Ani Eji Satan Yinɔ?

“KƐ WƆSUSU bɔ ni efɔŋfeemɔ mli ewo wu eha yɛ afii ohai 20 ni eho lɛ mli lɛ he lɛ, wɔbaanyɛ wɔkɛɛ akɛ eji Satan yinɔ. Be ko bako ni mɛi ejie shwelɛ kɛ akɔnɔ ni naa wa waa diɛŋtsɛ kpo kɛha mɛi krokomɛi akpekpei abɔ gbee yɛ hewolonɔ su, jamɔ loo kuu mli ni mɔ ko yɔɔ hewɔ tamɔ nɛkɛ dã.”

Nɔ ni kanya wiemɔi ni tsɔ hiɛ lɛ ŋmalamɔ yɛ The New York Times ni je kpo yɛ January 26, 1995 lɛ mli lɛ ji afii 50 gbijurɔyeli ni akɛkaiɔ mɛi ni efeko nɔ ko lɛ ni awo amɛ tsuŋ yɛ Nazi gbele nsarai amli lɛ ajiemɔ lɛ. Hiɛkpatamɔ Kpele—adesai ashishibulemɔi ni ale waa yɛ yinɔsane mli lɛ ateŋ ekome lɛ—kpata Yudafoi aaafee akpekpei ekpaa ahiɛ. Mɛi ni amɛjeee Poland Yudafoi aaafee akpekpei etɛ ahiɛ kpata yɛ nɔ ni áwo lɛ gbɛi akɛ “Hiɛkpatamɔ Kpele ni Akaiii” lɛ mli.

Jonathan Glover wie yɛ ewolo ni ji Humanity—A Moral History of the Twentieth Century lɛ mli akɛ: “Akɔntaabuu ko ni aná kɛjɛ afi 1900 kɛbashi afi 1989 be lɛ mli lɛ tsɔɔ akɛ mɛi akpe-kpei 86 gboi yɛ ta mli.” Ekɛfata he akɛ: “Gboimɔ ni agboi yɛ ta ní awuu yɛ afii ohai nyɔŋmai enyɔ lɛ mli lɛ fa babaoo bɔ ni ewa waa akɛ aaanu shishi. Kɛ ajara gbɔmɛi ni gboi lɛ ayibɔi lɛ mli lɛ, yibɔ ni abaaná lɛ efeŋ nɔ ni ja kwraa, akɛni mɛi ni gboi lɛ ayibɔ lɛ mlijaa etɛ mli enyɔ (akpekpei 58) ji mɛi ni agbe yɛ jeŋ tai enyɔ lɛ amli lɛ hewɔ. Shi kɛ́ ajara gbɔmɛi ni gboi nɛɛ ayibɔ lɛ mli pɛpɛɛpɛ yɛ nakai be lɛ naa lɛ, eeenyɛ efee akɛ, tawuu enyɛ egbe gbɔmɛi aaafee 2,500 daa gbi, Eji mɛi ni fa fe mɛi 100 yɛ ŋmɛlɛtswaa fɛɛ ŋmɛlɛtswaa mli, kɛtsara nɔ afii nyɔŋmai nɛɛhu.”

Enɛ hewɔ lɛ, atsɛ afii ohai 20 lɛ akɛ yinɔi ni ashwie lá shi babaoo yɛ mli fe fɛɛ ni adesai aweku lɛ ena pɛŋ lɛ ateŋ ekome. Nadezhda Mandelstam ŋma yɛ wolo ni ji Hope Against Hope lɛ mli akɛ: “Wɔna kunim ni efɔŋ ye beni afite adesai ashihilɛ gbɛ kpakpa he mlai ní anaanaa nɔ kwraa sɛɛ lɛ.” Yɛ mpleshii ni kã ekpakpa kɛ efɔŋ teŋ lɛ he lɛ, ani efɔŋ eye kunim lɛɛlɛŋ?

 [He ni Mfoniri ni yɔɔ baafa 2 lɛ Jɛ]

COVER: Mother and daughter: J.R. Ripper/SocialPhotos

[He ni Mfoniri ni yɔɔ baafa 3 lɛ Jɛ]

U.S. Department of Energy photograph