“Ejaakɛ Nyɔŋmɔ wiemɔ lɛ hiɛ kã ni eyɛ hewalɛ ni enaa ba fe klante fɛɛ klante ni hiɛ kɛ esɛɛ fɛɛ naa ba, ni egbuɔ kɛboteɔ gbɔmɔ mli aahu kɛyashi egbálaa susuma kɛ mumɔ mli, kɛ agbɛnɛ hu, talɔi kɛ wuiaŋfɔ lɛ mli, ni enyɛɔ ekɔɔ tsui lɛ mli susumɔi kɛ yiŋtoi asɛɛ.”​—Hebribii 4:12, Jeŋ Hee Shishitsɔɔmɔ.

 “Ejaakɛ Nyɔŋmɔ wiemɔ lɛ hiɛ kã ni eetsu nii, enaa ba fe klante fɛɛ klante kɛ enaa nta fɛɛ, ni egbuɔ kɛboteɔ mli kɛyashiɔ egbálaa susuma kɛ mumɔ lɛ mli, kɛ talɔi kɛ wuiaŋfɔi lɛ amli, ni enyɛɔ eyɔseɔ tsui lɛ mli susumɔi kɛ ejwɛŋmɔi lɛ.”​—Hebribii 4:12, English Standard Version.

 Sane ni Nyɔŋmɔ yɔɔ kɛhã adesai, ni aŋmala yɛ Biblia lɛ mli lɛ, yɛ hewalɛ ni baanyɛ ehã ana mɔ ko tsuiŋ susumɔi diɛŋtsɛ kɛ eyiŋtoi. Nakai sane lɛ baanyɛ atsake mɛi ashihilɛ koni amɛtsɔmɔ mɛi kpakpai.

 “Nyɔŋmɔ wiemɔ lɛ hiɛ kã.” Wiemɔ ni ji “Nyɔŋmɔ wiemɔ lɛ” damɔ shi kɛhã Nyɔŋmɔ wiemɔ ni ji eshiwoi, loo saji ni ewie ni kɔɔ eyiŋtoo he ni aŋmala yɛ Biblia lɛ mli lɛ. a Nakai yiŋtoo lɛ mli oti ko ni he hiaa waa ji, eesumɔ ni adesai ni feɔ toiboo lɛ ahi shikpɔŋ nɛɛ nɔ yɛ toiŋjɔlɛ diɛŋtsɛ kɛ ekomefeemɔ mli.​—1 Mose 1:28; Lala 37:29; Kpojiemɔ 21:3, 4.

 Mɛɛ gbɛ nɔ Nyɔŋmɔ wiemɔ lɛ, loo eyiŋtoi ni aŋmala ashwie shi lɛ “hiɛ kã”? Nɔ kome ji akɛ, enáa mɛi ni kpɛlɛɔ nɔ lɛ atsui nɔ hewalɛ kpakpa, ehãa amɛnáa hiɛnɔkamɔ, ni amɛhiɔ shi bɔ ni saa Nyɔŋmɔ hiɛ. (5 Mose 30:14; 32:47) Agbɛnɛ hu, Nyɔŋmɔ wiemɔ ni kɔɔ eshiwoi lɛ ahe lɛ “hiɛ kã,” ejaakɛ Nyɔŋmɔ hiɛkãalɔ lɛ miifee nɔ fɛɛ nɔ ni ebaanyɛ koni eshiwoi lɛ aba mli kɛmɔ shi. (Yohane 5:17) Akɛni Nyɔŋmɔ tamɔɔɔ adesai hewɔ lɛ, ewooo shi ni sɛɛ mli lɛ, ehiɛ baakpa nɔ loo ni ebaayɔse akɛ, asomoaŋ, enyɛŋ eye nakai shiwoo lɛ nɔ. (4 Mose 23:19) Ewiemɔi lɛ “ekuŋ esɛɛ kɛbaŋ [eŋɔɔ] efolo.”​—Yesaia 55:10, 11.

