Wěma e è wlán sɛ́dó Filemɔ́ɔ é 1:1-25
1 Nyɛ Pɔ́lu e nyí gantɔ́ ɖó Klísu Jezu wú é kpó nɔví mǐtɔn Timɔtée kpó wɛ ɖo wěma wlán sɛ́dó Filemɔ́ɔ, éé nyí azɔ̌gbɛ́ vívɛ́ mǐtɔn é wɛ,
2 bo lɛ́ ɖo wlǎnwlán sɛ́dó nɔví nyɔ̌nu mǐtɔn Afíya, ahwanfungbɛ́ mǐtɔn Aacípu kpó agun e nɔ kplé ɖo xwé towe gbe é kpó wɛ:
3 Mawu Tɔ́ mǐtɔn kpó Aklúnɔ Jezu Klísu kpó ní ná fɛ́nú kpó fífá kpó mi.
4 Un nɔ dó kú nú Mawu ce, hweɖébǔnu e un flín we ɖo ɖɛ ce lɛ́ mɛ é,
5 ɖó un nɔ fɔ́n bo nɔ ɖo nǔɖiɖi towe kpó wǎnyíyí e a ɖó nú Aklúnɔ Jezu, kpódó mɛ mímɛ́ lɛ́ bǐ kpán é kpó sín xó se wɛ.
6 Un nɔ xo ɖɛ ɖɔ nǔɖiɖi e a ɖó ɖo bǔ xá mɛ ɖě lɛ́ é ní sísɛ́ we, bónú a ní mɔ nǔ jɛ nǔ ɖagbe ɖěɖěe mǐ mɔ yí gbɔn Klísu gblamɛ lɛ́ é bǐ wú.
7 Ée un se xó dó wǎnyíyí towe wú é ɔ, un j’awǎ tawun, bɔ é lɛ́ dó gbɔ nú mì tawun, ɖó è fá kɔ nú mɛ mímɛ́ lɛ́,* gbɔn hwi nɔví ce ɔ gblamɛ.
8 Ðó hwɛjijɔ énɛ́ wú ɔ, un vo tawun ɖo bǔ e un ɖe xá Klísu é mɛ bo ná ɖe gbe nú we ɖɔ a ní wa nǔ e sɔgbe é; é ɖo mɔ̌ có,
9 un ná zɔn dó wǎnyíyí e a ɖó é wú, bo ná sa vo nú we, ɖó nyɛ Pɔ́lu ɔ, un ko nyí mɛxómɔ, bɔ din ɔ, un lɛ́ nyí gantɔ́, ɖó Klísu Jezu wú.
10 Un ɖo vo sa nú we wɛ dó vǐ ce Onɛzímu, ée un húzú tɔ́ ná ɖo gankpá* mɛ é tamɛ.
11 Ð’ayǐ ɔ, é nyí nǔɖéwanú nú we ǎ, amɔ̌ din ɔ, é ná jɛ alɔ nú nyi kpó hwi kpó.
12 Éyɛ́ mɛ e un yí wǎn ná tawun é* ɔ, un ɖo kɔ lɛ́ n’i sɛ́dó we wɛ.
13 É ná ko jló mì ɖɔ má hɛn ɛ ɖó fí, bónú é ní dó sixú d’alɔ mì ɖó tɛn towe mɛ, ɖo gankpá mɛ fí e un ɖe, ɖó wɛn ɖagbe ɔ wútu é.
14 Amɔ̌, un jló ná wa nǔ ɖěbǔ jlǒ towe mɛvo ǎ, bónú é ní ma nyí gǎn wɛ è hú we, bɔ a wa azɔ̌ ɖagbe énɛ́ ó, loɔ, é ní nyí kpó jlǒ hwiɖésúnɔ tɔn kpó.
15 Nǔgbó wɛ ɖɔ é hɔn nú hwenu kléwún ɖé.* Amɔ̌, bóyá nǔ nyí mɔ̌, bónú din ɔ, é ní dó sixú lɛ́ kɔ wá gɔ̌n towe káká sɔ́yi.
