Wala Shihilɛ He Sane

Ninefɔ̃ɔ ni Yehowa Kɛhaa lɛ Nɔkpɛlɛmɔ Kɛ Miishɛɛ Baa

TAAKƐ MARIA DO CÉU ZANARDI GBA

“Yehowa le nɔ ni efeɔ. Kɛ efɔ̃ bo nine lɛ, esa akɛ okɛ heshibaa akpɛlɛ nɔ.” Wiemɔi ni mitsɛ wie aaafee afii 45 ni eho nɛ lɛ, ye ebua mi ni mikpɛlɛ klɛŋklɛŋ ninefɔ̃ɔ ni Yehowa gbɛjianɔtoo lɛ kɛha mi koni mibasɔmɔ ákɛ be fɛɛ sɔɔlɔ lɛ nɔ. Kɛbashi amrɔ nɛɛ, miyɛ hiɛsɔɔ lolo yɛ ŋaawoo ni mitsɛ kɛha mi lɛ he, ejaakɛ ninefɔ̃ɔ ni tamɔ enɛɛmɛi ni mikpɛlɛ nɔ lɛ eha mimii eshɛ mihe waa diɛŋtsɛ.

YƐ AFI 1928 mli lɛ, Ataa shɛ Buu-Mɔɔ wolo tɛtrɛɛ lɛ eko, ni no ha ená Biblia lɛ he miishɛɛ. Akɛni ehi Portugal teŋgbɛ hewɔ lɛ, kpee pɛ ni ekɛ Nyɔŋmɔ asafo lɛ kpeɔ ji woji ni enine shɛɔ nɔ kɛtsɔɔ majemɔ nɔ, kɛ Biblia ni ji minii kɛ minaa nɔ̃ lɛ. Yɛ afi 1949, beni miye afii 13 lɛ, wɔ weku lɛ fã kɛbahi Brazil ni ji Awo jakumaŋ lɛ, ni wɔyahi Rio de Janeiro klotia.

Wɔnanemɛi heei lɛ fɔ̃ nine amɛtsɛ wɔ kɛtee amɛsɔlemɔ lɛ, ni wɔtee shii enyɔ ko. Ataa sumɔɔ ni ebi amɛ saji ni kɔɔ hɛl la, susuma lɛ, kɛ shikpɔŋ lɛ wɔsɛɛ be he—shi amɛnáaa hetooi amɛha. Nɔ ni Ataa fɔɔ kɛɛmɔ ji akɛ: “Nɔ ni ehe baahia ni wɔfee kɛkɛ ji koni wɔmɛ Biblia kaselɔi lɛ diɛŋtsɛ.”

Gbi ko lɛ, nuu shwilafo ko ba wɔ shia lɛ ní ekɛ Buu-Mɔɔ kɛ Awake! miiha. Ataa bi lɛ nakai saji lɛ nɔŋŋ, ni eha hetooi kpakpai ni damɔ Biblia lɛ nɔ. Enɔ otsi lɛ, Yehowa Odasefonyo kroko hu basara wɔ. Beni eha sanebimɔi babaoo hetoo lɛ, ejɛ heshibaa mli ewie akɛ, esa akɛ ekɛ ehe ayawo shiɛmɔ nitsumɔ lɛ mli, ni ekɛ Mateo 13:38 tsɔɔ mli akɛ esa akɛ atsu yɛ jeŋ muu lɛ fɛɛ. Ataa bi akɛ: “Ani mi hu manyɛ maya  eko?” Hetoo ni akɛha ji: “Obaanyɛ.” Wɔmli fili wɔ waa diɛŋtsɛ akɛ wɔnine eshɛ Biblia mli anɔkwale lɛ nɔ ekoŋŋ! Abaptisi Ataa yɛ kpokpaa wulu nɔ kpee ni nyiɛ sɛɛ ba lɛ mli, ni no sɛɛ lɛ, etsɛɛɛ ni abaptisi mi yɛ November 1955.

