Biblia lɛ kɛɔ akɛ Yesu lɛ, “agbe lɛ yɛ heloo mli, shi ahã ehiɛ kã yɛ mumɔ mli.”—1 Petro 3:18; Bɔfoi 13:34; 1 Korintobii 15:45; 2 Korintobii 5:16.

 Yesu diɛŋtsɛ naawiemɔi tsɔɔ akɛ, ateŋ lɛ shi akɛ heloo kɛ lá. Ewie akɛ ebaaŋɔ ‘eheloo ehã akɛ kpɔmɔnɔ kɛkpɔ̃ mɛi babaoo.’ (Yohane 6:51; Mateo 20:28) Eji eŋɔ eheloo lɛ ekoŋŋ yɛ eshitee lɛ sɛɛ kulɛ, no baatsɔɔ akɛ, ebashãko kpɔmɔnɔ he afɔle ko. Kɛ̃lɛ, enɛ nyɛŋ aba mli, ejaakɛ Biblia lɛ kɛɛ ekɛ lɛ diɛŋtsɛ eheloo kɛ elá shã afɔle “shi kome nyɔŋlo.”—Hebribii 9:11, 12.

Kɛ́ atee Yesu shi kɛ mumɔŋ gbɔmɔtso lɛ, te fee tɛŋŋ ekaselɔi lɛ na lɛ lɛ?

•  Mumɔŋ gbɔmɛi baanyɛ atsɔmɔ heloo gbɔmɛi. Akɛ nɔkwɛmɔnɔ lɛ, bɔfoi ni fee enɛ lɛ ekomɛi po kɛ adesai ye nii ni amɛnu nii. (1 Mose 18:1-8; 19:1-3) Ni tsɔɔ akɛ, mumɔŋ gbɔmɛi ji amɛ moŋ, shi amɛnyɛ amɛtsɔmɔ heloŋ gbɔmɛi.—Kojolɔi 13:15-21.

•  Yɛ Yesu shitee lɛ sɛɛ lɛ, lɛ hu etsɔ heloo gbɔmɔ be fioo taakɛ bɔfoi komɛi fee be ko ni eho lɛ. Akɛ mumɔŋ gbɔmɔ lɛ, ebaanyɛ elaaje kɛkɛ lɛ trukaa lɛ epueekoŋŋ. (Luka 24:31; Yohane 20:19, 26) Be ni ejie ehe kpo etsɔɔ mɛi lɛ, jeee heloo gbɔmɔtso kometoo lɛ nɔŋŋ amɛna be fɛɛ be. Kɛfata he lɛ, ja ewie loo efee nɔ ko dani enanemɛi ni bɛŋkɛ lɛ kpaakpa lɛ po yoɔ lɛ.—Luka 24:30, 31, 35; Yohane 20:14-16; 21:6, 7.

•  Be ni Yesu jie ehe kpo etsɔɔ Toma ni ji kaselɔi lɛ ateŋ mɔ kome lɛ, eŋɔ gbɔmɔtso ni atswãi yɔɔ he etsɔɔ lɛ. Yesu fee nakai koni ekɛwo Toma hemɔkɛyeli lɛ mli hewalɛ, akɛni Toma heee eyeee akɛ Yesu ete shi lɛ hewɔ.—Yohane 20:24-29.