Yohane Baptisilɔ lɛ sɔmɔ akɛ Nyɔŋmɔ gbalɔ. (Luka 1:76) Be ni afɔ lɛ lɛ, etsɛɛɛ nɔŋŋ ni afɔ Yesu. Nyɔŋmɔ kɛ nitsumɔ wo edɛŋ akɛ esaa gbɛ eto Mesia lɛ loo Kristo lɛ. Yohane tsu nitsumɔ nɛɛ, no ji eshiɛ sane ni Nyɔŋmɔ kɛhã lɛ lɛ etsɔɔ emaŋbii, ni ji Yudafoi lɛ koni amɛtsuii aku sɛɛ kɛba Nyɔŋmɔ ŋɔɔ.​—Marko 1:1-4; Luka 1:13, 16, 17.

 Sane ni Yohane shiɛ lɛ ye ebua mɛi ni hiɛ tsui kpakpa lɛ koni amɛle akɛ Yesu ni jɛ Nazaret lɛ ji Mesia ni awo he shi lɛ. (Mateo 11:10) Yohane wo etoibolɔi lɛ hewalɛ koni amɛtsake amɛtsui yɛ amɛhe eshai lɛ ahe, ni amɛhã abaptisi amɛ kɛfee amɛtsuitsakemɔ lɛ he okadi. (Luka 3:3-6) Akɛni Yohane baptisi mɛi babaoo hewɔ lɛ, atsɛɔ lɛ Baptisilɔ lɛ. Mɔ ko ni he hiaa fe mɔ fɛɛ mɔ ni Yohane baptisi lɛ ji Yesu. a​—Marko 1:9.

Nɔ ni wɔbaana yɛ sane nɛɛ mli

•  Mɛni hã Yohane Baptisilɔ lɛ bafee mɔ ko ni yɔɔ srɔto lɛ?

•  Namɛi ji Yohane Baptisilɔ lɛ fɔlɔi?

•  Namɔ hã agbe Yohane Baptisilɔ lɛ?

•  Ani Yohane Baptisilɔ lɛ kɛ Yesu tswa?

•  Hii enyiɛ atsĩ amɛ tã yɛ Biblia lɛ mli ni atsɛɔ amɛ Yohane?

 Agba nitsumɔ ni ebaatsu lɛ afɔ̃ shi: Yohane tsɔ enitsumɔ ni etsu akɛ shiɛlɔ lɛ nɔ ehã gbalɛ ni kɔɔ Yehowa tsulɔ lɛ he lɛ ba mli. (Maleaki 3:1; Mateo 3:1-3) Ebatsɔ mɔ ni ‘baasaa mɛi eto Yehowa’​—no ji eye ebua emaŋbii ni ji Yudafoi lɛ koni amɛsaa amɛtsui kɛkpɛlɛ sane ni Yehowa Nyɔŋmɔ najiaŋdamɔlɔ titri, Yesu Kristo baashiɛ lɛ nɔ.​—Luka 1:17.

 Bɔ ni abale lɛ ahã: Yesu wie akɛ “mɔ ko eteko shi ni fe Yohane Baptisilɔ lɛ, shi mɔ ni ji bibioo yɛ ŋwɛi Maŋtsɛyeli lɛ mli lɛ fe lɛ.” (Mateo 11:11) Akɛni Yohane jeee gbalɔ pɛ kɛkɛ, shi eji ‘tsulɔ’ ni agba ehe sane afɔ̃ shi hu hewɔ lɛ, Nyɔŋmɔ tsuji ni hi shi dani afɔ lɛ lɛ ateŋ mɔ ko bɛ ni abaanyɛ akɛɛ akɛ efe Yohane Baptisilɔ lɛ. Yesu wiemɔi lɛ hu tsɔɔ akɛ Yohane fataŋ mɛi ni baaye nɔ akɛ maŋtsɛmɛi yɛ Nyɔŋmɔ Maŋtsɛyeli lɛ mli lɛ ahe. b Gbalɔ anɔkwafo nɛɛ gbo dani Yesu hã adesai baná hegbɛ akɛ amɛbaaya ŋwɛi. (Hebribii 10:19, 20) Kɛ̃lɛ, Yohane baaná hegbɛ efata Nyɔŋmɔ Maŋtsɛyeli lɛ mli shishi bii lɛ ahe, kɛ hiɛnɔkamɔ akɛ ebaahi shi kɛya naanɔ yɛ Paradeiso.​—Lala 37:29; Luka 23:43.

 Zakaria kɛ Elizabet bote gbalashihilɛ mli ni amɛfɔ Yohane. Zakaria sɔmɔ akɛ Yuda osɔfo. Afɔ Yohane yɛ naakpɛɛ gbɛ nɔ, ejaakɛ no mli lɛ emami lɛ kene ni loo enyɛɛɛ efɔ bii. Agbɛnɛ hu, ‘Elizabet kɛ Zakaria fɛɛ edara yɛ afii amli.’​—Luka 1:5-7, 13.

 Maŋtsɛ Herode Antipa hã afo Yohane yitso. Eŋa Herodia ji mɔ ni wo eyiŋ ni ehã agbe Yohane. Herodia sumɔɔɔ Yohane sane, ejaakɛ Yohane kɛɛ Herode, ni tsɛɔ ehe Yudafonyo lɛ akɛ, ekɛ Herodia gbãla lɛ teɔ shi ewoɔ Yudafoi amla lɛ.​—Mateo 14:1-12; Marko 6:16-19.

 Nɔ ko kwraa bɛ Biblia lɛ mli ni fĩɔ susumɔ ni ahiɛ akɛ Yohane Baptisilɔ lɛ kɛ Yesu kɛ amɛhe tswa lɛ sɛɛ. (Yohane 3:25-30) Anɔkwa, Yohane kpɛ̃lɛ nɔ yɛ faŋŋ mli akɛ eji esɔ̃ akɛ ebaasaa gbɛ eto Mesia lɛ, jeee ni ekɛ lɛ baatswa. Yohane wie akɛ: “Miba koni mibabaptisi mɛi yɛ nu mli . . . koni ajie lɛ kpo atsɔɔ Israel.” Kɛkɛ ni ekɛfata he akɛ: “Mɔ nɛ ji Nyɔŋmɔ Bi lɛ.” (Yohane 1:26-34) No hewɔ lɛ, be ni Yohane nu akɛ Yesu shiɛmɔ nitsumɔ lɛ miiwo yibii kpakpai lɛ, emii shɛ ehe pam.