Klɛŋklɛŋ Ninefɔ̃ɔ ni Akɛha Mi lɛ Nɔkpɛlɛmɔ

Afi kome kɛ fã sɛɛ lɛ, minine shɛ wolo kotoku asara su wulu ko nɔ kɛjɛ Yehowa Odasefoi anitsumɔhe nine lɛ yɛ Rio de Janeiro ni kɛ ninefɔ̃ɔ miiha mi koni mikɛ mihe awo be fɛɛ shiɛmɔ nitsumɔ lɛ mli. Yɛ no beaŋ lɛ, Awo he miiye waa, ni yɛ no hewɔ lɛ, mibi ŋaawoo kɛjɛ mitsɛ dɛŋ. Hetoo ni yɔɔ shiŋŋ ni ekɛha ji: “Yehowa le nɔ ni efeɔ. Kɛ efɔ̃ bo nine lɛ, esa akɛ okɛ heshibaa akpɛlɛ nɔ.” Akɛni nɛkɛ wiemɔi nɛɛ wo mi hewalɛ hewɔ lɛ, miŋma gbɛbimɔ wolo lɛ nɔ nii ni mikɛ mihe wo be fɛɛ sɔɔmɔ lɛ mli yɛ July 1, 1957. He klɛŋklɛŋ ni aha mi nitsumɔ yɛ ji Três Rios, ni ji maŋ ko ni yɔɔ Rio de Janeiro State lɛ.

Shishijee mli lɛ, Três Rios maŋbii lɛ shashao shi akɛ amɛaabo wɔ shɛɛ sane lɛ toi, ejaakɛ wɔkɛ Katolik Biblia shishitsɔɔmɔ lɛ tsuuu nii. Wɔná yelikɛbuamɔ beni wɔkɛ Geraldo Ramalho ni ji Katoliknyo ni hiɛ dɔɔ waa lɛ bɔi Biblia mli nikasemɔ lɛ. Yɛ eyelikɛbuamɔ naa lɛ, minine nyɛ eshɛ Biblia ko nɔ, ní osɔfo ni yɔɔ jɛmɛ lɛ waonaa gbɛi yɔɔ mli. Kɛjɛ nakai beaŋ kɛyaa lɛ, be fɛɛ be ni mɔ ko aaatee shitee-kɛ-woo wiemɔ ko shi lɛ, mikɛ osɔfo lɛ waonaa gbɛi lɛ tsɔɔ lɛ, ni mɔ lɛ etswaaa esɛ̃ŋ dɔŋŋ. Sɛɛ mli lɛ, abaptisi Geraldo.

Mimli fili mi waa diɛŋtsɛ beni afee kpokpaa nɔ kpee yɛ Três Rios maŋ-te lɛ mli tuuntu yɛ afi 1959 lɛ. Polisifonyo nukpa ni kaseɔ Biblia lɛ yɛ nakai beaŋ lɛ to gbɛjianɔ po koni ekɛ okadi mamai ni aŋmala wiemɔ he gbɛjianɔtoo lɛ yɛ nɔ lɛ atsotsoro maŋ lɛŋ he fɛɛ he koni ekɛtswa nifeemɔ lɛ he adafi. Beni mitsu nii afii etɛ yɛ Três Rios lɛ, afɔ̃ mi nine kɛha nitsumɔ hee ko yɛ Itu, aaafee kilomitai 110 yɛ São Paulo anaigbɛ.

Woji Tsuji, Bluu kɛ Wuɔfɔ Sú

Beni mi kɛ mihefatalɔ gbɛgbalɔ lɛ etao tsũ yɛ bei fioo ko sɛɛ lɛ, wɔyahi Maria ni ji okulafo ko ni yɔɔ mlihilɛ lɛ shia ni hejɔlɛ yɔɔ mli lɛ yɛ maŋ-te lɛ mli. Maria kɛ wɔ ye tamɔ lɛ diɛŋtsɛ ebiyei. Shi kɛlɛ, etsɛɛɛ ni Roma Katolik osɔfonukpa ni yɔɔ Itu lɛ yasara lɛ ni ekɛɛ lɛ koni eshwie wɔ kɛjɛ eshia lɛ, shi ekɛ ekãa kɛɛ lɛ akɛ: “Beni miwu gbo lɛ, nyɛshɛjeee mimii kwraa. Nɛkɛ Yehowa Odasefoi nɛɛ eye ebua mi, eyɛ mli moŋ akɛ mijeee amɛjamɔ lɛ mli nyo.”

