Vendredi 24 février 2023 ɔ, é bló xwe ɖokpó bɔ nǔ baɖabaɖa ɖé jɛ: ahwan bɛ́ ɖo Ukraine. Sɔgbe kpó nǔ e gbeɖíɖó ɖé lɛ́ ɖɔ é kpó ɔ, sɔ́ja Ukraine kpó Russie kpó tɔn 300000 mɔ̌ wɛ ko kú alǒ gblé wǔ vantankánnyá, bɔ è ɖɔ ɖɔ toví 30000 mɔ̌ wɛ ko kú ɖó ahwan ɔ wú. É ɖo mɔ̌ có, kɛ́n ɔ sixú hú gǎn mɔ̌.

 É blá wǔ ɖɔ mɛɖé tuun hwenu e ahwan énɛ́ ná fó dó é ǎ.

•   “Sín ɖibla yi xwe ɖokpó ɖíe e sɔ́ja Russie tɔn lɛ́ byɔ́ Ukraine é ɔ, nǔɖé ko xlɛ́ ɖɔ ahwan ɔ ná fó ɖo malínmálín mɛ ǎ. Nǔɖé xlɛ́ nyi wɛn ɖɔ to we lɛ́ ɖě ná ɖu ɖo ahwan ɔ jí ǎ; gɔ́ ná ɔ, é lɛ́ cí ɖɔ akpáxwé we lɛ́ kún ɖo gbe ná ɖó kpɔ́ wɛ bá ɖe ɖɛ ninɔmɛ ɔ ó.”—NPR (Hladíoxwé nɔkɔ́ ɔ), 19 février 2023.

 É sɔgbe ɖɔ mɛ gěgé ɖo aluwɛ mɛ ɖó wǔvɛ́ e ahwan énɛ́ kpó gěgé ɖěvo lɛ́ kpó zɔ́n bɔ gbɛtɔ́ xomɛvɔ́nɔ lɛ́ ɖo sise wɛ gbɔn gbɛ ɔ bǐ mɛ é wú. Nukúnɖíɖó tɛ́ Biblu ka ná mɛ? Ahwan ka ná wá nɔ te gbeɖé a?

 Biblu ɖɔ ahwan e ná hwlɛ́n gbɛtɔ́ lɛ́ bo ma ná hɛn nǔ gblé ǎ é ɖé sín xó. Ahwan énɛ́ wɛ è nɔ ylɔ́ ɖɔ Aamagedɔ́ni, bɔ è ɖɔ é nyí “ahwan e è ná fun ɖo Mawu Nǔbǐwúkpétɔ́ ɔ sín azǎn ɖaxó ɔ gbe é.” (Nǔɖexlɛ́mɛ 16:14, 16) Mawu ná zán ahwan énɛ́ dó ɖó nǔ nu nú acɛkpikpa gbɛtɔ́ lɛ́ tɔn e dɔn ahwan gěgé wá lɛ́ é. Ényí a ba ná tuun lěe Aamagedɔ́ni ná hɛn fífá mavɔmavɔ wá gbɔn é hǔn, xa xóta e bɔ d’é wú lɛ́ é:

•   “Étɛ́ ka nyí ahwan Aamagedɔ́ni tɔn?”

•   “Aamagedɔ́ni ɔ, wɛn ɖagbe wɛ!”