Lalai 73:1-28
Lala ni Asaf fo.+
73 Lɛɛlɛŋ, Nyɔŋmɔ hi hã Israel, ehi hã mɛi ni tsui mli tse lɛ.+
2 Mi lɛ, shwɛ fioo ni minaji adu gbɛ;Shwɛ sharao ni minaji ashane.+
3 Ejaakɛ mihiɛ kɔ̃ mɛi ni shwãa* lɛ anɔBe ni mina bɔ ni mɛi fɔji lɛ atoiiaŋ ejɔ amɛ lɛ.+
4 Ejaakɛ amɛpiŋŋ yɛ amɛgbele mli;Amɛyɛ gbɔmɔtsoŋ hewalɛ.*+
5 Etɔɔɔ amɛ tamɔ adesai krokomɛi,+Amɛnaaa nɔ tamɔ gbɔmɛi krokomɛi.+
6 No hewɔ lɛ, henɔwomɔ ji amɛkuɛnii;+Yiwalɛ ewula amɛ tamɔ atade.
7 Nii ni amɛyɔɔ lɛ* ehã amɛhiŋmɛii ekɛ̃lɛ ebamamɔ shi;Amɛná fe nɔ ni amɛshwe yɛ amɛtsui mli lɛ.
8 Amɛyeɔ mɛi ahe fɛo ni amɛwieɔ saji fɔji.+
Amɛjɛɔ henɔwomɔ mli amɛkaa akɛ amɛbaawa mɛi ayi.+
9 Amɛwieɔ tamɔ nɔ ni amɛshɛɔ ŋwɛi tɔ̃ɔ,Ni amɛlilɛi shwãa kɛyaa kɛbaa yɛ shikpɔŋ lɛ nɔ.
10 No hewɔ lɛ, emaŋ lɛ tsɔɔ amɛhe kɛyaa amɛŋɔɔ,Ni amɛnuɔ amɛnu babaoo lɛ eko.*
11 Amɛkɛɔ akɛ: “Te Nyɔŋmɔ aaafee tɛŋŋ ale lɛ?+
Ani Mɔ Ni Nɔ Kwɔ Fe Fɛɛ le nɔ ko?”
12 Hɛɛ, nɛkɛ ji bɔ ni mɛi fɔji lɛ yɔɔ, mɛi ni be fɛɛ be lɛ, nibii ahe ejɔ ehã amɛ lɛ.+
Amɛyaa nɔ amɛbuaa nii babaoo naa amɛhãa amɛhe.+
13 Lɛɛlɛŋ, mihã mitsui mli etse efolo,Ni mifɔ miniji ahe efolo akɛ mɔ ni sane ko bɛ ehe.+
14 Ni mihao gbi muu fɛɛ;+Daa leebi lɛ, akãa mihiɛ.+
15 Shi eji miwie saji nɛɛ kulɛ,Miyeko omaŋbii* lɛ anɔkwa.
16 Be ni mibɔ mɔdɛŋ akɛ manu shishi lɛ,Ehao mi aahu
17 Kɛyashi mibote Nyɔŋmɔ jamɔhe kpele lɛ mli,Ni miyɔse bɔ ni amɛwɔsɛɛ baaji ahã.
18 Lɛɛlɛŋ, okɛ amɛ eto he ko ni shamɔɔ trotro.+
Obaahã amɛgbee shi ni amɛhiɛ akpãtã.+
19 Amɛhiɛ baakpãtã trukaa!+
Amɛnaagbee baaba trukaa yɛ gbɛ ni yɔɔ gbeyei nɔ!
20 Ao Yehowa, bɔ ni kɛ́ mɔ ko hiɛ tsɛ̃ yɛ lamɔ mli lɛ elamɔ lɛ laajeɔ lɛ,Nakai kɛ́ owó ohe nɔ lɛ, obaahã amɛhe mfoniri lɛ alaaje.*
21 Shi mitsui werɛ ho ehe,+Ni minu piŋmɔ ni naa wa he yɛ mimli tɔ̃ɔ.*
22 Mibɛ jwɛŋmɔ, ni minuuu nii ashishi;Mitamɔ kooloo yɛ ohiɛ.
23 Shi amrɔ nɛɛ miyɛ omasɛi be fɛɛ be;Ohiɛ mininejurɔ mli.+
24 Okɛ oŋaawoo lɛ tsɔɔ mi gbɛ,+Ni no sɛɛ lɛ, obaanyiɛ mihiɛ kɛya anunyam mli.+
25 Namɔ ekoŋŋ miyɔɔ yɛ ŋwɛi?
Ni osɛɛ lɛ, mitaooo nɔ ko yɛ shikpɔŋ lɛ nɔ.+
26 Migbɔmɔtso kɛ mitsui he baanyɛ ajɔ moŋ,Shi Nyɔŋmɔ ji mitsui tɛsaa kɛ migbɛfaŋnɔ kɛmiiya naanɔ.+
27 Anɔkwa, mɛi ni kɛ bo teŋ jekɛ lɛ, ahiɛ baakpãtã.
Mɔ fɛɛ mɔ ni yeee bo anɔkwa lɛ,* obaakpãtã ehiɛ.*+
28 Shi mi lɛ, ehi hã mi akɛ matsi mabɛŋkɛ Nyɔŋmɔ.+
Mikɛ Nuŋtsɔ Ofe Yehowa efee mibobaahe,Koni majaje enitsumɔi lɛ fɛɛ matsɔɔ.+
Shishigbɛ Niŋmaa
^ Loo “naafuutsɛmɛi.”
^ Loo “Amɛmusuŋ ewo fɔ.”
^ Hebri sht. ŋm., “Fɔ.”
^ Eeenyɛ efee akɛ, Nyɔŋmɔ maŋ lɛ tsɔɔ amɛhe amɛyanuɔ mɛi fɔji lɛ anu lɛ eko.
^ Hebri sht. ŋm., “obihii lɛ ayinɔbii.”
^ Hebri sht. ŋm., “obaagbe amɛhe mfoniri lɛ he guɔ.”
^ Hebri sht. ŋm., “yɛ misabai amli.”
^ Loo “Mɔ fɛɛ mɔ ni feɔ enii tamɔ ajwamaŋbɔlɔ lɛ.”
^ Hebri sht. ŋm., “obaahã efee diŋŋ.”
