Etɛ ka Nɔ Nyí Baptɛm?

Xósin e Biblu na é

Baptɛm sín tinmɛ wɛ nyí ɖɔ è ni nylɔ́ mɛɖé dó sin mɛ bǐ mlɛ́mlɛ́ bo lɛ́ ɖè è tɔ́n sín mɛ. a Nǔ e wu è bló baptɛm nú Jezu ɖò tɔsisa ɖaxó ɖé mɛ é nɛ. (Matie 3:13, 16) Mɔ̌ ɖokpo ɔ, nya Etiopíinu ɖé byɔ ɖɔ è ni bló baptɛm nú emi hwenu e ye “mɔ sin ɖò fí ɖé” é.—Mɛsɛ́dó 8:36-40.

Baptɛm sín tinmɛ

Biblu jlɛ́ baptɛm dó cyɔ ɖiɖi wu. (Hlɔmanu lɛ 6:4; Kolosinu lɛ 2:12) Baptɛm biblo ɖò sin mɛ nɔ xlɛ́ ɖɔ mɛɖé kú nú nǔ e é ko wà wá yì lɛ é, bo bɛ́ gbɛ̀ yɔyɔ̌ ɖevo dìn lobo nyí Klisanwun e zé éɖée jó nú Mawu é. Baptɛm kpo afɔ e è nɔ ɖè bo nɔ kpéwú lɛ é kpo ɔ, tuto Mawu tɔn wɛ bonu mɛɖé na ɖó ayixa mímɛ́ ɖé gbɔn nǔ e é ɖi nú vɔsisa Jezu Klisu tɔn é gblamɛ. (1 Piyɛ́ɛ 3:21) Enɛ wu wɛ Jezu kplɔ́n mɛ ɖɔ ahwanvu emitɔn lɛ ɖó na bló baptɛm.—Matie 28:19, 20.

Baptɛm nɔ súnsún hwɛ wɛ à?

Eǒ. Biblu kplɔ́n mɛ ɖɔ hun Jezu tɔn e kɔn nyi ayǐ é kɛɖɛ jɛn sixu súnsún hwɛ mǐtɔn lɛ. (Hlɔmanu lɛ 5:8, 9; 1 Jaan 1:7) É ɖò mɔ̌ có, nú mɛɖé na ɖu vɔsisa Jezu tɔn sín lè ɔ, mɛ ɔ ɖó na ɖi nǔ nú Jezu, huzu gbɛzán tɔn sɔgbe xá nǔkplɔnmɛ tɔn lɛ, bo na bló baptɛm.—Mɛsɛ́dó 2:38; 3:19.

Etɛ ka nyí baptɛm biblo nú vǐ yɛyɛ̌ lɛ?

Xógbe “baptɛm biblo nú vǐ yɛyɛ̌ lɛ” ɔ tɔ́n ɖò Biblu mɛ ǎ. É nɔ dó gesí nǔwiwa sinsɛn ɖé lɛ tɔn e mɛ è nɔ fúnfún sin alǒ kɔn sin dó ta nú vǐ yɛyɛ̌ ɖé bo nɔ sun nyikɔ ɛ ɖè é.

Biblu kplɔ́n mɛ ɖɔ è ni bló baptɛm nú vǐ yɛyɛ̌ lɛ wɛ à?

Eǒ, é kplɔ́n enɛ mɛ ǎ. Mɛ ɖěɖee ko zin bo sixu mɔ nukúnnú jɛ ‘Wɛnɖagbe axɔ́suɖuɖu Mawu tɔn tɔn’ mɛ bo ɖi nǔ na lɛ é wɛ ɖó na bló baptɛm Klisanwun tɔn. (Mɛsɛ́dó 8:12) É cá kan xá xó Mawu tɔn sise, gbè yíyí na, kpo kɔlilɛ sín hwɛ mɛtɔn lɛ gudo kpo; nǔɖe lɛ wɛ bɔ vǐ yɛyɛ̌ ɖé sixu wà ǎ.—Mɛsɛ́dó 2:22, 38, 41.

Gɔ́ na ɔ, Biblu xlɛ́ ɖɔ Mawu nɔ mɔ vǐ kpɛví Klisanwun lɛ tɔn lɛ dó mɔ mɛ mímɛ́, ɖó gbejininɔ gbɛ̀ e zán wɛ mɛjitɔ́ yetɔn lɛ ɖè é wutu. (1 Kɔlɛntinu lɛ 7:14) Enyi è ko yí gbè nú baptɛm vǐ yɛyɛ̌ lɛ tɔn wɛ ɔ, é sɔ́ na byɔ ɖɔ ye ni ɖu lè nǔ mɛjitɔ́ yetɔn lɛ tɔn e nyɔ́ Mawu nukúnmɛ é tɔn ǎ. b

Nukúnnúmɔjɛnǔmɛ agɔ lɛ dó baptɛm Klisanwun tɔn wu

Nukúnnúmɔjɛnǔmɛ agɔ: Sin fúnfún fúnfún dó ta nú mɛɖé alǒ sin kinkɔn dó ta nú mɛɖé sɔgbe, bɔ è sixu wà mɔ̌ ɖó mɛ nyinylɔ dó sin mɛ bǐ mlɛ́mlɛ́ tɛnmɛ.

