Sanebimɔi ni Jɛ Kanelɔi Adɛŋ

Ani Satan Abonsam yɛ nyɛmɔ ní ekɛaale nɔ ni adesa susuɔ he?

Eyɛ mli akɛ wɔbɛ nɔmimaa moŋ, shi etamɔ nɔ ni Satan loo edaimonioi lɛ bɛ nyɛmɔ ni amɛkɛaale nɔ ni wɔsusuɔ he.

Susumɔ shishitsɔɔmɔ ni yɔɔ gbɛii ni akɛha Satan lɛ he okwɛ. Atsɛɔ lɛ Satan (Shitee-kɛ-wolɔ), Abonsam (Heguɔgbelɔ), Onufu (kɛ Shishiulɔ fɛɛ pɛ), Mɔ ni kaa mɔ, kɛ Amalelɔ. (Hiob 1:6; Mateo 4:3; Yohane 8:44; 2 Korintobii 11:3; Kpojiemɔ 12:9) Nɛkɛ gbɛii ni yɔɔ shishitsɔɔmɔ nɛɛ eko eko etsɔɔɔ akɛ Satan yɛ nyɛmɔ ni ekɛaale nɔ ni mɛi susuɔ he.

Shi kɛlɛ, nɔ ni tamɔɔɔ nakai lɛ, awie Yehowa Nyɔŋmɔ he akɛ eji “mɔ ni kaa tsuii ekwɛɔ.” (Abɛi 17:3; 1 Samuel 16:7; 1 Kronika 29:17) Hebribii 4:13 lɛ jaje akɛ: “Ateee bɔɔ nɔ ko yɛ [Yehowa] ehiɛ, shi nibii fɛɛ yɛ faŋŋ ni agbele nɔ yɛ lɛ mɔ ni wɔkɛyɔɔ sane lɛ hiŋmɛiiaŋ.” Ebɛ naakpɛɛ mɔ akɛ Yehowa kɛ nyɛmɔ ni akɛpɛiɔ tsuii amli lɛ eha e-Bi Yesu. Yesu ni atee lɛ shi lɛ jaje akɛ: “Miji mɔ ni taoɔ sabai kɛ tsuii amli, ni maha nyɛteŋ mɔ fɛɛ mɔ bɔ ni nyɛnitsumɔi lɛ yɔɔ lɛ.”—Kpojiemɔ 2:23.

Biblia lɛ ekɛɛɛ akɛ Satan nyɛɔ etaoɔ gbɔmɛi atsuii kɛ jwɛŋmɔi amli. Enɛ sa kadimɔ waa, akɛni bɔfo Paulo ma nɔ aduatsɔ eha wɔ akɛ “[Satan] ejwɛŋmɔi lɛ aŋɔteee” Kristofoi lɛ hewɔ. (2 Korintobii 2:11) No hewɔ lɛ ehe ehiaaa ni wɔshe gbeyei akɛ Satan yɛ nyɛmɔ ko ni teke nɔ ní wɔleee he nɔ ko kwraa.

Kɛlɛ, enɛ etsɔɔɔ akɛ wɔ Henyɛlɔ lɛ nyɛŋ ayoo wɔgbɔjɔmɔi lɛ. Satan kɛ afii ohai abɔ ekase adesa subaŋ. Ehe ehiaaa ni enyɛ ele nɔ ni wɔsusuɔ he dani eyoo sui srɔtoi ni wɔyɔɔ lɛ, ni ena nɔ hiɛtserɛjiemɔ ni wɔdiɔ sɛɛ, loo ni ebo nibii ni wɔwieɔ he lɛ atoi, kɛ nibii krokomɛi. Ekolɛ wɔhiɛ su kɛ gbɔmɔtso lɛ kɛ nitsumɔ hu baaha ena nɔ ni he ni wɔsusuɔ loo bɔ ni wɔnuɔ he wɔhaa.

Shi kɛlɛ, yɛ fɛɛ mli lɛ, Satan kɛ ŋaatsɔɔi ni ekɛtsu nii yɛ Eden abɔɔ lɛ mli lɛ nɔŋŋ tsuɔ nii—amale, lakamɔ, kɛ amale wiemɔ. (1 Mose 3:1-5) Yɛ be mli ni esaaa akɛ Kristofoi sheɔ gbeyei akɛ Satan baale nɔ ni yɔɔ amɛjwɛŋmɔ mli lɛ, amɛyɛ yiŋtoo ni amɛaadamɔ nɔ amɛsusu nɔ susumɔi ni Satan baabɔ mɔdɛŋ akɛ ekɛaawo amɛjwɛŋmɔi amli lɛ he. Eesumɔ ni Kristofoi abatsɔmɔ mɛi ni “amɛjwɛŋmɔi efite ni ashɔ̃ anɔkwale lɛ yɛ amɛdɛŋ.” (1 Timoteo 6:5) Ebɛ naakpɛɛ mɔ akɛ Satan je lɛ eŋmɛɛ saji kɛ hiɛtserɛjiemɔ babaoo ni fiteɔ nii ahe eha mɛi. Bɔni afee ni Kristofoi anyɛ adamɔ nɛkɛ tutuamɔ ni naa wa waa nɛɛ naa lɛ, esa akɛ amɛbu amɛjwɛŋmɔi ahe kɛtsɔ “walaheremɔ dadefai lɛ” ni amɛaabu lɛ nɔ. (Efesobii 6:17) Amɛfeɔ enɛ kɛtsɔ Biblia mli anɔkwalei ni amɛkɛwoɔ amɛjwɛŋmɔi amli obɔ kɛ amɛhe ni amɛtsiɔ kɛjɛɔ sharamɔ ni he bɛ sɛɛnamɔ ni amɛkɛ Satan je lɛ subaŋi gbohii ni baa shi lɛ aaaná lɛ nɔ.

Satan ji henyɛlɔ ni he wa waa. Shi esaaa akɛ wɔsheɔ lɛ loo edaimonioi lɛ agbeyei yɛ gbɛ ni ejaaa nɔ. Yakobo 4:7 lɛ maa nɔ mi kɛhaa wɔ akɛ: “Nyɛtea shi nyɛwoa abonsam, ni eeejo nyɛnaa foi.” Kɛji akɛ wɔkɛ ŋaawoo nɛɛ tsu nii lɛ, wɔbaanyɛ wɔjaje, taakɛ Yesu fee lɛ, akɛ Satan bɛ nɔ ko yɛ wɔmli.—Yohane 14:30.