Kpojiemɔ Ko Ni Akɛhã Yohane 7:1-17
7 Enɛ sɛɛ lɛ, mina ŋwɛibɔfoi ejwɛ damɔ shikpɔŋ lɛ koji ejwɛ lɛ anɔ, ni amɛhiɛ shikpɔŋ lɛ kɔɔyɔi ejwɛ lɛ amli kpɛŋŋ, koni kɔɔyɔɔ ko akatswa yɛ shikpɔŋ lɛ nɔ loo ŋshɔ lɛ nɔ loo tso ko nɔ.
2 Ni mina ŋwɛibɔfo kroko miikwɔ kɛmiijɛ hulushiteehe* kɛmiiba, ni ehiɛ Nyɔŋmɔ hiɛkãalɔ lɛ niianaasɔomɔnɔ; ni ebolɔ kɛ gbee ni wa ekɛɛ ŋwɛibɔfoi ejwɛ lɛ ni ahã amɛ hegbɛ akɛ amɛye shikpɔŋ lɛ kɛ ŋshɔ lɛ awui lɛ
3 akɛ: “Nyɛkayea shikpɔŋ lɛ loo ŋshɔ lɛ loo tsei lɛ awui, kɛyashi be ni wɔkɛ niianaasɔomɔnɔ baakadi+ wɔ-Nyɔŋmɔ lɛ nyɔji lɛ ahiɛnai dã.”+
4 Ni minu mɛi ni akɛ niianaasɔomɔnɔ lɛ ekadi amɛ lɛ ayibɔ, mɛi 144,000,+ ni akɛ niianaasɔomɔnɔ ekadi amɛ kɛjɛ Israelbii lɛ aweku fɛɛ weku mli:+
5 Yuda weku lɛ mli lɛ akɛ niianaasɔomɔnɔ lɛ kadi mɛi 12,000;Ruben weku lɛ mli lɛ mɛi 12,000;Gad weku lɛ mli lɛ mɛi 12,000;
6 Asher weku lɛ mli lɛ mɛi 12,000;Naftali weku lɛ mli lɛ mɛi 12,000;Manase+ weku lɛ mli lɛ mɛi 12,000;
7 Simeon weku lɛ mli lɛ mɛi 12,000;Levi weku lɛ mli lɛ mɛi 12,000;Isakar weku lɛ mli lɛ mɛi 12,000;
8 Zebulon weku lɛ mli lɛ mɛi 12,000;Yosef weku lɛ mli lɛ mɛi 12,000;Benyamin weku lɛ mli lɛ, akɛ niianaasɔomɔnɔ lɛ kadi mɛi 12,000.
9 Enɛ sɛɛ lɛ mikwɛ, ni naa! asafoku babaoo ko, ni gbɔmɔ ko gbɔmɔ ko nyɛŋ akane, ni jɛ jeŋmaŋ fɛɛ jeŋmaŋ kɛ weku fɛɛ weku kɛ gbɔmɛi srɔtoi fɛɛ kɛ wiemɔ fɛɛ wiemɔ mli,+ damɔ maŋtsɛ sɛi lɛ hiɛ kɛ Gwantɛŋbi lɛ hiɛ, ni amɛwo atadei yɛji kakadaji;+ ni amɛhiɛ tɛŋ blɛoi yɛ amɛdɛŋ.+
10 Ni amɛyaa nɔ amɛbolɔɔ kɛ gbee ni wa akɛ: “Wɔnáa wɔyiwalaheremɔ lɛ kɛjɛɔ wɔ-Nyɔŋmɔ lɛ, mɔ ni ta maŋtsɛ sɛi lɛ nɔ lɛ,+ kɛ Gwantɛŋbi lɛ ŋɔɔ.”+
11 Ŋwɛibɔfoi lɛ fɛɛ damɔ maŋtsɛ sɛi lɛ kɛ onukpai+ lɛ kɛ bɔɔ nii ejwɛ ni hiɛ kamɔ lɛ ahewɔ kɛkpe, ni amɛkɛ amɛhiɛ bumɔ shi yɛ maŋtsɛ sɛi lɛ hiɛ ni amɛjá Nyɔŋmɔ
12 amɛkɛɛ: “Amen! Yijiemɔ lɛ kɛ anunyam lɛ kɛ hiɛshikamɔ lɛ kɛ shidaa lɛ kɛ woo lɛ kɛ hewalɛ lɛ kɛ nyɛmɔ lɛ ji wɔ-Nyɔŋmɔ lɛ nɔ kɛmiiya naanɔi anaanɔ.+ Amen.”
13 Onukpai lɛ ateŋ mɔ kome here nɔ ekɛɛ mi akɛ: “Mɛi ni wo atadei yɛji kakadaji nɛɛ,+ namɛi ni, ni nɛgbɛ amɛjɛ?”
14 Ni amrɔ lɛ, mikɛɛ lɛ akɛ: “Minuŋtsɔ, bo ole.” Ni ekɛɛ mi akɛ: “Mɛnɛɛmɛi ji mɛi ni je amanehulu kpeteŋkpele lɛ mli lɛ,+ ni amɛfɔ amɛtadei kakadaji lɛ ahe ni amɛhã eyɛ futaa yɛ Gwantɛŋbi lɛ lá lɛ mli.+
15 No hewɔ ni amɛyɔɔ Nyɔŋmɔ maŋtsɛ sɛi lɛ hiɛ, ni amɛkɛ sɔɔmɔ krɔŋŋ hãa lɛ jetsɛremɔ kɛ jenamɔ yɛ esɔlemɔ shĩa lɛ; ni mɔ ni ta maŋtsɛ sɛi lɛ nɔ+ lɛ baalɛɛ emama tsũ lɛ mli kɛha amɛnɔ.+
16 Hɔmɔ yeŋ amɛ dɔŋŋ, ni kumai hu yeŋ amɛ dɔŋŋ, hulu eshãŋ amɛ hu ni amɛnuŋ dɔlɛ ni naa wa ko he dɔŋŋ,+
17 ejaakɛ Gwantɛŋbi+ lɛ ni yɔɔ maŋtsɛ sɛi lɛ teŋ lɛ baakwɛ amɛ tamɔ tookwɛlɔ feɔ lɛ,+ ni ebaatsɔɔ amɛ gbɛ kɛya wala nuhiŋmɛii ahe.+ Ni Nyɔŋmɔ baatsumɔ amɛhiŋmɛiiaŋ yaafonui fɛɛ.”+
Shishigbɛ Niŋmaa
^ Loo “bokãgbɛ.”
