli akɛ aaahe aye akɛ Nyɔŋmɔ kɛ gbɛ ni wɔɔtsɔ nɔ wɔtsu wɔmumɔŋ hiamɔ nii ahe nii lɛ hu baaha wɔ, kɛ gbɛtsɔɔmɔ hu ni sa jogbaŋŋ ni wɔbaanyɛ wɔtsɔ nɔ wɔkɛkpá nibii ni he yɔɔ sɛɛnamɔ kɛ nibii ni yeɔ awui yɛ mumɔŋ lɛ amli. Taakɛ bɔ ni Nyɔŋmɔ bɔ wɔgbɔmɔtsei lɛ jogbaŋŋ ni ekɛ nibii ni jieɔ muawai kɛjɛɔ gbɔmɔtso lɛ mli, ni wuɔ shiɔ helai koni eye ebua ni wɔná gbɔmɔtsoŋ hewalɛ lɛ ji lɛ, nakai nɔŋŋ ehá wɔ henilee, loo mligbɛ gbee ko ni baanyɛ aye abua wɔ koni wɔfee yiŋkpɛi ni ja ni wɔtsi wɔhe kɛjɛ nifeemɔi ni yeɔ mɔ awui yɛ gbɔmɔtsoŋ kɛ mumɔŋ lɛ ahe. (Romabii 2:14, 15) Taakɛ wɔle lɛ, kɛji akɛ wɔ gbɔmɔtso mli nibii ni jieɔ muawai kɛjeɔ kpo lɛ baanyɛ atsu nii lɛ, no lɛ esa akɛ ená niyenii kpakpa. Nakai nɔŋŋ hu bɔni afee ni wɔhenilee lɛ atsu nii lɛ, ehe miihia ni wɔkɛ mumɔŋ niyenii kpakpa alɛ lɛ.

Beni Yesu tsɔɔ niyenii pɔtɛɛ ni baaha wɔná hewalɛ yɛ mumɔŋ lɛ, ekɛɛ akɛ: “Jeee aboloo kɛkɛ haa gbɔmɔ yi naa wala; shi moŋ wiemɔ  fɛɛ wiemɔ ni jɛɔ Nyɔŋmɔ daaŋ lɛ.” (Mateo 4:4) Aŋmala Yehowa daaŋ wiemɔi lɛ ashwie shi yɛ e-Wiemɔ, ni ji Biblia lɛ mli, ni ‘amɛhi ha nitsɔɔmɔ kɛ hiɛkamɔ kɛ mɔsaamɔ.’ (2 Timoteo 3:16) No hewɔ lɛ, eji gbɛnaa nii ni kã wɔnɔ akɛ wɔbɔ mɔdɛŋ fɛɛ ni wɔɔnyɛ koni wɔye nakai mumɔŋ niyenii lɛ. Babaoo ni wɔbaleɔ Biblia lɛ ni wɔbɔɔ mɔdɛŋ koni wɔkɛ eshishitoo mlai lɛ atsu nii yɛ wɔshihilɛ mli lɛ, babaoo ni wɔnáa he sɛɛ yɛ mumɔŋ kɛ gbɔmɔtsoŋ ji no.—Yesaia 48:17, 18.

Ani Sɛɛnamɔ yɛ He?

Eji anɔkwale akɛ, eheɔ be dani wɔbaanyɛ wɔha wɔmumɔŋ hewalɛnamɔ aya hiɛ kɛtsɔ Biblia lɛ kasemɔ nɔ; ni be ji nɔ ko ni etamɔ nɔ ni enamɔ wa. Shi jɔɔmɔi ni jɛɔ mli kɛbaa lɛ sa jogbaŋŋ! Bó bɔ ni nitsulɔi komɛi ni bɛ deka kwraa lɛ tsɔɔ nɔ hewɔ ni be ni amɛheɔ kɛtsuɔ amɛmumɔŋ hewalɛnamɔ he nii lɛ he yɔɔ sɛɛnamɔ kɛha amɛ lɛ toi.