Yɛ nakai be lɛ nɔŋŋ mli lɛ, yoo ko kɛɛ wɔ akɛ Katolik osɔfoi ni yɔɔ Itu lɛ egu amɛsɔlemɔ lɛ mli bii akɛ amɛkahé “wolo tsuru ni wieɔ Abonsam he lɛ” eko. Wolo ni amɛwieɔ he lɛ ji “Let God Be True,” ni ji Biblia kasemɔ wolo ni wɔkɛhaa mɛi yɛ otsi lɛ mli lɛ. Akɛni osɔfoi lɛ “egu” wolo tsuru lɛ hewɔ lɛ, wɔto shiɛmɔ wiemɔ ko he gbɛjianɔ koni wɔkɛ wolo bluu (“New Heavens and a New Earth”) lɛ aha. Sɛɛ mli beni osɔfoi lɛ nu tsakemɔ nɛɛ he sane lɛ, wɔtee wolo ni hiɛ wuɔfɔ sú (What Has Religion Done  for Mankind?) lɛ nɔ, ni nakai wɔfee aahu kɛtsara nɔ. Ehi jogbaŋŋ akɛ wɔyɛ woji srɔtoi babaoo ni hi kɛ amɛsɛɛ sui srɔtoisrɔtoi!

Beni miye aaafee afi kome yɛ Itu sɛɛ lɛ, minine shɛ tɛligram nɔ ní miifɔ̃ mi nine koni miyatsu nii be kukuoo ko yɛ Betel, ni ji Yehowa Odasefoi anitsumɔhe nine lɛ yɛ Rio de Janeiro koni mikɛsaa mihe kɛha maŋ kpokpaa nɔ kpee lɛ. Mikɛ miishɛɛ kpɛlɛ nɔ.

Hegbɛi Krokomɛi kɛ Ehe Nitsumɔi

Nitsumɔ etãaa yɛ Betel, ni miyɛ miishɛɛ akɛ maye mabua yɛ gbɛ fɛɛ gbɛ nɔ. Kwɛ bɔ ni eji hewalɛwoo akɛ maná daa gbi ŋmalɛ lɛ leebi, kɛ Buu-Mɔɔ Nikasemɔ ni afeɔ daa Ju gbɛkɛ lɛ mli gbɛfaŋnɔ! Otto Estelmann kɛ Betel weku lɛ mli bii krokomɛi lɛ asɔlemɔi ni jɛɔ tsuiŋ lɛ ná minɔ hewalɛ waa diɛŋtsɛ.

Beni agbe maŋ kpokpaa nɔ kpee lɛ naa lɛ, mito mijatsui lɛ koni maku misɛɛ kɛya Itu, shi nɔ ni fee mi naakpɛɛ ji akɛ, nitsumɔhe nine lɛ nɔkwɛlɔ, Grant Miller kɛ wolo ko ní miifɔ̃ mi nine koni matsɔ Betel weku lɛ mlinyo ni baahi jɛmɛ daa lɛ ha mi. Mɔ ni mikɛhi tsũ kome mli ji Nyɛmiyoo Hosa Yazedjian, ni miisɔmɔ amrɔ nɛɛ lolo yɛ Brazil Betel lɛ. Yɛ nakai beaŋ lɛ, Betel weku lɛ edaaa—wɔyi 28 pɛ—ni wɔ fɛɛ lɛ, nanemɛi ni bɛŋkɛ kpaakpa ji wɔ.

Yɛ afi 1964 mli lɛ, oblanyo be fɛɛ sɔɔlɔ ko, ni ji João Zanardi ba Betel kɛha tsɔsemɔ. No mli lɛ eji kpokpaa nɔkwɛlɔ, loo nɔkwɛlɔ gbɛfalɔ yɛ he ni kɛ jɛmɛ jɛkɛɛɛ. Bei komɛi lɛ wɔkpeɔ beni éba Betel koni ekɛ enitsumɔ lɛ he saji abaha lɛ. Nitsumɔhe nine nɔkwɛlɔ lɛ kɛ hegbɛ ha João koni ebaná weku nikasemɔ lɛ mli gbɛfaŋnɔ daa Ju gbɛkɛ, no hewɔ lɛ wɔnyɛɔ wɔfɔɔ sanegbaa waa. Mi kɛ João bote gbalashihilɛ mli yɛ August 1965. Mikɛ miishɛɛ kpɛlɛ ninefɔ̃ɔ ákɛ mifata miwu he yɛ kpokpaa nɔ nitsumɔ mli lɛ nɔ.

