1-2. (a) Mɛni hewɔ bɔfo Paulo kɛɛ suɔmɔ ji su ni “he hiaa fe fɛɛ” lɛ? (b) Mɛɛ sanebimɔi ahe wɔbaasusu yɛ nikasemɔ nɛɛ mli?

 BE NI bɔfo Paulo wieɔ hemɔkɛyeli, hiɛnɔkamɔ, kɛ suɔmɔ he lɛ, emu esane lɛ naa akɛ, ‘suɔmɔ ji sui nɛɛ ateŋ nɔ ni he hiaa fe fɛɛ.’ (1 Kor. 13:13) Mɛni hewɔ Paulo kɛɛ nakai? Nɔ hewɔ lɛ ji, wɔsɛɛ kɛ́ jeŋ hee ni Nyɔŋmɔ ewo he shi lɛ ba lɛ, ehe ebahiaŋ ni wɔná nakai shiwoo lɛ mli hemɔkɛyeli loo wɔná hiɛnɔkamɔ akɛ ebaaba mli, ejaakɛ eba mli momo. Shi suɔmɔ hu? Ehe baahia ni wɔya nɔ wɔsumɔ Yehowa kɛ wɔnyɛmi gbɔmɔ be fɛɛ be. Anɔkwa, suɔmɔ nɛɛ mli baaya nɔ awa kɛya naanɔ po.

² Akɛni ehe baahia ni wɔya nɔ wɔsumɔ Yehowa kɛ wɔnyɛmi gbɔmɔ be fɛɛ be hewɔ lɛ, wɔbaasusu sanebimɔi etɛ komɛi ahe. Klɛŋklɛŋ nɔ lɛ ji, mɛni hewɔ esa akɛ wɔsumɔ wɔnyɛmimɛi lɛ? Nɔ ni ji enyɔ lɛ, mɛni wɔbaanyɛ wɔfee kɛtsɔɔ akɛ wɔsumɔɔ wɔnyɛmimɛi lɛ? Kɛ nɔ ni ji etɛ lɛ, mɛni wɔbaanyɛ wɔfee koni wɔya nɔ wɔsumɔ amɛ waa?

3. Mɛɛ yiŋtoi ahewɔ esa akɛ wɔsumɔ wɔnyɛmimɛi lɛ?

³ Mɛni hewɔ ehe hiaa ni wɔsumɔ wɔnyɛmimɛi lɛ? Yiŋtoo kome ji akɛ, kɛ́ wɔsumɔɔ wɔnyɛmimɛi lɛ, no hãa anaa akɛ Kristo sɛɛnyiɛlɔi ji wɔ lɛɛlɛŋ. Yesu kɛɛ ebɔfoi lɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛbaale akɛ mikaselɔi ji nyɛ.” (Yoh. 13:35) Agbɛnɛ hu, kɛ́ wɔsumɔɔ wɔhe lɛ, no hãa wɔfeɔ  ekome. Paulo kɛɛ suɔmɔ ji “kpãa ni feɔ mɛi ekome yɛ gbɛ ni eye emuu nɔ.” (Kol. 3:14) Enɛɛmɛi asɛɛ lɛ, wɔyɛ yiŋtoo kroko ni he hiaa waa ni no hewɔ esa akɛ wɔsumɔ wɔnyɛmimɛi lɛ. Bɔfo Yohane kɛɛ enyɛmimɛi Kristofoi lɛ akɛ: “Mɔ fɛɛ mɔ ni sumɔɔ Nyɔŋmɔ lɛ, esa akɛ esumɔ enyɛmi hu.” (1 Yoh. 4:21) No hewɔ lɛ, kɛ́ wɔsumɔɔ wɔnyɛmimɛi lɛ, no hãa anaa akɛ wɔsumɔɔ Nyɔŋmɔ.

4-5. Okɛ nɔkwɛmɔnɔ ko atsɔɔ bɔ ni suɔmɔ ni wɔyɔɔ kɛhã wɔnyɛmimɛi lɛ baanyɛ ahã wɔna kɛji wɔsumɔɔ Nyɔŋmɔ waa.

