Daniel 3:1-30
-
Maŋtsɛ Nebukadnezar shika tsuru amaga lɛ (1-7)
-
Maŋtsɛ lɛ bi ni ajá amaga lɛ (4-6)
-
-
Akɛ sane fɔ̃ Hebribii etɛ lɛ nɔ akɛ amɛbooo maŋtsɛ lɛ toi (8-18)
-
“Wɔsɔmɔŋ onyɔŋmɔi lɛ” (18)
-
-
Ashɛrɛ amɛ ashwie la kɛ flɔnɔɔ lɛ mli (19-23)
-
Atsɔ naakpɛɛ gbɛ nɔ ajie amɛ kɛje la lɛ mli (24-27)
-
Maŋtsɛ lɛ jie Hebribii lɛ a-Nyɔŋmɔ lɛ yi (28-30)
3 Nebukadnezar ni ji maŋtsɛ lɛ fee shika tsuru amaga ko ni kwɔlɛ ji ninetalɔi 60,* ni elɛɛmɔ ji ninetalɔi 6.* Ekɛma shi yɛ Dura ŋa lɛ nɔ yɛ Babilon kpokpaa lɛ nɔ.
2 Kɛkɛ ni Maŋtsɛ Nebukadnezar tsu koni ayabua kpokpaa nɔkwɛlɔi* lɛ, kɛ hiɛnyiɛlɔi lɛ, kɛ amralofoi lɛ, kɛ ŋaawolɔi lɛ, kɛ jwetri nɔkwɛlɔi lɛ, kɛ kojolɔi lɛ, kɛ saneyelɔi lɛ, kɛ kpokpai lɛ anɔ onukpai lɛ fɛɛ anaa kɛba amaga ni Maŋtsɛ Nebukadnezar efee ema shi lɛ naagbelemɔ lɛ shishi.
3 No hewɔ lɛ, kpokpaa nɔkwɛlɔi* lɛ, kɛ hiɛnyiɛlɔi lɛ, kɛ amralofoi lɛ, kɛ ŋaawolɔi lɛ, kɛ jwetri nɔkwɛlɔi lɛ, kɛ kojolɔi lɛ, kɛ saneyelɔi lɛ, kɛ kpokpai lɛ anɔ onukpai lɛ fɛɛ babua amɛhe naa kɛhã amaga ni Maŋtsɛ Nebukadnezar efee ema shi lɛ naagbelemɔ lɛ. Ni amɛyadamɔ amaga ni Maŋtsɛ Nebukadnezar efee ema shi lɛ hiɛ.
4 Kɛkɛ ni adafitswalɔ lɛ bo waa akɛ: “Nyɛ majimaji, kɛ jeŋmaji, kɛ wiemɔ kui, aafã nyɛ akɛ,
5 kɛ́ nyɛnu tɛtɛrɛmantɛrɛ* lɛ, kɛ bɛlɛ lɛ, kɛ zita lɛ, kɛ saŋku ni hiɛ koji etɛ lɛ, kɛ kpãa saŋku lɛ, kɛ bɛlɛ agbo lɛ, kɛ nibii krokomɛi ni akɛtswaa lala lɛ fɛɛ agbɛɛmɔ lɛ, nyɛkɛ nyɛhiɛ abumɔa shi ni nyɛjáa amaga lɛ ni Maŋtsɛ Nebukadnezar efee ema shi lɛ.
6 Mɔ fɛɛ mɔ ni kɛ ehiɛ buuu shi ni ebaajá lɛ lɛ, abaashɛ lɛ afɔ̃ la kɛ flɔnɔɔ ni tsoɔ grigri lɛ mli amrɔ nɔŋŋ.”+
7 No hewɔ lɛ, be ni majimaji lɛ fɛɛ nu tɛtɛrɛmantɛrɛ* lɛ, kɛ bɛlɛ lɛ, kɛ zita lɛ, kɛ saŋku ni hiɛ koji etɛ lɛ, kɛ kpãa saŋku lɛ, kɛ bɛlɛ agbo lɛ, kɛ nibii krokomɛi ni akɛtswaa lala lɛ fɛɛ agbɛɛmɔ lɛ, majimaji lɛ, kɛ jeŋmaji lɛ, kɛ wiemɔ kui lɛ fɛɛ kɛ amɛhiɛ bumɔ shi ni amɛjá shika tsuru amaga ni Maŋtsɛ Nebukadnezar efee ema shi lɛ.
