Maŋtsɛyeli Jajelɔi Bɔ Amaniɛ

‘Nyɔŋmɔ Wiemɔ lɛ Yɛ Hewalɛ’

YƐ CARIBBEAN ŋshɔkpɔ ni ji Jamaica ni hulu tsoɔ waa yɛ jɛmɛ lɛ mli lɛ, gbɔmɛi babaoo le Biblia lɛ mli. Yɛ anɔkwale mli lɛ, etamɔ nɔ ni abaanyɛ ana King James Version lɛ yɛ shia fɛɛ shia mli, ni mɛi komɛi ekpa shi amɛna akɛ “Nyɔŋmɔ wiemɔ [lɛ] hiɛ kã ni eyɛ hewalɛ.” (Hebribii 4:12) Hewalɛ nɛɛ baanyɛ atsake shihilɛi, taakɛ niiashikpamɔ ni nyiɛ sɛɛ lɛ feɔ he nɔkwɛmɔnɔ lɛ.

Nuu ko ni atsɛɔ lɛ Cleveland jɛ nitsumɔ ebashɛ shia pɛ kɛkɛ ni Yehowa Odasefoi lɛ ateŋ mɔ kome basara lɛ. Be mli ni Odasefonyo lɛ kɛ lɛ esusu saji otii komɛi ahe kɛjɛ Ŋmalɛi lɛ amli lɛ sɛɛ lɛ, eshi Biblia kasemɔ wolo ni ji Nilee Ni Kɛ Mɔ Yaa Naanɔ Wala Mli lɛ eko eha lɛ. Cleveland leee bɔ ni Nyɔŋmɔ Wiemɔ lɛ baaná eshihilɛ nɔ hewalɛ aha.

Cleveland fɔɔ sɔlemɔ shii etɛ daa gbi, ni ebiɔ Nyɔŋmɔ koni eye ebua lɛ ní ena gbɛ ni ja ni esa akɛ etsɔ nɔ ejá Lɛ. Cleveland yiŋ batsɔ akɛ efɔlɔi lɛ jáaa yɛ gbɛ ni ja nɔ, shi beni epɛi jamɔi krokomɛi amli sɛɛ lɛ, enijiaŋ je wui. Eyɛ mli akɛ enu Yehowa Odasefoi ahe saji moŋ, shi eyiŋ fee lɛ kɔshikɔshi kɛji amɛji mɛi ni hiɛ anɔkwale lɛ. Yɛ yiŋkɔshikɔshifeemɔ henumɔi ni ha Cleveland shashao shi lɛ fɛɛ sɛɛ lɛ, ekpɛlɛ akɛ ekɛ Odasefonyo ni ba eshia lɛ baakase Biblia lɛ. Mɛni hewɔ? Ejaakɛ eetao ni eha Odasefoi lɛ ale akɛ amɛjamɔ lɛ ejaaa!

Etsɛɛɛ ni Cleveland kase akɛ bɔlɛnamɔ jeŋba shara shihilɛi ní ekɛ yei srɔtoi enyɔ yɔɔ mli lɛ esaaa Nyɔŋmɔ hiɛ. (1 Korintobii 6:9, 10) Beni amɛkase nikasemɔi enyɔ pɛ sɛɛ lɛ, ená ekãa ni ekɛ yei lɛ kpa shihilɛ. Ebɔi Kristofoi akpeei hu yaa yɛ Maŋtsɛyeli Asa lɛ nɔ. Shi enɛ bafee kaa kroko hu.

Cleveland ji mɔ ko ni tswaa bɔɔl waa ehaa akutso ni eyɔɔ mli lɛ bɔɔltswaa kuu lɛ, ni kuu lɛ bɔɔltswaa lɛ miigba ekpeeiyaa lɛ naa. Mɛni ebaafee? Yɛ nɔnyɛɛ ni naa wa waa ni jɛ Cleveland nanemɛi bɔɔltswalɔi, bɔɔltswaa tsɔɔlɔ lɛ, kɛ nanemɛi aŋɔɔ lɛ fɛɛ sɛɛ lɛ, ekpɛ eyiŋ akɛ ebaashi bɔɔltswaa kuu lɛ. Hɛɛ, Nyɔŋmɔ Wiemɔ lɛ miije shishi eená hewalɛ, eená enɔ hewalɛ koni ená he sɛɛ!

Hewalɛ ni Nyɔŋmɔ Wiemɔ lɛ yɔɔ lɛ bafee faŋŋ ekoŋŋ beni Cleveland je shishi akɛ ebaagba mɛi krokomɛi Biblia mli nilee ni ená lɛ he sane lɛ. (Bɔfoi lɛ Asaji 1:8) Nɔ ni jɛ mli ba ji akɛ, etsutsu nanemɛi bɔɔltswalɔi lɛ ateŋ mɛi enyɔ bɔi Yehowa Odasefoi akpeeiyaa. Beni Cleveland he basa akɛ sanekpakpa shiɛlɔ lɛ sɛɛ lɛ, ená miishɛɛ waa yɛ sɔɔmɔ nitsumɔ lɛ mli, ní ekɛ Nyɔŋmɔ Wiemɔ lɛ miitsu nii kɛmiiye kɛmiibua mɛi krokomɛi.

Akɛni hewalɛ ni yɔɔ Nyɔŋmɔ Wiemɔ lɛ mli lɛ tee nɔ etsirɛ Cleveland hewɔ lɛ, yɛ naagbee lɛ ekɛ nu mli baptisimɔ fee ehenɔjɔɔmɔ kɛha Yehowa lɛ he okadi, ni ená hegbɛ krɛdɛɛ akɛ esɔmɔ akɛ be-fɛɛ sɔɔlɔ kɛ akɛ asafoŋ sɔɔlɔ yɛ asafo lɛ mli.

Yɛ Jamaica kɛ agbɛnɛ yɛ je lɛŋ he fɛɛ he lɛ, gbɔmɛi akpekpei abɔ ekase akɛ, eji anɔkwale akɛ Nyɔŋmɔ Wiemɔ lɛ “hiɛ kã ni eyɛ hewalɛ” lɛɛlɛŋ.

[Shikpɔŋ he mfoniri/Mfoniri ni yɔɔ baafa 8]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

JAMAICA

[He ni Sane lɛ Jɛ]

Map and globe: Mountain High Maps® Copyright © 1997 Digital Wisdom, Inc.