Ani ofɔlɔi ŋmɛɔ bo gbɛ ni oya soshia midia nɔ? Kɛ́ nakai ni lɛ, sane nɛɛ baaye ebua bo yɛ oshihilɛ mli nibii etɛ komɛi ni he hiaa waa lɛ ahe.

Nɔ ni wɔbaasusu he yɛ sane nɛɛ mli

•  Te soshia midia náa mibe nɔ hewalɛ ehãa tɛŋŋ?

•  Te soshia midia miiná miwɔɔ nɔ hewalɛ eehã tɛŋŋ?

•  Te soshia midia miiná mihenumɔ nɔ hewalɛ eehã tɛŋŋ?

•  Nɔ ni otipɛŋfoi kɛɔ

 Kɛ́ oyɛ soshia midia nɔ lɛ, etamɔ ota okpɔŋɔ ko ni miijo foi nɔ​—kɛ́ okudɔɔɔ lɛ lɛ, ebaakudɔ bo.

 “Kɛ́ mikpɛ miyiŋ akɛ miiya soshia midia lɛ nɔ lɛ, mikɛɔ mihe akɛ mayakwɛ nɔ ko yɛ nɔ ‘be kukuoo ko kɛkɛ’​—shi be ni mahere shi lɛ, miye ŋmɛlɛtswai abɔ yɛ nɔ! Soshia midia lɛ nɔ yaa baanyɛ aka ohe waa ni ebaanyɛ efite obe babaoo hu.”​—Joanna.

 Ani ole? soshia midia lɛ nɔ yaa kaa mɔ he waa, ejaakɛ aje gbɛ afee lɛ nakai. Mɛi ni feɔ soshia midia saitii lɛ le akɛ kɛ́ amɛfee ni ehe gbɛi waa lɛ, ehãa mɛi babaoo yeɔ be yɛ nɔ ni ehãa mɛi ni tswaa amɛnibii ahe adafi yɛ nɔ lɛ hu woɔ nyɔmɔ babaoo.

 Bi ohe akɛ: ‘Ani efɔɔ kaa akɛ kɛ́ mitee soshia midia lɛ nɔ akɛ miyakwɛ nɔ ko lɛ, be ni mahɛle shi lɛ, miye be babaoo fe bɔ ni misusuɔ? Ani manyɛ mikɛ nakai bei lɛ eko afee nibii ni sɛɛnamɔ yɔɔ he, loo nibii krokomɛi ni he hiaa waa?’

 Nɔ ni obaanyɛ ofee. Too be abɔ ni obaaye yɛ soshia midia lɛ nɔ lɛ ofɔ̃ shi, ni obɔ mɔdɛŋ akɛ obaaye nakai be lɛ nɔ pɛpɛɛpɛ, ni ekaho he.

 “Mikɛ taima loo alam ko ewo mifoŋ lɛ nɔ, ni mitsɔɔ bei abɔ ni masumɔ ni maye yɛ app ko nɔ. Kɛ́ nakai be lɛ shɛ nɔŋŋ lɛ, elɔɔkiɔ app lɛ ni ehãaa ni mikɛtsu nii. Be ni mifee enɛ be kplaŋŋ lɛ, eye ebua mi ni mina bei abɔ ni manyɛ maye yɛ soshia midia lɛ nɔ, koni nakai bei amli nɔŋŋ lɛ, mikafite be tsɔ̃.”​—Tina

 Biblia mli shishitoo mla: “Nyɛkɛ nyɛbe atsu nii jogbaŋŋ.”​—Efesobii 5:16.

 Mɛi ni ekase oblahii kɛ oblayei ahe saji jogbaŋŋ lɛ kɛɔ akɛ, kɛ́ hooo kwraa lɛ, esa akɛ oblahii kɛ oblayei anyɛ awɔ ŋmɛlɛtswai kpaanyɔ daa gbɛkɛ, shi amɛteŋ mɛi babaoo awɔɔ shɛɛɛ nakai. Nɔ kome hewɔ ni ebaa lɛ nakai ji, amɛkɛ be ni esa akɛ amɛkɛwɔ lɛ yaa soshia midia lɛ nɔ.