Yɛ nakai beaŋ lɛ, gbɛfaa nitsumɔ lɛ ni atsuɔ yɛ Brazil maŋ lɛŋ tuuntu lɛ tamɔ osharai ni atsɔɔ mli. Mihiɛ kpaŋ shiɛlɔi akuu ni yɔɔ Aranha yɛ Minas Gerais State ni wɔyasaraa amɛ lɛ nɔ kɔkɔɔkɔ. Ehe bahiaa ni wɔwo oketeke, koni agbɛnɛ wɔkɛ wɔnane atsa nɔ kɛya—ní wɔtere gbɛfaa baagii, taipraita, tsɔne ni akɛjieɔ sini, shiɛmɔyaa baagii kɛ woji. Kwɛ miishɛɛ ni wɔyɔɔ akɛ wɔɔna Lourival Chantal, ni ji nyɛmi nuu nukpa ni be fɛɛ be lɛ emɛɔ yɛ oketeke maamɔhe lɛ koni etere wɔjatsui lɛ eha wɔ lɛ.

He ni afeɔ kpeei lɛ yɛ yɛ Aranha lɛ ji shia ko ni ahai. Wɔwɔɔ tsũ bibioo ko mli yɛ sɛɛgbɛ. Lai ni yɔɔ afãgbɛ lɛ ji nɔ ni wɔkɛhooɔ nii, ni wɔkɛ eko hu toɔ nula yɛ gogai ni nyɛmimɛi lɛ kɛyafoɔ nu amɛbahaa wɔ lɛ mli. Bu ko ni yɔɔ pampolo ŋmɔ ni bɛŋkɛ jɛmɛ lɛ teŋgbɛ lɛ bafee he ni wɔyaa nii asɛɛ yɛ. Kɛ shɛ gbɛkɛ lɛ, wɔshĩɔ gas la ni kpɛ́ɔ lɛ koni wɔkɛshwie tɔ̃ɔnii—filikilɔi ni baanyɛ eha aná Chagas hela lɛ. Kɛ shɛ leebi lɛ, lasu dĩɔ wɔgugɔjiaŋ be fɛɛ be. Eji sane ni yɔɔ miishɛɛ waa!

Beni wɔsɔmɔɔ yɛ Paraná State lɛ, wɔnine shɛ wolo kotokui wuji asara su lɛ ekome hu nɔ ekoŋŋ kɛjɛ nitsumɔhe nine lɛ. Ni kɛlɛ, ninefɔ̃ɔ kroko hu jɛ Yehowa gbɛjianɔtoo lɛ ŋɔɔ kɛba—yɛ nɛkɛ be nɛɛ mli lɛ koni wɔyasɔmɔ yɛ Portugal! Wolo ni aŋma lɛ wo wɔ ŋaa koni wɔsusu shishitoo mla ni yɔɔ Luka 14:28 lɛ he ní wɔsusu he jogbaŋŋ dani wɔkpɛlɛ nitsumɔ  nɛɛ nɔ, ejaakɛ agu wɔ Kristofoi anitsumɔ lɛ yɛ jɛmɛ, ni Portugal nɔyeli lɛ emɔmɔ nyɛmimɛi lɛ ateŋ mɛi babaoo yɛ jɛmɛ momo.

Ani wɔbaaya shikpɔŋ ko nɔ, ní wɔkɛ yiwaa ni tamɔ nakai baayakpe? João kɛɛ akɛ: “Kɛ wɔnyɛmimɛi Portugalbii lɛ baanyɛ ahi jɛmɛ ni amɛsɔmɔ Yehowa yɛ anɔkwayeli mli lɛ, mɛni hewɔ wɔnyɛŋ wɔfee nakai nɔŋŋ yɛ jɛmɛ?” Beni mikai mitsɛ hewalɛwoo wiemɔi lɛ, mikpɛlɛ nɔ akɛ: “Kɛ Yehowa efɔ́ wɔ nine lɛ, esa akɛ wɔkpɛlɛ nɔ, ní wɔŋɔ wɔhiɛ wɔfɔ̃ enɔ.” No sɛɛ lɛ etsɛɛɛ ni wɔyaje Betel yɛ São Paulo ní wɔnine miishɛ gbɛtsɔɔmɔi anɔ ní wɔmiito wɔwoji ahe gbɛjianɔ kɛha gbɛfãa lɛ.

