È sixu nɔ ayikúngban jí weziza hwesivɔ tɔn mɛvo à? Hwesivɔ nɔ na hlɔnhlɔn atín lɛ bɔ ye nɔ zɔ́n ama, na folowa lɛ, na sínsɛ́n lɛ kpo nǔkún lɛ kpo. É nɔ lɛ́ bló bɔ atín lɛ nɔ dɔn sin sín ayikúngban lanmɛ gbɔn ɖɔ lɛ gblamɛ bo nɔ hun kaka byɔ ama lɛ mɛ, enɛ gudo ɔ, ama ɔ nɔ wá tún sin enɛ dó jɔhɔn mɛ azizɔ ɖɔhun.

Jǐ nyí nǔnina xɔ akwɛ ɖé bo gosin Mawu gɔ́n, bo nɔ bló bɔ ayikúngban nɔ na nǔɖuɖu e mǐ na ɖu é mǐ. Mawu nɔ sɛ́ jǐ dó mǐ, bo nɔ na jinukún mǐ dó hwetɔnnu. É nɔ na nǔɖuɖu mǐ túnflá; é nɔ na xomɛhunhun mǐ.

Ado nɔ hu vǐtɔ́ gegě ɖɔ xwédo emitɔn ka na ɖó nǔɖuɖu kpo nǔzinzan kpo e kpé é à jí. Ðǒ ayi nǔ e wemafɔ elɔ ɖɔ é wu: “Mi kpɔ́n xɛ lɛ; ye nɔ dó nǔkún ǎ, ye ka nɔ ya nǔkún bo nɔ bɛ́ dó agɔ̌ mɛ ǎ; có Tɔ́ mitɔn e ɖò [jixwé] ɔ ka nɔ na nǔɖuɖu ye. Midɛɛ lɛ ɔ, mi ma ka xɔ akwɛ hú xɛ enɛ lɛ à cé?”—Matie 6:25, 26.

“Mi kpɔ́n lee folowa lɛ nɔ sù gbɔn ɖò gbehan lɛ mɛ é; . . . Axɔ́su Salomɔ́ɔ ɖesu ɔ, lee é ɖó dɔkun sɔ ɔ nɛ, có é ma ka ɖó avɔ sɔ ɖokpo yetɔn nɛ! Enyi Mawu ka ba acɔ́ nú gbehan . . . sɔmɔ̌ ɔ, nɛ̌ wɛ é ma ka na na mi nǔ e mi na dó lɛ ǎ gbɔn?”—Matie 6:28-30.

Ðó Mawu kpéwú bo na na mǐ nǔɖuɖu kpo avɔ kpo wutu ɔ, é ɖò wɛn ɖɔ é sixu lɛ́ d’alɔ mǐ bɔ mǐ na mɔ dandannú gbɛ̀ mɛ tɔn ɖevo lɛ. Enyi mǐ nɔ ba na wà jlǒ Mawu tɔn ɔ, é sixu dó nú gǎn e dó wɛ mǐ ɖè bo na mɔ nǔ ɖu é, alǒ é sixu d’alɔ mǐ bɔ mǐ na mɔ azɔ̌ bo na xɔ nǔ e sín hudo mǐ ɖó lɛ é.—Matie 6:32, 33.

Nǔgbo ɔ, enyi mǐ lin tamɛ dó hwesivɔ, jǐ, xɛví lɛ kpo folowa lɛ kpo jí ɔ, mǐ ɖó hwɛjijɔ gegě bo na yí wǎn nú Mawu. Xóta e bɔ d’ewu é na ɖɔ xó dó lee Gbɛɖotɔ́ mǐtɔn ɖɔ xó nú gbɛtɔ́ lɛ gbɔn é jí.