Nǔ ɖagbe kpó nǔ nyanya kpó: Biblu: Alixlɛ́mɛnú ɖejidéwú ɖé

Ényí mǐ nɔ sɔ́ gbeta e kɔn mǐ nɔ wá dó walɔ ɖagbe wú lɛ́ é jínjɔ́n lěe nǔ nɔ cí nú mǐ, alǒ cí nú mɛ ɖěvo lɛ́ é kɛ́ɖɛ́ jí ɔ, mǐ sixú kú d’é jí ɖɔ é ná tɔ́n kɔ dó ɖagbe mɛ ǎ. Biblu ɖɔ nǔ e wú wɛ é, bo ka lɛ́ wa nǔ hú mɔ̌. Alixlɛ́mɛnú walɔ ɖagbe tɔn ɖejidéwú ɖo Biblu mɛ, énɛ́ wɛ nyí nǔ tají e ná zɔ́n bɔ mǐ ná ɖó gbɛzán awǎjijɛnɔ e ná jɛmɛ nú mǐ é.

MǏ ÐÓ HUDÓ ALI E MAWU NƆ XLƐ́ MƐ É TƆN

Ðo Biblu mɛ ɔ, Jexóva Mawu a tínmɛ ɖɔ gbɛtɔ́ lɛ́ ɖó hudó alɔdó émítɔn tɔn, yě kún sixú wa nǔ lɛ́ bǐ yěɖóɖó ó. (Jelemíi 10:23) Nǔ e wú é xlɛ́ ali mǐ ɖo walɔ ɖagbe linu ɖo Biblu mɛ é nɛ́. É yí wǎn nú gbɛtɔ́ lɛ́, bo ba ɖɔ mǐ ní wá gbeta nyanya ɖěɖěe ná wa nǔ dó mǐ wú bo ná zɔ́n bɔ gbɛ ninɔ ná vɛ́ wǔ nú mǐ lɛ́ é kɔn ǎ. (Sɛ́nflínmɛ 5:29; 1 Jaan 4:8) Hú mɔ̌ ɔ, ɖó é wɛ nyí Gbɛɖótɔ́ mǐtɔn wútu ɔ, é ɖó nǔnywɛ́ kpó nukúnnúmɔjɛnǔmɛ kpó e jɛxá é, bo ná dó sixú ɖe wě e nyɔ́ hú gǎn é xá mǐ dó walɔ ɖagbe wú. (Ðɛhan 100:3; 104:24) Amɔ̌, Mawu nɔ hɛn gbɛtɔ́ lɛ́ gǎnnugǎnnu bónú yě ná zán gbɛ sɔgbe xá nǔgbódodó tɔn lɛ́ gbeɖé ǎ.

Jexóva ná Adámu kpó Ɛvu kpó e nyí súnnu kpó nyɔ̌nu kpó nukɔntɔn ɔ lɛ́ é nǔ e sín hudó yě ɖó, bo ná ɖó awǎjijɛ jɔ awǎjijɛ lɛ́ é bǐ. (Bǐbɛ́mɛ 1:28, 29; 2:8, 15) Jexóva lɛ́ dó sɛ́n e bɔkun é ɖé lɛ́ nú yě, bo ɖó nukún ɖɔ yě ná se tónú ná. Amɔ̌, é jó yě dó, bɔ yěɖésúnɔ ná wá gbeta ɔ kɔn bo ná nyi sɛ́n énɛ́ lɛ́, alǒ gbɔ. (Bǐbɛ́mɛ 2:9, 16, 17) É blá wǔ ɖɔ Adámu kpó Ɛvu kpó wá gbeta ɔ kɔn bá zán gbɛ sɔgbe xá nǔgbódodó yěɖésúnɔ tɔn lɛ́, bo jó Mawu tɔn lɛ́ dó. (Bǐbɛ́mɛ 3:6) Étɛ́ mɛ é ka tɔ́n kɔ dó? Nǔ e gbɛtɔ́ lɛ́ lin ɖɔ é sɔgbe é wiwa ka nɔ zɔ́n bɔ yě nɔ ɖó awǎjijɛ a? Éǒ. Hwenuxó xlɛ́ ɖɔ ya winwɔn nú nǔgbódodó Mawu tɔn lɛ́ kún nɔ ná fífá kpó awǎjijɛ kpó e nɔ nɔ ayǐ sɔ́yi é mɛ ó.—Nǔnywɛ́tɔ́xó 8:9.

