Halamɔ Naanɔ Wala

MƐI nako nibii amli halamɔi srɔtoi babaoo ni tamɔ nɛkɛ pɛŋ. Akɛ nɔkwɛmɔnɔ lɛ, bei pii lɛ atadei ni wɔwoɔ, niyenii ni wɔyeɔ, kɛ he ni wɔtsuɔ nii yɛ kɛ he ni wɔwɔɔ lɛ ji sane ni kɔɔ nihalamɔ he. Yɛ je lɛŋ hei babaoo lɛ, ákɛ mɔ aaahala ehefatalɔ lɛ hu ji sane ni kɔɔ nihalamɔ he. Shi kɛlɛ, Biblia lɛ kɛ nihalamɔ ko ni tekeɔ nihalamɔi krokomɛi fɛɛ lɛ haa—nihalamɔ ko ni yɔɔ kɛha adesai fɛɛ.

Biblia lɛ kɛɔ akɛ: “Mɔ ni fiɔ shi yɛ jalɛ mli lɛ, eyi aaaná wala; shi mɔ ni nyiɛɔ efɔŋ sɛɛ lɛ, eeená gbele.” (Abɛi 11:19) Ni Yesu Kristo jaje akɛ: “Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.”—Yohane 17:3.

Hɛɛ, wɔ-Bɔlɔ lɛ eha wɔ hegbɛ koni wɔhala gbɛ ko ni baanyɛ ekɛ wɔ aya naanɔ wala mli! Mɛni esa akɛ wɔfee koni wɔná naanɔ wala?

Taakɛ Biblia lɛ tsɔɔ lɛ, “wala yɔɔ jalɛ gbɛ lɛ nɔ.” (Abɛi 12:28) Wɔbaanyɛ wɔfata jalɔi ni nyiɛ gbɛ ni kɛ mɔ yaa naanɔ wala mli lɛ nɔ lɛ ahe. Yɛ mɛɛ gbɛ nɔ? Kɛtsɔ kwɛ ní wɔɔkwɛ akɛ wɔshihilɛ kɛ Nyɔŋmɔ suɔmɔnaa nifeemɔ kɛ ekitai lɛ kpãa gbee lo lɛ nɔ. (Mateo 7:13, 14) No hewɔ lɛ, eba akɛ wɔɔfee nihalamɔ ni ja, koni wɔnine ashɛ Nyɔŋmɔ nikeenii ni ji naanɔ wala lɛ nɔ.—Romabii 6:23.