‘Nyɛhiɛa Henilee Kpakpa’

“HA OHENILEE afee ogbɛtsɔɔlɔ” ji ŋaawoo wiemɔ ko ni afɔɔ numɔ. Shi bɔni afee ni wɔhenilee afee gbɛtsɔɔlɔ ni anyɛɔ akɛ he fɔɔ nɔ lɛ, ehe miihia ni wɔtsɔse lɛ jogbaŋŋ koni enyɛ ele ekpakpa kɛ efɔŋ, ni esa akɛ wɔhiɛ ahi wɔhe nɔ jogbaŋŋ yɛ he ni enyiɛɔ wɔhiɛ kɛyaa lɛ he.

Susumɔ nuu ko ni atsɛɔ lɛ Zakeo lɛ niiashikpamɔ lɛ he okwɛ, taakɛ aŋma yɛ Biblia lɛ mli lɛ. Zakeo ni hi shi yɛ Yeriko lɛ ji toohelɔ nukpa, ni eji niiatsɛ. Lɛ diɛŋtsɛ ekpɛlɛ nɔ akɛ, ená nii ni eyɔɔ lɛ kɛtsɔ amimyeli nɔ—nifeemɔ ko ni eka shi faŋŋ akɛ eyeɔ mɛi krokomɛi awui lɛ. Ani Zakeo henilee gbá enaa yɛ enifeemɔi ni ejaaa lɛ he? Kɛ nakai ni lɛ, belɛ eka shi faŋŋ akɛ ekuɔ ehiɛ eshwieɔ nɔ.—Luka 19:1-7.

Shi kɛlɛ, shihilɛ ko ba ni ha Zakeo saa esusu enifeemɔ gbɛ lɛ he ekoŋŋ. Yesu ba Yeriko. Zakeo ni ji mɔ ko ni kɛɛɛ lɛ miitao ni ekwɛ lɛ, shi yɛ mɛi lɛ ayifalɛ lɛ hewɔ lɛ enyɛɛɛ ena lɛ. No hewɔ lɛ ejo foi kɛtsɔ hiɛ ni eyakwɔ tso ko bɔni afee ni ena lɛ jogbaŋŋ. Akɛni miishɛɛ ní mli wa ni Zakeo jie lɛ kpo lɛ sa Yesu hiɛ waa hewɔ lɛ, ekɛɛ lɛ akɛ ebaayasara lɛ yɛ eshia. Zakeo kɛ miishɛɛ jie gbɔfeemɔ su kpo etsɔɔ egbɔ ni ehe gbɛi waa lɛ.

Nibii ni Zakeo na ni enu beni ekɛ Yesu náa naanyobɔɔ mli ŋɔɔmɔ lɛ ta etsui mli ni etsirɛ lɛ koni etsake egbɛ̀i. Ejaje akɛ: “Naa, miiŋɔ minii fã miike ohiafoi, ni kɛji mikɛ yaka naafolɔmɔ eshɔ̃ mɔ ko nɔ ko yɛ edɛŋ lɛ, miiku miibɔ he toi ejwɛ miiha lɛ.”—Luka 19:8.

Atsɔse Zakeo henilee, ni ebo toi ni etsu he nii. Nibii kpakpai ni jɛ mli ba lɛ tee shɔŋŋ diɛŋtsɛ. Susumɔ bɔ ni Zakeo nu he eha beni Yesu kɛɛ lɛ akɛ: “Ŋmɛnɛ walaheremɔ eba shĩa nɛɛ” lɛ he okwɛ.—Luka 19:9.

Mɛɛ nɔkwɛmɔnɔ ni woɔ mɔ ekãa enɛ ji nɛkɛ! Etsɔɔ akɛ wɔbaanyɛ wɔtsake gbɛ fɛɛ gbɛ ni wɔtiu sɛɛ yɛ be ko ni eho lɛ. Taakɛ Zakeo ji lɛ, wɔbaanyɛ wɔbo Yesu wiemɔi—ni aŋma yɛ Biblia lɛ mli lɛ—toi ni wɔha wɔ ekpakpa kɛ efɔŋ mlikpamɔ lɛ aya hiɛ. Kɛkɛ lɛ, taakɛ bɔfo Petro wo ŋaa lɛ, wɔbaanyɛ ‘wɔhiɛ henilee kpakpa.’ Wɔbaanyɛ wɔbo wɔhenilee ni wɔtsɔse lɛ lɛ toi ni wɔfee nɔ ni ja.—1 Petro 3:16.