Ani Esa akɛ Kristofoi Aye Hejɔɔmɔgbi Lɛ?
Ani Esa akɛ Kristofoi Aye Hejɔɔmɔ Gbi Lɛ?
Hetoo ni Biblia lɛ kɛhãa
Ejeee taomɔ nii kɛhã Kristofoi akɛ amɛye daa otsi hejɔɔmɔ gbi lɛ. Kristofoi yɛ “Kristo mla lɛ” shishi, ni no biii ni aye hejɔɔmɔ gbi lɛ. (Galatiabii 6:2; Kolosebii 2:16, 17) Mɛni hewɔ wɔyɔɔ nɔmimaa yɛ enɛ he lɛ? Klɛŋklɛŋ lɛ, susumɔ he ni Hejɔɔmɔ gbi lɛ jɛ kɛba lɛ he okwɛ.
Mɛni ji Hejɔɔmɔ Gbi lɛ?
Hebri wiemɔ ni atsɔɔ shishi akɛ “hejɔɔmɔ gbi” lɛ tsɔɔ akɛ “ajɔɔ he; akpa.” Eje kpo klɛŋklɛŋ kwraa yɛ Biblia lɛ mli yɛ mlai ni akɛhã blema Israelbii lɛ amli. (2 Mose 16:23) Ákɛ nɔkwɛmɔnɔ lɛ, Kitãi Nyɔŋma lɛ mli nɔ ni ji ejwɛ lɛ kɛɔ akɛ: “Ohiɛ ahi hejɔɔmɔ gbi lɛ nɔ, ni oye lɛ krɔŋkrɔŋ. Gbii ekpaa lɛ otsu nii, ni ofee onii fiaa; shi gbi ni ji kpawo lɛ ji hejɔɔmɔ gbi hã Yehowa, o-Nyɔŋmɔ lɛ; no nɔ lɛ kaatsu nitsumɔ ko.” (2 Mose 20:8-10) Hejɔɔmɔ gbi lɛ jeɔ shishi Sohaa be ni hulu enyɔ shi kɛyashi Hɔɔ be ni hulu enyɔ shi. Bei nɛɛ mli lɛ, Israelbii lɛ hiɔ amɛwe, amɛshɛreee la, amɛyaaa lai, amɛtereee jatsu ko. (2 Mose 16:29; 35:3; 4 Mose 15:32-36; Yeremia 17:21) Abuɔ mɔ fɛɛ mɔ ni yeee mla nɛɛ nɔ lɛ gbele fɔ.
Ayɛ gbii krokomɛi hu yɛ Yudafoi akalanda lɛ nɔ ni atsɛ amɛ akɛ hejɔɔmɔ gbii, tamɔ afi ni ji kpawo lɛ, kɛ afi ni ji nyɔŋmai enumɔ lɛ nɛkɛ. Yɛ hejɔɔmɔ afii lɛ amli lɛ, aduuu nii ni akpaaa nii hu, ni anyɛɛɛ Israelbii ni hiɛ nyɔmɔ lɛ anɔ koni amɛwo nyɔji ni amɛhiɛ.
Mɛni hewɔ ehe ehiaaa ni Kristofoi lɛ yeɔ Hejɔɔmɔ gbi mla lɛ nɔ?
Akɛ Hejɔɔmɔ gbi mla lɛ hã mɛi pɛ ni hi shi yɛ mlai krokomɛi ni atsɔ Mose nɔ akɛhã Israelbii lɛ shishi. (5 Mose 5:2, 3; Ezekiel 20:10-12) Nyɔŋmɔ biii ni mɛi krokomɛi aye hejɔɔmɔ gbi mla ko nɔ. Kɛfata he lɛ, kɛtsɔ Yesu Kristo kpɔmɔ afɔleshãa lɛ nɔ lɛ, ‘ajie Yudafoi lɛ tete kɛjɛ Mose Mla,’ lɛ ni Kitãi Nyɔŋma lɛ fata he lɛ shishi. (Romabii 7:6, 7; 10:4; Galatiabii 3:24, 25; Efesobii 2:15) Nɔ najiaŋ ni Kristofoi baaye Mose Mla lɛ nɔ lɛ, amɛyeɔ suɔmɔ mla ni nɔ kwɔ lɛ nɔ.
Susumɔi ni ejaaa ni ahiɛ yɛ Hejɔɔmɔ gbi lɛ he
Susumɔ ni ejaaa: Nyɔŋmɔ to Hejɔɔmɔ gbi lɛ be ni ejɔɔ ehe yɛ gbi ni ji kpawo lɛ nɔ lɛ.