João Maria kɛ Maria João

Wɔ lɛlɛ ni ji Eugênio C lɛ je gbɛfãa shishi kɛjɛ Santos yɛ São Paulo State lɛji amaamɔhe lɛ yɛ September 6, 1969. Beni wɔye gbii nɛɛhu yɛ ŋshɔ lɛ hiɛ lɛ, wɔyashɛ Portugal. Klɛŋklɛŋ lɛ, wɔye nyɔji babaoo ni wɔkɛ nyɛmimɛi ni yɔɔ niiashikpamɔ lɛ miitsu nii yɛ Alfama kɛ Mouraria gbɛjegbɛi leleooi lɛ ni yɔɔ Lisbon kpokpaa wulu momo lɛ nɔ. Amɛtsɔse wɔ koni wɔyɔse nii jogbaŋŋ bɔni afee ni polisifoi lɛ akana wɔ mra.

Afeɔ asafoŋ kpeei yɛ Odasefoi ashiai amli. Beni wɔyɔse akɛ akutsoŋbii lɛ miikpa wɔ shi lɛ, wɔjie kpeei lɛ kɛtee he kroko amrɔ nɔŋŋ bɔni afee ni akatutua shia lɛ loo akamɔmɔ nyɛmimɛi lɛ. Afeɔ hiɛtserɛjiemɔi taakɛ wɔtsɛɔ wɔkpeei lɛ yɛ Monsanto Park lɛ nɔ, yɛ Lisbon klotia, kɛ agbɛnɛ yɛ Costa da Caparica ni ji he ni koo yɔɔ jɛmɛ lɛ yɛ ŋshɔ lɛ naa. Wɔwoɔ shia atadei kɛyaa kpeei lɛ, ni mɛi komɛi damɔ hei ni sa jogbaŋŋ koni amɛbu. Kɛ mɔ ko ni haa mɔ yiŋ feɔ lɛ kɔshikɔshi ba jɛmɛ lɛ, wɔnáa be wɔtoɔ shwɛmɔ ko he gbɛjianɔ, wɔjeɔ hiɛtserɛjiemɔ ko shishi, loo wɔjeɔ nifeemɔ ko he lala lamɔ shishi.

Bɔni afee ni wɔha ewa waa kɛha polisifoi ni buɔ lɛ ni amɛkayɔse wɔ lɛ, wɔkɛ wɔ gbɛi diɛŋtsɛ tsɛɛɛ wɔhe. Nyɛmimɛi lɛ le wɔ akɛ João Maria kɛ Maria João. Akɛ wɔgbɛi tsuuu nii yɛ woloŋmaa ko kwraa loo yɛ woji amli. Yɛ no najiaŋ lɛ, aha wɔ nɔmbai. Mimia mihiɛ jogbaŋŋ bɔni afee ni mikɛ nyɛmimɛi lɛ adrɛs srɔtoi lɛ akawo miyitsoŋ. Yɛ nɛkɛ gbɛ nɔ lɛ, kɛ́ amɔ mi lɛ, ebafeŋ mlɛo kɛhaŋ mi akɛ matsɔɔ amɛsɛɛ gbɛ.

Yɛ naatsii lɛ fɛɛ sɛɛ lɛ, mi kɛ João tswa wɔfai shi akɛ wɔkɛ hegbɛ fɛɛ hegbɛ ni wɔbaaná  lɛ baatsu nii ni wɔkɛye odase, akɛni wɔle akɛ abaanyɛ amɔmɔ wɔ be fɛɛ be lɛ hewɔ. Wɔkase bɔ ni wɔɔfee ni wɔŋɔ wɔhiɛ wɔfɔ̃ wɔŋwɛi Tsɛ Yehowa nɔ. Akɛni eji wɔ Hebulɔ hewɔ lɛ, ekɛ eŋwɛibɔfoi lɛ tsu nii yɛ gbɛ ni ha wɔnu he akɛ ‘wɔmiina Mɔ ni anaaa lɛ lɛ.’—Hebribii 11:27.

