Ðo 2023 ɔ, nǔ gěgé jɛ gbɔn gbɛ ɔ bǐ mɛ, bo ɖe xlɛ́ nyi wɛn ɖɔ mǐ ɖo gbɛ nɔ wɛ ɖo táan e Biblu ylɔ́ ɖɔ “azǎn gǔdo gúdo tɔn lɛ́” é mɛ. (2 Timɔtée 3:1) Nǔ e ɖo jijɛ wɛ din lɛ́ é sɔgbe xá nǔ ɖěɖěe ná jɛ ɖo hwe mǐtɔn nu bɔ Biblu ɖɔ ɖ’ayǐ lɛ́ é. Hǎbǔ ɖíe:

Nǔ e ɖo jijɛ wɛ ɖo gbɛ ɔ mɛ bɔ Biblu ko ɖɔ ɖ’ayǐ lɛ́ é

 “Mi ná se ahwanfunfun sín zǐngídi ɖo fí e sɛkpɔ́ mi lɛ́ é, bo ná se ahwanfunfunxó ɖo fí e lín dó mi lɛ́ é.”—Matíe 24:6.

•   “Nǔwiwa dǎkaxixo tɔn lɛ́ ɖo jijɛjí wɛ ɖo akpáxwé gbɛ ɔ tɔn gěgé.” a

 “Ayǐkúngban ná dán wǔ sín fí ɖé jɛ fí ɖěvo.”—Maki 13:8.

•   “Sín bǐbɛ́mɛ 2023 tɔn ɔ, ayǐkúngban dán wǔ e tíin lɛ́ é 13 wɛ hɛn nǔ gblé tawun; sín hwenu e è ko jɛ kɛ́n lɛ́ sɔ́ jí é ɔ, énɛ́ sukpɔ́ tawun hú nabí e è nɔ mɔ ɖo xwe ɖokpó mɛ é.” b

 “Nǔ e ná dó xɛsi . . . lɛ́ é.”—Luki 21:11.

•   “Yǒzo syɛ́nsyɛ́n sín hwenu ko wá vivɔnu; gbɛ ɔ bǐ wɛ ɖo agbǎn hun wɛ fí e mǐ ɖe din é.”—António Guterres, wěgbójínɔtɔ́ ɖaxó Gbɛ̌ kplékplé akɔta lɛ́ tɔn tɔn. c

 “Nǔɖuɖu ná hwe dó mɛ.”—Matíe 24:7.

•   “2023 nyí adohu adohu sín xwe ɖěvo nú mɛ ɖěɖěe nǔɖuɖu níná xwédo yětɔn lɛ́ nɔ vɛ́ wǔ ná lɛ́ é.” d

 “Hwenu e syɛ́n bo vɛ́ wǔ bɔ è ná ɖí xwi xá lɛ́ é.”—2 Timɔtée 3:1.

•   “Gbɔn gbɛ bǐ mɛ ɔ, mɛ ɖokpó ɖo tántɔn jí nɔ ɖó taglomɛzɔn alɔkpa ɖé.” e

Étɛ́ mǐ ka sixú ɖó nukún ɖo 2024?

 Mɛ ɖěbǔ tuun nǔ e ná jɛ ɖo 2024 lɛ́ é pɛ́pɛ́pɛ́ ǎ. Amɔ̌, nǔ e ɖo jijɛ wɛ ɖo gbɛ ɔ mɛ lɛ́ é xlɛ́ ɖɔ malínmálín mɛ din ɔ, Axɔ́súɖuto Mawu tɔn, éé nyí acɛkpikpa jǐxwé tɔn ɖé é, ná ɖyɔ́ acɛkpikpa gbɛtɔ́ tɔn lɛ́, bo ná sú kún dó nú nǔ e nɔ dɔn wǔvɛ́ kpó linkpɔ́n kpó wá lɛ́ é bǐ.—Daniyɛ́li 2:44; Nǔɖexlɛ́mɛ 21:4.

 Ée mǐ ná ɖo te kpɔ́n nǔ énɛ́ sín jijɛ wɛ é ɔ, mǐ sixú ɖeji ɖɔ Mawu ná d’alɔ mǐ, hwenu e mǐ ná ɖo linkpɔ́n mɛ é. Biblu ɖɔ:

 “Xɛsi . . . jɛ jǐ ce gbeɖé ɔ, hwi wú wɛ un nɔ gán jɛ.”—Ðɛhan 56:4.

 Nɛ̌ mǐ ka sixú xlɛ́ ɖɔ mǐ ɖeji dó Mawu wú gbɔn? Mǐ byɔ́ we ɖɔ a ní kplɔ́n nǔ ɖěvo lɛ́ dó akpá e Biblu dó ɖɔ wǔvɛ́ mimɔ kún sɔ́ ná tíin ɖo sɔgúdo ó é wú. Tɛ́n tuto Biblu kplɔ́nkplɔ́n vɔ̌nu tɔn mǐtɔn kpɔ́n, bá mɔ lěe hwi kpó xwédo towe kpó sixú ɖu akpá e Biblu dó lɛ́ é sín le gbɔn é.