Nǔ e Mɛsɛ́dó lɛ́ wa lɛ́ é 14:1-28
14 Ée Pɔ́lu kpó Baanabási kpó wá Ikoniyɔ́mu é ɔ, yě zɔn kpɔ́ bo byɔ́ kplɔ́ngbasá Jwifu lɛ́ tɔn, bo ɖɔ xó ɖo ali ɖé nu bɔ mɛ wɔ̌búwɔ́bú ɖé húzú nǔɖitɔ́, Jwifu kpó Glɛ̌kinu kpó bǐ.
2 Amɔ̌, Jwifu e ma ɖi nǔ ǎ lɛ́ é fɔ́n mɛ e ɖo akɔta ɖě lɛ́ mɛ lɛ́ é* dó nɔví lɛ́ jí, bo bló bɔ mɛ lɛ́ gbɛ́ wǎn nú yě.
3 Pɔ́lu kpó Baanabási kpó nɔ fínɛ́ nú hwenu gěgé, bɔ Jexóva* ná yě acɛ bɔ yě nɔ ɖo xó ɖɔ wɛ kpó adɔgbígbó kpó. É lɛ́ yí gbe bɔ yě nɔ bló nǔjíwǔ lɛ́ kpó nǔdabaɖa lɛ́ kpó, dó ɖe kúnnu nú wɛn e kunkplá fɛ́nú tɔn é.
4 É ɖo mɔ̌ có, mɛ e ɖo toxo ɔ mɛ lɛ́ é sín gbe ɖo kpɔ́ ǎ; mɛ ɖě ɖo Jwifu lɛ́ jí, bɔ mɛ ɖě ɖo mɛsɛ́dó lɛ́ jí.
5 Hwenu e mɛ e ɖo akɔta ɖě lɛ́ mɛ lɛ́ é kpó Jwifu lɛ́ kpó, gɔ́ nú gǎn yětɔn lɛ́ bló tuto bo ná xo dǎka yě wú, bo ná lɛ́ nyi awǐnnyaglo dó hu yě é ɔ,
6 è gb’akpá tɔn nú yě, bɔ yě hɔn yi toxo Likawoníi tɔn lɛ́ mɛ, énɛ́ wɛ nyí Lisítli kpó Dɛɛbée kpó, lobo lɛ́ yi gletoxo e sɛkpɔ́ toxo énɛ́ lɛ́ é mɛ.
7 Yě gbɛ kan dó wɛn ɖagbe ɔ jíjlá nu ɖo fí énɛ́ lɛ́.
8 Nya sékúnɔ ɖé ka ɖo Lisítli bo ɖo ayǐjínjɔ́n. Afɔkponɔ tɔn wɛ è ji, bɔ é ɖi zɔnlin kpɔ́n ǎ.
9 Hwenu e Pɔ́lu ɖo xó ɖɔ wɛ é ɔ, nya énɛ́ ɖo tó ɖó è wɛ. Ée Pɔ́lu kpɔ́n ɛ dáán, bo mɔ ɖɔ é ɖó nǔɖiɖi e ná zɔ́n bɔ azɔn tɔn ná gbɔ é ɔ,
10 é zé gbe dó jǐ bo ɖɔ: “Sí te bo nɔ te ɖo afɔ towe lɛ́ jí.” Bɔ nya ɔ lɔ́n sí te, bo jɛ zɔnlin ɖi jí.
11 Ée ahwan ɔ mɔ nǔ e Pɔ́lu wa é ɔ, yě sú xó, bo ɖɔ dó Likawoníigbe mɛ ɖɔ: “Nǔmɛsɛn lɛ́ sɔ́ gbɛtɔ́ gbáza dó, bo jɛ te wá gɔ̌n mǐtɔn!”
12 Bɔ yě jɛ Baanabási ylɔ́ ɖɔ Zewúsi jí, bo ka ylɔ́ Pɔ́lu ɖɔ Ɛɛmɛ́si, ɖó é wɛ ɖɔ xó hú gǎn.
13 Hunnɔ nǔmɛsɛn Zewúsi, éé sín xɔ ɖo toxo ɔ nukɔn é tɔn bɛ́ nyibúsú kpó folówa linlɔn kpó wá hɔntogbó toxo ɔ tɔn lɛ́ jí, bɔ é kpó ahwan ɔ kpó jló ná sá vɔ̌ nú Baanabási kpó Pɔ́lu kpó.