Be ko beni wɔshiɛɔ yɛ shia kɛ shia yɛ Porto lɛ, wɔkɛ nuu ko kpe ni ma nɔ mi doo akɛ eefɔ̃ wɔ nine kɛya eshia. Nyɛmi yoo ni mikɛ lɛ tsuɔ nii lɛ kpɛlɛ ni shishashaomɔ ko kwraa bɛ mli, ni nɔ ko kwraa bɛ ni mafee akɛ ja mifata ehe kɛtee. Nɔ ni ha mitsui fã waa ji akɛ, miyɔse akɛ mfoniri ni tsɔɔ mɔ ko ni wo asraafoi atade tsotsoro ablanaa lɛ nɔ. Te wɔfeɔ tɛŋŋ amrɔ nɛɛ? Wɔgbɔfeelɔ lɛ ha wɔ sɛi, kɛkɛ ni ebi mi akɛ: “Ani obaaha obinuu atsu asraafoi anitsumɔ kɛ́ agbala lɛ awo mli?” Eji shihilɛ ko ni biɔ ŋaa. Beni misɔle dioo sɛɛ lɛ, mikɛ gbee ni baa shi ha hetoo akɛ: “Mibɛ bi ko kwraa, ni miyɛ nɔmimaa akɛ eji mibi bo nii ahesusumɔ sane ko ni tamɔ nɛkɛ kulɛ, obaaha mi hetoo nakai nɔŋŋ.” Efee diŋŋ. No hewɔ lɛ, mitee nɔ akɛ: “Agbɛnɛ kɛ́ ooobi mi akɛ te mɔ nuɔ he ehaa tɛŋŋ kɛ́ enyɛmi nuu loo etsɛ gbo lɛ, no lɛ manyɛ maha hetoo ejaakɛ minyɛmi nuu kɛ mitsɛ fɛɛ egboi.” Yaafonui yimɔ mihiŋmɛiiaŋ obɔbɔ beni miwieɔ lɛ, ni miyɔse akɛ lɛ hu eehe efo. Etsɔɔ mli akɛ, eŋa gbo nyɛsɛɛ nɛɛ. Ebo toi jogbaŋŋ diɛŋtsɛ be mli ni mitsɔɔ lɛ gbohiiashitee hiɛnɔkamɔ lɛ mli lɛ. Kɛkɛ ni wɔkɛ lɛ ye shɛɛ yɛ bulɛ mli ni wɔshi jɛmɛ wɔtee shweshweeshwe, ni wɔshi sane lɛ wɔwo Yehowa dɛŋ.

Yɛ nitsumɔ ni agu lɛ fɛɛ sɛɛ lɛ, aye abua anɔkwafoi koni amɛná anɔkwale lɛ he nilee. Porto ji he ni miwu kɛ Horácio ni ji jarayelɔ ko bɔi nikasemɔ yɛ, ni etee hiɛ oyayaayai. Sɛɛ mli lɛ, ebinuu Emílio ni ji datrɛfonyo ni he esa jogbaŋŋ lɛ hu kpɛ mli akɛ ebaasɔmɔ Yehowa, ni abaptisi lɛ. Yɛ anɔkwale mli lɛ, nɔ ko nɔ ko nyɛŋ atsĩ Yehowa mumɔ krɔŋkrɔŋ lɛ naa.

“Oleŋ Nɔ ni Yehowa Baaŋmɛ Gbɛ Kɔkɔɔkɔ”

Yɛ afi 1973 lɛ, afɔ̃ mi kɛ João nine kɛtee “Nyɔŋmɔ Kunimyeli” Majimaji Ateŋ Kpee yɛ Brussels, Belgium. Nyɛmimɛi akpei abɔ ni jɛ Spain kɛ Belgium lɛ ba, kɛ gbɔi ni jɛ Mozambique, Angola, Cape Verde, Madeira, kɛ Azores hu. Beni Nyɛminuu Knorr ni jɛ nitsumɔhe yitso lɛ yɛ New York kɛ ewiemɔ lɛ baa naagbee lɛ, ewo hewalɛ akɛ: “Yaa nɔ ní okɛ anɔkwayeli asɔmɔ Yehowa. Oleŋ nɔ ni Yehowa baaŋmɛ gbɛ kɔkɔɔkɔ. Namɔ le akɛ ekolɛ obaaya majimaji ateŋ kpokpaa wulu nɔ kpee ni baanyiɛ sɛɛ lɛ yɛ Portugal!”

