NA KUKU e dua na mataqali kai ni waitui, dau kabi ena vatu, kau, se dago ni waqa me vaka na dio. Na ka ga rau duidui kina, na dio e kabi sara ga ena vatu kei na so tale na ka. Na kuku e sega, na kena ua ga (wa lalai e via vaka na waniculacula) e kabita na vatu, kau, se dago ni waqa. Qori e vakarawarawataka nona kana kei na veitosoyaki. De dua ena nanumi ni rawarawa me kuitaki na kuku ni malumalumu na kena ua. Ia e kurabuitaki nira kukube matua toka na wa lalai qori se mani vakacava na kaukaua ni ua. E rawa vakacava ya?

Dikeva mada: Na ua ni kuku e kaukaua e dua na muana, e malumu qai wadrega na muana kadua. Era raica na dauvakadidike ni 80 na pasede ni ua ni kuku e kaukaua, e 20 na pasede e malumu. Na kena kaukaua va qori e dua na muana qai malumu e dua tale na muana, e veivuke vakalevu ena nodra kukube matua na ua ni kuku ena vanua era kabita. Se mani kaukaua gona vakacava na ua, ena toka dei ga na kuku.

Dua na ka nona qoroya o parofesa Guy Genin na macala ni vakadidike qori qai kaya: “E vakasakiti dina na nodra cakacaka vata na ua ni kuku, nodrau cakacaka vata na muana malumu kei na muana kaukaua.” Era vakabauta na saenitisi ni rawa ni vakatotomuri na ibulibuli ni ua ni kuku ena kena buli eso na iyaya kabikabi ni vale, waqanunu, sema ni ua ni yago kei na sui, kei na bonoti ni tikiniyago e sele. E kaya o J. Herbert Waite, dua na parofesa ena University of California mai Santa Barbara, Merika: “Ke da via kila na iwalewale mera vakabiri vata kina eso na ka, e rawa ni soli vakasama vei keda na kena iwalewale vakatubuqoroqoro era cakava na veika bula era tu wavoliti keda.”

Na cava o nanuma? E buli se vu mai na bula vakaidewadewa na ua ni kuku?