Nú mǐ ná bo tlɛ gosín fí ɖěbǔ ɔ, Biblu nɔ ɖe wě e sín hudó mǐ ɖó bo ná nɔ wá gbeta walɔ ɖagbe tɔn e nǔnywɛ́ kpé lɛ́ é tɔn kɔn xá mǐ. (2 Timɔtée 3:16, 17; kpɔ́n gbǎví “ Wěma ɖé nú gbɛtɔ́ lɛ́ bǐ.”) Mǐ ní gbéjé lěe Biblu nɔ wa mɔ̌ gbɔn é kpɔ́n.

Kplɔ́n nǔ ɖěvo lɛ́ dó nǔ e wú è sixú ylɔ́ Biblu ɖɔ “Xó Mawu tɔn” nǔgbó nǔgbó é wú.—1 Tɛsaloníkinu lɛ́ 2:13. Kpɔ́n video Mɛ̌ ka nyí Dǒwátɔ́ Biblu tɔn? ɖo jw.org jí.

Wěma ɖé nú gbɛtɔ́ lɛ́ bǐ

Mǐ ná ba ɖɔ wěɖexámɛ walɔ ɖagbe tɔn Gbɛɖótɔ́ nǔnywɛ́tɔ́ kpó wǎnyíyínɔ kpó ɖé tɔn ní tíin nú mɛ lɛ́ bǐ. Gbějé nǔ élɔ́ lɛ́ e kunkplá Biblu ɔ lɛ́ é kpɔ́n:

3500+ Kɛ́n gbe nabí e mɛ é hwe bǐ ɔ, akpáxwé Biblu ɔ tɔn ɖé tíin ɖe bo zɔ́n bɔ Biblu ɔ nyí wěma e è tínmɛ dó gbe ɖěvo mɛ hú gǎn wěma lɛ́ bǐ é tɔn.
5000000000+ Kɛ́n Biblu nabí e è zín, bɔ é zɔ́n bɔ Biblu ɔ nyí wěma e è má hú gǎn ɖo hwenuxó mɛ é tɔn.

Biblu nɔ sɔ́ sinmɛ agbaza tɔn ɖě, to ɖě, alǒ akɔta ɖě ɖ’ajo hú ɖěvo ǎ, mɔ̌ jɛ́n é ma nɔ lɛ́ sɔ́ nǔwalɔ akɔta ɖě tɔn ɖ’ajo hú ɖěvo tɔn ǎ é nɛ́. Wěma ɖé wɛ é nyí nú gbɛtɔ́ lɛ́ bǐ nǔgbó.

Xa Biblu ɔ ɖo Ɛntɛnɛ́ti jí (é ɖo gbe 250 jɛjí mɛ) ɖo jw.org jí

NǓ E WÚ MƐÐÉ LƐ́ MA NƆ KÉ YA NÚ BIBLU Ǎ É

Mɛɖé lɛ́ nɔ ɖɔ ɖɔ Biblu kún sixú nyí jɔtɛn wěɖexámɛ tɔn ɖagbe ɖé ɖo walɔ ɖagbe lixo ó. Nǔ e yě sixú ɖɔ lɛ́ é ɖé lɛ́ ɖíe.

Mɛɖé lɛ́ sixú ɖɔ: “Biblu nɔ sɔ́ ta éɖée.”

Nǔgbó ɔ: Ðo bǐbɛ́mɛ ɔ, é sixú cí ɖɔ akpáxwé Biblu ɔ tɔn ɖé lɛ́ kún xo nǔ dó akpa ɖokpó ɔ mɛ xá ɖěvo lɛ́ ó ɖɔhun, amɔ̌, ényí è kplɔ́n nǔ dó lěe è wlán yě gbɔn é kpó hwenu e è wlán yě é kpó wú ɔ, è ná wá mɔ ɖɔ yě kún sɔ́ ta yěɖée ó.

Bo ná dó mɔ kpɔ́ndéwú tawun tawun ɖé lɛ́ hǔn, xa xóta “Biblu sɔ́ ta éɖée wɛ a?” ɖo jw.org jí.

