BIBLIA MLI ŊMALƐI NI AGBALA MLI
Mateo 6:33—“Nyɛtaoa Nyɔŋmɔ Maŋtsɛyeli Lɛ”
“No hewɔ lɛ, nyɛyaa nɔ nyɛtaoa Maŋtsɛyeli lɛ kɛ Nyɔŋmɔ jalɛ lɛ klɛŋklɛŋ, ni akɛ nibii krokomɛi nɛɛ fɛɛ baafata he ahã nyɛ.”—Mateo 6:33, Jeŋ Hee Shishitsɔɔmɔ.
“Shi nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ nii nɛɛ fɛɛ aaafata he ahã nyɛ.”—Mateo 6:33, Ga Biblia momo.
Nɔ Ni Mateo 6:33 Lɛ Tsɔɔ
Nyɔŋmɔ Maŋtsɛyeli lɛ ji nɔyeli ko ni yɔɔ ŋwɛi ni baahã afee Nyɔŋmɔ suɔmɔnaanii yɛ shikpɔŋ lɛ nɔ. (Mateo 6:9, 10) Kɛ́ mɔ ko hã maŋtsɛyeli lɛ fee nɔ ni he hiaa lɛ fe nɔ fɛɛ nɔ yɛ shihilɛ mli lɛ, etsɔɔ akɛ eetao Maŋtsɛyeli lɛ klɛŋklɛŋ. a Enɛ etsɔɔɔ akɛ esa akɛ mɔ lɛ ale Nyɔŋmɔ Maŋtsɛyeli lɛ he nii pɛ kɛkɛ, shi moŋ ebiɔ ni ekɛɛ mɛi krokomɛi nibii kpakpai ni Maŋtsɛyeli lɛ baafee lɛ. (Mateo 24:14) Mɔ ni taoɔ Maŋtsɛyeli lɛ klɛŋklɛŋ lɛ sɔleɔ hu koni eba.—Luka 11:2.
Nyɔŋmɔ jalɛ lɛ kɔɔ eshishitoo mlai kɛhã nɔ ni ja kɛ nɔ ni ejaaa he. (Lala 119:172) No hewɔ lɛ, mɔ ni taoɔ Nyɔŋmɔ jalɛ lɛ hiɔ shi yɛ Nyɔŋmɔ jeŋba he mlai ni he yɔɔ sɛɛnamɔ be fɛɛ be lɛ anaa.—Yesaia 48:17.
Sane ni ji, akɛ nibii krokomɛi nɛɛ fɛɛ baafata he ahã nyɛ lɛ ji shi ni Nyɔŋmɔ ewo akɛ ebaakwɛ mɛi fɛɛ ni taoɔ maŋtsɛyeli lɛ kɛ ejalɛ lɛ klɛŋklɛŋ lɛ atsiabo.—Mateo 6:31, 32.
Saji Ni Kɔɔ Mateo 6:33 Lɛ He
Wiemɔi nɛɛ fata nɔ ni ale lɛ akɛ Yesu gɔŋ nɔ shiɛmɔ lɛ ni abɔ he amaniɛ yɛ Mateo 5-7 lɛ mli lɛ he. Ŋwanejee ko bɛ he akɛ mɛi ni bo Yesu toi nɛɛ ateŋ mɛi pii ji ohiafoi. No hewɔ lɛ, ekolɛ amɛnu he akɛ esa akɛ amɛtao heloonaa nibii klɛŋklɛŋ, ní amɛkɛ be fioo ni baashwɛ lɛ atao Maŋtsɛyeli lɛ. Shi Yesu wo amɛ hewalɛ koni amɛkwɛ bɔ ni Nyɔŋmɔ kwɛɔ kooloi kɛ tsei ni ebɔ lɛ. Nyɔŋmɔ ewo shi akɛ ebaafee nakai nɔŋŋ ehã mɛi fɛɛ ni taoɔ emaŋtsɛyeli lɛ klɛŋklɛŋ lɛ.—Mateo 6:25-30.
Susumɔ Ni Ejaaa Ni Ahiɛ Yɛ Mateo 6:33 Lɛ He
Susumɔ ni ejaaa: Mɔ fɛɛ mɔ ni taoɔ maŋtsɛyeli lɛ baatsɔ niiatsɛ.
