Ani Nyɔŋmɔ Yɛ He Fɛɛ He Kɛ Nɔ Fɛɛ Nɔ Mli?
Hetoo ni Biblia lɛ kɛhãa
Nyɔŋmɔ nyɛɔ enaa nɔ fɛɛ nɔ ni enyɛɔ etsuɔ saji ahe nii yɛ he fɛɛ he ni esumɔɔ. (Abɛi 15:3; Hebribii 4:13) Kɛ̃lɛ, Biblia lɛ etsɔɔɔ akɛ Nyɔŋmɔ yɛ he fɛɛ he kɛ nɔ fɛɛ nɔ mli yɛ be kome too mli. Kɛ̃lɛ, Biblia lɛ tsɔɔ akɛ eji mɔ ko ni yɔɔ diɛŋtsɛ ni eyɛ shihilɛ he.
Bɔ ni Nyɔŋmɔ yɔɔ: Nyɔŋmɔ lɛ Mumɔ ni. (Yohane 4:24) Adesai nyɛŋ amɛna lɛ. (Yohane 1:18) Ninai ni kɔɔ Nyɔŋmɔ he ni aŋmala yɛ Biblia lɛ mli lɛ eko fɛɛ eko hãa anaa akɛ eji mɔ ko ni yɔɔ he ko pɔtɛɛ. Atsɔɔɔ akɛ eyɛ he fɛɛ he.—Yesaia 6:1, 2; Kpojiemɔ 4:2, 3, 8.
Nyɔŋmɔ shihilɛ he: Biblia lɛ tsɔɔ akɛ, Nyɔŋmɔ yɛ shihilɛ he yɛ ŋwɛi. (1 Maŋtsɛmɛi 8:30) Enɛ tsɔɔ akɛ jeee shikpɔŋ lɛ nɔ loo je lɛ mli he ko Nyɔŋmɔ yɔɔ shi moŋ lɛ, ŋwɛi ji he ni eyɔɔ. Biblia lɛ tsĩ tã akɛ be ko lɛ, mumɔŋ bɔɔ nii lɛ tee amɛyadamɔ Yehowa hiɛ,” a enɛ tsɔɔ akɛ Nyɔŋmɔ yɛ he ko pɔtɛɛ ni eyɔɔ.—Hiob 1:6.
Kɛ́ Nyɔŋmɔ bɛ he fɛɛ he kɛ nɔ fɛɛ nɔ mli lɛ, ani ebaanyɛ etsu mihiamɔ nii ahe nii ehã mi akɛ mɔ aŋkro?
Hɛɛ. Nyɔŋmɔ susuɔ wɔ he waa akɛ aŋkroaŋkroi. Eyɛ mli akɛ Nyɔŋmɔ yɛ ŋwɛi moŋ, shi eyɔseɔ mɛi fɛɛ ni yɔɔ shikpɔŋ lɛ nɔ ni bɔɔ mɔdɛŋ akɛ amɛbaasa ehiɛ lɛ ni eyeɔ ebuaa amɛ. (1 Maŋtsɛmɛi 8:39; 2 Kronika 16:9) Susumɔ nibii ni Yehowa feɔ kɛtsɔɔ akɛ esusuɔ mɛi ni kɛ anɔkwayeli jaa lɛ lɛ ahe lɛ he okwɛ:
Kɛ́ osɔle: Kɛ́ osɔle lɛ, Yehowa baanyɛ anu osɔlemɔ lɛ amrɔ nɔŋŋ.—2 Kronika 18:31.
Be ni ohao: “Yehowa yɛ mɛi ni tsui ekumɔ lɛ amasɛi; ehereɔ mɛi ni werɛ eho amɛhe lɛ.”—Lala 34:18.
Be ni gbɛtsɔɔmɔ he miihia bo: Yehowa baatsɔ ewiemɔ ni ji Biblia lɛ nɔ ehã ‘oná sɛɛyoomɔ ni etsɔɔ bo gbɛ ni otsɔ nɔ.’—Lala 32:8.
Susumɔi ni ejaaa ni mɛi hiɛ akɛ Nyɔŋmɔ yɛ he fɛɛ he kɛ nɔ fɛɛ nɔ mli
Susumɔi ni ejaaa: Nyɔŋmɔ yɛ he fɛɛ he yɛ adebɔɔ mli.