 ‘Nyɔŋmɔ wiemɔ lɛ yɛ hewalɛ.’ Abaanyɛ atsɔɔ wiemɔ ni ji, “eyɛ hewalɛ” lɛ shishi hu akɛ “ehe wa,” “eetsu nii,” loo “ebaanyɛ etsu yiŋtoo hewɔ ni awie nakai [wiemɔ lɛ] he nii.” No hewɔ lɛ, nɔ fɛɛ nɔ kwraa ni Yehowa b Nyɔŋmɔ ekɛɛ loo ewo he shi lɛ baaba mli kɛ̃. (Lala 135:6; Yesaia 46:10) Anɔkwa, Nyɔŋmɔ baanyɛ aye eshiwoi lɛ anɔ yɛ gbɛi ni wɔjwɛŋmɔ nyɛŋ ashɛ he kwraa lɛ anɔ.​—Efesobii 3:20. c

 Agbɛnɛ hu, Nyɔŋmɔ wiemɔ lɛ ‘yɛ hewalɛ’ ejaakɛ, eyeɔ ebuaa mɛi ni kɛtsuɔ nii lɛ ni amɛfeɔ tsakemɔi kpakpai yɛ amɛshihilɛ mli. Amɛhiɔ shi yɛ Nyɔŋmɔ tsɔɔmɔi lɛ anaa, no hewɔ lɛ enáa amɛsusumɔi, bɔ ni amɛfeɔ amɛ nii amɛhãa, kɛ otii ni amɛkɛmamɔ amɛhiɛ lɛ anɔ hewalɛ. (Romabii 12:2; Efesobii 4:24) Enɛ hewɔ lɛ, wɔbaanyɛ wɔkɛɛ akɛ, “Nyɔŋmɔ wiemɔ lɛ . . . miitsu nii hu yɛ” mɛi ni mɔɔ mli akɛ eji Nyɔŋmɔ wiemɔ lɛ mli.​—1 Tesalonikabii 2:13.

 “Nyɔŋmɔ wiemɔ lɛ . . . enaa ba fe klante fɛɛ klante ni hiɛ kɛ esɛɛ fɛɛ naa ba.” Yɛ mfonirifeemɔŋ gbɛ nɔ lɛ, Nyɔŋmɔ wiemɔ lɛ naa ba fe klante fɛɛ klante ni adesai efee, ejaakɛ eyɛ hewalɛ ni hãa enyɛɔ egbuɔ kɛboteɔ mli. Nyɔŋmɔ wiemɔ lɛ baanyɛ eshɛ tsui lɛ ni ji, mligbɛ gbɔmɔ lɛ he, loo ená tsui lɛ nɔ hewalɛ bɔ ni adesa nitsɔɔmɔ ko nyɛŋ afee nakai. Ni wɔnaa enɛ yɛ nɔ ni Hebribii 4:12 lɛ wie kɛfata he lɛ mli.

 “Nyɔŋmɔ wiemɔ lɛ . . . egbuɔ kɛboteɔ gbɔmɔ mli aahu kɛyashi egbálaa susuma kɛ mumɔ mli, kɛ agbɛnɛ hu, talɔi kɛ wuiaŋfɔ lɛ mli.” Yɛ Biblia lɛ mli lɛ, abaanyɛ akɛ wiemɔ ni ji “susuma” lɛ atsu nii kɛtsɔɔ bɔ ni anaa mɔ ko ahãa, ni abaanyɛ akɛ wiemɔ ni ji “mumɔ” lɛ hu atsu nii kɛtsɔɔ bɔ ni mɔ ko ji diɛŋtsɛ yɛ mligbɛ. (Galatiabii 6:18) Yɛ mfonirifeemɔ gbɛ nɔ lɛ, “Nyɔŋmɔ wiemɔ lɛ” gbuɔ kɛboteɔ “wuiaŋfɔ lɛ,” ni ji, wɔhenumɔi kɛ wɔsusumɔi amli tɔ̃ɔ. Akɛni Yehowa tsɔɔmɔi lɛ hãa anaa mɛi ni wɔ ji diɛŋtsɛ yɛ mligbɛ, he ni adesai enaaa lɛ hewɔ lɛ, Yehowa tsɔɔmɔi lɛ baanyɛ atsirɛ wɔ ni wɔfee tsakemɔi kpakpai yɛ wɔshihilɛ mli. Enɛ hãa wɔ-Bɔlɔ lɛ mii shɛɔ ehe, ni wɔ hu wɔmii shɛɔ wɔhe.

