Jezu kú bonu è ni sixu sɔ́ hwɛ gbɛtɔ́ lɛ tɔn kɛ ye, lobonu ye na mɔ gbɛ̀ mavɔmavɔ. (Hlɔmanu lɛ 6:23; Efɛzinu lɛ 1:7) Kú Jezu tɔn lɛ́ xlɛ́ ɖɔ gbɛtɔ́ sixu kpò ɖò gbeji nú Mawu, enyi mɛtɛnkpɔn syɛnsyɛn lɛ na bo tlɛ kpannukɔn ɛ ɔ nɛ.—Eblée lɛ 4:15.

 Kpɔ́n lee kú gbɛtɔ́ ɖokpo tɔn sixu wà nǔ tobutobu enɛ lɛ bǐ gbɔn é.

1.   Jezu kú bonu è na “sɔ́ hwɛ mǐtɔn lɛ kɛ mǐ.”—Kolosinu lɛ 1:14.

    Adamu, gbɛtɔ́ nukɔntɔn ɔ nyí mɛ maɖóblɔ̌ ɖé, bɔ hwɛ ɖě ɖò kɔ n’i ǎ. É ɖò mɔ̌ có, é wá gbeta ɔ kɔn bo tlitó nú Mawu. Tó tlítlí alǒ hwɛhuhu Adamu tɔn wà nǔ dó kúnkan tɔn lɛ bǐ wu tawun. Biblu tinmɛ ɖɔ: “Tónúmase gbɛtɔ́ ɖokpo géé tɔn zɔ́n bɔ gbɛtɔ́ gegě huzu hwɛhutɔ́.”—Hlɔmanu lɛ 5:19.

    Jezu lɔmɔ̌ nyí mɛ maɖóblɔ̌, loɔ, é ka hu hwɛ kpɔ́n ǎ. Enɛ wu ɔ, é sixu “sɔ́ éɖée dó savɔ̌ na, bonu Mawu na sɔ́ hwɛ mǐtɔn lɛ kɛ mǐ.” (1 Jaan 2:2) Lee tónúmase Adamu tɔn dɔn hwɛhuhu dó kɔ nú gbɛtɔ́ lɛ bǐ gbɔn é ɔ, mɔ̌ jɛn kú Jezu tɔn súnsún hwɛ sín kɔ nú mɛ ɖěɖee ɖi nǔ n’i lɛ é bǐ gbɔn.

    Ðò ali ɖé nu ɔ, Adamu sà kúnkan gbɛtɔ́ lɛ tɔn nú hwɛhuhu. Jezu ka vɔ́ gbɛtɔ́ lɛ xɔ, gbɔn jlǒ sísɔ́ dó kú dó ta mǐtɔn mɛ gblamɛ. Enɛ wɛ zɔ́n bɔ, ‘enyi mɛɖé hu hwɛ ɔ, mǐ ɖó ɖɛ̌mɛnu ɖokpo ɖò Tɔ́ ɔ gɔn; é wɛ nyí Jezu Klisu hwɛjijɔnɔ ɔ.’—1 Jaan 2:1.

2.   Jezu kú “bonu mɛ e na ɖi nǔ n’i lɛ ɖebǔ ma dɔn ó; loɔ, ye bǐ ni mɔ gbɛ̀ mavɔmavɔ.”—Jaan 3:16.

    Mawu dá Adamu bonu é na nɔ gbɛ̀ kaka sɔyi có, hwɛ e é hu é zɔ́n bɔ è ɖó kúhwɛ́ n’i. “Hwɛhuhu ɔ, [Adamu] jí wɛ é gbɔn bo wá gbɛ̀ ɔ mɛ . . . hwɛhuhu ɔ ka dɔn kú wá. Enɛ ɔ, gbɛtɔ́ lɛ bǐ nɔ kú, ɖó mɛ bǐ wɛ hu hwɛ.”—Hlɔmanu lɛ 5:12.

    Ðò ali e gbɔn vo é ɖé nu ɔ, kú Jezu tɔn ɔ, hwɛ kɛɖɛ wɛ é ɖè síìn ǎ, loɔ, é lɛ ɖè kúhwɛ́ sín kɔ nú mɛ ɖěɖee ɖi nǔ n’i lɛ é bǐ. Biblu sɛ̀ sin xwè nú xó ɔ gbɔn lee: “Lee hwɛhuhu ko ɖu axɔ́su gbɔn kú jí ɔ, mɔ̌ ɖokpo ɔ jɛn fɛ́nú Mawu tɔn ɖò axɔ́su ɖu wɛ gbɔn hwɛjijɔ jí, bo na kplá mǐ yì gbɛ̀ mavɔmavɔ mɛ gbɔn Jezu Klisu Aklunɔ mǐtɔn jí.”—Hlɔmanu lɛ 5:21.