 “Kɛ́ miyawɔ lɛ, mikwɛɔ mifoŋ lɛ nɔ akɛ miná mɛseji loo nɔ ko ni he hiaa lo, kɛkɛ lɛ, be ni mahɛle shi lɛ, nɔ kroko egbala mijwɛŋmɔ, mihiɛ kwɛmɔ aahu be ni mahɛle shi lɛ, mikɛ ŋmɛlɛtswai abɔ ekwɛ mɛi a-mfonirii kɛ nibii ni amɛkɛwo soshia midia lɛ nɔ. Eji su gbonyo ko ni miibɔ mɔdɛŋ akɛ maye nɔ.”​—Maria.

 Ani ole? Kɛ́ onáaa be ni fa kɛwɔ lɛ, ebaahã ofee yeyeeye ni obaahao waa. Jwɛŋmɔ he nilelɔ kpanaa ko ni atsɛɔ lɛ Jean Twenge lɛ wie akɛ, nɔ́ titri ni hãa hela mɔɔ mɛi, ni ehãaa amɛná miishɛɛ hu ji wɔɔ kpakpa ni amɛnáaa amɛwɔ lɛ. Ekɛfata he akɛ, “be ni be shwieɔ mli lɛ,” akɛni mɛi nɛɛ náaa wɔɔ kpakpa amɛwɔ hewɔ lɛ, ehãa amɛnáa “jwɛŋmɔŋ naagbai.”

 Bi ohe akɛ: ‘Ŋmɛlɛtswai enyiɛ mináa mikɛwɔɔ daa gbɛkɛ?’ ‘Ani miyaa soshia midia lɛ nɔ be ni esa akɛ makã shi majɔɔ mihe ni mawɔ lɛ?’

 Nɔ ni obaanyɛ ofee. Okɛ ofoŋ kɛ ehenɔi lɛ akafɔ̃ omasɛi be ni oyaawɔ, aloo kɛ́ ebaahi lɛ, okɛkafɔ̃ he ni owɔɔ lɛ. Kɛ́ ebaahi lɛ, ŋmɛlɛtswai enyɔ dani obaawɔ lɛ, okɛ ofoŋ kɛ ehenɔi lɛ afɔ̃ he ko ni ekagbala ojwɛŋmɔ. Kɛ́ ootao osɛɛti alam koni kɛ́ je tsɛre lɛ etsiɛ ohiɛ lɛ, kaasɛɛti yɛ ofoŋ loo tablɛt lɛ nɔ.

 “Bei komɛi lɛ, mikwɛɔ nii yɛ mifoŋ lɛ nɔ aahu akɛ, je naa waa ni miwɔko. Eji naagba ko ni miibɔ mɔdɛŋ maye nɔ. Miitao mikɛ minifeemɔ atsɔɔ akɛ mihiɛ kã shi, miida, ni mitsuɔ misɔ̃i ahe nii hu. Oti ni ma mihiɛ ji akɛ mabɔi wɔɔ mra kɛjɔɔ migbɔmɔtso lɛ he, koni kɛ́ je tsɛre lɛ manyɛ mafee nɔ fɛɛ nɔ ni esa akɛ mafee lɛ jogbaŋŋ.”​—Jeremy.

 Biblia mli shishitoo mla: “Nyɛna nibii ni he hiaa waa lɛ.”​—Filipibii 1:10.

 Yɛ niiamlitaomɔ ko ni afee lɛ mli lɛ, oblayei ni yaa sɛkɛndre skul ni abibii amɛ saji lɛ ateŋ mɛi fã kpotoo kɛɛ akɛ, bei pii lɛ amɛnáaa miishɛɛ, ni amɛhiɛnɔkamɔ fɛɛ hu tãa. Ekolɛ, soshia midia hu hewɔ ni amɛnuɔ he nakai lɛ. Nuu ko ni atsɛɔ lɛ Dr. Leonard Sax lɛ wie akɛ, “Kɛ́ efɔɔ kaa akɛ oyeɔ bei babaoo yɛ soshia midia lɛ nɔ lɛ, ehãa okɛ ohe toɔ mɛi krokomɛi ahe, ni ewaaa kwraa akɛ obaanu he akɛ obɛ mli ni ayaa. Kɛkɛ lɛ, onii baafee ohe mɔbɔ, loo onáŋ ohewɔ miishɛɛ.”

