• Roghnaithe ag Dia. “Chuir mise mo rí féin i réimeas . . . tiomnóidh mé na ciníocha duit agus críocha na cruinne mar oidhreacht duit.”—Salm 2:6, 8.

• Ina oidhre ar Rí Dáiví. “Óir rugadh leanbh dúinn, tugadh mac dúinn. . . Níl teorainn lena thiarnas ná críoch lena shíocháin ar chathaoir ríoga Dháiví agus ar a ríogacht, ag cur bun agus taca leo.”—Íseáia 9:5, 6 (9: 6, 7 i mBíoblaí eile).

• Beirthe i mBeithil. “A Bheithil . . . , is asatsa a thiocfaidh chugam an té a bheidh ina cheann urra . . . leathnóidh a chumhacht amach ansin go críocha na cruinne.”—Míocá 5:1, 3 (5:2, 4 i mBíoblaí eile).

• Diúltaithe ag daoine agus curtha chun báis. “Ba tháir agus ba tharcaisne linn é. Goineadh é as ucht ár gcoireanna, bascadh é as ucht ár gcionta.”—Íseáia 53:3, 5.

• Tógtha ó mhairbh agus glóirithe. “Óir ní fhágfaidh tú m’anam i measc na marbh ná ní ligfidh tú do do mhuirneach truailliú a fheiceáil. . . . Tá lúcháir go fial i do láthair agus aoibhneas ar do dheasláimh go brách.”—Salm 16:10, 11.

Ní raibh ach duine amháin riamh cáilithe le bheith ina shár-Rialtóir; sin é Íosa Críost. Dúirt aingeal le Muire, máthair Íosa: “tabharfaidh an Tiarna Dia dó ríchathaoir Dháiví a athair, . . . agus ní bheidh deireadh lena ríocht.”—Lúcás 1:31-33.

Ní raibh sé i gceist riamh go mbeadh Íosa ag rialú anseo ar an talamh. Tá sé chun an cine daonna a rialú ó neamh mar Rí ar Ríocht Dé. Cén fáth go mbeadh Íosa ina shár-Rialtóir? Smaoinigh ar an méid a rinne Íosa nuair a bhí sé ar an talamh.

•   Léirigh Íosa suim i ndaoine. Chabhraigh Íosa le hóg agus aosta, beag beann ar a gcúlra. (Matha 9:36; Marcas 10:16) Nuair a d’impigh lobhar: “Más áil leat é,. . . is féidir duit mé a ghlanadh.” Bhí trua ag Íosa dó agus leigheas sé é.—Marcas 1:40-42.

• Mhúin Íosa dúinn le Dia a shásamh. Dúirt sé: “Ní féidir daoibh Dia a riaradh agus an t-airgead.” Dúirt sé freisin ‘nithe ar bith ar mhaith libh daoine a dhéanamh daoibhse, déanaigí amhlaidh sin dóibh.’ Léirigh sé go bhfuil suim ag Dia sa méid a dhéanann muid, sa gcaoi a smaoiníonn agus a mothaíonn muid. Mar sin chun Dia a shásamh, ní mór dúinn na mothúcháin is doimhne atá againn a smachtú. (Matha 5:28; 6:24; 7:12) Dúirt Íosa, go gcaithfidh muid fáil amach céard atá Dia a iarraidh orainn agus é a dhéanamh le bheith sona sásta.—Lúcás 11:28.

• Theagasc Íosa faoi ghrá. Bhí briathra agus gníomhartha Íosa cumhachtach agus chuaigh siad i gcion go mór ar a lucht éisteachta. “Bhí ionadh ar na sluaite faoina theagasc; á dteagasc a bhí sé mar a bheadh duine a mbeadh údarás aige.” (Matha 7:28, 29) Dúirt sé leo: “bíodh grá agaibh do bhur naimhde.” Ghuigh sé ar a son siúd a bhí freagrach as a bhás: “A Athair, maith dóibh óir níl a fhios acu cad tá siad a dhéanamh.”—Matha 5:44; Lúcás 23:34.

Tá na cáilíochtaí ag Íosa leis an domhan seo a rialú. Ach cén uair a thosaíonn sé ag rialú?