Anɔkwa sane: Yesu kɛɛ mɛi ni kɛ Nyɔŋmɔ maŋtsɛyeli lɛ yeɔ klɛŋklɛŋ gbɛhe lɛ baaná amɛhiamɔ nii, tamɔ niyenii kɛ atade nɛkɛ. (Mateo 6:25, 31, 32) Kɛ̃lɛ, ewooo amɛ shi akɛ amɛbaaná nii kpɔtɔɔ loo heloonaa nibii babaoo, koni no atsɔɔ akɛ Nyɔŋmɔ miijɔɔ amɛ. Anɔkwa, Yesu bɔ etoibolɔi lɛ kɔkɔ ni amɛkabɔ mɔdɛŋ akɛ amɛbaaná nii kpɔtɔɔ, ejaakɛ no baahã ewa kɛhã amɛ akɛ amɛbaatao maŋtsɛyeli lɛ klɛŋklɛŋ. (Mateo 6:19, 20, 24) Bɔfo Paulo kɛ ebe babaoo tsu Nyɔŋmɔ Maŋtsɛyeli lɛ nitsumɔ lɛ waa, kɛ̃lɛ enáaa heloonaa nibii babaoo. Tamɔ Yesu fee lɛ, bɔfo Paulo hu bɔ mɛi kɔkɔ yɛ oshara ni yɔɔ mɔdɛŋ ni abɔɔ akɛ abaaná nii babaoo lɛ he.—Filipibii 4:11, 12; 1 Timoteo 6:6-10.
Susumɔ ni ejaaa: Ehe ehiaaa ni Kristofoi tsuɔ nii kɛkwɛɔ amɛhe.
Anɔkwa sane: Biblia lɛ kɛɛ esa akɛ anɔkwa kristofoi atsu nii koni amɛnyɛ amɛkwɛ amɛhe kɛ amɛ wekui. (1 Tesalonikabii 4:11, 12; 2 Tesalonikabii 3:10; 1 Timoteo 5:8) Yesu ewieee akɛ esɛɛnyiɛlɔi lɛ atao maŋtsɛyeli lɛ pɛ; shi moŋ ekɛɛ amɛtaoɔ Maŋtsɛyeli lɛ klɛŋklɛŋ.
Mɛi ni taoɔ Nyɔŋmɔ Maŋtsɛyeli lɛ klɛŋklɛŋ, ni bɔɔ mɔdɛŋ amɛtsuɔ nii koni amɛná amɛheloonaa hiamɔ nii hu lɛ baanyɛ aná nɔmimaa akɛ Nyɔŋmɔ baaye abua amɛ ni amɛná shihilɛ mli nibii ni he hiaa amɛ lɛ.—1 Timoteo 6:17-19.
a Atsɔɔ “nyɛyaa nɔ nyɛtaoɔ lɛ” shishi kɛjɛ Greek feemɔ wiemɔ ko ni tsɔɔ nɔ ko ni ayaa nɔ afeɔ lɛ mli, ni abaanyɛ atsɔɔ wiemɔ nɛɛ shishi hu akɛ “taomɔ daa.” Enɛ tsɔɔ akɛ, esa akɛ Maŋtsɛyeli lɛ afee nɔ ni he hiaa waa fe nɔ fɛɛ nɔ, ni jeee kɛ́ aasumɔ dani ataoɔ aloo abaatao lɛ be kukuoo ko.
Ekolɛ Obaasumɔ Enɛ Hu
ESSENTIAL BIBLE TEACHINGS
Mɛni Ji Nyɔŋmɔ Maŋtsɛyeli Lɛ?
Yɛ Yesu sɔɔmɔ nitsumɔ lɛ mli fɛɛ lɛ, ewie Nyɔŋmɔ Maŋtsɛyeli lɛ he fe nibii krokomɛi fɛɛ. Afii ohai abɔ nɛ ní esɛɛnyiɛlɔi esɔle koni nakai Maŋtsɛyeli lɛ aba.
SANEBIMƆI NI BIBLIA LƐ EHÃ HETOO
Mɛni Nyɔŋmɔ Maŋtsɛyeli Lɛ Baatsu?
Kanemɔ koni ole nibii ni baaba be ni Nyɔŋmɔ nɔyeli lɛ yeɔ shikpɔŋ lɛ nɔ lɛ.
BIBLIA MLI ŊMALƐI NI AGBALA MLI
Filipibii 4:6, 7 Mligbalamɔ—“Nyɛkahaoa Yɛ Nɔ Ko Nɔ Ko He”
Mɛɛ sɔlemɔ henɔi baanyɛ aye abua mɛi ni jáa Nyɔŋmɔ lɛ koni amɛkaye amɛtsui ni amɛná toiŋjɔlɛ?
BIBLIA TSƆƆMƆI
Nibii Kɛhã Biblia Kasemɔ
Okɛ nibii ni afee kɛhã Biblia kasemɔ ni baahã otsui anyɔ omli beni okaseɔ nii, ni baawo bo hewalɛ hu lɛ atsu nii kɛkase Biblia lɛ.
BIBLIA TSƆƆMƆI
Kaa Wɔ-Biblia Kasemɔ Lɛ Okwɛ
Biblia kasemɔ ni baafee sanegbaa ni mɔ ko baawa bo; aheee shika.
