Tar éis do Dháiví Góla a mharú, chuir Rí Sól i gceannas an airm é. Bhí an-mheas ar Dháiví mar ba mhinic a bhíodh an bua aige sa gcath. Nuair a thagadh Dáiví abhaile ón gcogaíocht, bhíodh na mná ag damhsa agus ag canadh: ‘Mharaigh Sól na mílte, ach mharaigh Dáiví na deicheanna de mhílte!’ Bhí Sól in éad le Dáiví agus bhí sé ag iarraidh é a mharú.

Ba chláirseoir maith a bhí i nDáiví. Lá amháin nuair a bhí sé ag seinm ar an gcláirseach do Shól, chaith an rí sleá leis. D’éirigh le Dáiví imeacht as an mbealach, agus chuaigh an tsleá i bhfostú sa mballa. Thriail Sól Dáiví a mharú go minic ina dhiaidh sin. Ar deireadh, theith Dáiví agus chuaigh sé i bhfolach sa bhfásach.

Chuaigh Sól agus a arm de 3,000 fear ar thóir Dháiví. Tharla sé go ndeachaigh Sól isteach sa bpluais chéanna a raibh Dáiví  agus a chuid fear i bhfolach inti. Dúirt fir Dháiví i gcogar leis: ‘Seo é do sheans Sól a mharú.’ D’éalaigh Dáiví ar Shól agus ghearr sé an t-íochtar de chóta an rí. Níor thug Sól dada faoi deara. Ina dhiaidh sin, bhuail aiféala Dáiví mar nár léirigh an rud a rinne sé ómós do rí ungtha Iehova. Níor lig sé dá chuid fear Sól a ionsaí. D’fhógair sé ar Shól, ag rá gur scaoil sé thairis an deis a bhí aige é a mharú. An mbeadh athrú intinne ar Shól i dtaobh Dháiví?

Ní bheadh. Lean Sól air ag tóraíocht Dháiví. Oíche amháin d’éalaigh Dáiví agus a nia Aibísí isteach i gcampa Shóil. Bhí Aibneár, a bhí in ainm is a bheith ag cosaint Shóil, ina chodladh. Dúirt Aibísí: ‘Seo é do sheans. Lig dom é a mharú!’ D’fhreagair Dáiví: ‘Fágfaidh muid Sól ag Iehova. Tógfaidh muid a shleá agus a chrúsca uisce agus imeoidh muid.’

Chuaigh Dáiví suas cnoc, áit a raibh radharc aige ar champa Shóil. Bhéic sé amach: ‘A Aibneár, cén fáth nár chosain tú do rí? Cá bhfuil crúsca agus sleá Shóil?’ D’aithin Sól glór Dháiví agus dúirt sé: ‘Bhí an deis agat mé a mharú ach ní dhearna tú é. Tá a fhios agam anois gur tusa an chéad rí eile a bheidh ar Iosrael.’ D’fhill Sól ar a phálás. Ach bhí duine i dteaghlach Shóil nach raibh an ghráin aige ar Dháiví. Gheobhaidh muid amach faoi sa gcéad scéal eile.