2 Samuel 4:1-12
4 Be ni Saul binuu Ish-boshet*+ nu akɛ Abner egbo yɛ Hebron lɛ,+ enijiaŋ je wui, ni Israel fɛɛ hao.
2 No mli lɛ, hii enyɔ komɛi nyiɛɔ Saul binuu lɛ ojotswalɔi atai lɛ ahiɛ: atsɛɔ mɔ kome Baanah kɛ mɔ kroko lɛ hu Rekab. Rimon, Beerotnyo ni jɛ Benyamin weku lɛ mli lɛ bihii ji amɛ. (Ejaakɛ no mli lɛ, abuɔ Beerot+ ashiɔ Benyamin nɔ.
3 Beerotbii lɛ jo foi kɛtee Gitaim,+ ni amɛji gbɔi yɛ jɛmɛ kɛbashi ŋmɛnɛ.)
4 No mli lɛ, Saul binuu Yonatan+ yɛ binuu ko ni eji obubuafo.*+ Be ni ajɛ Yezreel+ ababɔ Saul kɛ Yonatan he amaniɛ lɛ, no mli lɛ eye afii enumɔ, ni yoo lɛ ni kwɛɔ lɛ lɛ wó lɛ kɛjo foi, shi bɔ ni etsui efã sɔŋŋ hewɔ lɛ, gbekɛ lɛ gbee shi ni etsɔ obubuafo. Atsɛɔ gbekɛ lɛ Mefiboshet.+
5 Rekab kɛ Baanah ni ji Rimon, Beerotnyo lɛ bihii lɛ tee Ish-boshet shĩa lɛ shwane fintiŋŋ, be ni eejɔɔ ehe shwane tamɔ bɔ ni efɔɔ feemɔ lɛ.
6 Amɛbote shĩa lɛ mli oookɛɛ nɔ ni amɛyaatao wiiti, ni amɛkɛ klante tsu emusuŋ; kɛkɛ ni Rekab kɛ enyɛmi nuu Baanah+ jo foi ni mɔ ko enaaa amɛ.
7 Be ni amɛbote shĩa lɛ mli lɛ, ekã esaatso lɛ nɔ yɛ esɛɛtsu lɛ mli, ni amɛtsu lɛ nɔ ni amɛgbe lɛ, ni amɛfo eyitso. Kɛkɛ ni amɛkɔ eyitso lɛ ni amɛnyiɛ nyɔɔŋnyɔɔŋ fɛɛ kɛtsɔ Araba lɛ gbɛ lɛ nɔ.
8 Ni amɛkɛ Ish-boshet+ yitso lɛ bahã David yɛ Hebron ni amɛkɛɛ maŋtsɛ lɛ akɛ: “Saul, ohenyɛlɔ+ ni taoɔ bo agbe*+ lɛ binuu Ish-boshet yitso nɛ. Ŋmɛnɛ gbi nɛɛ, Yehowa etɔ minuŋtsɔ maŋtsɛ he owele yɛ Saul kɛ eseshibii lɛ anɔ.”
9 Shi David kɛɛ Rekab kɛ enyɛmi nuu Baanah, ni ji Rimon, Beerotnyo lɛ bihii lɛ akɛ: “Gbii abɔ ni Yehowa, mɔ ni jie mi* kɛje mimanehului lɛ fɛɛ amli lɛ hiɛ kã nɛɛ,+
10 be ni mɔ ko bakɛɛ mi akɛ, ‘Naa! Saul egbo,’+ ni esusu akɛ eekɛɛ mi sane kpakpa ko lɛ, mimɔ lɛ ni migbe lɛ+ yɛ Ziklag. Nakai ji bɔ ni mida mɔ ni babɔ mi amaniɛ lɛ shi!
11 Enyiɛ nɔŋŋ kɛji mɛi fɔji eyagbe jalɔ yɛ esaatso nɔ yɛ lɛ diɛŋtsɛ eshĩa lɛ ni mibiŋ elá shi yɛ nyɛdɛŋ,+ ni mikpãtãŋ nyɛhiɛ yɛ shikpɔŋ lɛ nɔ?”
12 Kɛkɛ ni David fã oblahii lɛ akɛ amɛgbe amɛ.+ Amɛfolɔ amɛniji kɛ amɛnaji ni amɛkɛ amɛ tsotsoro shi*+ yɛ Hebron kpaakpo lɛ he. Shi amɛkɔ Ish-boshet yitso lɛ ni amɛyafu yɛ Abner fuuhe lɛ yɛ Hebron.
Shishigbɛ Niŋmaa
^ Hebri sht. ŋm., “Be ni Saul binuu lɛ.”
^ Loo “akpaketsɛ.”
^ Loo “ni taoɔ osusuma.”
^ Loo “mɔ ni kpɔ̃ misusuma.”
^ Loo “ni amɛkɛtsotsoro shi.”
