1 Mose 42:1-38
42 Be ni Yakob ná le akɛ ŋmaa* yɛ Ejipt lɛ,+ ekɛɛ ebihii lɛ akɛ: “Mɛni hewɔ nyɛteŋ mɔ fɛɛ mɔ kã he ekwɛɔ enyɛmi hiɛ lɛ?”
2 Ekɛɛ kɛfata he akɛ: “Minu akɛ ŋmaa yɛ Ejipt. Nyɛkpelekea shi kɛyaa jɛmɛ ní nyɛyahea eko nyɛbahãa wɔ, koni wɔya nɔ wɔhi wala mli ní wɔkagboi.”+
3 No hewɔ lɛ, Yosef nyɛmimɛi hii lɛ ateŋ mɛi nyɔŋma+ kpeleke shi kɛtee Ejipt koni amɛyahé ŋmaa.
4 Shi Yakob hãaa Yosef nyɛmi nuu Benyamin+ afata enyɛmimɛi krokomɛi lɛ ahe kɛya, ejaakɛ ekɛɛ: “Ekolɛ oshãra wulu* ko baayashãra lɛ.”+
5 No hewɔ lɛ, Israel bihii lɛ fata mɛi krokomɛi ni miiba abahé nii lɛ ahe kɛba, ejaakɛ hɔmɔ lɛ eshɛ Kanaan shikpɔŋ lɛ nɔ.+
6 No mli lɛ, Yosef ji shikpɔŋ lɛ nɔkwɛlɔ,+ ni lɛ ji mɔ ni hɔ̃ɔ ŋmaa lɛ ehãa shikpɔŋ lɛ nɔ bii lɛ fɛɛ.+ No hewɔ lɛ, Yosef nyɛmimɛi lɛ ba amɛbakoto lɛ ni amɛkɛ amɛhiɛ bumɔ shi.+
7 Be ni Yosef na enyɛmimɛi lɛ, eyoo amɛ amrɔ nɔŋŋ, shi ejieee ehe shi etsɔɔɔ amɛ.+ No hewɔ lɛ, ekɛ amɛ wie nyanyaanya ekɛɛ: “Nɛgbɛ nyɛjɛ?” kɛkɛ ni amɛkɛɛ: “Wɔjɛ Kanaan shikpɔŋ lɛ nɔ wɔba koni wɔbahé niyenii.”+
8 No hewɔ lɛ, Yosef yoo enyɛmimɛi lɛ, shi amɛ lɛ, amɛyooo lɛ.
9 Amrɔ lɛ, Yosef kai lamɔi ní ela yɛ amɛhe lɛ,+ ni ekɛɛ amɛ akɛ: “Shikpálɔi ji nyɛ! Nyɛba koni nyɛbakwɛ shikpɔŋ lɛ hei ní ewaaa akɛ abaatutua lɛ!”
10 Kɛkɛ ni amɛkɛɛ: “Dabi minuŋtsɔ, shi otsuji ba koni amɛbahé niyenii.
11 Nuu kome bii ji wɔ fɛɛ. Jalɔi ji wɔ. Jeee shikpálɔi ji otsuji.”
12 Shi ekɛɛ amɛ akɛ: “Dabi! Nyɛba koni nyɛbakwɛ shikpɔŋ lɛ hei ní ewaaa akɛ abaatutua lɛ!”
13 Kɛkɛ ni amɛkɛɛ: “Nyɛmimɛi hii 12 ji otsuji.+ Nuu kome bii ji wɔ fɛɛ+ yɛ Kanaan shikpɔŋ lɛ nɔ, ni mɔ ni ji gbekɛ kwraa lɛ yɛ wɔpapa ŋɔɔ amrɔ nɛɛ,+ shi mɔ kroko lɛ bɛ dɔŋŋ.”+
14 Shi Yosef kɛɛ amɛ akɛ: “Enɛ nɔŋŋ ji nɔ ni mikɛɛ nyɛ lɛ—‘Shikpálɔi ji nyɛ!’
15 Enɛ ji nɔ ni akɛbaaka nyɛ akwɛ: Gbii abɔ ni Farao hiɛ kã nɛɛ, nyɛjeŋ biɛ nyɛyaŋ, ja nyɛnyɛmi gbekɛ lɛ eba biɛ dã.+
16 Nyɛtsua nyɛteŋ mɔ kome ni eyaŋɔa nyɛnyɛmi nuu lɛ kɛbaa, shi nyɛ lɛ, abaawo nyɛ tsuŋ. Enɛ nɔ abaatsɔ ana kɛji nyɛwiemɔi lɛ ji anɔkwale. Ni kɛjeee nakai lɛ, no lɛ, gbii abɔ ni Farao hiɛ kã nɛɛ, shikpálɔi ji nyɛ.”