Mɛɖé lɛ́ sixú ɖɔ: “Mɛ e nɔ ɖɔ ɖɔ émí nɔ xwedó nǔ e Biblu ɖɔ lɛ́ é nɔ wa nǔ nyanya lɛ́, énɛ́ wú ɔ, é ɖó ná nyí alixlɛ́mɛnú walɔ ɖagbe tɔn ɖé ǎ.”

Nǔgbó ɔ: È sixú dó hwɛ Biblu ɖó walɔ nyanya e mɛ ɖěɖěe ma nɔ xwedó nǔkplɔ́nmɛ tɔn lɛ́ ǎ é nɔ zán lɛ́ é wú ǎ. É ɖɔ ɖ’ayǐ ɖɔ mɛ gěgé, káká jɛ sinsɛngán e nɔ ɖɔ ɖɔ émí nɔ xwedó nǔ e Biblu ɖɔ lɛ́ é jí ná nɔ wa nǔ e Biblu ɖɔ lɛ́ é sín flíjɛ. É lɛ́ ɖɔ gɔ́ ná ɖɔ, wǎgbɔ tɔn ɔ, è ná “ɖɔ xó nyanya” dó nǔkplɔ́nmɛ Biblu tɔn lɛ́ wú.—2 Piyɛ́ɛ 2:1, 2.

Bo ná dó mɔ kpɔ́ndéwú ali ɖěɖěe nu sinsɛngán gěgé zɛ sín nǔ e Biblu kplɔ́n mɛ tawun lɛ́ é sín ali jí é tɔn ɖokpó hǔn, xa xóta “La religion n’est-elle qu’une entreprise commerciale de plus ?” ɖo jw.org jí.

Mɛɖé lɛ́ sixú ɖɔ: “Biblu nɔ sɔ́ wǎngbɛ́númɛ ɖ’ajo.”

Nǔgbó ɔ: Biblu dó wǔsyɛ́n lanmɛ nú mɛ ɖɔ è ní nɔ wa nǔ xá mɛ ɖěvo lɛ́ kpó sísí kpó. É yí gbe nú nǔwalɔ élɔ́ lɛ́ ǎ. . .

mimɔ ɖɔ è hú gǎn mɛ ɖěvo lɛ́.—Filípunu lɛ́ 2:3.
sísí ma ɖó nú mɛ e sín nǔwalɔ alǒ nǔɖiɖi gbɔn vo nú mɛtɔn lɛ́ é.—1 Piyɛ́ɛ 2:17.
mɛ ɖěvo lɛ́ hinhɛn gǎnnugǎnnu bónú yě ná ɖó linlin ɖokpó ɔ dó nǔ lɛ́ wú mǐɖɔhun.—Matíe 10:14.

Biblu ɖe xlɛ́ ɖɔ Mawu nɔ wa nǔ xá gbɛtɔ́ lɛ́ kpó xomɛnyínyɔ́ kpó, kpódó hwɛjijɔ kpán hwebǐnu, bo nɔ ba ɖɔ mǐ lɔ ní wa nǔ ɖokpó ɔ.—Hlɔ̌manu lɛ́ 9:14.

Bo ná dó mɔ nǔ ɖěvo lɛ́ gɔ́ ná hǔn, xa xóta “La tolérance : Quelle aide la Bible peut-elle apporter ?” ɖo jw.org jí.

BIBLU ÐƆ NǓ E MAWU BA ÐƆ MǏ NÍ WA É NÚ MǏ

Biblu ɖɔ lěe Mawu nɔ wa nǔ gbɔn xá gbɛtɔ́ lɛ́ sín bǐbɛ́mɛ é nú mǐ. Nǔ e ɖ’é mɛ lɛ́ é nɔ d’alɔ mǐ bɔ mǐ nɔ mɔ nǔ jɛ nǔ e Mawu nɔ sɔ́ dó mɔ nǔ ɖagbe kpó nǔ nyanya kpó, nǔ e nɔ hɛn le wá é kpó nǔ e nɔ wa nǔ dó mɛ wú lɛ́ é kpó é mɛ. (Ðɛhan 19:8, 12) Mǐ nɔ kplɔ́n nǔgbódodó ɖěɖěe ma nɔ cá ǎ, bo nɔ d’alɔ mǐ bɔ mǐ nɔ wá gbeta walɔ ɖagbe tɔn ɖěɖěe nǔnywɛ́ kpé lɛ́ é kɔn ɖo gbɛ zínzán gbe bǐ gbe tɔn mǐtɔn mɛ lɛ́ é.