Anɔkwa sane: Biblia lɛ kɛɔ akɛ: “Nyɔŋmɔ jɔɔ gbi ni ji gbi kpawo lɛ, ni efee lɛ krɔŋkrɔŋ, ejaakɛ no mli ejɔɔ ehe yɛ kɛjɛ enitsumɔ fɛɛ ni Nyɔŋmɔ bɔ ni efee lɛ mli.” (1 Mose 2:3) Ŋmalɛ nɛɛ mli wiemɔi lɛ jeee mla kɛhã gbɔmɔ, shi moŋ lɛ, eetsɔɔ nɔ ni Nyɔŋmɔ fee yɛ adebɔɔ gbi ni ji gbi kpawo lɛ nɔ. Biblia lɛ etsɔɔɔ akɛ mɛi ni hi shi dani afɔ Mose lɛ ateŋ mɔ ko ye hejɔɔmɔ gbi.
Susumɔ ni ejaaa: Dani akɛ Mose Mla lɛ hã Israelbii lɛ, no mli lɛ, amɛyɛ Hejɔɔmɔ gbi mla lɛ shishi.
Anɔkwa sane: Mose kɛɛ Israelbii lɛ akɛ: “Yehowa, wɔ-Nyɔŋmɔ lɛ, kɛ wɔ kpaŋ yɛ Horeb” ní bɛŋkɛ Sinai Gɔŋ lɛ. Hejɔɔmɔ gbi mla lɛ fata kpaŋmɔ nɛɛ he. (5 Mose 5:2, 12) Israelbii lɛ anifeemɔ tsɔɔ akɛ Hejɔɔmɔ gbi lɛ ji nɔ ko hee kɛhã amɛ. Eji Israelbii lɛ yɛ Hejɔɔmɔ gbi mla ko shishi momo be ni amɛyɔɔ Ejipt lɛ kulɛ, te aaafee tɛŋŋ ni Hejɔɔmɔ gbi lɛ baahã amɛkai kpɔmɔ ni akpɔ amɛ taakɛ Nyɔŋmɔ kɛɛ lɛ? (5 Mose 5:15) Mɛni hewɔ akɛɛ amɛ akɛ amɛkabua mana naa yɛ gbi ni ji kpawo lɛ nɔ lɛ? (2 Mose 16:25-30) Mɛni hewɔ hu ni amɛyaleee bɔ ni amɛkɛ klɛŋklɛŋ mɔ ni ku hejɔɔmɔ gbi mla lɛ mli lɛ baaye ahã lɛ?
Susumɔ ni ejaaa: Hejɔɔmɔ gbi lɛ ji naanɔ kpaŋmɔ, no hewɔ lɛ, esa akɛ akɛtsu nii lolo.
Anɔkwa sane: Biblia shishitsɔɔlɔi komɛi tsɛɔ Hejɔɔmɔ gbi lɛ akɛ “naanɔ kpaŋmɔ.” (2 Mose 31:16) Nɔ ni tamɔɔɔ nakai lɛ, Hebri wiemɔ ni atsɔɔ shishi akɛ “naanɔ” lɛ baanyɛ atsɔɔ “nɔ ko ni sɛɛ tsɛɔ” shi jeee nɔ ko ni baahi shi kɛya naanɔ. Ákɛ nɔkwɛmɔnɔ lɛ, Biblia lɛ kɛ nakai wiemɔ lɛ nɔŋŋ tsu nii kɛkɔ Israel osɔfoyeli lɛ, ni Nyɔŋmɔ kɛba naagbee afii 2,000 ni eho nɛ lɛ he.
Susumɔ ni ejaaa: Akɛni Yesu ye Hejɔɔmɔ gbi lɛ hewɔ lɛ, esa akɛ Kristofoi hu aye.
Anɔkwa sane: Yesu ye Hejɔɔmɔ gbi lɛ ejaakɛ Yudanyo ni, no hewɔ lɛ, esa akɛ eye Mose Mla lɛ nɔ. (Galatiabii 4:4) Yesu gbele sɛɛ lɛ, akɛ Mla kpaŋmɔ nɛɛ
Susumɔ ni ejaaa: Bɔfo Paulo ye Hejɔɔmɔ gbi akɛ Kristofonyo.