⁴ Mɛni suɔmɔ ni wɔyɔɔ kɛhã wɔnyɛmimɛi lɛ tsɔɔ wɔ yɛ suɔmɔ ni wɔyɔɔ kɛhã Nyɔŋmɔ lɛ he? Wɔbaanyɛ wɔkɛ bɔ ni wɔgbɔmɔtso lɛ fã ko hãa aleɔ nɔ ni yaa nɔ yɛ wɔtsui he lɛ afee enɛ he nɔkwɛmɔnɔ. Bei pii lɛ, kɛ́ wɔtee helatsamɔhe lɛ, datrɛfoi lɛ yɛ he ko ni amɛmɔɔ yɛ wɔnineshi ni hãa amɛnaa bɔ ni wɔtsui lɛ tsuɔ nii ehãa. Mɛɛ gbɛ nɔ wɔbaanyɛ wɔkɛ enɛ ato sane ni wɔsusuɔ he lɛ he?

⁵ Bɔ ni datrɛfoi lɛ nyɛɔ amɛmɔɔ wɔnineshi ni no hãa amɛleɔ bɔ ni wɔtsui lɛ tsuɔ nii ehãa lɛ, nakai nɔŋŋ suɔmɔ ni wɔyɔɔ kɛhã wɔnyɛmimɛi lɛ baanyɛ ahã wɔna kɛji wɔsumɔɔ Nyɔŋmɔ waa. Kɛ́ wɔna akɛ suɔmɔ ni wɔyɔɔ kɛhã wɔnyɛmimɛi lɛ he miijɔ lɛ, no baanyɛ atsɔɔ akɛ suɔmɔ ni wɔyɔɔ kɛhã Nyɔŋmɔ lɛ hu he miijɔ. Shi kɛ́ wɔsumɔɔ wɔnyɛmimɛi lɛ waa lɛ, belɛ no tsɔɔ akɛ wɔsumɔɔ Nyɔŋmɔ hu waa.

6. Kɛ́ wɔna akɛ suɔmɔ ni wɔyɔɔ kɛhã wɔnyɛmimɛi lɛ he miijɔ lɛ, mɛni hewɔ esa akɛ no ahɛle wɔ shi waa lɛ? (1 Yohane 4:​7-9, 11)

⁶ Kɛ́ wɔna akɛ suɔmɔ ni wɔyɔɔ kɛhã wɔnyɛmimɛi lɛ he miijɔ lɛ, esa akɛ no ahɛle wɔ shi waa. Mɛni hewɔ? Ejaakɛ no baatsɔɔ akɛ wɔ kɛ Yehowa teŋ wekukpaa lɛ miigbɔjɔ. Bɔfo Yohane fee enɛ faŋŋ be ni ewie akɛ: “Mɔ ni sumɔɔɔ enyɛmi ni enaa lɛ lɛ, enyɛŋ esumɔ Nyɔŋmɔ ni enaaa lɛ lɛ.” (1 Yoh. 4:20) Mɛni enɛ tsɔɔ wɔ? Etsɔɔ wɔ akɛ, ja wɔsumɔɔ wɔnyɛmimɛi lɛ dani Yehowa baaná wɔhe miishɛɛ.—Kanemɔ 1 Yohane 4:​7-9, 11.

7-8. Mɛni ji nibii komɛi ni wɔbaanyɛ wɔfee kɛtsɔɔ akɛ wɔsumɔɔ wɔnyɛmimɛi lɛ?

⁷ Awie yɛ Nyɔŋmɔ Wiemɔ lɛ mli shii abɔ akɛ, ‘wɔsumɔsumɔɔ wɔhe.’ (Yoh. 15:​12, 17; Rom. 13:8; 1 Tes. 4:9; 1 Pet. 1:22; 1 Yoh. 4:11) Shi suɔmɔ lɛ, tsui lɛ mli eyɔɔ, ni adesa ko nyɛŋ ana tsui lɛ mli. No hewɔ lɛ, te wɔbaafee tɛŋŋ wɔhã ana akɛ wɔsumɔɔ wɔnyɛmimɛi lɛ? Ja wɔtsɔ wɔwiemɔ kɛ wɔnifeemɔi anɔ.

