• Sa laurai na dokadoka vei luvemu tagane ni se qai yabaki tini!

• E vinakata me vakademeni.

O na rairai veinanuyaka, ‘Na cava e va kina qo na nona ivukivuki? Au vinakata me marautaka nona bula, me kua ga ni nanuma ni vinaka cake vei ira eso tale!’

E rawa vakacava ni vakavulici e dua na gone me yalomalumalumu, me donu tiko ga nona rai me baleti koya?

Ena veiyabaki sa sivi, era dau vakamalumalumu na itubutubu ina ka era vinakata na luvedra, qai sivia tale nodra vakacaucautaki ira. Era sega ni dau vakadodonutaki luvedra se vakavulici ira. E nanumi nira na sega ni beci ira na gone ke ra vakademeni. Ia na cava e dau yaco? E kaya na ivola na Generation Me: “Na nodra vakademeni na gone e vakavuna mera nanumi ira ga, e sega ni vinaka kina na nodra itovo qai sega ni marautaki nodra bula.”

Nira vakacaucautaki vakasivia na gone, era na sega ni kila na ka mera cakava nira vakalewai se ni sotavi na leqa nira sa uabula. Ke ra vakavulici na gone mera kauaitaka ga na ka era vinakata, ena sega ni vinaka nodra ivakarau ni veimaliwai, era na yalolailai qai nuiqawaqawa.

Era na sega ni kila na gone ni tiko na kedra yaga ke ra vakamenemenei tu ga. Ia nira cakava vakataki ira eso na ka qai rawa vinaka nodra sasaga, era na kila ni tiko na kedra yaga. Ke ra digia e dua na taba ni cakacaka, mera uqeti sara mera vulica vinaka, vakayagataka na ka era vulica, qai saga mera kenadau kina. (Vosa Vakaibalebale 22:29) E bibi mera uqeti tale ga mera dau kauaitaki ira eso tale. (1 Korinica 10:24) Qori ena vinakati kina na yalomalumalumu.

Veivakacaucautaki ga ke veiganiti. Ke vinaka na kena maka ni veitarogi o luvemu yalewa, vakacaucautaki koya. Ke lailai na kena maka, kua ni beitaki qasenivuli. Qori ena sega ni vukei luvemu me yalomalumalumu. Saga mo vukei koya ena ka me vakavinakataka. Vakacaucautaki koya ga ke veiganiti.

Veivakadodonutaki ke gadrevi. Sega ni tukuni mo vakalewai luvemu ena cala kece e cakava. (Kolosa 3:21) Ia me vakadodonutaki ke vakayacora e dua na cala bibi. Vukei koya tale ga ke dau cala nona rai. Ke sega, ena rawa ni vakawakana e lomana na rai cala qori.

Kena ivakaraitaki, kaya mada e dau tukutukuni koya o luvemu. Ke o sega ni vukei koya, ena rawa ni dokadoka qai sega ni taleitaki koya e dua. Vakamacalataka gona vei luvemu ni sega ni vinaka nona dau tukutukuni koya, ena vakamadualaki ga kina. (Vosa Vakaibalebale 27:2) Vakamacalataka tale ga vua ni o koya e yalomalumalumu e sega ni dau tukutukuni koya. Ni o veivakadodonutaki vakayalololoma, o na vukei luvemu me yalomalumalumu, qai vinaka tiko ga na kena irogorogo.—iVakavuvuli vakaivolatabu: Maciu 23:12.

Me kua na veivakamenemenei. Ke soli vei gone na ka kece e vinakata, ena nanuma ni dodonu me caka tiko ga vua ya e veigauna. Kena ivakaraitaki, ke vinakata o luvemu e dua na ka o sega ni volia rawa, vakamacalataka vua na vuna o sega ni volia rawa kina. Ke daro nomudou gade vakavuvale, vakamacalataka vei luvemu ni na yaco tale ga eso na ituvaki ena vakararawataki koya. De dua ena vukei koya nomu vakamacalataka na ka o cakava ni yaco na ituvaki va ya. Kua ni saga mo taqomaki luvemu mai na leqa kece e sotava. Vakarautaki koya ga ena veika dredre ena sotava ni sa uabula. —iVakavuvuli vakaivolatabu: Vosa Vakaibalebale 29:21.

Veiuqeti ena soli ka. Vakadeitaka vei luvemu ni “marau vakalevu o koya e solia na ka, vakalailai o koya e taura na ka.” (Cakacaka 20:35) De dua o rawa ni cakava qori ni drau vakasamataki ira era vinakata na veivuke ena volivoli, veitosoyaki, se na kena vakavinakataki eso na ka ena nodra itikotiko. O rawa ni kauti luvemu tale ga me lai veivuke. Me raica o luvemu ni o lomavakacegu qai marautaka nomu vukei ira eso tale. Na nomu ivakaraitaki e sala vinaka duadua mo vakavulici luvemu kina me yalomalumalumu.—iVakavuvuli vakaivolatabu: Luke 6:38.