Biblu gbajɛ̌mɛ nú nǔ ɖěɖee na jɛ alǒ ninɔmɛ ɖěɖee na tíìn, bɔ ye na nyí wuntun “hwenu e gbɛ̀ elɔ na vɔ dó ɔ” tɔn lɛ é. (Matie 24:3) Biblu ylɔ́ hwe enɛ nu ɖɔ “azǎn gudogudo tɔn lɛ.” (2 Timɔtée 3:1) Nǔɖɔɖ’ayǐ ɖěɖee xlɛ́ azǎn gudogudo tɔn lɛ sín wuntun lɛ é taji ɖé lɛ ɖíe:

•   Ahwan na kpé fí gegě.—Matie 24:7; Nǔɖexlɛ́mɛ 6:4.

•   Adɔ.—Matie 24:7; Nǔɖexlɛ́mɛ 6:5, 6.

•   Ayikúngban na dánwǔ syɛnsyɛn.—Luki 21:11.

•   Azɔn baɖabaɖa lɛ kpo “jɛmɛji” lɛ kpo.—Luki 21:11.

•   Adakaxixo na jɛji.—Matie 24:12.

•   Gbɛtɔ́ lɛ na hɛn ayikúngban ɔ gblé.—Nǔɖexlɛ́mɛ 11:18.

•   Nǔwalɔ gbɛtɔ́ lɛ tɔn na nyla bǐ, ɖó mɛ gegě “na nɔ dó alɔgudokpɛ́ nú mɛ; ye na nɔ ɖó sísí nú nǔ e nyí Mawu tɔn lɛ ɖě ǎ. . . . Ye na nɔ kú nǔblawu nú mɛ ǎ; ye na nɔ ɖɔ mɛ nú; ye [na] nɔ sixu ɖu ɖò yeɖée jí ǎ, bo na nɔ nylahun; ye na nɔ gbɛ́ wǎn nú ɖagbewiwa. Ye na nɔ sà mɛ ɖu; ye na nɔ lin tamɛ kpɔ́n cobo na nɔ wà nǔ ǎ; ye na nɔ yí gò zɛ xwé wu.”—2 Timɔtée 3:1-4.

•   Xwédo lɛ na nɔ gbá, bɔ mɛ lɛ “na ɖó wanyiyi ɖebǔ ǎ,” lobɔ vǐ lɛ “na nɔ vɛtoli nú mɛjitɔ́ yetɔn lɛ.”—2 Timɔtée 3:2, 3.

•   Wanyiyi e mɛ gegě ɖó nú Mawu é na ɖekpo.—Matie 24:12.

•   Yɛmɛnúwiwa ɖò sinsɛn kpáxwé na vunkan.—2 Timɔtée 3:5.

•   Nukúnnú mimɔ jɛ nǔɖɔɖ’ayǐ Biblu tɔn lɛ wu na jɛji, kaka jɛ ɖěɖee kúnkplá azǎn gudogudo tɔn lɛ é jí.—Daniyɛli 12:4.

•   È na jlá wɛnɖagbe Axɔ́suɖuto ɔ tɔn gbɔn gbɛ̀ ɔ bǐ mɛ.—Matie 24:14.

•   Mɛ gegě na dóvɛ̌ nú kúnnuɖenú ɖěɖee xlɛ́ ɖɔ vivɔnu ɔ ko sɛkpɔ́ lɛ é, bo na nɔ cá ko.—Matie 24:37-39; 2 Piyɛ́ɛ 3:3, 4.

•   Nǔɖɔɖ’ayǐ enɛ lɛ bǐ na jɛnu zɛ̌nzɛ̌n, é na nyí klewun ɖé alǒ gegě tɔn ǎ.—Matie 24:33.

Mǐ ko ɖò “azǎn gudogudo tɔn lɛ” mɛ wɛ à?

 Ɛɛn. Ninɔmɛ gbɛ̀ ɔ tɔn lɛ gɔ́ nú azǎnlinlɛn Biblu tɔn xlɛ́ ɖɔ azǎn gudogudo tɔn lɛ bɛ́ ɖò 1914. Ðò hwe enɛ nu ɔ, Axɔ́suɖuto Mawu tɔn jɛ acɛ kpa jí ɖò jixwé, bɔ nǔ e é wà dó nukɔn lɛ é ɖokpo wɛ nyí ɖɔ é nya Satáan kpo awoví lɛ kpo sín jixwé, lobo ɖó dogbó nú nǔwiwa yetɔn b’ɛ nɔte ɖó ayikúngban ɔ jí. (Nǔɖexlɛ́mɛ 12:7-12) Lee Satáan nɔ wà nǔ dó gbɛtɔ́ lɛ wu gbɔn é nɔ jɛ wě ɖò walɔ baɖabaɖa ɖěɖee zɔ́n bɔ “hwenu vɛwǔ lɛ” dó tíìn ɖò azǎn gudogudo tɔn lɛ mɛ é gegě mɛ.—2 Timɔtée 3:1.