⁸ Nibii pii yɛ ni wɔbaanyɛ wɔfee kɛtsɔɔ akɛ wɔsumɔɔ wɔnyɛmimɛi lɛ. Naa ekomɛi ni atsɔɔ yɛ Biblia lɛ mli: “Nyɛkɛ nyɛhe awiea anɔkwale.” (Zak. 8:16) “Nyɛkɛ nyɛhe ahia shi yɛ toiŋjɔlɛ mli.” (Mar. 9:50) “Mɔ fɛɛ mɔ kɛ woo ahã enaanyo klɛŋklɛŋ.” (Rom. 12:10) “Nyɛhereherea nyɛhe atuu.” (Rom. 15:7) “Nyɛyaa nɔ . . . nyɛkɛkea nyɛhe tswaa.” (Kol. 3:13) “Nyɛyaa nɔ nyɛkpeekpea nyɛhe kɛterea nyɛjatsui ni tsiitsii lɛ.” (Gal. 6:2) ‘Nyɛyaa nɔ nyɛshɛjea nyɛmii.’ (1 Tes. 4:18) “Nyɛyaa nɔ . . . nyɛtswaa nyɛhe nyɛmaa shi.” (1 Tes. 5:11) “Nyɛsɔlea nyɛhãa nyɛhe.”—Yak. 5:16.

9. Mɛni hewɔ kɛ́ wɔshɛje wɔnyɛmimɛi lɛ amii lɛ, eji nɔ ko ni he hiaa waa ni wɔfeɔ kɛtsɔɔ akɛ wɔsumɔɔ amɛ lɛ? (Kwɛmɔ mfoniri lɛ hu.)

⁹ Hã wɔsusu nibii ni awie he yɛ kuku ni tsɔ hiɛ lɛ mli akɛ wɔbaanyɛ wɔfee kɛtsɔɔ akɛ wɔsumɔɔ wɔnyɛmimɛi lɛ ekome he wɔkwɛ. No ji ŋaa ni Paulo wo akɛ, ‘Nyɛyaa nɔ nyɛshɛjea nyɛmii lɛ.’ Mɛni hewɔ kɛ́ wɔshɛje wɔnyɛmimɛi lɛ amii lɛ, eji nɔ ko ni he hiaa waa ni wɔfeɔ kɛtsɔɔ akɛ wɔsumɔɔ amɛ lɛ? Biblia he wolo ko wie akɛ, Greek wiemɔ ni Paulo kɛtsu nii ni atsɔɔ shishi yɛ biɛ akɛ, ‘ashɛje mii’ lɛ shishi ji, “ni abaadamɔ mɔ ko masɛi ni awo lɛ hewalɛ be ni ekɛ kaa ni naa wa waa kpeɔ  lɛ.” No hewɔ lɛ, kɛ́ wɔshɛje nyɛmi ko ni kɛ shihilɛ ko ni naa wa waa miikpe lɛ mii lɛ, belɛ wɔmiiye wɔmiibua lɛ koni eya nɔ esɔmɔ Yehowa, ni no hãa enaa akɛ wɔsumɔɔ lɛ.—2 Kor. 7:​6, 7, 13.