17 Kɛkɛ ni ewo amɛ fɛɛ tsuŋ gbii etɛ.
18 Yosef kɛɛ amɛ yɛ gbi ni ji etɛ lɛ nɔ akɛ: “Nyɛfea enɛ koni nyɛyi aná wala, ejaakɛ misheɔ Nyɔŋmɔ gbeyei.
19 Kɛ́ jalɔi ji nyɛ lɛ, nyɛhãa nyɛnyɛmimɛi lɛ ateŋ mɔ kome ahia tsuŋwoo lɛ mli yɛ shĩa ni awo nyɛ tsuŋ yɛ mli lɛ mli, shi nyɛteŋ mɛi ni eshwɛ lɛ, nyɛyaŋɔa ŋmaa koni nyɛkɛyamɔa hɔmɔ ni yɔɔ nyɛshĩai lɛ naa.+
20 Ni nyɛkɛ nyɛnyɛmi gbekɛ lɛ abahãa mi, koni ana akɛ nyɛwiemɔi lɛ anɔkwale ni, ni nyɛgboiŋ.” Ni amɛfee nakai.
21 Ni amɛkɛɛkɛɛ amɛhe akɛ: “Aagbala wɔtoi yɛ wɔnyɛmi nuu lɛ hewɔ,+ ejaakɛ wɔna bɔ ni ehao* waa be ni ekpa wɔ fai ní wɔna lɛ mɔbɔ lɛ, shi wɔbooo toi. Enɛ hewɔ ni haomɔ nɛɛ eba wɔnɔ lɛ.”
22 Kɛkɛ ni Ruben kɛɛ amɛ akɛ: “Ani mikɛɛɛ nyɛ akɛ, ‘Nyɛkafea gbekɛ lɛ esha ko,’ shi nyɛbooo toi?+ Agbɛnɛ, aabi elá shi yɛ wɔdɛŋ.”+
23 Shi amɛleee akɛ Yosef miinu, ejaakɛ mɔ ko yɛ ní tsɔɔ amɛwiemɔ lɛ kɛ lɛ hu ewiemɔ lɛ shishi.
24 No hewɔ lɛ, etsɔ ehe kɛje amɛmasɛi ni eyafo.+ Be ni eku esɛɛ ekɛ amɛ bawie ekoŋŋ lɛ, emɔ Simeon+ yɛ amɛteŋ ni efi lɛ yɛ amɛhiɛ.+
25 Kɛkɛ ni Yosef fã akɛ awo amɛkotokui lɛ amli ŋmaa obɔbɔ, ní akɛ amɛteŋ mɔ fɛɛ mɔ shika aku sɛɛ awo ekotoku lɛ mli, ní ahã amɛ nii hu ní amɛbaaye yɛ gbɛfãa lɛ mli. Ni afee enɛ ahã amɛ.
26 No hewɔ lɛ, amɛkɛ amɛŋmaa lɛ shwie amɛtejii lɛ anɔ, ni amɛshi jɛmɛ.
27 Be ni amɛteŋ mɔ kome fɛne ekotoku lɛ naa koni ehã eteji lɛ niyenii yɛ gbɔiatoohe lɛ, naa, eshika lɛ yɛ ekotoku lɛ mli.
28 Kɛkɛ ni ekɛɛ enyɛmimɛi lɛ akɛ: “Akɛ mishika lɛ eku sɛɛ ehã mi, ni naa, eyɛ mikotoku lɛ mli!” Ni amɛtsui fã, ni amɛkɛ hekpokpomɔ kɛɛkɛɛ amɛhe akɛ: “Mɛni Nyɔŋmɔ efee wɔ nɛɛ?”