Marina, ni eji datrɛfonyo lɛ kɛɛ akɛ: “Yɛ anɔkwale mli lɛ, misusuuu mimumɔŋ shidaamɔ he aahu kɛyashi be mli ni mibɔi nitsumɔ yɛ helatsamɔhe ni mibɔi mɛi krokomɛi apiŋmɔi ahe numɔ waa lɛ. Kɛkɛ ni miyɔse akɛ kɛ́ maná tsui ni nyɔɔ mɔ mli kɛ jwɛŋmɔŋ toiŋjɔlɛ lɛ, esa akɛ male bɔ ni mimumɔŋ shidaamɔ ji ha koni matsu he nii, akɛni bɔ ni shihilɛ lɛ yaa lɛ ehaa, kɛ bɔ ni ehe hiaa ni atsu mɛi krokomɛi anaagbai ahe nii lɛ baanyɛ ekɛ nɔnyɛɛ aba mɔ fɛɛ mɔ ni tsuɔ nitsumɔ ni mitsuɔ lɛ nɔ lɛ hewɔ.

“Amrɔ nɛɛ mikɛ Yehowa Odasefoi kaseɔ Biblia lɛ. Nikasemɔ nɛɛ yeɔ ebuaa ni ehaa misusuɔ minifeemɔi kɛ yiŋtoi ahe yɛ gbɛ ni hi jogbaŋŋ nɔ, ni mitsɔseɔ misusumɔi kɛkpaa nibii kpakpai agbɛ, bɔni afee ni maha mishihilɛ aŋmɛ pɛpɛɛpɛ. Mináa tsui ni nyɔɔ mɔ mli waa diɛŋtsɛ yɛ miheloo naa nitsumɔ lɛ mli. Shi, mi-Biblia mli nikasemɔ lɛ ji nɔ ni eha hewalɛ ni miyɔɔ yɛ henumɔŋ lɛ etee hiɛ lɛ, ni eye ebua mi koni manyɛ makudɔ henumɔ ni ejaaa námɔ, maba nɔnyɛɛ shi, ni mikɛ mɛi aye yɛ tsuishitoo kɛ musuŋtsɔlɛ babaoo mli. Biblia mli shishitoo mlai kɛ nitsumɔ hu eye ebua migbalashihilɛ lɛ. Nɔ ni fe fɛɛ lɛ, mibale Yehowa, ni miiná emumɔ ni ekɛhaa yaka, ní eha shishinumɔ kpele eba mishihilɛ he lɛ mli gbɛfaŋnɔ.”

Nicholas, ni eji tsumaa he gbɛjianɔtoo he ŋaalɔ lɛ kɛɛ akɛ: “Dani mikɛ Yehowa Odasefoi baabɔi Biblia lɛ kasemɔ lɛ, no mli minyaaa mumɔŋ nibii ahe kwraa. Oti ni fe fɛɛ ni mikɛma mihiɛ yɛ shihilɛ mli ji ni maye omanye yɛ nitsumɔ ni mihala akɛ matsu lɛ mli. Mi-Biblia mli nikasemɔ lɛ etsɔɔ mi akɛ yɛ nitsumɔ sɛɛ lɛ, nibii babaoo fata shihilɛ he, ni akɛ Yehowa suɔmɔnaa nii ni aaafee lɛ kɛ anɔkwa miishɛɛ ni sɛɛ tsɛɔ baa.

“Eyɛ mli akɛ miheloonaa nitsumɔ lɛ haa mináa tsui ni nyɔɔ mɔ mli moŋ, shi Biblia lɛ ji nɔ ni etsɔɔ mi sɛɛnamɔ ni yɔɔ shihilɛ ni aaaha efee mlɛo lɛ he kɛtsɔ mumɔŋ nibii ni migbala mijwɛŋmɔ kɛtee nɔ lɛ nɔ. Kɛtsɔ enɛ ni mi kɛ miŋa fee lɛ nɔ lɛ, wɔye wɔhe kɛjɛ nɔnyɛɛ babaoo ni jɛɔ heloonaa nibii asɛɛtiumɔ shihilɛ mli kɛbaa lɛ he. Kɛfata he lɛ, mɛi ni hiɛ nakai mumɔŋ shidaamɔ lɛ nɔŋŋ yɛ shihilɛ he ni wɔkɛbɔɔ lɛ eha wɔná nanemɛi kpakpai babaoo.”

