TOƁƁERE 34

Ko honno hollirten hiɗen yiɗi Yahuwah Alla ?

LECTURE

Hiɗon miijii on ɓurtike ɓadaade Alla gila fuɗɗiɗon janngugol Deftere Alla nden ? Hiɗon faalaa jokkude tiiɗingol weldigal mon ngal e makko ? Si ko ɗun, annditee ko no Yahuwah Alla yiiri giggol mon ngol fii makko tiiɗiri woo, ko non o yiɗirta on e o dankorta on. Ko honno hollirton hiɗon yiɗi mo ?

1. Ko honno hollirten Yahuwah Alla hiɗen yiɗi mo ?

En hollay Yahuwah Alla hiɗen yiɗi mo e hoore ɗoftagol mo (janngee 1 Yuuhanna 5:3). O doolataa hay gooto ɗoftagol mo. O accay mo kala suɓoo si ɗoftoto mo maa si ɗoftotaako mo. Fii honɗun ? Ko fii Yahuwah Alla no faalaa yo en ‘ɗoftor mo ɓernde nden’ (Roomu 6:17). Ɗun no firi, himo faalaa yo on ɗoftor mo giggol hara on doolaaka. Pecce 3 e 4 e nder ndee deftere wallay on no holliron hiɗon yiɗi Yahuwah Alla e hoore waɗugol ko welata mo e wikkagol ko o yiɗaa.

2. Fii honɗun hino sattani en hollugol hiɗen yiɗi Yahuwah Alla ?

« Feewuɗo no fotta e boneeji ɗuuɗuɗi » (Zabuura 34:19 [34:20, VPFJ]). En fow hiɗen gerda e junuubaaji men ɗin. Hiɗen heɓa kadi annde fii kaalisi, anngal peewal e satteendeeji goo. Sabu ɗii satteendeeji, no gasa hino sattani en waɗugol ko Yahuwah Alla yamiri en kon. Ko fii jokkugol laawol bonngol ngol no gasa no ɓuri newaade. Kono si on waɗii ko Yahuwah Alla daalani on kon, on hollay hiɗon yiɗi mo ɓuri fow. Ɗun on hollay mo sella-finndeyaagal. Kanko kadi o hollay on sella-finndeyaagal. O tertotaako on muk (janngee Zabuura 4:3 [4:4, VPFJ]).

LUGGINEE

Taskee fii honɗun ɗoftagol no hittani Yahuwah Alla e janngon fii ko wallata on wonugol sella-finndeejo.

3. Huunde hittande on

Deftere Ayyuuba nden ka nder Deftere Alla no holli Seytaane tooɲaano annabi Ayyuuba tun, kono o tooɲuno kala faalaaɗo rewugol Yahuwah Alla. Janngee Ayyuuba 1:1, 6–2:10 e yewton fii ɗee lanndaale :

Wano Seytaane wi’iri non, fii honɗun annabi Ayyuuba ɗoftanii Yahuwah Alla ? (Ndaaree Ayyuuba 1:9-11).
Ko honno Seytaane tooɲiri yimɓe ɓen fow, hay onon ? (Ndaaree Ayyuuba 2:4).

Janngee Ayyuuba 27:5b e yewton fii ngal lanndal :

Ko honno annabi Ayyuuba hollirnoo himo yiɗuno Yahuwah Alla tigi tigi ?

Annabi Ayyuuba holluno himo yiɗi Yahuwah Alla e hoore wonugol sella-finndeejo.

En hollay hiɗen yiɗi Yahuwah Alla e hoore wonugol sella-finndeeɓe.

4. Weltinee ɓernde Yahuwah Alla nden

Janngee Tindi 27:11 (VPFJ) e yewton fii ɗee lanndaale :

Ko honno Yahuwah Alla miijortoo si on hollii faamu e si on ɗoftike mo ? Fii honɗun ?

5. Hiɗon waawi hollude Yahuwah Alla sella-finndeyaagal

Giggol men ngol fii Yahuwah Alla wakkilinay en yewtugol woɓɓe goo fii makko. Sella-finndeyaagal wakkilinay en waɗugol ɗun kadi hay si no sattani en. Fijinee VIDIO on e yewton fii lanndaale jokkituɗe ɗen.

VIDIO : Daranee gomɗinal mon ngal hay si on heɓii liddondiral (5:09)

On heɓii satteende wonnde haalangol woɓɓe goo fii Yahuwah Alla ?
E nder vidio on, ko honɗun wallunoo Grayson foolugol kulol makko ngol ?

No newii hollugol Yahuwah Alla sella-finndeyaagal si hiɗen yiɗi ko o yiɗi e si hiɗen aɲi ko o aɲi. Janngee Zabuura 97:10 (VPFJ) e yewton fii ɗee lanndaale :

E nder ko jannguɗon kon, ko piiji honɗi Yahuwah Alla yiɗi ? Ko piiji honɗi o aɲi ?
Ko honno ekkitorton yiɗugol ko moƴƴi e aɲugol ko boni ?

6. Ɗoftagol Yahuwah Alla no wondani en e nafa

Ɗoftagol Yahuwah Alla ko huunde ɓurnde moƴƴude. Janngee Isaaya 48:17, 18 e yewton fii ɗee lanndaale :

E miijo mon, hiɗen waawi hoolaade Yahuwah Alla no anndi soono woo ko ɓuri moƴƴande en ? Fii honɗun ?
Ko honno jannde mon Deftere Alla nden e fii Alla goongaajo on, Yahuwah, nafiri on ?

WOƁƁE GOO NO WI’A : « Tigi tigi on, kuuɗe an ɗen hittanaa Alla. »