8 Agbɛnɛ, yɛ nakai be lɛ mli lɛ, Kaldeabii komɛi je kpo kɛba ni amɛbafo sane amɛfɔ̃ Yudafoi lɛ anɔ.*
9 Amɛkɛɛ Maŋtsɛ Nebukadnezar akɛ: “Maŋtsɛ, oyi aná wala kɛya naanɔ.
10 Maŋtsɛ, bo ofã akɛ gbɔmɔ fɛɛ gbɔmɔ ni baanu tɛtɛrɛmantɛrɛ* lɛ, kɛ bɛlɛ lɛ, kɛ zita lɛ, kɛ saŋku ni hiɛ koji etɛ lɛ, kɛ kpãa saŋku lɛ, kɛ bɛlɛ agbo lɛ, kɛ nibii krokomɛi ni akɛtswaa lala lɛ fɛɛ agbɛɛmɔ lɛ, ekɛ ehiɛ abu shi ni ejá shika tsuru amaga lɛ;
11 ni mɔ fɛɛ mɔ ni kɛ ehiɛ buuu shi ni ebaajá lɛ lɛ, abaashɛ lɛ afɔ̃ la kɛ flɔnɔɔ ni tsoɔ grigri lɛ mli.+
12 Shi Yudafoi komɛi yɛ ni owó amɛ onukpai yɛ Babilon kpokpaa lɛ nɔ, amɛji: Shadrak, kɛ Meshak, kɛ Abednego.+ Maŋtsɛ, nɛkɛ hii nɛɛ ebuuu bo amɛhãaa nɔ ko nɔ ko. Amɛsɔmɔɔɔ onyɔŋmɔi lɛ, ni amɛkɛɛ amɛjáaa shika tsuru amaga ni ofee oma shi lɛ hu.”
13 Kɛkɛ ni Nebukadnezar mli fu waa ni efã ni akɛ Shadrak, kɛ Meshak, kɛ Abednego aba ehiɛ. No hewɔ lɛ, akɛ hii nɛɛ ba maŋtsɛ lɛ hiɛ.
14 Nebukadnezar kɛɛ amɛ akɛ: “Shadrak, kɛ Meshak, kɛ Abednego, lɛɛlɛŋ akɛ nyɛsɔmɔɔɔ minyɔŋmɔi lɛ,+ ni nyɛkɛɛ nyɛjáaa shika tsuru amaga ni mifee mima shi lɛ?
15 Agbɛnɛ kɛ́ nyɛnu tɛtɛrɛmantɛrɛ* lɛ, kɛ bɛlɛ lɛ, kɛ zita lɛ, kɛ saŋku ni hiɛ koji etɛ lɛ, kɛ kpãa saŋku lɛ, kɛ bɛlɛ agbo lɛ, kɛ nibii krokomɛi ni akɛtswaa lala lɛ fɛɛ agbɛɛmɔ, ni nyɛfee klalo akɛ nyɛkɛ nyɛhiɛ baabumɔ shi ni nyɛjá amaga ni mifee lɛ, no lɛ, sane ko bɛ. Shi kɛ́ nyɛkɛɛ nyɛjáaa lɛ lɛ, no lɛ, abaashɛrɛ nyɛ ashwie la kɛ flɔnɔɔ ni tsoɔ grigri lɛ mli amrɔ nɔŋŋ. Ni namɔ ji nyɔŋmɔ ni baanyɛ ajie nyɛ kɛje midɛŋ?”+
