Sanebimɔi ni Jɛ Kanelɔi Adɛŋ

Mɛni hewɔ Elisha bi Elia mumɔ lɛ “mlijaai enyɔ” lɛ?

Beni eshwɛ fioo ni Elia baagbe enitsumɔ akɛ gbalɔ yɛ Israel lɛ naa lɛ, Elisha, ni ji gbalɔ fioo lɛ bi lɛ akɛ: “Miikpao fai, ha ni omumɔ lɛ mlijaai enyɔ aba minɔ!” (2 Maŋtsɛmɛi 2:9) Kɛ́ aawie he yɛ mumɔŋ susumɔ naa lɛ, eka shi faŋŋ akɛ Elisha miibi koni aha lɛ mlijaai enyɔ taakɛ afeɔ ahaa kromɔbi ko lɛ pɛpɛɛpɛ. (5 Mose 21:17) Sane lɛ he ni wɔɔsusu kuku lɛ baaha efee faŋŋ ni ebaaye ebua wɔ ni wɔkase nii kɛjɛ nɔ ni ba lɛ mli.

Yɛ Yehowa gbɛtsɔɔmɔ kɛ gbeekpamɔ naa lɛ, gbalɔ Elia fɔ Elisha mu akɛ mɔ ni baaye esɛɛ. (1 Maŋtsɛmɛi 19:19-21) Elisha kɛ nɔ ni miihe ashɛ afii ekpaa sɔmɔ Elia akɛ sɔɔlɔ anɔkwafo, ni etswa efai shi akɛ ebaafee enɛ kɛyashi naagbee. Yɛ Elia naagbee gbi akɛ gbalɔ yɛ Israel po lɛ, Elisha tee nɔ ekpɛtɛ etsɔɔlɔ kɛ ŋaawolɔ nɛɛ he. Eyɛ mli akɛ Elia fã Elisha koni ekpa esɛɛ nyiɛmɔ moŋ, shi gbalɔ fioo lɛ wie shii etɛ sɔŋŋ akɛ: “Mishĩiio!” (2 Maŋtsɛmɛi 2:2, 4, 6; 3:11) Eji anɔkwale akɛ, Elisha bu gbalɔ nukpa lɛ akɛ emumɔŋ tsɛ.—2 Maŋtsɛmɛi 2:12.

Ni kɛlɛ, jeee Elisha pɛ ji Elia mumɔŋ bi. Elia kɛ Elisha kɛ hii akuu ko ni atsɛɔ amɛ “gbalɔi abii lɛ” bɔ. (2 Maŋtsɛmɛi 2:3) Sane ni yɔɔ Maŋtsɛmɛi a-Wolo ni Ji Enyɔ lɛ mli lɛ tsɔɔ akɛ, ‘bii’ nɛɛ hu kɛ amɛmumɔŋ tsɛ Elia ná wekukpaa ni yɔɔ gbagbalii. (2 Maŋtsɛmɛi 2:3, 5, 7, 15-17) Kɛlɛ, ákɛ mɔ ni afɔ lɛ mu akɛ sɛɛyelɔ lɛ, Elisha bafee Elia mumɔŋ bii lɛ ateŋ mɔ klɛŋklɛŋ—ebafee tamɔ kromɔbi. Yɛ blema Israel lɛ, mɔ ni ji kromɔbi diɛŋtsɛ lɛ nine shɛɔ etsɛ gboshinii lɛ mlijaai enyɔ nɔ, yɛ be mli ni bii krokomɛi lɛ ateŋ mɔ fɛɛ mɔ nine shɛɔ mlijaa kome nɔ. No hewɔ lɛ, Elisha bi Elia mumɔŋ gboshinii lɛ mlijaai enyɔ.