10. Mɛɛ tsakpaa yɔɔ musuŋtsɔlɛ kɛ miishɛjemɔ teŋ?

¹⁰ Tsakpaa yɛ musuŋtsɔlɛ kɛ miishɛjemɔ teŋ. Mɛni hewɔ wɔkɛɔ nakai? Kɛ́ mɔ ko musuŋ tsɔ lɛ yɛ mɔ ko ni kɛ shihilɛ ko ni naa wa miikpe lɛ he lɛ, eshɛjeɔ mɔ lɛ mii ni efeɔ nɔ ni ebaanyɛ kɛyeɔ ebuaa lɛ. No hewɔ lɛ, kɛ́ wɔmusuŋ tsɔ wɔ yɛ mɛi ahe lɛ, no ji nɔ ni baatsirɛ wɔ ni wɔshɛje amɛmii. Paulo wie nɔ ko ni hãa wɔnaa nakai yɛ Yehowa he. Etsɛ Yehowa akɛ, “musuŋtsɔlɛi a-Tsɛ lɛ kɛ miishɛjemɔ fɛɛ Nyɔŋmɔ lɛ.” (2 Kor. 1:3) Yehowa musuŋ tsɔɔ lɛ waa yɛ mɛi ahe, ni no hewɔ Paulo tsɛ lɛ yɛ biɛ akɛ, “musuŋtsɔlɛi a-Tsɛ” lɛ. Ni musuŋtsɔlɛ nɛɛ ji nɔ ni tsirɛɔ lɛ ni eshɛjeɔ wɔmii yɛ “wɔmanehului fɛɛ amli.” (2 Kor. 1:4) Wɔbaanyɛ wɔkɛ Yehowa ato nuhiŋmɛi ko ni jeɔ nuŋma he. Bɔ ni kɛ́ kuma miiye mɔ ko ni ená nu ni tamɔ nakai enu lɛ etsui nyɔɔ emli lɛ, nakai nɔŋŋ Yehowa shɛjeɔ mɛi ni ehao lɛ amii ni ehãa amɛtsui nyɔɔ amɛmli. Mɛɛ gbɛ nɔ wɔbaanyɛ wɔkase Yehowa ni wɔ hu wɔmusuŋ atsɔ wɔ yɛ mɛi ahe ni wɔshɛje amɛmii? Gbɛ kome ji, ni wɔbaaná sui ni baahã wɔmusuŋ atsɔ wɔ yɛ mɛi ahe ni wɔshɛje amɛmii. Mɛni ji sui nɛɛ ekomɛi?

11. Tamɔ bɔ ni awie yɛ Kolosebii 3:12 kɛ 1 Petro 3:8 lɛ, mɛɛ sui krokomɛi kɛ́ wɔná lɛ, ebaaye ebua wɔ ni wɔya nɔ wɔsumɔ wɔnyɛmimɛi lɛ ni wɔshɛje amɛmii?

¹¹ Mɛni baaye abua wɔ ni wɔya nɔ wɔsumɔ wɔnyɛmimɛi lɛ ni ‘wɔya nɔ wɔshɛje amɛmii’ daa gbi? Nɔ ni baaye abua wɔ ji, ni wɔbaanu he wɔhã amɛ, wɔkɛ amɛ abɔ kpaakpa tamɔ wɔwekumɛi diɛŋtsɛ ji amɛ, ni wɔmli ahi ahã amɛ. (Kanemɔ Kolosebii 3:12; 1 Petro 3:8.) Mɛɛ gbɛ nɔ sui nɛɛ baaye abua wɔ? Kɛ́ wɔmusuŋ tsɔɔ wɔ yɛ wɔnyɛmimɛi lɛ ahe ni amɛsane kã wɔtsui nɔ lɛ, no lɛ, kɛ́ wɔna ni amɛhao lɛ, wɔbaanu he waa akɛ wɔshɛje amɛmii. Tamɔ bɔ ni Yesu wie lɛ, “nɔ ni eyi tsui lɛ obɔ kɛteke nɔ lɛ, no naabu lɛ wieɔ. Gbɔmɔ kpakpa jieɔ nibii kpakpai kɛjɛɔ ejwetrii kpakpai ni ebua naa lɛ amli ehãa.” (Mat. 12:​34, 35) Kɛ́ wɔshɛje wɔnyɛmimɛi lɛ amii lɛ, eji gbɛ kome ni he hiaa waa ni wɔtsɔɔ nɔ wɔtsɔɔ akɛ wɔsumɔɔ amɛ.

