“Ni Nyɔŋmɔ kɛɛ: ‘Hã wɔbɔ gbɔmɔ tamɔ bɔ ni wɔyɔɔ lɛ, tamɔ wɔhenɔ, ni amɛye ŋshɔŋ loi kɛ bɔɔ nii ni filikiɔ yɛ ŋwɛi kɛ shĩa kooloi kɛ shikpɔŋ lɛ fɛɛ kɛ kooloi fɛɛ ni wamɔɔ yɛ shikpɔŋ lɛ nɔ lɛ anɔ.’”​—1 Mose 1:26, Jeŋ Hee Shishitsɔɔmɔ.

 “Ni Nyɔŋmɔ kɛɛ: ‘Nyɛhãa wɔfea gbɔmɔ yɛ wɔsubaŋ nɔ, tamɔ wɔhenɔ, ni amɛye ŋshɔŋ loi kɛ ŋwɛi loofɔji kɛ shĩa kooloi kɛ shikpɔŋ lɛ fɛɛ kɛ waamɔ nibii fɛɛ ni wamɔɔ yɛ shikpɔŋ lɛ nɔ lɛ nɔ.’”​—1 Mose 1:26, Ga Biblia momo.

 Abɔ gbɔmɛi yɛ Nyɔŋmɔ subaŋ nɔ, ni no tsɔɔ akɛ amɛbaanyɛ amɛná Nyɔŋmɔ sui tamɔ suɔmɔ, musuŋtsɔlɛ, kɛ jalɛsaneyeli, ni amɛjie sui nɛɛ kpo. No hewɔ ni adesai baanyɛ akase Nyɔŋmɔ lɛ.

 “Nyɔŋmɔ kɛɛ: ‘Hã wɔbɔ gbɔmɔ tamɔ bɔ ni wɔyɔɔ lɛ.’” Dani Yehowa Nyɔŋmɔ a baabɔ gbɔmɔ ko loo nibii krokomɛi lɛ, ebɔ ŋwɛi bɔfo ko ni he wa waa, ŋwɛi bɔfo nɛɛ ji mɔ ni sɛɛ mli lɛ abale lɛ akɛ Yesu lɛ. Yesu fata Nyɔŋmɔ he be ni abɔ “nibii krokomɛi fɛɛ ni yɔɔ ŋwɛi kɛ nibii ni yɔɔ shikpɔŋ lɛ nɔ lɛ.” (Kolosebii 1:16) Yesu feɔ enii tamɔ Yehowa feɔ lɛ​—“Lɛ ji mɔ ni tamɔ Nyɔŋmɔ ni anaaa lɛ lɛ.” (Kolosebii 1:15) Belɛ, esa jogbaŋŋ akɛ Nyɔŋmɔ kɛɛ Yesu akɛ: “Hã wɔbɔ gbɔmɔ tamɔ bɔ ni wɔyɔɔ lɛ.”

 “Amɛye . . . shĩa kooloi kɛ shikpɔŋ lɛ fɛɛ . . . anɔ.” Abɔɔɔ kooloi yɛ Nyɔŋmɔ subaŋ nɔ. Abɔɔɔ amɛ koni amɛjie sui ni sa kadimɔ waa ni adesai jieɔ lɛ kpo lɛ akpo, tamɔ suɔmɔ nɛkɛ, loo ni amɛná henilee. Fɛɛ sɛɛ lɛ, Nyɔŋmɔ jwɛŋɔ kooloi ni ebɔ lɛ ahe. No hewɔ ni ewie akɛ gbɔmɛi ‘aye kooloi anɔ’ loo “amɛkwɛ kooloi lɛ anɔ” lɛ (Common English Bible). No hewɔ lɛ, Yehowa kɛ sɔ̃ fɔ̃ gbɔmɛi anɔ akɛ amɛkwɛ kooloi lɛ anɔ. (Lala 8:6-8; Abɛi 12:10) Yehowa miikpa gbɛ akɛ adesai baakwɛ shikpɔŋ lɛ kɛ kooloi kɛ tsei ni yɔɔ nɔ lɛ fɛɛ anɔ jogbaŋŋ.

 Mose klɛŋklɛŋ wolo lɛ yitso kome kɛ enyɔ lɛ gbaa wɔ bɔ ni fee ni abɔ je lɛ, shikpɔŋ lɛ, kɛ wala ni yɔɔ shikpɔŋ lɛ nɔ lɛ. Nibii ni Yehowa bɔ lɛ fɛɛ yɛ naakpɛɛ waa, shi yɛ bɔɔ nii ni yɔɔ shikpɔŋ lɛ nɔ lɛ fɛɛ ateŋ lɛ, bɔ ni abɔ gbɔmɛi ahã lɛ yɛ naakpɛɛ fe fɛɛ. Be ni Nyɔŋmɔ bɔ nibii fɛɛ egbe naa lɛ, “[ekwɛ] nɔ fɛɛ nɔ ni efee lɛ, ni naa! ehi jogbaŋŋ diɛŋtsɛ.”​—1 Mose 1:31.

 Kwɛmɔ vidio kuku nɛɛ koni ole saji krokomɛi ni Mose klɛŋklɛŋ wolo lɛ wieɔ yɛ adebɔɔ he.

 Kwɛmɔ Mose klɛŋklɛŋ wolo lɛ hiɛkpamɔ vidio kuku nɛɛ.