Nǔgbo: Baptɛm e xó è ɖɔ ɖò Biblu mɛ lɛ é bǐ ɔ, mɛ wɛ è nylɔ́ dó sin mɛ. Ði kpɔ́ndéwú ɔ, hwenu e ahwanvu Filipu bló baptɛm nú nya Etiopíinu ɔ é ɔ, ye “byɔ sin ɔ mɛ” bo bló baptɛm ɔ. Enɛ gudo ɔ, “ye tɔ́n sín sin ɔ mɛ.”—Mɛsɛ́dó 8:36-39. c

Nukúnnúmɔjɛnǔmɛ agɔ: Biblu ɖexlɛ́ ɖò ali ɖé nu ɖɔ xwédo e mɛ mɛ lɛ bǐ bló baptɛm ɖè é ɔ, vǐ yɛyɛ̌ lɛ lɔ ɖ’emɛ. Ði kpɔ́ndéwú ɔ, è ɖɔ dó gantɔ́cɔ́tɔ́ e nɔ nɔ Filipu é ɖé wu ɖɔ: “É kpodo mɛtɔn lɛ bǐ kpan [bló baptɛm].”—Mɛsɛ́dó 16:31-34.

Nǔgbo: Tan gantɔ́cɔ́tɔ́ e huzu nǔɖitɔ́ é tɔn xlɛ́ ɖɔ mɛ ɖěɖee bló baptɛm lɛ é mɔ nukúnnú jɛ “Aklunɔ xó” ɔ mɛ bo “jɛ awǎ” tawun. (Mɛsɛ́dó 16:32, 34) Kúnnuɖenú enɛ lɛ xlɛ́ ɖɔ vǐ yɛyɛ̌ ɖě kún ɖò mɛ ɖěɖee bló baptɛm ɖò gantɔ́cɔ́tɔ́ ɔ sín xwégbe lɛ é mɛ ó, ɖó vǐ yɛyɛ̌ lɛ sixu mɔ nukúnnú jɛ xó Jehovah tɔn mɛ ǎ.

Nukúnnúmɔjɛnǔmɛ agɔ: Jezu ɖɔ ɖɔ Axɔ́suɖuto ɔ yɔkpɔvu lɛ tɔn wɛ bo dó kplɔ́n mɛ ɖɔ baptɛm vǐ yɛyɛ̌ lɛ tɔn ɖè.—Matie 19:13-15; Maki 10:13-16.

Nǔgbo: Baptɛm xó ɖɔ wɛ Jezu ɖè hwenu e é ɖɔ xó enɛ lɛ é ǎ. É nyɔ́ wá ɔ, xlɛ́xlɛ́ wɛ é ɖè ɖɔ mɛ ɖěɖee na jɛxa Axɔ́suɖuto Mawu tɔn lɛ é ɖó na cí yɔkpɔvu ɖɔhun, é wɛ nyí ɖɔ ye na sɔ́ yeɖée hwe bo nyɔ́ kplɔ́n.—Matie 18:4; Luki 18:16, 17.

a Xókwín Glɛkigbe tɔn dodó e è lilɛ dó “baptɛm” é sín tinmɛ wɛ nyí “è ni nylɔ́ dó.” Kpɔ́n Theological Dictionary of the New Testament, Akpáxwé I, wexwɛ 529.

b Sɔgbe xá The International Standard Bible Encyclopedia ɔ, “fí ɖebǔ ɖò Alɛnuwema Yɔyɔ̌ ɔ mɛ bo ɖɔ baptɛm vǐ yɛyɛ̌ lɛ tɔn xó ǎ.” É lɛ́ ɖɔ gɔ́ na ɖɔ “nukúnnúmɔjɛnǔmɛ agɔ e mɛ lɛ nɔ ɖó dó baptɛm wu é kpo linlin e zɛkpá bɔ ye nɔ ɖó dó nǔ e baptɛm nɔ wà é wu é kpo,” enɛ wɛ nyí ɖɔ baptɛm ɔ ɖesu nɔ súnsún hwɛ lɛ síìn é mɛ wɛ aca enɛ gosin.—Akpáxwé 1, wexwɛ 416-417.

c New Catholic Encyclopedia ɖɔ ɖò xótalá “Baptɛm (ɖò Biblu mɛ)” glɔ́ ɖɔ: “É ɖò wɛn ɖɔ ɖò Sinsɛn bǐbɛ̌mɛ tɔn mɛ ɔ, mɛ wɛ è nɔ nylɔ́ dó sin mɛ dó bló baptɛm nú mɛ.”—Akpáxwé 2, wexwɛ 59.