Mɛni hewɔ Elisha bi nii ni tamɔ nɛkɛ yɛ nakai be lɛ tuuntu mli lɛ? Ejaakɛ eeba koni ebatsu nitsumɔ ko ni tsii—ni ji Elia sɛɛ ni ebaa koni ebaye akɛ gbalɔ yɛ Israel lɛ. Elisha yɔse akɛ, bɔni afee ni enyɛ etsu gbɛnaa nii ni fata nɛkɛ nitsumɔ ni tsii nɛɛ he lɛ ahe nii lɛ, ehe baahia ni ená mumɔŋ hewalɛ ni fa kwraa fe lɛ diɛŋtsɛ enyɛmɔi, hewalɛ ni Yehowa pɛ ji mɔ ni baanyɛ ekɛha. Ehe baahia ni efee mɔ ni sheee gbeyei tamɔ Elia fee lɛ. (2 Maŋtsɛmɛi 1:3, 4, 15, 16) No hewɔ lɛ, ebi Elia mumɔ lɛ mlijaai enyɔ, ni ji ekãa mumɔ, kɛ mumɔ ni ‘ekɛbaaye Yehowa he awuŋa’—ni ji sui kpakpai ni Nyɔŋmɔ mumɔ lɛ woɔ lɛ. (1 Maŋtsɛmɛi 19:10, 14) Te Elia here nɔ eha tɛŋŋ?

Elia le akɛ Elisha ebi nɔ ko ni jeee lɛ ji mɔ ni yɔɔ hegbɛ akɛ ekɛhaa, ja Nyɔŋmɔ pɛ. No hewɔ lɛ, Elia kɛ heshibaa ha hetoo akɛ: “Obi nɔ ko ni wa; shi kɛlɛ kɛji ooona mi ni aaŋɔ mi kɛjɛ oŋɔɔ kɛya lɛ, aaaba mli nakai ahao.” (2 Maŋtsɛmɛi 2:10) Ni yɛ anɔkwale mli lɛ, Yehowa ha Elisha na Elia ni miikwɔ kɛmiiya ŋwɛi yɛ lasuogbele mli. (2 Maŋtsɛmɛi 2:11, 12) Atsu Elisha nibimɔ lɛ he nii. Yehowa kɛ mumɔ ni he baahia koni ekɛje enitsumɔ hee lɛ shishi, ni enyɛ ekpee kaai ni baaba lɛ anaa lɛ ha lɛ.

Kristofoi ni afɔ amɛ mu (ni bei komɛi lɛ atsɛɔ amɛ Elisha kuu lɛ) kɛ agbɛnɛ Nyɔŋmɔ tsuji fɛɛ baanyɛ aná hewalɛwoo babaoo kɛjɛ Biblia mli sane nɛɛ mli ŋmɛnɛ. Bei komɛi lɛ, ekolɛ nitsumɔ hee ko ni akɛha wɔ lɛ baaha wɔhao ni wɔbaanu he akɛ wɔhe esako, aloo ekolɛ ekãa ni wɔkɛaaya nɔ yɛ wɔ Maŋtsɛyeli shiɛmɔ nitsumɔ lɛ mli lɛ mli baagbɔjɔ be mli ni wɔkɛ shikpilikpiifeemɔ loo shitee-kɛ-woo ni mli woɔ wu kpeɔ yɛ wɔshikpɔŋkuku lɛ mli lɛ. Kɛlɛ, kɛji akɛ wɔkpá Yehowa fai kɛha edɛŋ yelikɛbuamɔ lɛ, no lɛ ebaaha wɔ mumɔ krɔŋkrɔŋ ni he hiaa wɔ koni wɔkɛkpee kaai kɛ shihilɛi ni tsakeɔ lɛ anaa. (Luka 11:13; 2 Korintobii 4:7; Filipibii 4:13) Hɛɛ, taakɛ bɔ ni Yehowa waje Elisha kɛha egbɛnaa nii ni tsii lɛ ahe nitsumɔ lɛ, nakai nɔŋŋ ebaaye ebua wɔ fɛɛ, gbekɛbii kɛ onukpai, koni wɔtsu wɔsɔɔmɔ nitsumɔ lɛ kɛgbe naa.—2 Timoteo 4:5.