Naagbee Gbɛkɛnaashi Niyenii Lɛ—Mɛni Eji?

MƐNI ji nɔ ni baa ojwɛŋmɔ mli kɛji akɛ onu wiemɔ ni ji “naagbee gbɛkɛnaashi niyenii lɛ”? Mɛi babaoo baagbala amɛjwɛŋmɔ kɛya nitɛŋmɔ ni feɔ mɛi fɛo waa ni yɔɔ Milan, Italy, ni nitɛŋlɔ Leonardo da Vinci (1452-1519) tɛŋ lɛ nɔ. Anɔkwale sane ji akɛ, Naagbee Gbɛkɛnaashi Niyenii lɛ ebatsɔ nitɛŋlɔi, woloŋmalɔi, kɛ lalafolɔi asaneyitso ko ni ehe shi waa yɛ yinɔi lɛ amli.

Kɛlɛ, mɛni ji Naagbee Gbɛkɛnaashi Niyenii lɛ, ni mɛɛ shishinumɔ eyɔɔ kɛha mɛi ni yɔɔ shihilɛ mli yɛ afii ohai 21 lɛ mli? Ensaiklopediai kɛ wiemɔ komekomei ashishitsɔɔmɔ woji baakɛɛ bo akɛ, Naagbee Gbɛkɛnaashi Niyenii, ni atsɛɔ lɛ hu akɛ Nuŋtsɔ lɛ Gbɛkɛnaashi Niyenii lɛ, ji niyenii ni Yesu Kristo kɛ ebɔfoi lɛ ye gbɛkɛ ni tsɔ hiɛ dani efɔleshaa gbele lɛ shɛ lɛ. Akɛni eji naagbee gbɛkɛnaashi niyenii ni Yesu kɛ esɛɛnyiɛlɔi anɔkwafoi lɛ ye hewɔ lɛ, afɔɔ lɛ tsɛmɔ akɛ Naagbee Gbɛkɛnaashi Niyenii. Ni akɛni Nuŋtsɔ Yesu Kristo diɛŋtsɛ ji mɔ ni to shishi hewɔ lɛ, gbɛi ni ji Nuŋtsɔ lɛ Gbɛkɛnaashi Niyenii lɛ sa jogbaŋŋ diɛŋtsɛ.

Yɛ afii ohai ni eho lɛ amli lɛ, mɛi babaoo kɛ amɛwala eshã afɔle amɛha nifeemɔ gbɛ̀i ni amɛsusu akɛ nomɛi sa yijiemɔ lɛ. Gbelei nɛɛ ateŋ ekomɛi ahe ba sɛɛnamɔ kɛha mɛi pɔtɛɛi komɛi kɛyashi be ko. Shi kɛlɛ, kɛji ákɛ akɛ enɛ aaato he lɛ, nakai hetuu-kɛhamɔ gbelei lɛ eko eko bɛ ni bɛŋkɛɔ hiamɔ ni Yesu Kristo gbele lɛ he hiaa lɛ he kwraa, ekɔɔɔ he eko bɔ ni ekolɛ amɛsa yijiemɔ amɛha. Kɛfata he lɛ, gbele ko gbele ko bɛ adesai ayinɔsane ni mli eyi obɔ kɛ haomɔi lɛ mli ni baanyɛ aná mɛi anɔ hewalɛ kɛkpele je lɛŋ he fɛɛ he tamɔ enɛ. Mɛni hewɔ?

Bɔni afee ni oha nakai sanebimɔ lɛ hetoo koni aye abua bo ni ona shishinumɔ ni Nuŋtsɔ lɛ Gbɛkɛnaashi Niyenii lɛ yɔɔ kɛha bo lɛ, wɔmiifɔ̃ bo nine ni okane sane ni nyiɛ sɛɛ lɛ.