Akɛ Miishɛɛ Miifɔ̃ Bo Nine

NAAGBEE Gbɛkɛnaashi Niyenii lɛ, ni Nuŋtsɔ Yesu Kristo to shishi aaafee afii 2,000 ni eho nɛ lɛ fe yinɔsane mli nifeemɔ ko kɛkɛ ni ayɔɔ he miishɛɛ. Kɛjɛ be ni ato shishi kɛbaa nɛɛ, ená mɛi anɔ hewalɛ waa. Akɛni nɔ ni mɛi babaoo ekane yɛ Sanekpakpai lɛ amli saji ni kɔɔ nibii ni tee nɔ nakai gbɛkɛ lɛ he lɛ tsirɛ amɛ hewɔ lɛ, amɛbɔ mɔdɛŋ koni amɛkai Nuŋtsɔ lɛ Gbɛkɛnaashi Niyenii lɛ yɛ gbɛ̀i srɔtoi anɔ.

Shishinumɔ yɛ fɛɛ mli, ejaakɛ Yesu Kristo diɛŋtsɛ kɛ famɔ ha esɛɛnyiɛlɔi lɛ ni amɛye nifeemɔ nɛɛ he gbi jurɔ, koni amɛfee lɛ daa. Eje gbɛ ekɛɛ amɛ akɛ: “Nyɛfea enɛ ni nyɛŋɔkai mi.”—Luka 22:19; 1 Korintobii 11:23-25.

Yɛ anɔkwale mli lɛ, bɔni afee ni gbijurɔyeli nɛɛ afee niiashikpamɔ ni nyɔmɔwoo yɔɔ mli aha mɔ ko lɛ, esa akɛ mɔ lɛ aná shishinumɔ ni ja yɛ nɔ ni eshishinumɔ ji taakɛ anaa yɛ Nyɔŋmɔ Wiemɔ, ni ji Biblia lɛ mli lɛ he. Kɛfata he lɛ, ehe miihia ni ale nɔ ni Biblia lɛ yɔɔ kɛɛmɔ yɛ be kɛ bɔ ni esa akɛ aye nifeemɔ lɛ he gbi jurɔ aha lɛ he.

Yɛ Yesu famɔ lɛ toiboo naa lɛ, Yehowa Odasefoi ni yɔɔ jeŋ fɛɛ lɛ baabua amɛhe naa Shɔ gbɛkɛ, April 16, 2003 koni amɛkai Yesu gbele lɛ. Ebaafee be ni amɛkɛbaapɛi Ŋmalɛi lɛ amli, ni amɛku sɛɛ amɛwaje amɛhemɔkɛyeli kɛ suɔmɔ ni amɛyɔɔ kɛha Nuŋtsɔ Yesu Kristo, mɔ ni kɛɛ akɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala” lɛ. (Yohane 3:16) Akɛ miishɛɛ miifɔ̃ bo nine koni obafata amɛhe yɛ nɛkɛ gbi gbɛkɛ nɛɛ nɔ, bɔni afee ni bo hu owo hemɔkɛyeli kɛ suɔmɔ ni oyɔɔ kɛha Yesu Kristo kɛ ŋwɛi Tsɛ, ni ji Yehowa Nyɔŋmɔ lɛ mli hewalɛ.