14 Amɔ̌, ée mɛsɛ́dó Baanabási kpó mɛsɛ́dó Pɔ́lu kpó se mɔ̌ é ɔ, yě vún awu dó kɔ nú yěɖée, bo dó wezun byɔ́ ahwan ɔ mɛ, lobo sú xó ɖɔ:
15 “Mɛ ce lɛ́ mi, étɛ́wú mi ka ɖo nǔ énɛ́ lɛ́ wa wɛ? Gbɛtɔ́ wɛ nú mǐ lɔ, bo ɖó gǎnmaɖó ɖokpó ɔ lɛ́ mi ɖɔhun. Bɔ mǐ ɖo wɛn ɖagbe ɔ jlá mi wɛ, bónú mi ní lɛ́ kɔ sín nǔ yǎyá énɛ́ lɛ́ gúdo bo wá Mawu gbɛɖe ɔ gɔ́n, Mawu e bló jǐxwé, ayǐkúngban, xu kpó nǔ e ɖ’é mɛ lɛ́ é bǐ kpó é.
16 Ðo jijimɛ e wá yi lɛ́ é mɛ ɔ, é jó akɔta lɛ́ bǐ dó bɔ yě mlɛ́ ali e jló yě lɛ́ é.
17 É ɖo mɔ̌ có, é gɔn kúnnu ɖe nú éɖée ɖɔ émí nɔ wa ɖagbe ǎ; é nɔ ná mi jǐ sín jǐnukúnsin, bo nɔ bló bɔ ji nɔ jɛ nú mi ɖo hwenu e nyɔ́ é, lobo nɔ bló bɔ mi nɔ mɔ nǔɖuɖu bɔ é nɔ kpé mi, lobɔ awǎjijɛ nɔ gɔ́ ayi mitɔn mɛ.”
18 Yě ɖɔ xó énɛ́ lɛ́ có, é fá dó yě cóbónú ahwan ɔ wá gɔn vɔ̌ sá nú yě ǎ.
19 Amɔ̌, Jwifu ɖé lɛ́ gosín Antyɔ́ci kpó Ikoniyɔ́mu kpó wá, bo bló bɔ ahwan ɔ húzú linlin dó Pɔ́lu wú, bo nyi awǐnnyaglo dó è, lobo dɔn ɛ tɔ́n sín toxo ɔ mɛ, bo vɛdó ɖɔ é kú wɛ sín.
20 É ɖo mɔ̌ có, hwenu e ahwanvú lɛ́ wá lɛ́ lɛ̌ dó è é ɔ, é fɔ́n sí te bo byɔ́ toxo ɔ mɛ. Ayǐhɔ́ngbe tɔn ɔ, é kpó Baanabási kpó gosín fínɛ́ ɖidó Dɛɛbée.
21 Ée yě jlá wɛn ɖagbe ɔ mɛ e ɖo toxo énɛ́ mɛ lɛ́ é, bo bló bɔ mɛ gěgé húzú ahwanvú gúdo é ɔ, yě lɛ́ kɔ yi Lisítli, Ikoniyɔ́mu kpó Antyɔ́ci kpó.
22 Yě dó wǔsyɛ́n lanmɛ nú ahwanvú lɛ́* ɖo fí énɛ́ lɛ́, bo byɔ́ yě vɛ́návɛ́ná ɖɔ yě ní lí dǒ ɖo nǔɖiɖi mɛ, lobo ɖɔ: “Cóbónú mǐ ná byɔ́ Axɔ́súɖuto Mawu tɔn mɛ ɔ, mǐ ɖó ná xo wǔvɛ́ gěgé zlɛ́.”
23 Gɔ́ ná ɔ, yě sɔ́ súnnu ɖé lɛ́ mɛxó agun tɔn ɖo agun ɖokpó ɖokpó mɛ, bo xo ɖɛ lobo blá nu, bo sɔ́ yě dó alɔ mɛ nú Jexóva* e yě ɖi nǔ ná é.
24 Énɛ́ gúdo ɔ, yě gbɔn Pisidíi bo wá Panfilíi,
25 bɔ ée yě ɖɔ mawuxó ɖo Pɛɛjée gúdo é ɔ, yě yi Atalíya.
26 Yě dó tɔjíhún sín fínɛ́ yi Antyɔ́ci. Antyɔ́ci ɔ wɛ è ko sɔ́ yě d’así nú Mawu, gbɔn fɛ́nú tɔn gblamɛ ɖe, bónú yě ná wa azɔ̌ e yě fó din é.
27 Ée yě wá bo xo agun ɔ bǐ kplé ɖó kpɔ́ é ɔ, yě ɖɔ nǔ tobutóbú e Mawu wa gbɔn yě jí lɛ́ é, kpó lěe é hun ali nú mɛ e ɖo akɔta ɖě lɛ́ mɛ lɛ́ é, bónú yě ní dó sixú ɖi nǔ gbɔn é kpó.
28 Énɛ́ ɔ, yě zán hwenu gěgé ɖó kpɔ́ xá ahwanvú lɛ́.
Tínmɛ e ɖo do lɛ́ é
^ Alǒ “lǐndɔ̌n mɛ e ɖo akɔta ɖě lɛ́ mɛ lɛ́ é tɔn.”
^ Alǒ “lǐndɔ̌n ahwanvú lɛ́ tɔn.”
