Te Mlihilɛ He Hiaa Ha Tɛŋŋ?

BIBLIA lɛ kɛɔ akɛ: “Gbɔmɔ taomɔ tsɔɔ bɔ ni emli hi ha.” (Abɛi 19:22) Yɛ anɔkwale mli lɛ, hiɛ sɔɔ mlihilɛ nifeemɔi ni suɔmɔ kanyaa efeemɔ lɛ diɛŋtsɛ. Shi kɛlɛ, wiemɔ ni ji “mlihilɛ” ni yɔɔ Biblia lɛ mli lɛ kɔɔ mlihilɛ ko ni ekolɛ abaanyɛ akɛdamɔ wekukpaa ko ni yɔɔ momo lɛ nɔ, tamɔ nɔ ni damɔ mlihilɛ kpo ni mɔ kroko lɛ tsɔ hiɛ ejie lɛ kpo lɛ nɔ. No hewɔ lɛ, nɔ ni fata he ji susumɔ ni tsɔɔ anɔkwayeli.

Maŋtsɛ Yoash ni hi shi yɛ Yuda lɛ naaa nɛkɛ su ni asumɔɔ nɛɛ eko. Esa akɛ eda enyɛkwɛ̃ kɛ Yehoiada, ni ji etsɛkwɛ̃ lɛ shi waa diɛŋtsɛ. Beni Yoash yeko nɔ ni shɛɔ afi kome lɛ, enaa ni yitsoŋ wa waa lɛ tsɔ̃ ehe maŋnyɛ ni egbe Yoash nyɛmimɛi hii lɛ fɛɛ, mɛi ni ji maŋtsɛyeli gboshiniyelɔi lɛ. Kɛlɛ, enyɛɛɛ egbe abifao Yoash ejaakɛ enyɛkwɛ̃ kɛ etsɛkwɛ̃ lɛ kɛ lɛ eto jogbaŋŋ. Amɛtsɔɔ lɛ Nyɔŋmɔ Mla lɛ hu. Beni Yoash ye afii kpawo lɛ, etsɛkwɛ̃ lɛ kɛ hegbɛ ni eyɔɔ akɛ osɔfonukpa lɛ tsu nii ni egbe maŋnyɛ yitsoŋwalɔ lɛ ni ewo Yoash maŋtsɛ.—2 Kronika 22:10–23:15.

Oblanyo fioo Yoash ye nɔ akɛ maŋtsɛ yɛ gbɛ ni yɔɔ fɛo nɔ aahu kɛyashi etsɛkwɛ̃ lɛ gbo, kɛkɛ ni ebɔi wɔŋjamɔ. Nyɔŋmɔ tsu Zakaria ni ji Yehoiada binuu lɛ, koni eyabɔ Yoash kɔkɔ yɛ ehemɔkɛyeli kwamɔ lɛ he. Yoash ha atswia Zakaria tɛi. Mɛɛ anɔkwa ni ayeee weku ni ahiɛ lɛ nyɔmɔ babaoo lɛ he nifeemɔ ko ni haa mɔ naa kpɛɔ ehe po enɛ ji nɛkɛ!—2 Kronika 24:17-21.

Biblia lɛ kɛɔ akɛ: “Maŋtsɛ Yoash kaiii ejurɔ ní [Zakaria] etsɛ Yehoiada fee lɛ lɛ, ni egbe ebi lɛ.” Beni Zakaria gboɔ lɛ ekɛɛ akɛ: “Yehowa aaakwɛ ní ebi shi!” Yɛ Zakaria wiemɔ lɛ mlibaa yɛ anɔkwale mli lɛ, Yoash he baye waa ni lɛ diɛŋtsɛ etsuji gbe lɛ.—2 Kronika 24:17-25.

Yɛ nɔ najiaŋ ni wɔnaagbee baatamɔ Maŋtsɛ Yoash nɔ lɛ, mɛi fɛɛ ni boɔ ŋaawoo nɛɛ toi lɛ baaná wɔsɛɛ be ni yɔɔ nyam akɛ: “Kaaha mlihilɛ anɔkwale miishio. . . . No dani oooná nyam . . . yɛ Nyɔŋmɔ kɛ gbɔmɛi ahiɛ.”—Abɛi 3:3, 4.