•  Mɛni hewɔ esa akɛ okɛ obe atsu nii jogbaŋŋ?

•  Nɔ ni obaanyɛ ofee

•  Nɔ ni otipɛŋfoi kɛɔ

• Be tamɔ shika. Kɛ́ ofite be, ni sɛɛ mli lɛ ehe bahia bo lɛ, onine nyɛŋ ashɛ nɔ dɔŋŋ. Yɛ gbɛ kroko nɔ lɛ, kɛ́ oto obe he gbɛjianɔ jogbaŋŋ lɛ, obaana eko ni okɛtsu nibii ni onáa amɛhe miishɛɛ lɛ ahe nii!

  Biblia shishitoo mla: “Anihaolɔ yɛ nɔ ni eshweɔ, shi fɛɛ sɛɛ lɛ, enáaa nɔ ko, shi mɔdɛŋbɔlɔ lɛ, etsui baanyɔ emli.”—Abɛi 13:4.

  Sane lɛ nɔŋŋ ji akɛ: Kɛ́ oto obe he gbɛjianɔ jogbaŋŋ lɛ, ohe fiŋ bo, moŋ lɛ, obaaná be pii kɛfee nibii.

• Kɛ́ okase bɔ ni akɛ be tsuɔ nii jogbaŋŋ lɛ, kɛ́ oda lɛ ebaaye ebua bo. Kɛ́ okɛtsu nii jogbaŋŋ lɛ ehãŋ onitsumɔ aje odɛŋ, shi kɛ́ okɛtsuuu nii jogbaŋŋ lɛ onitsumɔ baanyɛ aje odɛŋ. Kɛ́ oyɛ nitsumɔ ni ohe mɛi owo mli lɛ, ani obaahã mɔ ko ni kpeɔ sɛɛ daa kɛbaa nitsumɔ lɛ aya nɔ ahi mli?

  Biblia shishitoo mla: “Mɔ ni yeɔ anɔkwa yɛ nɔ ko bibioo kwraa mli lɛ, eyeɔ anɔkwa yɛ babaoo hu mli.”—Luka 16:10.

  Sane lɛ nɔŋŋ ji akɛ: Kɛ́ okɛ obe tsuɔ nii jogbaŋŋ lɛ, ehãa anaa mɔ ni oji.

Eji anɔkwale akɛ, ebɛ mlɛo akɛ mɔ kɛ ebe baatsu nii jogbaŋŋ. Naa gbɛtsĩi nibii fioo komɛi.

Gbɛtsĩi 1: Nanemɛi

“Kɛ́ minanemɛi kɛɛ mifata amɛhe ni wɔje kpo lɛ, bei pii kɛ́ mibɛ dekã po lɛ, mikɛ amɛ yaa. Bei komɛi lɛ misusuɔ akɛ, ‘Kɛ́ miku misɛɛ miba lɛ, manyɛ magbe nibii ni esa akɛ mafee lɛ anaa.’ Bei pii lɛ, minyɛɛɛ matsu nibii nɛɛ ahe nii, ni ehã nibii amli ewo wu moŋ.”—Cynthia.

Gbɛtsĩi 2: Nibii ni gbalaa jwɛŋmɔ

“TV kaa mɔ waa. Nibii ni ajieɔ yɛ nɔ lɛ nyɛɔ emɔɔ mɔ, ni ewaa akɛ obaagbe loo obaate shi yɛ sɛɛ.”—Ivy.

“Mifiteɔ ŋmɛlɛtswai abɔ kɛ́ mikɛ mitablɛt lɛ miitsu nii. Minuɔ fɔyeli he waa, ejaakɛ ja batreɛI lɛ egbo dani mikɛfɔ̃ɔ shi.”—Marie.

Gbɛtsĩi 3: Nii ni afeee yɛ be naa

“Kɛ́ ahã mi homwɛk loo nɔ kroko ni esa akɛ mafee yɛ be naa lɛ, mitsiɔ mitoɔ. Mifiteɔ be lɛ kɛfeɔ nibii krokomɛi ni sɛɛnamɔ bɛ he kɛyashiɔ be ni esa akɛ mikɛ homwɛk lɛ ayahã lɛ shɛɔ—jeee nɛkɛ kwraa ji bɔ ni esa akɛ akɛ be atsu nii.”—Beth.