Anɔkwa sane: Paulo tee kpeehei lɛ yɛ Hejɔɔmɔ gbi lɛ nɔ, shi jeee koni eyafata Yudafoi lɛ ahe kɛye Hejɔɔmɔ gbi. (Bɔfoi 13:14; 17:1-3; 18:4) Moŋ lɛ, taakɛ efɔɔ feemɔ lɛ, eyashiɛ sane kpakpa lɛ yɛ kpeehei lɛ, ejaakɛ no beiaŋ lɛ, anyɛɔ afɔ̃ɔ shiɛlɔi nine koni amɛbashiɛ amɛtsɔɔ mɛi ni ebabua amɛhenaa kɛhã jamɔ lɛ. (Bɔfoi 13:15, 32) Paulo shiɛɔ “daa gbi,” jeee yɛ hejɔɔmɔ gbi nɔ kɛkɛ.
Susumɔ ni ejaaa: Kristofoi Ahejɔɔmɔ gbi ji Hɔgbaa.
Anɔkwa sane: Biblia lɛ fãaa Kristofoi akɛ amɛkɛ Hɔgbaa, ni ji otsi lɛ mli klɛŋklɛŋ gbi lɛ ama shi akɛ hejɔɔmɔ gbi kɛjá Nyɔŋmɔ. Yɛ mra beiaŋ Kristofoi lɛ agbɛfaŋ lɛ, Hɔgbaa tamɔ gbii krokomɛi ni akɛtsuɔ nii lɛ nɔŋŋ. Wolo ko (The International Standard Bible Encyclopedia) kɛɛ akɛ: “Afii ohai etɛ afiiaŋ dani Roma nɔyelɔ Konstantino [Roman nɔyelɔ wɔŋjalɔ] wo akpɔ akɛ akatsu nitsumɔi komɛi Hɔgbaa, ni no hã Hɔgbaa baafee tamɔ hejɔɔmɔ gbi.” *
Belɛ, mɛni hewɔ ŋmalɛi komɛi hãa Hɔgbaa bafeɔ tamɔ gbi krɛdɛɛ ko lɛ? Biblia lɛ kɛɛ akɛ, bɔfo Paulo kɛ kaselɔi krokomɛi lɛ ye nii ‘yɛ otsi lɛ klɛŋklɛŋ gbi ni ji Hɔgbaa lɛ nɔ,’ shi nilee yɛ mli, ejaakɛ enɔ jetsɛremɔ lɛ, ebaashi amɛ. (Bɔfoi 20:7) Kɛfata he lɛ, akɛɛ asafoi komɛi ni amɛŋɔ nii ni amɛyɔɔ lɛ eko amɛto yɛ ‘otsi fɛɛ otsi mli klɛŋklɛŋ gbi, ni ji Hɔgbaa lɛ nɔ’ koni akɛye abua mɛi krokomɛi, shi eji ŋaawoo kɛhã aŋkroaŋkroi bɔ ni afee ni amɛto amɛshika he gbɛjianɔ jogbaŋŋ. Akɛ onia nɛɛ toɔ yɛ shĩa, akɛbaaa kpeehe lɛ.
Susumɔ ni ejaaa: Eji tɔ̃mɔ akɛ abaato gbi kome daa otsi kɛhã hejɔɔmɔ kɛ Nyɔŋmɔ jámɔ.
Anɔkwa sane: Biblia lɛ shiɔ yiŋkpɛɛ nɛɛ ehãa Kristofonyo fɛɛ Kristofonyo.
[Footnotes]
^ kk. 21 Kɛfata he lɛ, kwɛmɔ wolo ni ji New Catholic Encyclopedia, Second Edition, Volume 13 lɛ, baafa 608 lɛ.
Ekolɛ Obaasumɔ Enɛ Hu
SANEBIMƆI NI BIBLIA LƐ EHÃ HETOO
Mɛni Ji Kitãi Nyɔŋma Ni Nyɔŋmɔ Kɛhã Lɛ?
Namɛi akɛhã? Ani aakpa Kristofoi gbɛ ni amɛye Kitai Nyɔŋma lɛ nɔ?
SAJI NI MƐI FƆƆ BIMƆ
Ani Yehowa Odasefoi lɛ, Kristofoi ji Amɛ?
Ofainɛ, kwɛmɔ bɔ ni esoro wɔ kwraa yɛ jamɔ kui ni atsɛɔ amɛ Kristofoi lɛ ahe.
BUU-MƆƆ
Ani Mla ni Nyɔŋmɔ Kɛhã Israel lɛ Ja ni Ehi?
Shishitoo mlai ejwɛ titrii komɛi ye ebua Israel kojolɔi lɛ.
ESSENTIAL BIBLE TEACHINGS
Ani Nyɔŋmɔ Kpɛlɛɔ Jamɔi Fɛɛ Nɔ?
Mɛi pii heɔ amɛyeɔ akɛ Nyɔŋmɔ kpɛlɛɔ jamɔi srɔtoi fɛɛ anɔ.