12. (a) Mɛni hewɔ esa akɛ wɔhã wɔhiɛ ahi wɔhe nɔ lɛ? (b) Mɛɛ sanebimɔ he wɔbaasusu?

¹² Wɔ fɛɛ wɔmiisumɔ ni ‘wɔya nɔ wɔsumɔ wɔnyɛmimɛi’ lɛ. (1 Yoh. 4:7) Shi ehe miihia waa ni wɔhã kɔkɔ ni Yesu bɔ akɛ “mɛi pii asuɔmɔ lɛ he baajɔ” lɛ ahi wɔjwɛŋmɔ mli. (Mat. 24:12) Nɔ ni Yesu wie nɛɛ etsɔɔɔ akɛ ekaselɔi lɛ ateŋ mɛi pii asuɔmɔ he baajɔ. Shi akɛni wɔkɛ mɛi ni yɔɔ je lɛ mli lɛ ni yɔɔ ni amɛbɛ suɔmɔ hewɔ lɛ, esa akɛ wɔkwɛ jogbaŋŋ ni wɔ hu wɔsuɔmɔ lɛ he akajɔ. Enɛ hewɔ lɛ, nyɛhãa wɔsusua sanebimɔ ni he hiaa nɛɛ he: Mɛni baahã wɔna kɛji wɔsumɔɔ wɔnyɛmimɛi lɛ waa?

13. Mɛni baanyɛ ahã ana kɛji wɔsumɔɔ wɔnyɛmimɛi lɛ waa?

¹³ Nɔ kome ni baaye abua wɔ ni wɔna kɛji wɔsumɔɔ wɔnyɛmimɛi lɛ waa ji, ni wɔbaakwɛ bɔ ni wɔfeɔ wɔnii wɔhãa kɛ́ wɔkɛ shihilɛi komɛi kpe. (2 Kor. 8:8) Bɔfo Petro wie akɛ: “Shi titri lɛ, nyɛsumɔsumɔa nyɛhe kɛ suɔmɔ ni mli wa, ejaakɛ suɔmɔ haa eshai babaoo anɔ.” (1 Pet. 4:8) Nɔ ni ewie nɛɛ hãa wɔnaa akɛ, bɔ ni wɔfeɔ wɔnii wɔhãa kɛji wɔnyɛmimɛi lɛ tɔ̃ wɔnɔ lɛ hãa anaa kɛji wɔsumɔɔ wɔnyɛmimɛi lɛ waa.

14. Yɛ nɔ ni awie yɛ 1 Petro 4:8 lɛ naa lɛ, te esa akɛ wɔsuɔmɔ lɛ aji ahã tɛŋŋ? Okɛ nɔkwɛmɔnɔ ko atsɔɔ enɛ mli.

¹⁴ Nyɛhãa wɔsusua nɔ ni Petro wie lɛ he jogbaŋŋ  wɔkwɛa. Yɛ kuku 8 lɛ klɛŋklɛŋ fã lɛ, etsɔɔ bɔ ni esa akɛ suɔmɔ ni wɔyɔɔ lɛ aji; ekɛɛ esa akɛ efee “suɔmɔ ni mli wa.” Wiemɔ ni Petro kɛtsu nii ni atsɔɔ shishi akɛ “mli wa” lɛ shishitsɔɔmɔ ŋmiiŋmi ji, “ni akpã mli.” Ŋmalɛ lɛ fã ni ji enyɔ lɛ hãa wɔnaa nɔ ni suɔmɔ ni mli wa lɛ baanyɛ atsu. Ehaa eshai ni wɔnyɛmimɛi lɛ feɔ amɛshiɔ wɔ lɛ anɔ. Yɛ gbɛ ko nɔ lɛ, etamɔ nɔ ni wɔkɛ wɔniji emɔ wɔsuɔmɔ lɛ biɛ kɛ biɛ ni wɔmiikpã mli tamɔ mama ko ni lastik yɔɔ mli koni eha “eshai babaoo” anɔ, shi jeee ekome loo enyɔ ko pɛ. Kɛ́ akɛɛ wɔmiiha eshai ni wɔnyɛmimɛi lɛ feɔ lɛ anɔ lɛ, no tsɔɔ akɛ wɔkɛmiike amɛ. Bɔ ni anyɛɔ akɛ mama haa okpɔlɔ ko ni nɔ ewo muji nɔ lɛ, nakai nɔŋŋ wɔsuɔmɔ lɛ baanyɛ aha wɔnyɛmimɛi lɛ atɔmɔi kɛ nibii krokomɛi ni amɛfeɔ amɛshiɔ wɔ lɛ anɔ.