16 Shadrak, kɛ Meshak, kɛ Abednego kɛɛ maŋtsɛ lɛ akɛ: “Nebukadnezar, nɔ ko bɛ ni wɔbaakɛɛ bo yɛ sane nɛɛ he.
17 Maŋtsɛ, kɛ́ nakai ji nɔ ni baaba po lɛ, wɔ-Nyɔŋmɔ lɛ ni wɔsɔmɔɔ lɛ baanyɛ ajie wɔ kɛje la kɛ flɔnɔɔ ni tsoɔ grigri lɛ mli, ni ejie wɔ kɛje bo hu odɛŋ.+
18 Shi kɛ́ ejieee wɔ po lɛ, maŋtsɛ, ná ole akɛ wɔsɔmɔŋ onyɔŋmɔi lɛ, ni wɔjáŋ shika tsuru amaga ni ofee oma shi lɛ hu.”+
19 Kɛkɛ ni Nebukadnezar mli fu Shadrak, kɛ Meshak, kɛ Abednego waa aahu akɛ ehiɛ tsake ewo amɛ,* ni efã ni atsi la kɛ flɔnɔɔ lɛ mli toi kpawo fe bɔ ni afeɔ lɛ daa lɛ.
20 Ni efã esraafoi lɛ ateŋ hii kãkãlɔi komɛi koni amɛfimɔ Shadrak, kɛ Meshak, kɛ Abednego ni amɛshɛrɛ amɛ amɛshwie la kɛ flɔnɔɔ ni tsoɔ grigri lɛ mli.
21 No hewɔ lɛ, afimɔ amɛ kɛ amɛtadei anɔhaanɔi lɛ, kɛ amɛtadei lɛ, kɛ amɛfaii lɛ, kɛ amɛtadei krokomɛi lɛ, ni ashɛrɛ amɛ ashwie la kɛ flɔnɔɔ ni tsoɔ grigri lɛ mli.
22 Akɛni maŋtsɛ lɛ famɔ lɛ naa wa ni flɔnɔɔ lɛ edɔ waa diɛŋtsɛ hewɔ lɛ, lalilɛii lɛ gbe hii ni hole Shadrak, kɛ Meshak, kɛ Abednego amɛwo mli lɛ.
23 Shi nɛkɛ hii etɛ nɛɛ, Shadrak, kɛ Meshak, kɛ Abednego yagbee la kɛ flɔnɔɔ ni tsoɔ grigri lɛ mli bɔ ni afimɔ amɛ lɛ nɔŋŋ.
24 Kɛkɛ ni Maŋtsɛ Nebukadnezar tsui fã ni ete shi oya ni ekɛɛ enukpai lɛ akɛ: “Ani jeee hii etɛ wɔfimɔ ni wɔshɛrɛ amɛ wɔshwie la lɛ mli lɛ?” Amɛkɛɛ maŋtsɛ lɛ akɛ: “Maŋtsɛ, nakai ni.”
25 Ekɛɛ akɛ: “Naa! Miina hii ejwɛ nyiɛ la lɛ mli kɛmiiya kɛmiiba, ni nɔ ko nɔ ko efeko amɛ, ni mɔ ni gbe yi fee ejwɛ lɛ tamɔ nyɔŋmɔi lɛ abihii lɛ eko.”
26 Nebukadnezar tsi ebɛŋkɛ la kɛ flɔnɔɔ ni tsoɔ grigri lɛ shinaa lɛ ni ekɛɛ akɛ: “Shadrak, kɛ Meshak, kɛ Abednego, nyɛ, Nyɔŋmɔ Ni Nɔ Kwɔ Fe Fɛɛ+ lɛ tsuji, nyɛjea kpo ni nyɛbaa biɛ!” Shadrak, kɛ Meshak, kɛ Abednego je kpo kɛje la lɛ mli.
