Yɛ nyɔji ni nyiɛ sɛɛ lɛ mli lɛ, Hitoshi nu he akɛ ebaawa akɛ ebaaná nitsumɔ. Akɛ nɔkwɛmɔnɔ lɛ, be ko be ni abiɔ Hitoshi saji kɛhã nitsumɔ ko ni etaoɔ lɛ, ewie akɛ enyɛŋ emale yɛ nibii ni ebaatsu lɛ mli. Mɔ ni biɔ lɛ saji lɛ wie akɛ, “Bɔ ni osusuɔ nii ahe ohãa lɛ ehã mihiɛ miifee mi yaa!” Hitoshi weku lɛ kɛ enanemɛi wo lɛ hewalɛ ni ehiɛ shidaamɔ ni ekɔ akɛ ebaaye anɔkwa lɛ mli, shi eshɛ he ko ni eyiŋ bɔi lɛ kɔshikɔshifeemɔ. Akɛ nɔkwɛmɔnɔ lɛ, ewie akɛ, “Mishwie miyiŋ akɛ, ani ehi akɛ maye anɔkwa yɛ mihemɔkɛyeli lɛ hewɔ lo?”

Hitoshi niiashikpamɔ lɛ hãa wɔnaa akɛ, jeee mɔ fɛɛ buɔ anɔkwayeli akɛ nɔ ko ni hi. Yɛ anɔkwale mli lɛ, mɛi komɛi buɔ lɛ po akɛ eji buulufeemɔ, titri lɛ yɛ nitsumɔhei. Yoo ko ni tsuɔ nii yɛ South Africa lɛ wie akɛ, “Mɛi ni mikɛtsuɔ nii lɛ yeee anɔkwa, ni bei komɛi lɛ anyɛɔ onɔ koni bo hu ofee nakai.”

Nɔ kroko hu ni etsɔɔɔ anɔkwayeli ni ehe shi waa ŋmɛnɛ ji malemɔ. Afii fioo komɛi ni eho nɛ lɛ, niiamlitaomɔ ko ni jwɛŋmɔ he nilelɔ ko ni atsɛɔ lɛ Robert S. Feldman ni yɔɔ University of Massachusetts Amherst lɛ fee lɛ tsɔɔ akɛ, kɛ́ onukpai miigba sane lɛ, yɛ minitii nyɔŋma pɛ mli lɛ, amɛteŋ mɛi ohã mlijaa 60 maleɔ. Feldman wie akɛ, “Sane nɛɛ yɛ naakpɛɛ waa. Wɔkpaaa gbɛ akɛ malemɔ baafee wɔdaa gbi shihilɛ lɛ fã.” Naakpɛɛ sane ji akɛ, mɛi babaoo sumɔɔɔ ni amaleɔ amɛ, shi kɛ̃lɛ, mɛi babaoo maleɔ?

Mɛni hewɔ malemɔ, juu, kɛ nibii krokomɛi ni afeɔ ni etsɔɔɔ anɔkwayeli lɛ efa waa ŋmɛnɛ nɛkɛ? Mɛɛ gbɛ nɔ anɔkwa ni ayeee lɛ saa mɔ fɛɛ mɔ he? Ni nɔ ni fe fɛɛ lɛ, mɛni wɔbaanyɛ wɔfee koni wɔkɛ wɔhe akawo nifeemɔi nɛɛ ni tsɔɔ anɔkwa ni ayeee lɛ mli?