16 É ka sɔ́ nyí kannumɔ ǎ, loɔ, é hú gǎn kannumɔ. Nɔví vívɛ́ná wɛ é nyí, ɖo tají ɔ, nú nyɛ; amɔ̌, é nyí nɔví vívɛ́ná nú hwɛ hú gǎn, ɖó kannumɔ towe wɛ é nyí bo lɛ́ nyí nɔví towe ɖo Aklúnɔ mɛ.
17 Énɛ́ wú ɔ, ényí a nɔ kpɔ́n mì dó mɔ xɔ́ntɔn* hǔn, yǐ i kpó xomɛnyínyɔ́ kpó, lěe a ná yí mì gbɔn é.
18 Gɔ́ ná ɔ, ényí é wa nǔ ɖěbǔ nyi do nú we alǒ ɖu nǔ ɖěbǔ xɔ́ dó we hǔn, lɛ̌n dó kɔ nú mì.
19 Nyɛ Pɔ́lu wɛ sɔ́ alɔ ce ɖésúnɔ dó ɖo wlǎnwlán wɛ: Un ná s’axɔ́ tɔn we. É byɔ́ ɖɔ má ɖɔ nú we ɖɔ a tlɛ ɖu gbɛ hwiɖésúnɔ tɔn sín axɔ́ dó mì ǎ.
20 Ɛɛn, nɔví ce, kɛnklɛ́n kpɔ́n dó bǔ e mǐ ɖe xá Aklúnɔ é wú, bo dó alɔ élɔ́ mì. Fá kɔ nú mì* ɖo bǔ e a ɖe xá Klísu é mɛ.
21 Un kú d’é jí ɖɔ a ná wa nǔ e un byɔ́ we é; énɛ́ wú wɛ un ɖo nǔ wlán sɛ́dó we wɛ, ɖó un tuun ɖɔ a tlɛ ná wa nǔ zɛ nǔ e un ɖɔ é wú.
22 Gɔ́ ná ɔ, lɛ̌ sɔ́ nǔ nú fí e un ná nɔ é nú mì, ɖó un ɖo nukún ɖó wɛ ɖɔ ɖɛ mitɔn lɛ́ ná zɔ́n, bɔ è ná ɖe mì nyi te nú mi.
23 Epaflási e nyí gantɔ́ hǎtɔ́ ce ɖo bǔ e é ɖe xá Klísu Jezu é mɛ é ɖo gbe dó sɛ́dó we wɛ.
24 Azɔ̌gbɛ́ ce Maki, Alisitáki, Demási kpó Luki kpó lɔ ɖo gbe dó sɛ́dó we wɛ.
25 Fɛ́nú Aklúnɔ Jezu Klísu tɔn ní nɔ kpɔ́ xá mi, hwenu e mi ná ɖo jijɔ ɖagbe lɛ́ ɖe xlɛ́ wɛ é.
Tínmɛ e ɖo do lɛ́ é
^ Blǔju tɔn, “è fá kɔ nú adɔkan mɛ mímɛ́ lɛ́ tɔn lɛ́.” Xógbe “adɔkan lɛ́” ɔ nɔ dó gesí lěe nǔ nɔ cí mɛ ɖo ayi gɔngɔn mɛtɔn mɛ é.
^ Blǔju tɔn, “wlɔ.”
^ Blǔju tɔn, “Éyɛ́ mɛ e nyí adɔkan ce lɛ́ é.” Xógbe “adɔkan lɛ́” ɔ nɔ dó gesí lěe nǔ nɔ cí mɛ ɖo ayi gɔngɔn mɛtɔn mɛ é.
^ Blǔju tɔn, “nú ganxixo ɖokpó.”
^ Alǒ “azɔ̌gbɛ́.”
^ Blǔju tɔn, “Fá kɔ nú adɔkan ce lɛ́.” Xógbe “adɔkan lɛ́” ɔ nɔ dó gesí lěe nǔ nɔ cí mɛ ɖo ayi gɔngɔn mɛtɔn mɛ é.