29 Be ni amɛbashɛ amɛtsɛ Yakob ŋɔɔ yɛ Kanaan shikpɔŋ lɛ nɔ lɛ, amɛgba lɛ nibii fɛɛ ni ba amɛnɔ lɛ amɛkɛɛ:
30 “Nuu lɛ ni ji maŋ lɛ nɔ nuŋtsɔ lɛ kɛ wɔ wie nyanyaanya,+ ni ekɛɛ wɔba maŋ lɛ shikpámɔ.
31 Shi wɔkɛɛ lɛ akɛ, ‘Jalɔi ji wɔ. Jeee shikpálɔi ji wɔ.+
32 Nyɛmimɛi hii 12 ji wɔ,+ wɔ fɛɛ wɔpapa kome. Mɔ kome bɛ dɔŋŋ,+ ni mɔ ni ji gbekɛ kwraa lɛ yɛ wɔpapa ŋɔɔ amrɔ nɛɛ yɛ Kanaan shikpɔŋ lɛ nɔ.’+
33 Shi nuu lɛ ni ji maŋ lɛ nɔ nuŋtsɔ lɛ kɛɛ wɔ akɛ, ‘Nɔ ni mikɛbaale akɛ jalɔi ji nyɛ nɛ: Nyɛshia nyɛnyɛmimɛi lɛ ateŋ mɔ kome nyɛhãa mi.+ Ni nyɛŋɔa nɔ ko ní nyɛkɛbaayamɔ hɔmɔ ni yɔɔ nyɛshĩai lɛ naa, ní nyɛyaa.+
34 Ni nyɛkɛ nyɛnyɛmi nuu ni ji gbekɛ kwraa lɛ abahãa mi, koni male akɛ jeee shikpálɔi ji nyɛ, shi moŋ, jalɔi ji nyɛ. Kɛkɛ lɛ, mikɛ nyɛnyɛmi nuu lɛ baaku sɛɛ ahã nyɛ, ni nyɛbaanyɛ nyɛye jara yɛ shikpɔŋ lɛ nɔ.’”
35 Be ni amɛtsɔmɔɔ amɛkotokui lɛ amli nii lɛ, naa, mɔ fɛɛ mɔ shika kotoku ní eshika lɛ yɔɔ mli lɛ yɛ ekotoku lɛ mli. Be ni amɛ kɛ amɛtsɛ fɛɛ na shika kotokui ní amɛshika lɛ yɔɔ mli lɛ, gbeyei mɔmɔ amɛ.
36 Amɛtsɛ Yakob bo ekɛɛ amɛ akɛ: “Nyɛhã mibii eŋmɛɛ mi!+ Yosef bɛ dɔŋŋ,+ ni Simeon hu bɛ dɔŋŋ,+ ni nyɛmiiba nyɛbaŋɔ Benyamin hu kɛya! Mi minɔ nibii nɛɛ fɛɛ eba!”
37 Shi Ruben kɛɛ epapa akɛ: “Kɛ́ mikɛ lɛ ekuuu sɛɛ ebahãaa bo lɛ, no lɛ, gbee mi diɛŋtsɛ mibihii enyɔ lɛ.+ Okɛ lɛ awo midɛŋ, ni mikɛ lɛ baaku sɛɛ abahã bo.”+
38 Shi ekɛɛ: “Mibinuu lɛ kɛ nyɛ eyaŋ,* ejaakɛ enyɛmi nuu lɛ egbo, ni eshwɛ ekome too pɛ.+ Kɛ́ oshãra wulu* ko yashãra lɛ yɛ gbɛ ni nyɛbaafã lɛ mli lɛ, no lɛ bɔ fɛɛ bɔ ni fee lɛ, nyɛbaahã mikɛ miyiteŋ waji akpeleke shi kɛya Gbonyobu*+ lɛ mli kɛ awerɛho.”+
Shishigbɛ Niŋmaa
^ Ŋmaa ní awieɔ he yɛ yitso nɛɛ mli lɛ ji wiiti, abele, omɔ, kɛ amɛhenɔi lɛ eko.
^ Ni tsɔɔ akɛ, oshãra ni kɛ gbele baa.
^ Loo “esusuma hao.”
^ Loo “kɛ nyɛ kpelekeŋ shi kɛyaŋ.”
^ Ni ji, oshãra ni kɛ gbele baa.
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
