Virginia, ee nyí Kúnnuɖetɔ́ Jehovah tɔn ɖé é ɖò azɔn e è nɔ ylɔ́ ɖɔ syndrome d’enfermement é jɛ wɛ. É cɛ́ kplíbɔ́ bǐ. É sixu mɔ nǔ bo sè nǔ, hun nukún bo lɛ́ myɔ nukún, lobo dán ta dɛ̌dɛ̌. É ka sixu ɖɔ xó alǒ ɖu nǔ ǎ. Hweɖenu ɔ, é ɖò ganji ɖò agbaza mɛ bo lɛ́ ɖó hlɔnhlɔn. Amɔ̌, zǎnzǎn tɛɛn ɖokpo ɖò 1997 ɔ, é sè wuvɛ̌ syɛnsyɛn e gbɛ́ kɔ gbò é ɖé ɖò zogudó. Asú tɔn kplá ɛ yì dotóoxwé, bɔ ɖò gbè nɛ gbè gbadanu ɔ, é byɔ komáa mɛ. É wá fɔ́n ɖò aklunɔzán gbla we gudo, bo mɔ éɖée ɖò azɔ̌xɔsa e nɔ kpé nukún dó nǔ mɔ̌hun wu ɖò dotóoxwé ɔ é (unité de soins intensifs), bo ko cɛ́ kplíbɔ́ bǐ bɔ è sɔ́ nǔ e mɛ è nɔ gbɔjɛ gbɔn é (respirateur) ɖó awɔnnu tɔn. Nú azǎn yɔywɛ ɖé ɔ, é sɔ́ sixu nɔ flín nǔtí ǎ, é tlɛ sɔ́ tuùn éɖée ǎ.

Virginia tinmɛ nǔ e jɛ bɔ d’ewu é. “Kpɛɖé kpɛɖé ɔ, un jɛ nǔ lɛ flín jí. Un xoɖɛ syɛnsyɛn. Un jló na kú bo jó vǐ sunnu ce dó, bonu é na huzu nɔcyɔvǐ ǎ. Bo na dó na hlɔnhlɔn akɔ́nkpinkpan e un ɖó é ɔ, un tɛ́n kpɔ́n bo flín wemafɔ Biblu tɔn gegě lee un kpéwú gbɔn é.

“Gudo mɛ ɔ, dotóo lɛ ɖè mì sín azɔ̌xɔsa enɛ ɔ. Un bló sun ayizɛ́n ɖò dotóoxwé vovo lɛ kpo fí e è nɔ fɔ́n agbazakan mɛtɔn lɛ ɖè é (centre de rééducation) kpo gudo é ɔ, un wá yì xwé. Un cɛ́ kplíbɔ́ bǐ mlɛ́mlɛ́, bo ɖó hudo alɔdó tɔn ɖò nǔ lɛ bǐ kɔn. Awakanmɛ kú mì tawun! Un mɔ ɖɔ un kún sɔ́ nyí nǔɖewanú nú mɛ ɖevo lɛ kpo Jehovah kpo ó. Ado nɔ lɛ́ hu mì, ɖó un sɔ́ sixu kpé nukún dó vǐ sunnu ce wu ǎ.

“Un jɛ Kúnnuɖetɔ́ ɖěɖee ɖò azɔn syɛnsyɛn jɛ wɛ nyiɖɔhun lɛ é sín tan xà jí, bɔ nǔ e wu ye kpé bo lɛ́ wà nú Jehovah é kpaca mì. Wǎgbɔ tɔn ɔ, un tɛ́n kpɔ́n bo sɔnǔ nú linlin ɖagbe gbɔn ayi sísɔ́ ɖó nǔ e un sixu wà é jí gblamɛ. Cobonu na bɛ́ azɔn ɔ, un ɖè hwenu ɖó vo nú nǔ gbigbɔ tɔn lɛ. Dìn ɔ, kéze ɔ bǐ nɔ nyi ce gbè bǐ gbè. Enɛ wu ɔ, bo ma na wá ba nukúnɖiɖó kpò ǎ ɔ, un sɔ́ ayi ɖó sɔ́ e un sɔ́ nyiɖée jó nú Jehovah é jí.

“Un kplɔ́n bo na nɔ zán ɔdinatɛ́ɛ ɖé. Tuto ɔdinatɛ́ɛ jí tɔn e sixu zɔn dó lee un dán ta ce gbɔn é wu dó wlán nǔ é wɛ un nɔ zán. É nɔ cikɔ, amɔ̌, nǔnywɛ xwitixwiti sín nǔ enɛ nɔ d’alɔ mì bɔ un nɔ kplɔ́n Biblu, bo nɔ lɛ́ ɖɔ nukúnɖiɖó ce sín xó nú mɛ ɖevo lɛ gbɔn wema winwlán sɛ́dó mɛ gbɔn alɔnu kpo Ɛntɛnɛti jí kpo gblamɛ. Bonu na ɖɔ xó xá mɛ e lɛlɛ̌ dó mì lɛ é ɔ, un ɖó atɛ ɖé bɔ wekwín lɛ ɖ’eji. Mɛ e ɖò akpá ce é nɔ sɔ́ alɔ ɖó wekwín lɛ ɖokpo ɖokpo jí. Nú é sɔ́ wekwín ɔ gbɔ ɔ, un nɔ ván nukún ce; nú é ka sɔ́ wekwín ɖagbe ɔ ɔ, un nɔ myɔ nukún ce. Mǐ nɔ vɔ́ bló bo na dó sɔnǔ nú xókwín lɛ kpo nukɛgbe lɛ kpo. Nɔví nyɔnu e nɔ zán hwenu ɖó kpɔ́ xá mì hugǎn lɛ é ɖé lɛ wá syɛn ɖ’emɛ bǐ, bo nɔ ko tuùn nǔ e un jló na ɖɔ é. Hweɖelɛnu ɔ, nú ye sɔ́ wekwín ɔ gbɔ ɔ, mǐ nɔ ko nǔ.