Ði kpɔ́ndéwú ɔ, ɖ’ayi wěɖexámɛ e ɖo Nǔnywɛ́xó 13:20 mɛ é wú: “A dó nǔnywɛ́tɔ́ há ɔ, a ná húzú nǔnywɛ́tɔ́; a ka dó xlonɔ há ɔ, a ná wa nǔ dó hwiɖée wú.” Nǔgbódodó énɛ́ nyɔ́ zán égbé, lěe é nyí gbɔn ɖo hwexónu é ɖɔhun. Nǔgbódodó mɔ̌hun e sixú d’alɔ mɛ, bo lɛ́ xɔ akwɛ́ lɛ́ é wɛ gɔ́ Biblu ɔ mɛ.—Kpɔ́n gbǎví “ Nǔnywɛ́ e ɖo Biblu mɛ é cá ǎ” ɔ.

Amɔ̌, a sixú kanbyɔ́ hwiɖée ɖɔ: ‘Nɛ̌ un ka sixú wa gbɔn bo kú d’é jí ɖɔ wěɖexámɛ Biblu tɔn lɛ́ sixú d’alɔ mì?’ Ðo xóta e bɔ d’é wú é mɛ ɔ, mǐ ná ɖɔ xó dó kpɔ́ndéwú jɔnwun ɖé lɛ́ jí.

a Nyǐkɔ Mawu tɔn ɖésúnɔ wɛ nɔ nyí Jexóva.—Luki 4:8.

NǓNYWƐ́ E ÐO BIBLU MƐ É CÁ Ǎ

È wlán Biblu ɔ fó é ɔ, é ko ɖibla bló xwe 2000 có, é ka kpo ɖo nyǐnyɔ́ zán wɛ ɖo égbé. Nǔ e gbɛtɔ́ nyí sín do é ko húzú ǎ; gbɛtɔ́ lɛ́ nɔ ba hwebǐnu bo ná ɖó awǎjijɛ kpó gbɛzán ɖagbe ɖé kpó. (Nǔnywɛ́tɔ́xó 1:9) Nǔnywɛ́ Biblu tɔn e ma nɔ cá ǎ é sixú d’alɔ mǐ bɔ mǐ ná kpé énɛ́ wú.

Nǔgbóɖiɖɔ

“Mǐ . . . jló ná zán gbɛ ɖagbe ɖo nǔ bǐ mɛ.”—Eblée lɛ́ 13:18.
“Mɛ e nɔ j’ajo é ní ma sɔ́ j’ajo ɖě ó. É nyɔ́ wa ɔ, é ní nɔ w’azɔ̌ syɛ́nsyɛ́n.”—Efɛ́zinu lɛ́ 4:28.

Lěe è ná nɔ wa nǔ xá mɛ ɖěvo lɛ́ gbɔn é

“Mi nú mɛ ɖokpó ɖokpó ní nɔ ba nǔ e ná hɛn le wá nú mɛ ɖěvo lɛ́ é, é ní ma nyí nǔ e ná hɛn le wá nú éɖésúnɔ é ó.”—1 Kɔlɛ́ntinu lɛ́ 10:24.
“Mi ní nɔ mɔ miɖée gbɔ, bo nɔ sɔ́ hwɛ kɛ miɖée lɛ́ faa.”—Kolósinu lɛ́ 3:13.

Gbeta lɛ́ kɔn wíwá

“Gbɛtɔ́ e ayivɔ vún ɔ nɔ ɖi nǔ nú nǔ e è ɖɔ n’i lɛ́ bǐ; mɛ e ayi tɔn ka ɖo te ɔ nɔ lin tamɛ cóbó nɔ wa nǔ.”—Nǔnywɛ́xó 14:15.
“Gbɛtɔ́ e ayi tɔn ɖo te ɔ mɔ nǔ nyanya ja ɔ, é nɔ hɔn bɛ; xlonɔ ka nɔ zɔn mɔ̌ bo nɔ yi zɔn mɛ.”—Nǔnywɛ́xó 22:3.

ATƆXWƐ