Vincent, ni eji mlalelɔ lɛ kɛɛ akɛ: “Heloonaa nitsumɔ kpakpa baanyɛ ekɛ tsui ni nyɔɔ mɔ mli aba. Kɛlɛ,  mina akɛ babaoo he miihia kɛha miishɛɛ kɛ tsui ni nyɔɔ mɔ mli námɔ. Dani mibale nɔ ni Biblia lɛ tsɔɔ yɛ sane nɛɛ he lɛ, mikaiɔ akɛ no mli lɛ miyɛ shihilɛ ko ni yiŋtoo ko bɛ sɛɛ lɛ mli—ni afɔ, ni ada, ni abote gbalashihilɛ mli, ni atsu nii koni akɛná heloonaa nibii ni he hiaa kɛha bii alɛɛ, ni atsɔse amɛ koni amɛbanyiɛ nakai wala shibɔlemɔ lɛ nɔŋŋ sɛɛ, kɛ naagbee lɛ ni agbɔ ni agbo.

“Beni mikɛ Yehowa Odasefoi lɛ kase Biblia lɛ sɛɛ dani mibaná hetooi ni haa mɔ tsui nyɔɔ emli ni kɔɔ yiŋtoo ni yɔɔ wala sɛɛ lɛ he. Mi-Biblia mli nikasemɔ lɛ eye ebua mi ni mibale Yehowa akɛ mɔ ko ni yɔɔ diɛŋtsɛ ni miná suɔmɔ ni mli kwɔ miha lɛ. Enɛ haa mináa shishitoo nɔ ni madamɔ nɔ mahiɛ mumɔŋ shidaamɔ kpakpa mli, be mli ni mibɔɔ mɔdɛŋ koni mahi shi yɛ gbɛ ni kɛ eyiŋtoi kpaa gbee lɛ nɔ lɛ. Amrɔ nɛɛ, mi kɛ miŋa fɛɛ tsui enyɔ wɔmli akɛni wɔle akɛ wɔkɛ wɔwala miitsu nii yɛ gbɛ ni hi fe fɛɛ ni wɔɔnyɛ lɛ nɔ lɛ hewɔ.”

Bo hu obaanyɛ oná yiŋtoo kɛ shishinumɔ ni yɔɔ wala sɛɛ lɛ kɛtsɔ Biblia lɛ ni oookase lɛ nɔ. Yehowa Odasefoi yɛ he miishɛɛ akɛ amɛaaye amɛbua bo. Taakɛ Marina, Nicholas, kɛ Vincent ji lɛ, obaanyɛ oná tsui ni nyɔɔ mɔ mli ni baa kɛtsɔ Yehowa kɛ eyiŋtoi kɛha adesai fɛɛ ni bo hu ofata he akɛ aŋkro lɛ ahe nii ni oookase lɛ nɔ. Jeee akɛ obaaná miishɛɛ kɛjɛ omumɔŋ hiamɔ nii ni oootsu he nii lɛ mli kɛkɛ, shi moŋ obaaná gbɔmɔtsoŋ hewalɛ ni eye emuu ni baaba wɔsɛɛ lɛ hu mli ŋɔɔmɔ—hiɛnɔkamɔ ni yɔɔ kɛha mɛi pɛ ni ‘hiɛ yɔɔ amɛmumɔŋ hiamɔ nii anɔ lɛ.’—Mateo 5:3.

Gbɛ kome ni wɔbaanyɛ wɔtsɔ nɔ ni wɔkɛha wɔmumɔŋ shidaamɔ aya hiɛ lɛ ji kɛtsɔ sɔlemɔ nɔ. Yesu he be ni ekɛtsɔɔ ekaselɔi lɛ bɔ ni asɔleɔ ahaa, ni ekɛ nɔ ni afɔɔ lɛ tsɛmɔ akɛ Nuŋtsɔ lɛ Sɔlemɔ lɛ ha amɛ. Mɛɛ shishinumɔ nakai sɔlemɔ lɛ hiɛ kɛha bo ŋmɛnɛ? Mɛɛ gbɛ nɔ obaatsɔ oná he sɛɛ? Obaana hetooi lɛ yɛ nikasemɔi enyɔ ni nyiɛ sɛɛ lɛ amli.

[Mfonirii ni yɔɔ baafa 6]

Marina

[Mfonirii ni yɔɔ baafa 7]

Nicholas

[Mfonirii ni yɔɔ baafa 7]

Vincent