Mɛni Obaasumɔ ni Obi Nyɔŋmɔ?

Gbɔmɛi ni yɔɔ je lɛŋ he fɛɛ he lɛ yɛ sanebimɔi ni hiɛdɔɔ yɔɔ he ni kɔɔ shihilɛ he. Ani bo hu nakai nɔŋŋ? Mɛi pii kɛ amɛ sanebimɔi lɛ eyafɔ jamɔŋ nitsɔɔlɔi ahiɛ, shi amɛnine shɛko hetooi ni ja ni haa mɔ tsui nyɔɔ emli lɛ nɔ. Mɛi krokomɛi esusu sanebimɔi nɛɛ ahe yɛ teemɔŋ. Mɛi komɛi esɔle kɛha gbɛtsɔɔmɔ. Ani eeenyɛ eba akɛ onine baanyɛ ashɛ sanebimɔi ni haoɔ bo lɛ ahetooi anɔ kɛjɛ Nyɔŋmɔ ŋɔɔ? Nɔ ni fata sanebimɔi ni mɛi pii ekɛɛ akɛ amɛbaasumɔ ni amɛbi Nyɔŋmɔ lɛ ahe ji enɛɛmɛi.

Nyɔŋmɔ, namɔ kwraa oji?

Gbɔmɛi akusum nifeemɔi, jamɔ mli ni amɛfɔlɔi yɔɔ, kɛ ekolɛ jamɔ ni amɛ diɛŋtsɛ amɛhala lɛ náa bɔ ni amɛsusuɔ Nyɔŋmɔ he amɛhaa lɛ nɔ hewalɛ. Mɛi komɛi kɛ gbɛi ko tsɛɔ Nyɔŋmɔ ni amɛjáa; mɛi krokomɛi tsɛɔ lɛ kɛkɛ akɛ Nyɔŋmɔ. Ani ehe miihia kwraa? Ani anɔkwa Nyɔŋmɔ kome pɛ yɔɔ ni jieɔ ehe kpo kɛ egbɛi kpo etsɔɔ wɔ?

Mɛni hewɔ amanehului efa babaoo nɛkɛ?

Kɛ́ mɔ ko anyagbafeemɔ loo jeŋba shara shihilɛ fite egbɔmɔtsoŋ hewalɛnamɔ loo eha eye ohia futaa lɛ, ekolɛ ebaajie enaa akɛ eshihilɛ lɛ ehiii. Shi ekolɛ ele nɔ diɛŋtsɛ hewɔ ni enaa amanehulu lɛ.

Ni kɛlɛ, mɛi komɛi kɛ amanehulu ni mli wa kpeɔ ni ejɛɛɛ amɛtɔmɔ ko hewɔ. Mɛi komɛi miiye helai ni ehiii tsamɔ. Mɛi krokomɛi kɛ naagbai ni tamɔ nɔ ni anyɛŋ nɔ kunim aye shiɔ mple kɛtaoɔ wɔɔhe kɛ niyenii ni sa amɛhaa amɛwekui lɛ. Mɛi akpekpei abɔ ena amanehulu yɛ efɔŋfeemɔ, tai, awuiyeli ni asusuuu he, adebɔɔ mli osharai, loo jalɛ sane ni ayeee mli yɛ mɛi ni yɔɔ nɔyeli hegbɛi amli lɛ adɛŋ.

Shishinumɔ yɛ he akɛ mɛi pii biɔ akɛ: ‘Mɛni hewɔ shihilɛi ni tamɔ nɛkɛ lɛ egbɛ eshwã he fɛɛ he nakai lɛ? Mɛni hewɔ ni Nyɔŋmɔ ŋmɛɔ amanehului nɛɛ fɛɛ agbɛ?’

 Mɛni hewɔ miyɔɔ biɛ? Mɛni ji yiŋtoo ni yɔɔ shihilɛ sɛɛ?

Bei pii lɛ sanebimɔi ni tamɔ enɛɛmɛi teɔ shi yɛ be mli ni mɔ ko nijiaŋ eje wui yɛ edaa gbi shihilɛ mli nifeemɔi ni kɛ tsui ni nyɔɔ mɔ mli ebahaaa lɛ lɛ hewɔ—ni mɛi babaoo kɛ nijiaŋwujee ni tamɔ nɛkɛ miikpe. Mɛi akpekpei abɔ krokomɛi heɔ yeɔ akɛ, Nyɔŋmɔ etsɔ hiɛ eto mɔ fɛɛ mɔ wala shihilɛ he gbɛjianɔ momo yɛ gbɛ ko nɔ. Ani nakai eji? Kɛ́ eji anɔkwale akɛ Nyɔŋmɔ yɛ yiŋtoo krɛdɛɛ ko kɛha bo lɛ, ŋwanejee ko bɛ he akɛ obaasumɔ ni ole nɔ ni eji.

Yɛ woji fɛɛ ni yɔɔ je lɛ mli lɛ gbɛfaŋ lɛ, ekome pɛ yɔɔ ni tsɔɔ faŋŋ akɛ ejɛ Nyɔŋmɔ mumɔ mli. Taakɛ obaakpa gbɛ yɛ shɛɛ sane ni jɛ Nyɔŋmɔ diɛŋtsɛ ŋɔɔ kɛha adesai fɛɛ lɛ gbɛfaŋ lɛ, nɛkɛ wolo nɛɛ yɛ wiemɔi babaoo mli fe woji krokomɛi fɛɛ ni aŋma pɛŋ. No ji Ŋmalɛ Krɔŋkrɔŋ lɛ. Nyɔŋmɔ diɛŋtsɛ, ni ji ŋwɛi kɛ shikpɔŋ Bɔlɔ lɛ tsɔɔ mɔ ni eji kɛ nɔ ni egbɛi ji yɛ wolo nɛɛ mli. Ani ole nakai gbɛi lɛ? Ani ole nɔ ni Biblia lɛ kɛɔ yɛ nɔ̃ Gbɔmɔ ni Nyɔŋmɔ ji lɛ he? Ani ole nɔ ni ekɛɔ yɛ nɔ ni Nyɔŋmɔ taoɔ yɛ odɛŋ lɛ he?

 [He ni Mfoniri ni yɔɔ baafa 2 lɛ Jɛ]

COVER: Chad Ehlers/Index Stock Photography

[He ni Mfoniri ni yɔɔ baafa 3 lɛ Jɛ]

Gɔŋ: Chad Ehlers/Index Stock Photography