27 Ni kpokpaa nɔkwɛlɔi* lɛ, kɛ hiɛnyiɛlɔi lɛ, kɛ amralofoi lɛ, kɛ maŋtsɛ lɛ onukpai lɛ ni ebabua amɛhe naa+ lɛ na akɛ la lɛ efeko hii nɛɛ agbɔmɔtsei lɛ nɔ ko nɔ ko;*+ amɛyiteŋ tsɔi kome po eshãko, ni amɛtadei anɔhaanɔi lɛ tsakeko, ni anuuu la he fu po yɛ amɛhe.
28 Kɛkɛ ni Nebukadnezar jaje akɛ: “Ajie Shadrak, kɛ Meshak, kɛ Abednego Nyɔŋmɔ lɛ yi,+ mɔ ni tsu ebɔfo ni ebajie etsuji lɛ. Amɛkɛ amɛhiɛ fɔ̃ enɔ ni amɛte shi amɛwo maŋtsɛ lɛ famɔ lɛ, ni amɛmiisumɔ ni amɛgboi* moŋ fe nɔ ni amɛbaasɔmɔ nyɔŋmɔ kroko loo amɛbaajá nyɔŋmɔ kroko yɛ amɛ diɛŋtsɛ amɛ-Nyɔŋmɔ lɛ sɛɛ.+
29 No hewɔ lɛ, miifã akɛ maŋ fɛɛ maŋ loo jeŋmaŋ fɛɛ jeŋmaŋ loo wiemɔ kuu fɛɛ wiemɔ kuu ni baawie nɔ ko ashi Shadrak, kɛ Meshak, kɛ Abednego Nyɔŋmɔ lɛ, afolɔ amɛmli ni akɛ amɛshĩai lɛ afee he ko ni ayaa tiafi yɛ;* ejaakɛ nyɔŋmɔ ko nyɔŋmɔ ko bɛ ni baanyɛ ajie mɔ yɛ nɛkɛ gbɛ nɔ.”+
30 Kɛkɛ ni maŋtsɛ lɛ hã Shadrak, kɛ Meshak, kɛ Abednego gbɛhe ni nɔ kwɔ* yɛ Babilon kpokpaa lɛ nɔ.+
Shishigbɛ Niŋmaa
^ Aaafee mitai 27 (nanetalɔi 88). Kwɛmɔ Saji Krokomɛi B14 lɛ.
^ Aaafee mitai 2.7 (nanetalɔi 8.8). Kwɛmɔ Saji Krokomɛi B14 lɛ.
^ Loo “satrapii.” Satrap ji gbɛnaa gbɛ́i ni akɛtsɛɔ mɛi ni kwɛɔ kpokpai ni yɔɔ Babilon nɔyeli lɛ shishi lɛ anɔ lɛ.
^ Loo “satrapii.” Satrap ji gbɛnaa gbɛ́i ni akɛtsɛɔ mɛi ni kwɛɔ kpokpai ni yɔɔ Babilon nɔyeli lɛ shishi lɛ anɔ lɛ.
^ Aramaik sht. ŋm., “akolonto.”
^ Aramaik sht. ŋm., “akolonto.”
^ Loo “ni amɛbawie Yudafoi lɛ ahe efɔŋ.”
^ Aramaik sht. ŋm., “akolonto.”
^ Aramaik sht. ŋm., “akolonto.”
^ Loo “etsake bɔ ni efeɔ enii yɛ amɛhe lɛ kwraa.”
^ Loo “satrapii.” Satrap ji gbɛnaa gbɛ́i ni akɛtsɛɔ mɛi ni kwɛɔ kpokpai ni yɔɔ Babilon nɔyeli lɛ shishi lɛ anɔ lɛ.
^ Loo “la lɛ náko hii nɛɛ agbɔmɔtsei lɛ anɔ hewalɛ.”
^ Loo “amɛmiisumɔ ni amɛgbɔmɔtsei aŋmɛɛ amɛ.”
^ Shishitsɔɔmɔi komɛi kɛɔ akɛ, “ni akɛ amɛshĩai lɛ afee tumo; bɔɔla.”
^ Aramaik sht. ŋm., “maŋtsɛ lɛ hã Shadrak, kɛ Meshak, kɛ Abednego shwere.”
