“Be fɛɛ be lɛ shihilɛi komɛi baa ni kaa wu kɛ ŋa tsuishitoo. Kɛ́ oboteko gbalashihilɛ mli lɛ, ekolɛ obaasusu akɛ tsuishitoo he ehiaaa bo tsɔ, shi efata nibii ni hãa gbalashihilɛ yeɔ omanye lɛ ahe.”​—John.

•  Mɛni hewɔ esa akɛ oto otsui shi?

•  Te obaafee tɛŋŋ otsɔɔ akɛ otoɔ otsui shi?

•  “Tsuishitoo he hiaa waa”

•   Kɛ́ obote gbalashihilɛ mli lɛ, obaana ohefatalɔ lɛ fatɔi lɛ jogbaŋŋ.

   “Be ni nyɛhi shi be kpalaŋŋ sɛɛ lɛ, ewaŋ akɛ okɛ ojwɛŋmɔ baama ohefatalɔ lɛ sui ni osumɔɔɔ lɛ anɔ. Kɛ́ obɔi susumɔi ni esaaa nɛɛ námɔ lɛ, ebaawa kɛhã bo akɛ obaato otsui shi.”—Jessena.

•   Kɛ́ otooo otsui shi lɛ, obaawie nɔ ko ni ojwɛŋko nɔ.

   “Mihe tswaa shi kɛwieɔ bɔ ni minuɔ he mihãa lɛ he, no hewɔ lɛ, bei pii lɛ miwieɔ nibii ni kulɛ esaaa akɛ mawie. Eji mito mitsui shi kulɛ, miwieŋ kɛkɛ, moŋ lɛ majwɛŋ nɔ jogbaŋŋ makwɛ akɛ nɔ ni mawie lɛ sa loo esaaa.”—Carmen.

   Biblia lɛ kɛɛ: “Suɔmɔ toɔ etsui shi ni emli hi.” (1 Korintobii 13:4) Esa akɛ mɛi enyɔ ni sumɔɔ amɛhe lɛ ato amɛtsui shi amɛhã amɛhe. Shi bei pii lɛ, jeee nakai ji bɔ ni ebaa lɛ. John, ni awie ehe yɛ ŋwɛigbɛ lɛ wie akɛ: “Bɔ ni sui kpakpai nyɛɔ efiteɔ oyayaayai lɛ, nakai nɔŋŋ eji yɛ tsuishitoo gbɛfaŋ, ewaaa akɛ mɔ baafee enii kpalakpala fe ni ebaato etsui shi. Ebiɔ mɔdɛŋbɔɔ dani mɔ ko baanyɛ ato etsui shi be fɛɛ be.”

•   Kɛ́ shihilɛ ko ni okpaaa gbɛ ba ni hã ewa kɛhã bo akɛ obaato otsui shi.

   Nɔkwɛmɔnɔ: Ohefatalɔ kɛ bo wie bɔ ni esaaa. Ekolɛ, nɔ ni baaba ojwɛŋmɔŋ ji ni bo hu okɛɛ lɛ nɔ ko ni baadɔ lɛ.

   Biblia shishitoo mla: “Kaahã omli fu oya, ejaakɛ mlifu lɛ, no akɛyoɔ buulu.”​—Jajelɔ 7:9, shishigbɛ niŋmaa.

   Bɔ ni obaafee oto otsui shi: Mɛɛ fioo. Dani obaajie ohefatalɔ lɛ naa lɛ, kɛɛmɔ ohe akɛ, ’jeee eyiŋtoo ji akɛ ekɛɛ mi nɔ ni ekɛɛ lɛ koni edɔ mi loo ejɛ mi.’ Wolo ko (Fighting for Your Marriage) wie akɛ: “Bei komɛi lɛ, bɔ ni wɔnu nɔ ni wɔhefatalɔ lɛ wie lɛ shishi wɔhã lɛ, no nɔ wɔdamɔɔ wɔfeɔ wɔnii, shi jeee nɔ ni etsɔɔ lɛ kɛ nɔ tuuntu ni ewie lɛ nɔ wɔdamɔɔ wɔfeɔ wɔnii.”

   Kɛ́ no mli lɛ ohefatalɔ lɛ yiŋtoo ji ni ehã omli afu po lɛ, kɛ́ oto otsui shi ni ofeee lɛ eko otooo najiaŋ lɛ, toiŋjɔlɛ baaba. Biblia lɛ kɛɔ akɛ: “Kɛ́ lai tã lɛ, la gboɔ.”​—Abɛi 26:20.

   “Kɛ́ obɔi oŋa lɛ naa tamɔ ohenyɛlɔ lɛ, mɛɛ fioo ni ojwɛŋ nɔ hewɔ ni osumɔɔ lɛ lɛ he, ní amrɔ nɔŋŋ lɛ ofee nɔ ko ni ebaasumɔ waa ohã lɛ.”​—Ethan.

   Kɛhã he susumɔ:

  •  Kɛ́ ohefatalɔ lɛ wie nɔ ko loo efee nɔ ko ni osumɔɔɔ lɛ, te ofeɔ onii ohãa tɛŋŋ?

  •  Be kroko kɛ́ efee nɔ ko tamɔ nakai lɛ, te obaafee tɛŋŋ oto otsui shi waa fe tsutsu lɛ?

•   Kɛ́ ohefatalɔ lɛ fɔɔ nakai nii lɛ feemɔ.

   Nɔkwɛmɔnɔ: Ohefatalɔ lɛ kpeɔ sɛɛ be fɛɛ be, ni no hãa omɛɔ lɛ, ni be ni omɛɔ lɛ ni ebaaa lɛ omli fuɔ waa.

   Biblia shishitoo mla: “Nyɛyaa nɔ nyɛnáa tsui nyɛhãa nyɛhe ni nyɛkɛkea nyɛhe tswaa.”​—Kolosebii 3:13.

   Bɔ ni obaafee oto otsui shi: Bɔɔ mɔdɛŋ osusu ogbalashihilɛ lɛ he waa fe bɔ ni osusuɔ bo diɛŋtsɛ ohe. Bi ohe akɛ: ‘Kɛ́ mimli fu loo mikɛ mihefatalɔ taa saji anaa yɛ nɔ ni ba lɛ he lɛ, ani ebaahã wɔgbalashihilɛ lɛ asɔ waa loo ekɛ naagba baaba?’ Kɛfata he lɛ, kaimɔ akɛ “wɔ fɛɛ wɔtɔ̃ɔ babaoo.” (Yakobo 3:2) Enɛ tsɔɔ akɛ bo hu oyɛ fãtɔi ni esa akɛ otsu he nii.

   “Bei komɛi lɛ, mitoɔ mitsui shi waa mihãa minanemɛi fe bɔ ni mitoɔ mitsui shi mihãa miwu. Efeɔ mi akɛ, ebaa lɛ nakai akɛni ebɛŋkɛ mi be fɛɛ be ni minaa efãtɔi lɛ hewɔ. Shi kɛ́ mitoɔ mitsui shi lɛ, no tsɔɔ akɛ misumɔɔ miwu lɛ, ni mibuɔ lɛ hu. No hewɔ lɛ, tsuishitoo he miihia mi waa yɛ migbalashihilɛ lɛ mli.​—Nia.

   Kɛhã he susumɔ:

  •  Kɛ́ ohefatalɔ fee nɔ ko ni osumɔɔɔ loo etɔ̃ lɛ, ani otoɔ otsui shi ohãa lɛ?

  •  Be kroko kɛ́ efee nɔ ko tamɔ nakai lɛ, te obaafee tɛŋŋ oto otsui shi waa fe tsutsu lɛ?