“Alɔɖiɖó ɖò agun ɔ sín azɔ̌ lɛ mɛ nɔ víví nú mì. Un nɔ yì Ɛntɛnɛti jí hwebǐnu bo na dó nɔ bló kplé lɛ, bɔ dìn ɔ, un nɔ bló gbɔn visioconférence jí. Un kpéwú bo nɔ wlán xósin ce lɛ, bɔ mɛɖé nɔ wá xà ye d’aga ɖò nǔkanbyɔ kpo xósin nina kpo sín akpáxwé lɛ hwenu. Un nɔ lɛ́ kplé xá gbɛ̌ta kúnnuɖegbé tɔn kpɛví ɖé gbɔn Ɛntɛnɛti jí bo na dó nɔ kpɔ́n Televiziɔn JW tɔn sín tuto e nɔ tɔ́n sunmɛ sunmɛ é. *

“Un bɛ́ syndrome d’enfermement dìn é ɔ, xwè 23 ɖíe. Hweɖelɛnu ɔ, wǔ nɔ kú mì. Amɔ̌, un kpéwú bo nɔ xò táan enɛ lɛ e nɔ wá wá lɛ é zlɛ́ gbɔn ɖɛxixo, kpɔ́ninɔ xá nɔví lɛ kpo alɔnu ce hinhɛn ján ɖò sinsɛnzɔ́ Jehovah tɔn mɛ kpo gblamɛ. Nǔgbo ɔ, kpo alɔdó mɛ e ɖò agun ɔ mɛ lɛ é tɔn kpo ɔ, un kpéwú bo nyí gbexosin-alijitɔ́ alɔgɔtɔ́ sín xwè ayizɛ́n jɛji ɖíe. Un tɛ́n kpɔ́n bo na nyí kpɔ́ndéwú ɖagbe ɖé nú vǐ sunnu ce Alessandro e ko wlí alɔ dìn, bo lɛ́ nyí mɛxo agun tɔn ɖé é. É kpo asì tɔn kpo lɔ nyí gbexosin-alijitɔ́ hwebǐnu tɔn.

“Hwɛhwɛ ɔ, un nɔ lin tamɛ dó nǔ ɖěɖee wu un na kpé bo wà ɖò palaɖisi e ɖò nukɔn ja é mɛ lɛ é jí. Nǔ nukɔn nukɔntɔn e un jló na wà é wɛ nyí ɖɔ má zán gbè e ɖò kɔ ce nu é dó ɖɔ xó dó Jehovah wu nú mɛ lɛ. Un ba na ɖisa gbɔn zunkan mɛ gbɔn tɔhwín ɖé tó, bá kpɔ́n fí ɖɛkpɛɖɛkpɛ lɛ. Gɔ́ na ɔ, ɖó kan mɛ wɛ un nɔ nu nǔ sinnɔ lɛ gbɔn sín xwè ko ɖíe wutu ɔ, akpakpa ɖò sísɔ́ mì wɛ nú má wá nɔte afɔ ce lɛ jí bo gbɛ̀ pɔ́mu ɖé ɖò atín ɖé jí lobo wɔ ɖu. È ka na lɛ́ ɖɔ ɔ, ɖó Italie-nu ɖé wɛ nú mì wutu ɔ, un ɖò nukún ɖó wɛ, bo na nɔ ɖa nǔɖuɖu Italie tɔn ɖěɖee un yí wǎn na hugǎn lɛ é bo na nɔ ɖu, kaka jɛ pizza jí!

“‘Hwlɛngán e ɖó nukún wɛ un ɖé é’ d’alɔ mì bɔ un nya xɛ ɖò ayi ce jí. (1 Tɛsalonikinu lɛ 5:8) Lanmɛ ce ɖó dogbó lɛ nú mì có, nyiɖée mimɔ sɛ́dó ɖò gbɛ̀ yɔyɔ̌ ɔ mɛ nɔ na mì awǎjijɛ, bɔ un kúdeji ɖɔ enɛ lɛ bǐ na vɔ zaanɖé. Nǔgbo ɔ, akpakpa ɖò sísɔ́ mì wɛ nú má ɖu “gbɛ̀ jɔ gbɛ̀” e sín akpá Jehovah dó ɖɔ emi na na mǐ gbɔn Axɔ́suɖuto tɔn gblamɛ é sín vivǐ.”—1 Timɔtée 6:19; Matie 6:9, 10.