1. Ŋmalamɔ nibii ni esa akɛ ofee lɛ. Ekomɛi ji shĩa nifeemɔ kɛ́ homwɛk. Ŋmalamɔ be ni esa akɛ oye kɛtsu nibii ni oyɔɔ tsumɔ yɛ otsi pɔtɛɛ ko mli lɛ eko fɛɛ eko oshwie shi.

   Biblia shishitoo mla: “Nyɛkwɛa ni nyɛna nibii ni he hiaa waa lɛ.”—Filipibii 1:10.

2. Ŋmalamɔ nibii ni osumɔɔ feemɔ be ni obɛ nɔ ko tsɔ feemɔ. Nibii nɛɛ ekomɛi ji fesbuk kɛ ehenɔi lɛ kɛ nitsumɔ kɛ TV kwɛmɔ. Kɛfata he lɛ, ŋmalamɔ bei abɔ ni oyeɔ yɛ otsi pɔtɛɛ ko mli lɛ yɛ nibii nɛɛ eko fɛɛ eko he lɛ oshwie shi.

   Biblia shishitoo mla: “Nyɛyaa nɔ nyɛnyiɛa yɛ hiɛshikamɔ mli . . . , nyɛkɛ nyɛbe atsu nii jogbaŋŋ.”—Kolosebii 4:5.

3. Too gbɛjianɔ. Kwɛmɔ nibii srɔtoi enyɔ ni oŋmala oshwie shi lɛ. Ani ohã nibii ni he hiaa bo lɛ be falɛ ni sa? Ani esa akɛ ohe be kɛje be ni okɛjieɔ ohiɛtserɛ lɛ mli?

   Ŋaawoo: Ŋmalamɔ nibii ni oyɔɔ feemɔ yɛ gbi lɛ mli lɛ oshwie shi, kɛ́ ogbe eko naa nɔŋŋ lɛ, tiikimɔ.

   Biblia shishitoo mla: “Mɔdɛŋbɔlɔ gbɛjianɔtoi baaye omanye kɛ̃.”—Abɛi 21:5.

4. Bɔɔ mɔdɛŋ ni okɛ nɔ ni oŋma lɛ atsu nii. Anɔkwa, bei komɛi lɛ ebaabi ni okaya henaabuamɔi komɛi bɔ ni afee ni onyɛ ofee nibii ni he hiaa bo waa lɛ. Enɛ baahã oná be pii kɛtsu nibii krokomɛi ahe nii, ni omii baashɛ ohe waa.

   Biblia shishitoo mla: “Nyɛhiɛ adɔa nyɛnitsumɔ he, nyɛkɛ nyɛnitsumɔ akashwɛa.”—Romabii 12:11, shishigbɛ niŋmaa.

5. Jweremɔ ohe—shi gbee onitsumɔ lɛ naa dã. Oblayoo ko ni atsɛɔ lɛ Tara lɛ wie akɛ “Bei komɛi lɛ migbeɔ nibii ni miŋmala ni matsu he nii lɛ enyɔ naa, kɛkɛ lɛ, mikɛɛ akɛ, ‘OK, manyɛ makwɛ TV minitii 15 koni no sɛɛ lɛ matsu nɔ ni eshwɛ lɛ.’ Nɔ ni baa ji minitii 15 lɛ tsɔɔ minitii 30, ni minitii 30 lɛ tsɔɔ ŋmɛlɛtswaa kome, be ni mahɛle shi lɛ miye ŋmɛlɛtswai enyɔ sɔŋŋ kɛkwɛ TV!”

   Mɛni baaye abua bo? Buu hiɛtserɛjiemɔ akɛ nɔ ko ni okɛmiijwere ohe akɛni ogbe onitsumɔ lɛ naa lɛ hewɔ—jeee be fɛɛ be esa akɛ ojie ohiɛtserɛ.

   Biblia shishitoo mla: “Nɔ kpakpa ko bɛ kɛhã gbɔmɔ fe . . . ni ená nii ni etsuɔ waa lɛ mli ŋɔɔmɔ.”—Jajelɔ 2:24.