 “Efɔɔ kaa akɛ oblahii kɛ oblayei kɛ amɛhe toɔ mɛi krokomɛi ahe, ni soshia midia fiteɔ sane lɛ kwraa. Ehãa okɛ be babaoo kwɛɔ mɛi srɔtoi ahe mfonirii ni akɛwo nɔ ni okɛ ohe toɔ amɛhe, aloo ebaahã okwɛ nibii ni onanemɛi feɔ kɛjieɔ amɛhiɛtserɛ lɛ ni ebaahã onu he akɛ nɔ ko miiŋmɛɛ bo loo obɛ mli ni ayaa.”​—Phoebe.

 Ani ole? Eyɛ mli akɛ soshia midia baanyɛ ehã okɛ onanemɛi ashãra moŋ, shi etamɔɔɔ ni okɛ amɛmiishãra hiɛ kɛ hiɛ. Nuu ko ni atsɛɔ lɛ Dr. Nicholas Kardaras lɛ wie akɛ, “Kɛ́ okɛ mɛi miigba sane hiɛ kɛ hiɛ lɛ, ehãa omii shɛɔ ohe waa fe bɔ ni omii shɛɔ ohe kɛ́ okɛ amɛ miiwie yɛ foŋ kɛ ehenɔi lɛ anɔ. Foŋ kɛ ehenɔi lɛ anɔ shãramɔ lɛ hãaa wɔtsui anyɔ wɔmli jogbaŋŋ, ejaakɛ adesai sumɔɔ ni akɛ amɛ ashãra hiɛ kɛ hiɛ.” a

 Bi ohe akɛ: ‘Kɛ́ mikwɛ nibii ni minanemɛi lɛ feɔ lɛ, ani minuɔ he akɛ mihe efee shoo?’ ‘Kɛ́ mikwɛ nibii ni minanemɛi kɛwo soshia midia lɛ nɔ, ni etamɔ nɔ ni nɔ fɛɛ nɔ miiya lɛ jogbaŋŋ eehã amɛ lɛ, ani minuɔ he akɛ mishihilɛ efee shwɛm loo mibɛ mli ni ayaa? Kɛ́ mikɛ nɔ ko wo soshia midia lɛ nɔ ni mɛi fioo ko pɛ tsɔɔ akɛ amɛnyaa he, loo amɛsumɔɔ, loo mɔ ko kwraa etsɔ̃ɔɔ akɛ esumɔɔ lɛ, ani minijiaŋ jeɔ wui?’

 Nɔ ni obaanyɛ ofee. Bɔɔ mɔdɛŋ “ojie ojwɛŋmɔ yɛ soshia midia nɔ,” no ji, kaaya nɔ, ekolɛ gbii fioo, otsi loo nyɔɔŋ kome po. Okɛ onanemɛi afɔ shãramɔ hiɛ kɛ hiɛ, loo yɛ foŋ nɔ fe bɔ ni ofeɔ tsutsu lɛ. Kɛ́ okpa soshia midia lɛ nɔ yaa fioo lɛ, ekolɛ obaana akɛ onuŋ tɔlɛ he tsɔ, ni omii baashɛ ohe fe tsutsu lɛ.

 “Be ni miyaa soshia midia lɛ nɔ lɛ, miyɔse akɛ mikɛ mijwɛŋmɔ maa nibii ni mɛi feɔ lɛ anɔ waa. Be ni midiliti soshia midia akaunt lɛ, minu he tamɔ awo jatsu ko ni tsii yɛ minɔ, kɛkɛ ni miná be kɛfee nibii ni he hiaa waa lɛ.”​—Briana.

 Biblia mli shishitoo mla: “Mɔ fɛɛ mɔ apɛi enifeemɔi amli ekwɛ, kɛkɛ lɛ ebaana nɔ ko yɛ lɛ diɛŋtsɛ ehe ni baahã emii ashɛ ehe, shi jeee ni ekɛ ehe baato mɔ kroko he.”​—Galatiabii 6:4.