Anɔkwa sane: Nyɔŋmɔ ehiii shikpɔŋ lɛ nɔ loo je lɛŋ he ko he ko. (1 Maŋtsɛmɛi 8:27) Eji anɔkwale akɛ, ŋulamii lɛ kɛ nibii krokomɛi ni Nyɔŋmɔ ebɔ lɛ “jajeɔ Nyɔŋmɔ anunyam lɛ.” (Lala 19:1) Kɛ̃lɛ, Nyɔŋmɔ ehiii nibii ni ebɔ lɛ amli tamɔ bɔ nɔŋŋ ni nitɛŋlɔ ehiii nibii ni etɛŋɔ lɛ amli lɛ. Fɛɛ sɛɛ lɛ, nɔ ni atɛŋ lɛ hãa aleɔ mɔ ni tɛŋ lɛ he sane. Nakai nɔŋŋ je lɛ ni wɔnaa nɛɛ hãa wɔleɔ wɔ-Bɔlɔ ‘sui ni anaaa lɛ,’ tamɔ ehewalɛ, hiɛshikãmɔ, kɛ suɔmɔ.—Romabii 1:20.
Susumɔi ni ejaaa: Já Nyɔŋmɔ yɛ he fɛɛ he kɛ nɔ fɛɛ nɔ mli dani ebaanyɛ ele nɔ fɛɛ nɔ ni efee mɔ ni yɛ hewalɛ fe fɛɛ.
Anɔkwa sane: Nyɔŋmɔ mumɔ krɔŋkrɔŋ lɛ loo ehewalɛ lɛ ji Nyɔŋmɔ hewalɛ ni miitsu nii. Nyɔŋmɔ baanyɛ etsɔ emumɔ krɔŋkrɔŋ lɛ nɔ ena nɔ fɛɛ nɔ, ni efee nɔ fɛɛ nɔ, yɛ he fɛɛ he ni esumɔɔ, be fɛɛ be ni esumɔɔ, ni jeee ja lɛ diɛŋtsɛ eyɛ jɛmɛ daŋ.—Lala 139:7.
Susumɔi ni ejaaa: Lala 139:8 lɛ kɛɛ: “Kɛ́ mikwɔ kɛtee ŋwɛi lɛ, oyɛ jɛmɛ, ni kɛ́ miyaŋmɛ misaa yɛ Gbonyobu lɛ mli po lɛ, naa! oyɛ jɛmɛ.” Ŋmalɛ nɛɛ tsɔɔ akɛ Nyɔŋmɔ yɛ he fɛɛ he kɛ nɔ fɛɛ nɔ mli.
Anɔkwa sane: Jeee Nyɔŋmɔ shihilɛ he he ŋmalɛ nɛɛ wieɔ lɛ. Moŋ lɛ eji lalafoo wiemɔ ni tsɔɔ akɛ ekɔɔɔ he eko he ni wɔyɔɔ lɛ, Nyɔŋmɔ baanyɛ aye abua wɔ.
a Yehowa ji Nyɔŋmɔ gbɛ́i taakɛ ejeɔ kpo yɛ Biblia lɛ mli lɛ.
Ekolɛ Obaasumɔ Enɛ Hu
SANEBIMƆI NI BIBLIA LƐ EHÃ HETOO
Ani Nyɔŋmɔ Yɛ Shihilɛhe Pɔtɛ̃ɛ Ko?
Mɛni Biblia lɛ kɛɔ yɛ Nyɔŋmɔ shihilɛhe he? Ani jɛmɛ nɔŋŋ ji he ni Yesu yɔɔ?
BIBLIA TSƆƆMƆI NI HE HIAA WAA
Ani Nyɔŋmɔ Ji Mɔ Ko Ni Yɔɔ Diɛŋtsɛ?
Naa odaseyeli ni tsɔɔ akɛ nilee yɛ mli akɛ abaahe aye akɛ Nyɔŋmɔ yɛ.
SANEBIMƆI NI BIBLIA LƐ EHÃ HETOO
Mɛni Ji Mumɔ Krɔŋkrɔŋ Lɛ?
Eja jogbaŋŋ akɛ Biblia lɛ wie mumɔ krɔŋkrɔŋ lɛ he akɛ, Nyɔŋmɔ “nine.”
SANEBIMƆI NI BIBLIA LƐ EHÃ HETOO
Kɛ́ Misɔle Lɛ, Ani Nyɔŋmɔ Baaye Abua Mi?
Ani Nyɔŋmɔ susuɔ wɔnaagbai lɛ ahe lɛɛlɛŋ?
BIBLIA MLI ŊMALƐI NI AGBALA MLI
Yesaia 41:10 Ni Agbala Mli—“Kaashe Gbeyei, Shi Mi, Mikɛo Yɔɔ”
Yehowa wie sane kome too lɛ nɔŋŋ he yɛ gbɛi etɛ nɔ kɛma nɔ mi ehã mɛi ni jáa lɛ lɛ akɛ bɔ fɛɛ bɔ ni fee lɛ, ebaaye ebua amɛ.
