Ee Zarina bló baptɛm bo huzu ɖokpo ɖò Kúnnuɖetɔ́ Jehovah tɔn lɛ mɛ gudo é ɔ, é gosin Russie bo yì tò tɔn mɛ ɖò Tɛntin Azíi tɔn kpo linlin ɔ kpo bo na kplɔ́n vǐ nyɔnu tɔn we lɛ dó nǔgbo ɔ mɛ. Ðó Zarina ma ɖó akwɛ sɔmɔ̌ ǎ wutu ɔ, é kpo mɛjitɔ́ tɔn lɛ kpo, gɔ́ nú nɔví tɔn sunnu ɔ kpo asì tɔn kpo nɔ nɔ xɔ fosúɖokponɔ mɛ. Mɛjitɔ́ tɔn lɛ gbɛ́ ɖɔ é kún na kplɔ́n nǔgbo Biblu tɔn lɛ vǐ lɛ ó. Ye lɛ́ ɖɔ nú vǐ nyɔnu lɛ ɖɔ ye ni ma ɖɔ xó dó Biblu jí xá nɔ yetɔn ó.

Zarina lin tamɛ dó lee é na d’alɔ vǐ nyɔnu tɔn lɛ, bɔ ye na kplɔ́n nǔ dó Jehovah wu gbɔn é jí tawun. (Nǔnywɛxó 1:8) Enɛ wu ɔ, é xoɖɛ vívɛ́ sɛ́dó Jehovah dó ba alixlɛ́mɛ kpo nǔnywɛ kpo. Enɛ gudo ɔ, Zarina wà nǔ sɔgbe xá ɖɛ e é xò é; é nɔ ɖisa xá vǐ nyɔnu tɔn lɛ, bo nɔ ɖɔ xó xá ye dó nǔjiwǔ e ɖò nǔɖiɖó lɛ mɛ lɛ é jí. Sà klewun klewun enɛ lɛ e ye ɖi lɛ é zɔ́n bɔ vǐ lɛ sɛkpɔ Gbɛɖotɔ́ ɔ d’eji.

Enɛ gudo ɔ, Zarina lin tamɛ dó lee é na lɛ́ kplɔ́n nǔ vǐ lɛ d’eji gbɔn é jí, bo nɔ zán wema Etɛ Biblu ka Kplɔ́n Mɛ Tawun? * É nɔ wlan akpáxwé e ɖò wema ɔ mɛ lɛ é kpo nǔkanbyɔ lɛ kpo ɖebɔdoɖewu dó wema ɖé jí. É nɔ lɛ́ gɔ́ nukɛgbe ɖé lɛ na, bo na dó d’alɔ vǐ nyɔnu tɔn lɛ nú ye na mɔ nǔ jɛ nǔ lɛ mɛ ganji. Enɛ gudo ɔ, é nɔ sɛ̀ wema ɔ kpo klɛnyɔ́ɔ ɖé kpo xwè dó macinu e nɔ nya nǔ é glɔ́ ɖò kpá ɔ mɛ. Nú vǐ lɛ yì kpá ɔ mɛ ɔ, ye nɔ xà akpáxwé lɛ, bo nɔ wlan xósin lɛ ɖ’ayǐ.

Wlɛnwín enɛ e Zarina zán é zɔ́n bɔ é kpéwú bo kplɔ́n wemata we ɖò wema Biblu Kplɔ́n Mɛ ɔ mɛ xá vǐ nyɔnu tɔn lɛ cobɔ ye mɛ atɔn lɛ wá yì jɛ fí ɖevo. É vo dìn bá kplɔ́n nǔ vǐ tɔn lɛ faa. Ðò octobre 2016 ɔ, vǐ nyɔnu we lɛ bló baptɛm b’ɛ víví nú ye tawun ɖɔ nɔ yetɔn zán nǔnywɛ kpo ayiɖote kpo dó kplɔ́n nǔgbo ɔ ye dó Mawu wu.