YIMƁE no rewa allaaji buy. Kono ko Deftere Alla nden janni kon, ko Alla goongaajo gooto woodi. Ko o bajjo, mawɗo e poomayankeejo. Ko kanko tagi piiji ɗin fow ka kammu e ka hoore leydi, e ko kanko okki en ngurndan. Ko ɗun waɗi, ko kanko tun haanuɗen rewude.

Alla no mari tiitooɗe buy kono ko innde wootere o mari : YAHUWAH. Alla daalanno annabi Muusa : « A wowliranay nii Banii Isra’iila’en : “ Yahuwah Alla baabiraaɓe mon ɓen, Alla Ibraahiima on, Alla Issaaqa e Alla Yaaquuba on, woni ko nulimmi e mon. ” Ko ɗun woni innde an nden haa poomaa, e ko ndee innde mi haanaa annditireede e nder jamaanuuji ɗin fow » (Eggudu ndun 3:15). Ndee innde Yahuwah no ka nder Deftere Alla ko yahata 7 000. Wano Zabuura 83:18 haaliri non fii Alla, « An, mo innde mun woni Yahuwah, ko an tun woni Jom Ɓural on e hoore leydi ndin fow. »

Tagaaɗo hay gooto yi’aali Alla. Alla daalanno annabi Muusaa : « A waawataa yi’ude yeeso an ngon, ɓay neɗɗo waawataa lan yi’ude, o wuura » (Eggudu ndun 33:20, VPFJ). Alla no ka kammu. Tagaaɗo waawataa mo yi’ude. No harmi moƴƴingol maa rewugol sanamuru, fotoo maa al’alaama ko nannditinaa e Alla. Yahuwah Allaahu on yamirno rewrude annabi Muusaa, o daali : « Wota a moƴƴinan hoore ma sanamu maa ko nanditi e goɗɗun ko woni ka kammuuli dow maa ko woni ka hoore leydi maa ko woni ka nder ndiyan wonɗan ka nder leydi. wota a sujjan ɗi maa rewaa ɗi, ko fii min Alla Joomiraaɗo maa on ko mi Allaajo nawluɗo » (Eggudu ndun 20:2-5, VPFJ). Ɓawto ɗun, rewrude annabi Isaaya, Alla daali : « Ko min woni Yahuwah. Ko ɗun woni innde an nden ; mi jonnataa hay gooto darja an on, maa mantoore an nden sanamuuji » (Isaaya 42:8).

Woɓɓe no hoolii Alla kono hiɓe sikka en waawataa mo anndude maa ɓadaade mo, huleteeɗo e dii yiɗeteeɗo. Ko honɗun wi’uɗon ? Alla no kippi fii mon ? On waaway mo anndude tigi tigi, waawon hay ɓadaade mo ? Ndaaren ko Deftere Alla nden holli kon fii no Alla siforii non.