Mótafella #1: At lata miðlarnar stýra, hvussu tú sært út.

 Ein tannáringagenta, sum eitur Theresa, sigur: „Viðhvørt haldi eg, at okkurt mótarák er smart, tí eg havi sæð so nógvar lýsingar um tað. Tá ið mann alla tíðina sær fólk í nøkrum bestemtum klæðum, fær mann eisini sjálvur hug at ganga í sovorðnum klæðum.“

 Tað eru ikki bara gentur, sum verða ávirkaðar av lýsingum. Í bókini The Everything Guide to Raising Adolescent Boys stendur: „Dreingir verða eisini ávirkaðir av móta. Teir eru ikki serliga gamlir, áðrenn teir blíva ein málbólkur hjá lýsingarfyritøkum.“

 Nakað, sum er betri: Bíblian sigur: „Hin fávitskuti [ella naivi] trýr hvørjum orði, men hin klóki gevur sær far um, hvussu hann stígur.“ (Orðtøkini 14:15) Henda meginreglan kann hjálpa tær at seta spurnartekn við tað, sum tú sært í lýsingum. Tá ið tú til dømis sært lýsingar fyri klæðir, sum skulu eitast at vera „frek“ ella „seksut“, kanst tú spyrja teg sjálvan:

•  Hvør fær í veruleikanum nakað burturúr, viss eg fylgi hasum rákinum?

•  Hvørja mynd høvdu fólk fingið av mær, viss eg gekk í sovorðnum klæðum?

•  Er tað virkuliga soleiðis eg vil, at fólk skulu hugsa um meg?

 Mótaprei: Royn í eina viku at leggja merki til klædnalýsingar. Hvat leggja tær dent á? Liggur ein fjaldur boðskapur í lýsingunum, sum fær teg at føla, at tú bara mást fylgja einum ávísum ráki? Ein ung genta, sum eitur Karen, sigur: „Eitt stórt trýst verður lagt á ung um at síggja perfekt út, at ganga í teimum perfektu klæðunum og at vísa sín ’perfekta’ kropp fram. Lýsingarfólk vita, at tað er soleiðis ung fólk hava tað, og tað royna tey at útnytta.“

Mótafella #2: At fylgja einum ráki bara fyri at passa inn.

 Ein ungur drongur, sum eitur Manuel, sigur: „Viss nøkur bestemt klæðir eru modernað, fara øll at ganga í teimum. Viss mann ikki ger tað, halda onnur, at mann er løgin.“ Ein genta, sum eitur Anna, er samd. Hon sigur: „Tað handlar ikki so nógv um móta, men meira um at passa inn.“

 Nakað, sum er betri: Bíblian sigur: „Berið tykkum ikki at sum henda øld [ella hesin heimur].“ (Rómbrævið 12:2) Við hesi meginregluni í huga kanst tú kekka klædnaskápið hjá tær og spyrja teg sjálvan:

•  Hvat ger av, hvørji klæðir eg velji at ganga í?

•  Hvussu nógv betýðir tað fyri meg at eiga merkiklæðir?

•  Royni eg at imponera fólk við mínum klæðum?

 Mótaprei: Nógv síggja bara tveir møguleikar fyri sær: at vera smartur (og góðkendur) ella kiksaður (og uttanfyri). Men har er faktiskt ein triði møguleiki: at hava sjálvsálit. Tey, sum hvíla í sær sjálvum, eru ikki so bangin fyri ikki at passa inn.