    Nǔgbo wɛ ɖɔ táan e gbɛtɔ́ lɛ nɔ nɔ gbɛ̀ na ɖò égbé dìn é ɖó dogbó. Amɔ̌, Mawu d’akpá ɖɔ emi na dó gbɛ̀ mavɔmavɔ sín ajɔ gbɛtɔ́ hwɛjijɔnɔ lɛ, bo na fɔ́n mɛ ɖěɖee ko kú lɛ é wá gbɛ̀ bonu ye lɔ na ɖu kú vɔsisa tɔn Jezu tɔn sín lè.—Ðɛhan 37:29; 1 Kɔlɛntinu lɛ 15:22.

3.   Jezu “setónú nú Mawu kaka yì kú,” bo xlɛ́ ɖɔ ɖò mɛtɛnkpɔn alǒ wuvɛ̌ ɖebǔ mɛ ɔ, gbɛtɔ́ sixu kpò ɖò gbeji nú Mawu.—Filipunu lɛ 2:8.

    Adamu ɖó linlin maɖóblɔ̌ ɖé kpo agbaza maɖóblɔ̌ ɖé kpo có, ɖó é sɔ́ cejɛnnabi dó jló nǔ e ma nyí étɔn ǎ é wutu ɔ, é tlitó nú Mawu. (Bǐbɛ̌mɛ 2:16, 17; 3:6) Ðò nukɔnmɛ ɔ, Satáan ee nyí kɛntɔ́ ɖaxó Mawu tɔn é zyan vǎ d’eji ɖɔ gbɛtɔ́ ɖebǔ kún na setónú nú Mawu cejɛnnabi mɛvo ó, lé taji bǐ ɔ wɛ nyí hwenu e gbɛ̀ tɔn ɖò axɔ́ nu é. (Jɔbu 2:4) É ɖò mɔ̌ có, Jezu ee nyí mɛ maɖóblɔ̌ é setónú nú Mawu bo lɛ́ nɔ gbeji n’i hwenu e é tlɛ ja winnya kpo wuvɛ̌ kpo sín kú kú gbé é. (Eblée lɛ 7:26) Enɛ ɖeɖɛ xó ɔ bǐ mlɛ́mlɛ́: Ðò mɛtɛnkpɔn alǒ wuvɛ̌ ɖebǔ mɛ ɔ, gbɛtɔ́ sixu kpò ɖò gbeji nú Mawu.

Nǔkanbyɔ ɖé lɛ dó kú Jezu tɔn wu

•   Etɛwu é ka byɔ ɖɔ Jezu ni jiya bo kú dó xɔ gbɛ̀ nú gbɛtɔ́ lɛ? Etɛwu Mawu ma ka ɖè kúhwɛ́ ɔ síìn kpowun ǎ?

   Sɛ́n Mawu tɔn ɖɔ ɖɔ “axɔ́ e hwɛhuhu nɔ sú mɛ ɔ wɛ nyí kú.” (Hlɔmanu lɛ 6:23) Mawu hwlá sɛ́n enɛ dó Adamu ǎ, é nyɔ́ wà ɔ, é ɖɔ n’i nyi wɛn ɖɔ tónúmase na jì kú n’i. (Bǐbɛ̌mɛ 3:3) Hwenu e Adamu hu hwɛ é ɔ, Mawu ee ma “nɔ ɖó adingban ǎ” é wà nǔ lee é ko ɖɔ gbɔn é. (Titu 1:2) É nyí hwɛhuhu kɛɖɛ wɛ Adamu ɖu kpò nú kúnkan tɔn lɛ ǎ, loɔ, axɔ́ e hwɛhuhu nɔ sú mɛ é lɔmɔ̌, é wɛ nyí kú.

   Nǔ e jɛxa gbɛtɔ́ hwɛhutɔ́ lɛ é wɛ nyí kú có, Mawu ɖè “xomɛnyínyɔ́ [alǒ fɛ́nú] tɔn ma ɖó jlɛ̌ ɔ” xlɛ́ ye. (Efɛzinu lɛ 1:7) Tuto e É bló bo na xɔ gbɛ̀ nú gbɛtɔ́ lɛ lobo sɛ́ Jezu dó, vɔsisa maɖóblɔ̌ ɖé ɖɔhun é sɔgbe tawun bo lɛ́ nyí nǔblawukúnúmɛ-núwiwa ɖaxó bǐ ɔ.