Enɔ afi lɛ, akpɛlɛ shiɛmɔ nitsumɔ lɛ nɔ yɛ mla naa yɛ Portugal. Ni yɛ Nyɛminuu Knorr wiemɔi lɛ anaa lɛ, wɔfee wɔ klɛŋklɛŋ majimaji ateŋ kpokpaa wulu nɔ kpee lɛ yɛ Lisbon yɛ April 25, 1978. Kwɛ hegbɛ ni wɔná akɛ wɔɔnyiɛ kɛtsɔ Lisbon gbɛjegbɛi lɛ anɔ ni wɔkɛ woji ni wɔwo, woji tɛtrɛbii, ni wɔmiiye odase kɛmiifɔ̃  mɛi nine koni amɛbabo maŋshiɛmɔ lɛ toi! Eji nɔ ko ni wɔsusu he aahu ni eba mli anɔkwale.

Wɔbaná suɔmɔ ni mli wa wɔha wɔnyɛmimɛi Portugalbii lɛ, ní amɛteŋ mɛi babaoo ji mɛi ni awo amɛ tsuŋ ni ayi amɛ yɛ amɛhe ni amɛkɛwooo maŋkwramɔŋ saji amli akɛ Kristofoi lɛ hewɔ lɛ. Nɔ ni wɔshweɔ ji ni wɔya nɔ wɔsɔmɔ yɛ Portugal. Shi kɛlɛ, wɔnyɛɛɛ wɔya nɔ wɔsɔmɔ yɛ jɛmɛ. Yɛ afi 1982 lɛ, João ná tsui hela ko ni naa wa, ni nitsumɔhe nine lɛ wo ŋaa koni wɔku sɛɛ kɛya Brazil.

Kaa Be Ko

Nyɛmimɛi ni yɔɔ Brazil nitsumɔhe nine lɛ ye amɛbua wɔ waa diɛŋtsɛ ni amɛkɛ Quiririm Asafo ni yɔɔ Taubaté yɛ São Paulo State lɛ ha wɔ koni wɔsɔmɔ yɛ mli. João hela lɛ mli bawo wu waa, ni etsɛɛɛ ni eka tsũ mli. Aŋkroaŋkroi ni yɔɔ wiemɔ lɛ he miishɛɛ lɛ ba wɔ shia lɛ kɛha Biblia kasemɔ, ni afeɔ kpeei kɛha shiɛmɔyaa daa gbi kɛ agbɛnɛ woloŋ nikasemɔ daa otsi. Nɛkɛ gbɛjianɔtoi nɛɛ ye ebua wɔ koni wɔya nɔ wɔhiɛ wɔmumɔŋ shidaamɔ lɛ mli.

João tee nɔ efee nɔ ni ebaanyɛ yɛ Yehowa sɔɔmɔ mli aahu kɛyashi beni egbo yɛ October 1, 1985. Minii fee mɔbɔ ni etamɔ nɔ ni mihao, shi mitswa mifai shi koni matsa minitsumɔ lɛ nɔ. Nɔ kroko ni gbalaa mɔ sɛɛ lɛ ba yɛ April 1986 beni julɔi baju nɔ ni miihe ashɛ nɔ fɛɛ nɔ ni miyɔɔ kɛtee lɛ. Enɛ ji klɛŋklɛŋ kwraa ni mihe bafee shoo ni mibashe gbeyei yɛ mishihilɛ mli. Gbalashihilɛ mli hefatalɔi komɛi jɛ amɛsuɔmɔ mli amɛfɔ̃ mi nine koni mikɛ amɛ abahi shi fioo, ni mihiɛ sɔ enɛ jogbaŋŋ diɛŋtsɛ.

João gbele lɛ kɛ juu ni abaju mi lɛ hu ná sɔɔmɔ ni mikɛhaa Yehowa lɛ nɔ hewalɛ. Mináaa nɔmimaa dɔŋŋ yɛ sɔɔmɔ nitsumɔ lɛ mli. Beni miŋma naagba lɛ he sane kɛyaha nitsumɔhe nine lɛ, minine shɛ ninefɔ̃ɔ ko nɔ koni mibahi Betel kɛyashi be ko koni no aye abua mi ni maye mihenumɔŋ piŋmɔ lɛ nɔ. Kwɛ hewalɛwoo ni nakai be lɛ baji kɛha mi!