15. Kɛ́ wɔsumɔɔ wɔnyɛmimɛi lɛ waa lɛ, mɛni wɔbaafee? (Kolosebii 3:13)

¹⁵ Kɛ́ wɔsumɔɔ wɔnyɛmimɛi lɛ waa lɛ, wɔkɛ amɛtɔmɔi baake amɛ, kɛ́ bei komɛi lɛ nakai feemɔ wa waa kɛhã wɔ po. (Kanemɔ Kolosebii 3:13.) Be fɛɛ be ni wɔkɛ mɛi atɔmɔi baake amɛ lɛ, no hãa anaa akɛ wɔsuɔmɔ lɛ mli wa, ni wɔmiisumɔ ni Yehowa aná wɔhe miishɛɛ. Mɛni ekoŋŋ baaye abua wɔ ni wɔkɛ  wɔnyɛmimɛi lɛ atɔmɔi ake amɛ ni wɔku wɔhiɛ wɔshwie nibii ni amɛfeɔ ni woɔ wɔmli la lɛ anɔ?

16-17. Mɛni ji nɔ kroko ni baaye abua wɔ ni wɔkɛ nibii ni wɔnyɛmimɛi lɛ feɔ ni woɔ wɔmlila loo edɔɔ wɔ lɛ ake amɛ? Okɛ nɔkwɛmɔnɔ ko atsɔɔ enɛ mli. (Kwɛmɔ mfoniri lɛ hu.)

¹⁶ Nɔ kroko ni baaye abua wɔ ji, ni wɔkɛ wɔjwɛŋmɔ baama nibii ni wɔsumɔɔ yɛ wɔnyɛmimɛi lɛ ahe lɛ anɔ, shi jeee nibii ni wɔsumɔɔɔ yɛ amɛhe lɛ. Hã wɔfee enɛ he nɔkwɛmɔnɔ yɛ nɛkɛ gbɛ nɔ. Ŋɔɔ lɛ akɛ, okɛ nyɛmimɛi komɛi etee henaabuamɔ ko. Nyɛyaná nyɛhewɔŋ miishɛɛ waa. Shi dani nyɛbaashi lɛ, okɛɛ amɛ akɛ amɛba ni nyɛsha mfoniri. Osha mfonirii lɛ etɛ sɔŋŋ koni kɛ́ aleenɔ eko eyafeee fɛo lɛ, ojie yɛ mli. Be ni okwɛɔ mfonirii etɛ lɛ, ona akɛ ekome ko yɛ mli ni nyɛmi lɛ eko eŋa ehiŋmɛii yɛ mli. Mɛni obaafee nakai mfoniri lɛ? Obaajie yɛ mli, ejaakɛ oyɛ mfonirii enyɔ sɔŋŋ ni mɔ fɛɛ mɔ, ni nakai nyɛmi lɛ hu fata he lɛ, miiŋmɔ yɛ mli.