 “Nyɔŋmɔ wiemɔ lɛ . . . enyɛɔ ekɔɔ tsui lɛ mli susumɔi kɛ yiŋtoi asɛɛ.” Kɛ́ mɔ ko nu Nyɔŋmɔ wiemɔ lɛ, bɔ efeɔ enii ehãa yɛ he lɛ baanyɛ ahã ana nɔ ni esusuɔ, loo eyiŋtoi po, ejaakɛ anaa yɛ enifeemɔ kɛ ejeŋba mli. Akɛ nɔkwɛmɔnɔ lɛ, kɛ́ mɔ ko nu Nyɔŋmɔ wiemɔ lɛ ni ekɛtsu nii, ni no hã efee tsakemɔi kpakpai lɛ, etsɔɔ akɛ ebaa ehe shi, ni eyeɔ anɔkwa. Eesumɔ ni esa e-Bɔlɔ lɛ hiɛ. Shi kɛ́ ekɛtsuuu nii, ni eetao tɔ̃mɔ yɛ Nyɔŋmɔ wiemɔ lɛ mli lɛ, no baanyɛ etsɔɔ akɛ eyɛ sui gbohii, tamɔ henɔwomɔ loo ŋkomeŋfa. Ekolɛ, eetao nɔ ko ekɛjie enaa koni eya nɔ efee nibii ni esaaa Nyɔŋmɔ hiɛ lɛ.​—Yeremia 17:9; Romabii 1:24-27.

 Wolo ko wie akɛ, Nyɔŋmɔ wiemɔ lɛ “baanyɛ abote wɔmligbɛ tɔ̃ɔ.” Wɔmligbɛ gbɔmɔ lɛ he ko bɛ ni Nyɔŋmɔ nyɛŋ ana loo e-Wiemɔ lɛ nyɛŋ ajie lɛ kpo. Hebribii 4:13 lɛ kɛɔ akɛ: “Nibii fɛɛ he kã ni agbele nɔ kpetekplee yɛ lɛ mɔ ni esa akɛ wɔbu wɔhe akɔntaa wɔhã lɛ lɛ hiŋmɛiiaŋ.”

 Bɔfo Paulo ji mɔ ni ŋma Hebribii awolo lɛ yɛ aaafee afi 61 Ŋ.B., ni eji wolo ni akɛ mumɔ tsirɛ lɛ ni eŋma kɛyahã Yudafoi ni ebatsɔmɔ Kristofoi, ni hi Yerusalem kɛ Yudea lɛ.

 Yɛ yitso 3 kɛ 4 lɛ mli lɛ, Paulo tsɔɔ akɛ nibii ni blema Israelbii lɛ fee kɛ nɔ ni jɛ mli ba lɛ ji kɔkɔbɔɔ kɛhã Kristofoi lɛ. (Hebribii 3:8-12; 4:11) Yehowa wo shi akɛ ebaajie Israelbii lɛ kɛje nyɔŋyeli mli kɛya shikpɔŋ ko nɔ, ni ‘amɛbaahi shi shweshweeshwe’ yɛ jɛmɛ. (5 Mose 12:9, 10) Shi Israelbii ni shi Ejipt lɛ tee nɔ amɛtsɔɔ shii abɔ akɛ amɛbɛ hemɔkɛyeli yɛ Nyɔŋmɔ shiwoi lɛ amli, ni amɛku ekitãi lɛ amli shii abɔ. Enɛ hewɔ lɛ, ‘amɛboteee Nyɔŋmɔ hejɔɔmɔ lɛ mli,’ ni tsɔɔ akɛ amɛnáaa amɛ kɛ Nyɔŋmɔ teŋ wekukpaa kpakpa. Nakai yinɔbii lɛ gboi yɛ ŋa lɛ nɔ. Eyɛ mli akɛ amɛseshibii lɛ yahi Shiwoo Shikpɔŋ lɛ nɔ moŋ, shi amɛ hu amɛtee nɔ amɛgbo Nyɔŋmɔ nɔ toi. Sɛɛ mli lɛ, enɛ hã maŋ muu lɛ fɛɛ na nɔ waa.​—Nehemia 9:29, 30; Lala 95:9-11; Luka 13:34, 35.

 Paulo tsɔɔ mli akɛ, esa akɛ Kristofoi akase nii kɛjɛ Israelbii ni eyayeee anɔkwa lɛ anɔkwɛmɔnɔ gbonyo lɛ mli. Kɛ́ wɔfeee nibii ni amɛfee lɛ, ni wɔbo Yehowa Nyɔŋmɔ wiemɔ lɛ toi, ni wɔtee nɔ wɔná hemɔkɛyeli yɛ eshiwoi lɛ amli lɛ, wɔ lɛ, wɔbaabote ehejɔɔmɔ lɛ mli.​—Hebribii 4:1-3, 11.

 Kwɛmɔ Hebribii awolo lɛ hiɛkpamɔ vidio kuku nɛɛ.