•   Hwetɛnu Jezu ka kú?

   Jezu kú ɖò “gan atɔn mɛ” hwemɛ tɔn mɔ̌ alǒ ganxixo tɛnnɛgɔ́ kéze ɔ tɔn ɖò Dindinwayixwe Jwifu lɛ tɔn zán gbè. (Maki 15:33-37) Sɔgbe xá sunzánwema égbé tɔn lɛ ɔ, azǎn enɛ jɛ dó vendredi 1^er avril 33 H.M. tɔn jí.

•   Fitɛ Jezu ka kú ɖè?

   È hu Jezu ɖò fí ɖé, “bɔ è ylɔ́ fí ɔ ɖɔ ‘takágo,’ bɔ Eblée lɛ nɔ ylɔ́ fí enɛ ɖɔ Gɔlugɔta.” (Jaan 19:17, 18) Ðò Jezu hwenu ɔ, nɔtɛn enɛ “ɖò toxo” Jeluzalɛmu tɔn “gudo.” (Eblée lɛ 13:12) É sixu ko nyí ɖò só ɖé jí, ɖó Biblu ɖɔ ɖɔ hwenu e è ɖò Jezu hu wɛ é ɔ, mɛɖé lɛ “ɖò zɔga” bo ɖò kpinkpɔn wɛ. (Maki 15:40) É ɖò mɔ̌ có, fí e Gɔlugɔta ɖè ɖò égbé dìn é ɔ, è sixu ɖɔ bo t’afɔ jí ǎ.

•   Nɛ̌ Jezu ka kú gbɔn?

   Mɛ gegě ɖi nǔ ɖɔ è ká Jezu nyi akluzu jí có, Biblu ka ɖɔ: “Éyɛ ɖesu sɔ́ agbaza éɖesunɔ tɔn bo hɛn hwɛ mǐtɔn lɛ ɖò atín jí.” (1 Piyɛ́ɛ 2:24, Biblu Wiwe lọ—Gun Alada) Xókwín Glɛki gbè tɔn we wɛ Biblu wlantɔ́ lɛ zán dó dó gesí nǔ e jí è hu Jezu dó é, ye wɛ nyí stauros kpo xulon kpo. Akɔwé Biblu tɔn gegě wá gbeta ɔ kɔn ɖɔ xókwín enɛ lɛ dó gesí atínkpo ɖé alǒ atín e xwete é ɖé.

•   Nɛ̌ è ka ɖó na flín kú Jezu tɔn gbɔn?

   Gbadanu ɖò Dindinwayixwe Jwifu lɛ tɔn sín azǎn jí ɔ, Jezu ɖó nǔwiwa klewun ɖé ayǐ kpo ahwanvu tɔn lɛ kpo bo ɖegbe nú ye ɖɔ: “Mi na nɔ bló gbɔn lě dó flín mì na.” (1 Kɔlɛntinu lɛ 11:24) Ganxixo ɖé lɛ gudo ɔ, è hu Jezu.

   Biblu wlantɔ́ lɛ jlɛ́ Jezu dó lɛngbɔ̌ví e è nɔ sɔ́ dó savɔ̌ na ɖò Dindinwayixwe ɔ hwenu é wu. (1 Kɔlɛntinu lɛ 5:7) Lee Dindinwayixwe ɔ ɖuɖu nɔ flín Izlayɛli-ví lɛ ɖɔ è ɖè ye sín kannumɔgbenu gbɔn é ɔ, mɔ̌ ɖokpo ɔ wɛ Flǐn kú Jezu Klisu tɔn tɔn nɔ flín Klisanwun lɛ ɖɔ è hwlɛn ye sín hwɛhuhu kpo kú kpo sí é nɛ. È nɔ ɖu Dindinwayixwe ɔ ɖokpo xwè ɖokpo mɛ ɖò 14 Nisáan sɔgbe xá sunzánwema Jwifu lɛ tɔn. Mɔ̌ ɖokpo ɔ, Klisanwun nukɔntɔn lɛ nɔ bló nǔwiwa Flǐn tɔn ɔ ɖokpo xwè ɖokpo mɛ.

   Xwewu xwewu ɖò azǎn e sɔgbe xá 14 Nisáan é jí ɔ, gbɛtɔ́ livi mɔkpan gbɔn gbɛ̀ ɔ bǐ mɛ nɔ flín kú Jezu tɔn.