¹⁷ Wɔbaanyɛ wɔkɛ mfonirii lɛ ato wɔnyɛmimɛi lɛ ahe saji ni wɔle lɛ ahe. Bei pii lɛ, kɛ́ wɔkɛ wɔnyɛmimɛi lɛ fee ekome kɛfee nɔ ko lɛ, wɔnáa miishɛɛ waa, ni wɔhiɛ kpaaa nɔ kɔkɔɔkɔ. Shi ŋɔɔ lɛ akɛ, be ko be ni okɛ nyɛmimɛi komɛi ebua nyɛhe naa ni nyɛmiiná nyɛhewɔŋ miishɛɛ lɛ, nyɛmi lɛ eko fee nɔ ko loo ewie nɔ ko ni dɔ bo waa. Mɛni esa akɛ ofee? Esa akɛ ojie yɛ ojwɛŋmɔ mli, tamɔ bɔ ni obaajie mfoniri ni bɛ fɛo lɛ yɛ ekrokomɛi lɛ ateŋ lɛ. (Abɛi 19:11; Efe. 4:32) Akɛni wɔkaiɔ nibii  kpakpai babaoo ni wɔkɛ wɔnyɛmi lɛ efee ni hã wɔná miishɛɛ hewɔ lɛ, esaaa akɛ efeɔ naagba kwraa akɛ wɔbaajie nɔ ni efee ni gba wɔnaa lɛ kɛje wɔjwɛŋmɔ mli. Wɔmiisumɔ ni wɔkɛ nibii kpakpai ni wɔkaiɔ yɛ ehe lɛ pɛ ato wɔjwɛŋmɔ mli.

18. Mɛɛ nibii titrii wɔkase yɛ suɔmɔ he yɛ nikasemɔ nɛɛ mli?

¹⁸ Mɛni hewɔ ehe miihia ni wɔya nɔ wɔsumɔ wɔnyɛmimɛi lɛ waa? Nikasemɔ nɛɛ eye ebua wɔ ni wɔna akɛ, kɛ́ wɔsumɔɔ wɔnyɛmimɛi lɛ, no ji nɔ ni baatsɔɔ akɛ wɔsumɔɔ Yehowa. Mɛni wɔbaanyɛ wɔfee kɛtsɔɔ akɛ wɔsumɔɔ wɔnyɛmimɛi lɛ? Nɔ kome ni wɔbaanyɛ wɔfee ji, ni wɔbaashɛje amɛmii. Kɛ́ wɔmusuŋ tsɔɔ wɔ yɛ amɛhe lɛ, no baaye abua wɔ ni ‘wɔya nɔ wɔshɛje amɛmii.’ Mɛni wɔbaanyɛ wɔfee koni wɔya nɔ wɔsumɔ wɔnyɛmimɛi lɛ waa? No ji, ni wɔbaamia wɔhiɛ ni wɔkɛ wɔnyɛmimɛi lɛ atɔmɔi ake amɛ kɛ́ efeemɔ wa kɛhã wɔ po.

19. Mɛni hewɔ ehe hiaa waa ni wɔsumɔ wɔnyɛmimɛi lɛ waa bianɛ?

¹⁹ Mɛni hewɔ ehe miihia waa ni wɔsumɔ wɔnyɛmimɛi lɛ bianɛ? Petro hã wɔna nɔ hewɔ. Ewie akɛ: “Nibii fɛɛ anaagbee eshɛ etã. No hewɔ lɛ, . . . nyɛsumɔsumɔa nyɛhe kɛ suɔmɔ ni mli wa.” (1 Pet. 4:​7, 8) Be ni jeŋ fɔŋ nɛɛ naagbee lɛ bɛŋkɛɔ lɛ, mɛni esa akɛ wɔkpa gbɛ? Yesu tsɔɔ nɔ ni baaba esɛɛnyiɛlɔi lɛ anɔ. Ewie akɛ: “Jeŋmaji lɛ fɛɛ baanyɛ nyɛ yɛ migbɛ́i lɛ hewɔ.” (Mat. 24:9) Nɔ ni baaye abua wɔ ni wɔfi shi kɛ́ je lɛ miinyɛ wɔ ji, ni wɔbaaya nɔ wɔfee ekome. Kɛ́ wɔfee nakai lɛ, Satan nyɛŋ egbála wɔmli kɔkɔɔkɔ, ejaakɛ suɔmɔ, ni ji “kpãa ni feɔ mɛi ekome yɛ gbɛ ni eye emuu nɔ” lɛ, efee wɔ ekome.—Kol. 3:14; Fip. 2:​1, 2.