Beni nibii amli bahi fioo kɛha mi lɛ, mikpɛlɛ nitsumɔ nɔ koni miyasɔmɔ yɛ Ipuã ni ji maŋ ko ni yɔɔ São Paulo maŋ lɛ mli lɛ. Shiɛmɔ nitsumɔ lɛ haaa maná dekã kwraa, shi bei komɛi lɛ, minijiaŋ jeɔ wui. Yɛ bei ni tamɔ nɛkɛ mli lɛ, mitswaa nyɛmimɛi ni yɔɔ Quiririm lɛ tɛlifoŋ, ni weku ko basaraa mi ni amɛkɛ mi hiɔ shi gbii fioo ko. Nakai saramɔi lɛ wo mi hewalɛ waa diɛŋtsɛ! Beni miyɔɔ Ipuã ni miyeko afi kome yɛ jɛmɛ lɛ, nyɛmimɛi hii kɛ yei 38 srɔtoi fãa gbɛ kakadaŋŋ koni amɛbasara mi.

Afii ekpaa yɛ João gbele lɛ sɛɛ yɛ afi 1992 lɛ, minine shɛ ninefɔ̃ɔ kroko hu nɔ kɛjɛ Yehowa gbɛjianɔtoo lɛ ŋɔɔ, shi yɛ nɛkɛ be nɛɛ mli lɛ koni mafã kɛya Franca yɛ São Paulo State, he ni misɔmɔɔ yɛ lolo akɛ be fɛɛ sɔɔlɔ lɛ. Shikpɔŋkuku ni yɔɔ biɛ lɛ woɔ yibii waa diɛŋtsɛ. Yɛ afi 1994 lɛ, mikɛ maŋ lɛ nɔ onukpa lɛ bɔi Biblia lɛ kasemɔ. No mli lɛ eetsu tafaa ko he nii kɛha gbɛhe namɔ yɛ Brazil maŋ kpee lɛ mli, shi yɛ dekã ni enáaa lɛ fɛɛ sɛɛ lɛ, wɔkaseɔ nii daa Ju shwane. Bɔni afee ni akagba nikasemɔ lɛ naa lɛ, egbeɔ etɛlifoŋ lɛ. Kwɛ bɔ ni eha miná miishɛɛ babaoo ha be mli ni mina akɛ eetsi ehe kɛmiijɛ maŋkwramɔ nitsumɔ he fiofio lɛ, ni yɛ anɔkwale lɛ yelikɛbuamɔ naa lɛ, etswa egbalashihilɛ lɛ ema shi ekoŋŋ! Abaptisi lɛ kɛ eŋa fɛɛ yɛ afi 1998.

Kɛ mikai nibii ni tee nɔ lɛ, manyɛ makɛɛ akɛ jɔɔmɔi kɛ hegbɛi babaoo eba mishihilɛ mli ákɛ be fɛɛ sɔɔlɔ. Ninefɔ̃ɔ ni mikpɛlɛ nɔ yɛ Yehowa dɛŋ kɛtsɔ egbɛjianɔtoo lɛ nɔ lɛ eha miná miishɛɛ waa diɛŋtsɛ. Ni ninefɔ̃ɔ fɛɛ ni minine aaashɛ nɔ wɔsɛɛ ko lɛ, suɔmɔ ni miyɔɔ akɛ mikɛaakpɛlɛ nɔ lɛ mli wa waa taakɛ etsɔ hiɛ lɛ.

[Mfonirii ni yɔɔ baafa 25]

Yɛ afi 1957 beni mikɛ mihe wo be fɛɛ sɔɔmɔ lɛ mli lɛ kɛ ŋmɛnɛ

[Mfoniri ni yɔɔ baafa 26]

Mi kɛ Brazil Betel weku lɛ yɛ afi 1963 lɛ mli

[Mfoniri ni yɔɔ baafa 27]

Wɔ yookpeemɔ lɛ yɛ August, afi 1965

[Mfoniri ni yɔɔ baafa 27]

Kpee ni afee yɛ Portugal beni agu nitsumɔ lɛ

[Mfoniri ni yɔɔ baafa 28]

Gbɛjegbɛ nɔ odaseyeli yɛ Lisbon yɛ afi 1978 “Hemɔkɛyeli Kunimyeli” Majimaji Ateŋ Kpokpaa Wulu nɔ Kpee